Apocalipsis 13:1-18
13 Ye* omoketski itempa mar kanin onka xali.
Ijkuakon onikitak ijtik mar okiski se yolkatl temomojti. Okinpiaya majtlaktli ikuakonuan uan chikome itsontekonuan. Itech ikuakonuan okinpiaya chikome coronas uan ipan itsontekonuan okinpiaya tokayomej tlen kiuijuikaltiaj toTajtsin Dios.
2 Yolkatl temomojti tlen onikitak omotaya ken se leopardo. Pero ikxiuan omotayaj ken ikxiuan oso uan ikamak omotaya ken ikamak león. Dragón okimakak ichikaualis yolkatl, okimakak itrono uan nochi tlen kinauatia.
3 Onikitak se itsonteko yolkatl omotaya okikojkojkej uan yimikiskia pero opajtik kanin okikojkojkej. Nochtin tlen chantij tlaltikpak okitokakej yolkatl temomojti uan omotlajtlachialtijkej.
4 Okiueyichijkej dragón porque okikauili matlanauati yolkatl temomojti. Noijki okiueyichijkej yolkatl temomojti uan okijtojkej: “¿Kox onka okse ken yolkatl temomojti? ¿Akin uelis iuan kimomakas?”.
5 Yolkatl temomojti okiseli chikaualistli para mamoueyineki uan makiuijuikalti toTajtsin Dios. Noijki okikauilijkej matlanauati 42 metstli.
6 Satepan opejki kiuijuikaltia toTajtsin Dios, opejki kiuijuikaltia itoka, opejki kiuijuikaltia kanin kajki uan noijki opejki kinuijuikaltia akinmej katej iluikak.
7 Okikauilijkej makimomaka inuan akinmej yolchipauakej uan makintlanili. Noijki okikauilijkej makinnauati tlatlamantli familias, tlatlamantli altepemej, akinmej tlatlamantli intlajtol uan akinmej oksekan chantij.
8 Kiueyichiuaskej nochtin akinmej chantij ipan tlaltikpak. Desde ijkuak ayamo ikaj okatka, yejuan intoka amo ijkuilitok itech rollo tlen kijtoua akinmej yoltoskej. Non rollo iaxka Ichkatsin tlen okimiktijkej.
9 Matlakaki akin kinpia inakasuan.
10 Kitsakuaskej akin moneki kitsakuaskej. Kimiktiskej ika espada akin temiktia ika espada. Ikinon akinmej yolchipauakej moneki tlaxikoskej uan tlaneltokaskej.
11 Ijkuakon onikitak okse yolkatl temomojti opankiski ijtik tlali. Okinpiaya ome ikuakonuan ijkon ken ikuakonuan se Ichkatsin pero opejki tlajtoua ijkon ken se dragón.
12 Non yolkatl okiteititi ixpan okse yolkatl temomojti ye noijki tlanauatia ken ye. Kichiua akinmej chantij ipan tlaltikpak makiueyichiuakan achto yolkatl temomojti tlen opajtik kanin okikojkojkej maski yimikiskia.
13 Kinchiua uejueyij milagros, hasta kichiua makisa tlitl iluikak uan maualtemo ipan tlaltikpak inmixpan nochtin.
14 Kinkajkayaua akinmej chantij ipan tlaltikpak ika milagros tlen okikauilijkej makinchiua ixpan yolkatl temomojti. Noijki kinmiluia akinmej chantij ipan tlaltikpak makichiuilikan se imagen yolkatl temomojti tlen okikojkojkaj ika espada pero omoyolkuik.
15 Okikauilijkej makiyoliti imagen tlen okichiuilijkej yolkatl temomojti. Ijkon imagen tlen okichiuilijkej yolkatl temomojti, otlajto uan otlanauati makinmiktikan nochtin akinmej amo kinekij kiueyichiuaskej imagen tlen okichiuilijkej yolkatl temomojti.
16 Nochtin akinmej ueyititokej, akinmej amo ueyititokej, akinmej kipiaj tomin, akinmej amo kipiaj tomin, tlakeualmej uan akinmej amo tlakeualmej, kinnauatia makimotlalilikan marca inyekma noso inmixkuak.
17 Ijkon san akin kipias marca uelis tlakouas noso tlanemakas. Non marca ye itoka yolkatl temomojti noso número tlen kipia itoka.
18 Xikkauilikan akin ixtlamatki makita inúmero yolkatl temomojti porque non número inmiaxka tlakamej. Non número 666 uan san uelis kajsikamatis akin ixtlamatki.
Notas
^ Kijtosneki ye dragón.
