Hebreos 13:1-25
13 Nochipa ximotlasojtlakan ken namiknimej.
2 Amo xikilkauakan kuali xikinselikan oksekimej. Porque sekimej kuali okinseliayaj oksekimej ikinon okinkalotijkej ángeles maski amo okimatkej.
3 Xikinmilnamikikan akinmej tsaktokej ken yetoskia inuan nantsaktokej. Noijki xikinmilnamikikan akinmej kintlajyouiltiaj ken yetoskia inuan nantlajyouiaj.
4 Nochtin makintlakaitakan akinmej yomonamiktijkej. Noijki akinmej yomonamiktijkej makipiakan chipauak innemilis. Porque toTajtsin Dios kinmixkomakas akinmej auilnemij* uan akinmej kikajkayauaj innamik noso insiua.
5 Amo xikixnekikan tomin uan xipakikan san ika tlen nankipiaj. Porque toTajtsin Dios yokijto: “Amo keman nimitskauas uan nochipa nimitspaleuis”.
6 Ikinon amo matimomojtikan uan matikijtokan: “Amo nimomojtis porque Jehová nechpaleuia. ¿Tlen uelis nechtoktiskej oksekimej?”.
7 Xikinmilnamikikan akinmej namechyekanaj porque yejuan onamechtlapouijkej iTlajtol toTajtsin Dios. Xikitakan tlen kuali kichiuaj uan xitlaneltokakan ijkon ken yejuan.
8 Jesucristo amo okipatlak iyelis achto, amo kipatlas axkan nion amo kipatlas satepan.
9 Amo xiktekauilikan manamechxelo tlen okse tlamantli tlamachtiaj uan tlen amo keman onankikakiayaj. Tetliokolil tlen kuali namechpaleuis ximoyekketokan pero tlakuali amo namechpaleuis ximoyekketokan. Porque akinmej kintekipachoua tlakuali amo kinpaleuia.
10 Tikpiaj se altar kanin amo uelis tlakuaskej akinmej tekipanouaj itech tabernáculo.
11 Teopixki tlen otlayekanaya okitemakaya inmieso yolkamej itech Santísimo ken se tetliokolil para makintlapojpoluilikan intlajtlakol, pero innakayo yolkamej okitlatiayaj uejka kanin amikaj ochantiaya.
12 Ikinon Jesús noijki otlajyoui tlatentli itech altepetl uan ijkon ika ieso okinchipa akinmej pouij itech altepetl.
13 Matiakan inauak ik uejka kanin amikaj chanti uan matitlaxikokan ijkuak techpinauiaj ijkon ken ye otlaxiko.
14 Porque nikan amo tikpiaj se altepetl tlen nochipa yetos, ikinon tikchiaj ika nochi toyolo altepetl tlen satepan yetos.
15 Jesús techpaleuia nochipa matikueyichiuakan toTajtsin Dios uan yetoskia ken tikmakaj se tetliokolil toTajtsin Dios. Tejuan tiktematiltiaj itoka ika tokamak.
16 Noijki amo xikilkauakan nankichiuaskej tlen kuali uan nankinmakaskej oksekimej tlen nankipiaj. Porque non yetoskia ken se tetliokolil tlen sapanoua kipaktia toTajtsin Dios.
17 Xikintlakamatikan* tlayekankej uan xikinkauilikan manamechyekanakan porque yejuan namechmaluiaj uan toTajtsin Dios kinmixkomakas. Tla ijkon nankichiuaskej, yejuan pakiskej kichiuaskej inteki uan amo moyolkokoskej. Noijki namejuan amo nantlajyouiskej.
18 Nochipa topatka ximotlatlaujtikan porque tejuan kuali tikmatij tikpiaj chipauak totlalnamikilis. Tejuan amo keman tiknekij titlakajkayauaskej.
19 Pero ne namechiluia nopatka ximotlatlaujtikan para san niman namechitati.
20 ToTajtsin Dios tlen teyolseuia oksepa okiyoliti toTeko Jesús. Estli tlen ika omochi acuerdo* uan nochipa uejkaua kajki iuan Jesús. Ye ueyi tlajpixki tlen kinmaluia ichkamej. Axkan toTajtsin Dios tlen teyolseuia,
21 manamechmaka nochi tlen moneki para xikchiuakan tlen kineki. Noijki ika Jesucristo techyolinia matikchiuakan nochi tlen kipaktia. ToTajtsin Dios nochipa makiueyichiuakan. Amén.
22 Nokniuan, namechtlatlaujtia xikselikan nin tlajtoli tlen namechyolchikaua porque itech nin carta amo miak onamechtlajkuilili.
23 Nikneki xikmatikan yokiski tokni Timoteo. Tla san niman uits san sekan tiaskej timechitatiuij.
24 Techintlajpalilikan akinmej namechyekanaj uan nochtin tokniuan yolchipauakej. Namechontlajpalouaj tokniuan tlen katej Italia.
25 ToTajtsin Dios nochipa nannochtin manamechtliokoli tlen kuali.
Notas
^ Xikita diccionario kanin kijtoua auilnemi.
^ Noso “xikinuelkakikan”.
^ Noso “pacto”. Xikita diccionario.
