Efesios 2:1-22
2 ToTajtsin Dios okichi xiyoltokan maski onanmiktokaj porque onantlajtlakolchiuayaj.
2 Namejuan onankichiuayaj ken axkan kichiuaj akinmej chantij tlaltikpak. Onankitlakamatiayaj* akin tlanauatia ipan ejekatl. Non ejekatl kijtosneki espíritu tlen kinnauatia akinmej amo tetlakamatij.*
3 Tinochtin achto otikchiuayaj tlen kineki tocuerpo ijkon ken yejuan kichiuaj. Otikchiuayaj tlen kineki tocuerpo uan tlen tejuan otimokuayejyekouayaj.* Desde otineskej* technamiki topan mayeto ikualanilis toTajtsin Dios ijkon ken oksekimej.
4 Pero toTajtsin Dios sapanoua techiknomati uan sapanoua techtlasojtla, ikinon
5 okichi matiyoltokan iuan Cristo maski otimiktokaj porque otitlajtlakolchiuayaj. (Namejuan onamechmakixtijkej porque namechtliokoliaj tlen kuali).
6 ToTajtsin Dios otechmakak toyolilis uan techkauilia matimotlalikan inakastlan Cristo Jesús ompa iluikak porque iuan tikatej.
7 Ijkon okichi para satepan kiteititis sapanoua kitetliokolia tlen kuali, porque techmaka tlen kuali tejuan akinmej tikatej iuan Cristo Jesús.
8 ToTajtsin Dios kitetliokolia tlen kuali ikinon onamechmakixti porque nantlaneltokaj. Pero ye onamechtliokoli uan amo san namoselti onankimotlanilijkej.
9 Tlen onankichijkej amo onamechpaleui ximomakixtikan para amikaj mamoueyineki.
10 ToTajtsin Dios otechchijchi. Ye otechchijchi para matikchiuakan tlen kuali porque tejuan tiidiscípulos Cristo Jesús. ToTajtsin Dios yokijtojka tlen tikchiuaskiaj.
11 Xikilnamikikan namejuan amo nanjudíos. Akinmej kimochiuiliaj circuncisión onamechixmatiayaj ken akinmej amo kimochiuiliaj circuncisión. Non circuncisión kichiuaj tlakamej.
12 Achto amo onankixmatiayaj Cristo uan amo onanpouiayaj itech altepetl Israel. Amo onanpouiayaj itech acuerdos* tlen omoijtojkej. Itech nin tlaltikpak amitlaj onankichiayaj uan amo onankixmatiayaj toTajtsin Dios.
13 Achto amo onankatkaj iuan toTajtsin Dios pero axkan nanidiscípulos Cristo Jesús. Ieso Cristo onamechpaleui xiyetokan iuan toTajtsin Dios.
14 Cristo otechmakako yolseuilistli. Ye okichi san sekan mayetokan ome grupos uan okixixini tepamitl tlen okintlajkoxelouaya.
15 Ika icuerpo okinpojpolo tlanauatilmej tlen okatkaj itech iTlanauatil Moisés. Ijkon okichi ome grupos kuali mamouikakan. Satepan okichi san se grupo, nonmej ome grupos yejuan idiscípulos Cristo uan okinpaleui kuali mamouikakan.
16 Ijkuak okimiktijkej itech kouitl,* okinpaleui ome grupos kuali mamouikakan iuan toTajtsin Dios. Ika icuerpo okinpaleui ome grupos kuali mamouikakan.
17 Ye ouala onamechmatiltiko kuali tlajtoli tlen kitemaka yolseuilistli namejuan akinmej amo onankixmatiayaj toTajtsin Dios uan noijki akinmej yokixmatiayaj.
18 Ye otechpaleui tinochtin ome grupos matiktlatlaujtikan toTajtsin Dios porque tinochtin tikseliaj san se espíritu santo.
19 Axkan namejuan san se namoaltepe. Nanpouij inuan tokniuan yolchipauakej uan noijki nanpouij itech ifamilia toTajtsin Dios.
20 Namejuan onamechchijkej ken se kali tlen motlakxilijtok ipan apóstoles uan profetas. Cristo Jesús ye tetl tlen okachi tlakitskijtok* kanin motlakxilijtok kali.
21 Non kali kuali kisalojtiuij ijkuak kichiuaj. Moskaltijtias hasta mochiuas itemplo Jehová porque kajki iuan Cristo.
22 Namejuan nankatej iuan Cristo, ikinon toTajtsin Dios okichi xiyetokan ken se kali inuan oksekimej kanin ye kajki porque iespíritu ompa kajki.
Notas
^ Noso “onankiuelkakiayaj”.
^ Noso “tlauelkakij”.
^ Noso “otimonejneuiliayaj”.
^ Noso “otitlakatkej”.
^ Noso “pactos”. Xikita diccionario.
^ Xikita diccionario.
^ Noso “tlachikajtok”.
