Colosenses 1:1-29
1 Ne niPablo, niiapóstol Cristo Jesús porque toTajtsin Dios ijkon okinek. Ne uan tokni Timoteo timechtitlaniliaj nin carta
2 namejuan tokniuan yolchipauakej tlen nankatej Colosas. Namejuan nanidiscípulos Cristo Jesús uan amo keman nankikauaj:
ToTajtsin Dios manamechtliokoli tlen kuali uan manamechmaka yolseuilistli.
3 Ijkuak namopatka timotlatlaujtiaj, nochipa tiktlasojkamatiliaj toTajtsin Dios tlen iTajtsin toTeko Jesucristo,
4 porque yotikmatkej nankineltokaj Cristo Jesús uan nankintlasojtlaj nochtin tokniuan yolchipauakej.
5 Namejuan ijkon nankichiuaj porque nankichixtokej manamechmakakan namotetliokolil ompa iluikak. Onanmomachtijkej tlen kijtosneki non tetliokolil ijkuak onankikakej kuali tlajtoli tlen melauak.
6 Non kuali tlajtoli tlen onankimatkej momiaktilijtok uan motematiltijtok ipan nochi tlaltikpak. Noijki ijkon panotok namouan desde ijkuak onankikakej uan kuali onankajsikamatkej toTajtsin Dios melauak kitetliokolia tlen kuali.
7 Non tlen onamechmachti Epafras. Ye tiktlasojtlaj uan nochipa topatka kitekichiuilia Cristo ken se tlakeuali.
8 Noijki otechilui espíritu santo namechpaleuia xitetlasojtlakan.
9 Tejuan nochipa namopatka timotlatlaujtiaj desde ijkuak ijkon otikmatkej, uan tikiluiaj toTajtsin Dios manamechpaleui kuali xikajsikamatikan tlen ye kineki. Noijki manamechmaka ixtlamatilistli uan espíritu santo manamechpaleui nochi xikajsikamatikan.
10 Ijkon nanyeknemiskej ken Jehová kineki, nochipa nankiyolpaktiskej, nankichiuaskej tlen kuali uan okachi kuali nankixmatiaskej toTajtsin Dios.
11 Noijki tikiluiaj manamechyolchikaua ika ichikaualis ueyititok. Manamechmaka chikaualistli tlen moneki para ximochiakan uan nochi xikxikokan ika pakilistli.
12 Xiktlasojkamatilikan toTajtsin Dios porque ye yonamechpaleui para nankiseliskej tlen kinmakaskej akinmej yolchipauakej tlen katej kanin onka tlauili.
13 Ye otechkixti kanin tlayoua uan otechuikak kanin tlanauatia iKone tlen kitlasojtla.
14 Ika iKone otechtlaxtla* uan otechmakixti uan ijkon techtlapojpoluilia totlajtlakol.
15 Ye okimokixti toTajtsin Dios tlen amikaj ueli kita uan ye achto okichijchijkej ijkuak ayamo itlaj okatka.
16 Ye okipaleui toTajtsin Dios ijkuak okichijchi nochi tlen onka iluikak uan ipan tlaltikpak, nochi tlen mota uan tlen amo mota. Noijki tronos, tlayekankej, tekiuajkej uan akinmej tlanauatiaj. Nochi okseki tlamantli otlapaleui makichijchiuakan uan ye iaxka.
17 Ye yokatka ijkuak ayamo itlaj okichijchiuayaj uan ye otlapaleui makichijchiuakan okseki tlamantli.
18 Ye itsonteko cuerpo uan cuerpo kijtosneki tlanechikol. Ika ye opejki nochi uan ye achto okiyolitijkej, ikinon tlayekapankistok itech nochi tlamantli.
19 Porque toTajtsin Dios okinek nochi iyelis makipia Cristo.
20 Ieso Cristo tlen okinoki* itech kouitl,* otlapaleui toTajtsin Dios mamouika iuan nochi tlen onka iluikak uan tlaltikpak.
21 Achto amo onanmouikayaj iuan toTajtsin Dios uan onankikokoliayaj porque san onanmokuayejyekouayaj* nankichiuaskej tlen amo kuali.
22 Pero axkan namechkauilia iuan ximouikakan porque iKone okitemakak icuerpo ijkuak okimiktijkej. Ijkon ixpan nanyetoskej nanyolchipauakej, amo nankipiaskej itlaj tlen amo kuali uan ixpan amitlaj namechtlajtlakoltiskej.
23 Pero namejuan moneki nochipa xitlaneltokakan, ximoyektlakxilijtokan uan ximoyekketokan. Amo xikkauakan tlateochiuali tlen nankichiaj porque onankikakej kuali tlajtoli tlen yomotetlapoui ipan nochi tlaltikpak. Ne Pablo noijki oniktematilti kuali tlajtoli.
24 Axkan nipaki nitlajyouia namopatka. Nikmachilia ok moneki nitlajyouijtos porque nipoui itech icuerpo Cristo. Tlen nikijyouia kipaleuis icuerpo Cristo uan non cuerpo kijtosneki tlanechikol.
25 ToTajtsin Dios onechtlali manikpaleui tlanechikol uan non namechpaleuia namejuan, ikinon nimochijchikaua nitetlapouia iTlajtol toTajtsin Dios.
26 Nin tlamantli santo tlen amo omomatiaya, yiuejkika otlatitoka uan amo okimatkej akinmej yiuejkika oyoltokaj. Pero akinmej yolchipauakej axkan yokimatkej.
27 ToTajtsin Dios paki porque okinmatilti akinmej amo judíos nin kualtsin tlateochiuali santo tlen amo omomatiaya. Non tlamantli santo tlen amo omomatiaya kijtosneki ye Cristo tlen namouan kajki uan nankichiaj iuan manamechueyitlalikan.
28 Tejuan tiktematiltiaj akin ye, nochtin tikinnejmachtiaj uan tikinmachtiaj ika ixtlamatilistli. Ijkon yetoskej idiscípulos Cristo uan yetoskej ajsitokej ijkuak tikinmaktiliskej toTajtsin Dios.
29 Ikinon chikauak nitekipanoua uan toTajtsin Dios ika ichikaualis nechpaleuia manimochijchikaua.
Notas
^ Xikita diccionario kanin kijtoua okitlaxtla.
^ Noso “okimimilo”, “okixauani”, “okitoya”.
^ Xikita diccionario.
^ Noso “onanmonejneuiliayaj”.
