Efesios 1:1-23
1 Ne niPablo, niiapóstol Cristo Jesús porque toTajtsin Dios ijkon okinek. Ne namechtlajkuililia namejuan tokniuan yolchipauakej tlen nankatej Éfeso. Namejuan nanidiscípulos Cristo Jesús uan amo keman nankikauaj.
2 ToTajtsin Dios uan toTeko Jesucristo manamechtliokolikan tlen kuali uan manamechmakakan yolseuilistli.
3 Makiueyichiuakan iDios uan iTajtsin toTeko Jesucristo. ToTajtsin Dios tlatlamantli techteochiua ika iespíritu santo ompa iluikak porque tikatej iuan Cristo.
4 Ye otechpejpenki ijkuak ayamo ikaj okatka para tiyetoskej iuan Cristo, para matikteititikan titetlasojtlaj, matiyetokan tiyolchipauakej uan ixpan ayakmo matiyetokan titlajtlakolejkej.
5 ToTajtsin Dios yiuejkika otechpejpenki uan Jesucristo otechpaleui para matechseli ken tiikoneuan. Ijkon ken ye kipaktia uan ijkon ken ye kineki,
6 para matikueyichiuakan toTajtsin Dios porque otechtliokoli tlen kuali ika iKone tlen kitlasojtla.
7 ToTajtsin Dios otechtlaxtla* uan otechmakixti ika ieso iKone. Noijki techtlapojpoluilia totlajtlakol porque sapanoua kitetliokolia tlen kuali.*
8 Ye sapanoua otechtliokoli tlen kuali porque otechpaleui matiyetokan tiixtlamatkej uan kuali matimokuayejyekokan.*
9 Noijki otechmatilti tlen kichiuas maski itlaj santo tlen amo omomatiaya. Ye kipaktia uan kineki
10 kiyekanas nochi tlamantli ijkuak ajsis tonal tlen omoijto. Ijkon san sekan kitlalis nochi tlamantli itech iluikak uan ipan tlaltikpak para makinauati Cristo. Nochi san sekan kitlalis para makinauati Cristo.
11 Tejuan tikatej iuan Cristo uan toTajtsin Dios yotechtlali matikselikan tlen yokijto techmakas. Ye yiuejkika otechpejpenki ken ye kineki. Noijki ye nochi kichiua ijkon ken ye kineki.
12 Tejuan achto otikneltokakej Cristo uan otitlapaleuijkej para makiueyichiuakan toTajtsin Dios.
13 Pero namejuan noijki onankineltokakej Cristo ijkuak onankikakej melauak kuali tlajtoli tlen namechmakixtis. Ijkuak onantlaneltokakej, ye onamechpaleui manamechtlalilikan sello ika espíritu santo tlen toTajtsin Dios okijto namechmakas.
14 Non kiteititia tlen satepan tikseliskej. ToTajtsin Dios ijkon okichi para kitlaxtlauas ialtepe uan kimakixtis, uan ijkon sapanoua makiueyichiuakan.
15 Ikinon desde ijkuak onikmatki nankineltokaj toTeko Jesús uan nankiteititiaj nankintlasojtlaj nochtin tokniuan yolchipauakej, ne noijki
16 nochipa namopatka nimotlasojkamati. Ne namopatka niktlatlaujtia
17 toTajtsin tlen ueyititok, iDios toTeko Jesucristo, manamechpaleui xiyetokan namixtlamatkej uan xikajsikamatikan tlen namechmatiltia para kuali nankixmatiskej.
18 Ye kitlauilia namotlayejyekol* para xikmatikan tlen kineki xikchiakan, para xikmatikan tlen kualtsin tlateochiuali kinmakas akinmej yolchipauakej,
19 para xikmatikan tetlajtlachialti ichikaualis tlen technextilia tejuan akinmej titlaneltokaj. Non mota itech nochi tlen kichiua ika ichikaualis.
20 Ika ichikaualis okiyoliti Cristo uan okitlali iyekma ompa iluikak.
21 Okachi okiueyitlali amo ken tekiuajkej, akinmej tlanauatiaj, akinmej chijchikauakej uan tlayekankej. Noijki okachi okiueyitlali amo ken akinmej axkan ueyititokej uan akinmej satepan ueyititoskej.
22 ToTajtsin Dios nochi tlamantli okitlali ikxitlampa Cristo para makinauati uan noijki okitlali makinyekana nochi tlanechikolmej.
23 Yejuan katej ken icuerpo Cristo uan ye kinmaka nochi tlen kinpoloua.
Notas
^ Xikita diccionario kanin kijtoua okitlaxtla.
^ Xikita diccionario kanin kijtoua techtliokoliaj tlen kuali.
^ Noso “matimonejneuilikan”.
^ Noso “namotlanemilil”.
