Hechos 19:1-41
19 Ijkuak Apolos okatka Corinto, Pablo opanotia itech tepeyo uan oyajki* Éfeso. Ompa okinmajsito sekimej discípulos
2 uan okintlajtlani: “¿Onankiselijkej espíritu santo ijkuak opejki nantlaneltokaj?”. Yejuan okinankilijkej: “Amo keman tikkakij kox onka espíritu santo”.
3 Ye okinmilui: “Tla ijkon, ¿ken onanmoapolaktijkej?”. Yejuan okinankilijkej: “Otimoapolaktijkej ijkon ken Juan otlamachti”.
4 Pablo okinmilui: “Juan okinapolaktiaya oksekimej uan ijkon okiteititiayaj omoyolkopayaj. Noijki okinmiluiaya oksekimej makineltokakan tlakatl tlen satepan ualaskia. Non tlakatl ye Jesús”.
5 Ijkuak ijkon okikakej, omoapolaktijkej ika itoka toTeko Jesús.
6 Ijkuak Pablo inpan okintlali imauan yejuan okiselijkej espíritu santo. Noijki opejki tlajtouaj tlatlamantli tlajtoli uan opejki kitematiltiaj tlen toTajtsin Dios okinmiluiaya.
7 Okatkaj kanaj 12 tlakamej.
8 Pablo okatka yolchikauak uan eyi metstli otlamachti itech sinagoga.* Ye okinpaleuiaya oksekimej makineltokakan iTekiuajkayo toTajtsin Dios.
9 Pero sekimej oyoltlakuauakej, amo otlaneltokakej uan teixpan okinteneuayaj* akinmej opouiayaj itech Ojtli tlen melauak. Ikinon Pablo okinkajte uan okinuikak discípulos. Mojmostla otlamachtiaya itech se auditorio tlen okatka iaxka Tirano.
10 Ome xiuitl ijkon otlamachti ikinon judíos uan griegos tlen ochantiayaj Asia okikakej itlajtol toTeko.
11 ToTajtsin Dios okipaleuiaya Pablo makinchiua milagros tetlajtlachialtijkej.
12 Itsotsoluan* Pablo uan itlakenuan okinuikiliayaj kokoxkej uan ijkon yejuan opajtiayaj. Noijki okisayaj ejekamej* tlen okinpiayaj.
13 Ijkuakon sekimej judíos okinkixtijtinemiayaj ejekamej.* Yejuan noijki okinekiayaj kinejnekiskej* itoka toTeko Jesús ijkuak okinkixtiayaj ejekamej.* Okijtouayaj: “Namechnauatia xikisakan ika itoka Jesús tlen Pablo kitematiltia akin ye”.
14 Ijkon okichiuayaj chikome ikoneuan se teopixki judío tlen otlayekanaya uan omotokayotiaya Esceva.
15 Pero se ejekatl* okinmilui: “Ne nikixmati Jesús uan nikmati akin Pablo. Pero ¿akinmej namejuan?”.
16 Ijkuakon tlakatl tlen okipiaya ejekatl* inpan oyajki uan nochtin okintlanilijtiaj. Okinkojko uan okiskej xipetsikej itech non kali.
17 Nochtin judíos uan griegos tlen ochantiayaj Éfeso okimatkej tlen opanok, ikinon nochtin omomojtijkej uan okachi okitlakaitakej itoka toTeko Jesús.
18 Miakej tlen opejki tlaneltokaj, omoyolkuitiayaj uan teixpan okijtouayaj tlen amo kuali okichiuayaj.
19 Noijki miakej tlen achto otetlajchiuiayaj okimololojkej inlibros uan teixpan okintlatijkej. Okiyejyekolijkej kanaj kech inpati uan okitakej inpati 50,000* tomin de plata.
20 ITlajtol Jehová okachi omotematiltiaya uan amitlaj okitsakuiliaya.
21 Ijkuak yopanok nochi nin, Pablo okijto panoskia ik Macedonia uan Acaya ijkuak yaskia Jerusalén. Noijki okijto: “Ijkuak yonipanok Jerusalén nias Roma”.
22 Pablo okintitlanki Macedonia ome tlakamej tlen okipaleuiayaj: se omotokayotiaya Timoteo uan okse Erasto. Pero ye omoka seki tonal ompa Asia.
23 Ijkuakon miakej opejki mokualaniaj porque sekimej opouiayaj itech Ojtli tlen melauak.
24 Se tlakatl itoka Demetrio okinchiuaya tsikitsitsintin templos ika plata tlen omotayaj ken itemplo diosa Ártemis. Ijkon okitlaniayaj miak tomin akinmej iuan otekipanouayaj.
25 Ye okinnechiko akinmej okipaleuiayaj uan noijki akinmej okichiuayaj okseki tlamantli ijkon ken ye. Okinmilui: “Namejuan kuali nankimatij ika nin tekitl tiktlanij miak tomin.
26 Axkan nankitaj uan nankikakij Pablo kijtojtinemi dioses tlen kinchiuaj amo melauak dioses. Miakej tlen chantij Asia yokineltokilijkej uan amo san akinmej chantij Éfeso.
27 Amo kuali tlen kichijtinemi porque uelis tikpoloskej toteki uan ayakmo kitlakaitaskej itemplo ueyi diosa Ártemis. Noijki ayakmo kiueyichiuaskej nin diosa maski axkan kiueyichiuaj nochtin tlen chantij Asia uan ipan nochi tlaltikpak”.
28 Nonmej tlakamej okualankej ijkuak ijkon okijto uan chikauak okijtojkej: “¡Maueyitito diosa Ártemis tlen kajki nikan Éfeso!”.
29 Omokuejsojkej nochtin tlen ochantiayaj itech non altepetl. San sekan okalaktikiskej itech teatro uan okintilantiajkej Gayo uan Aristarco. Yejuan ome oualayaj Macedonia uan oyayaj kanin Pablo oyaya.
30 Pablo okinekiaya kalakis kanin nochtin okatkaj pero discípulos amo okikauilijkej.
31 Noijki sekimej tekiuajkej* tlen omouikayaj iuan Pablo, otlanauatijkej makiluitij amo mauia teatro.
32 Nochtin tlen omonechikojkej amo okimatiayaj tlen kichiuaskej, ikinon sekimej chikauak okijtouayaj seki tlamantli uan oksekimej okseki tlamantli. Miakej nion amo okimatiayaj tleka ompa okatkaj.
33 Sekimej judíos okitilanatoj Alejandro uan okitopejkej tlayekapan. Alejandro ika ima okichi señas porque okinekiaya itlaj kinmiluis.
34 Pero ijkuak okitakej ye okatka judío, ome hora san sekan chikauak okijtojkej: “¡Maueyitito diosa Ártemis tlen kajki nikan Éfeso!”.
35 Tekiua tlen otlayekanaya itech non altepetl okintlakaualti uan okijto: “Tlakamej tlen nanchantij Éfeso, ¿amo nochtin kimatij tejuan tikmaluiaj itemplo ueyi Ártemis? ¿Amo noijki tikmaluiaj imagen de Ártemis tlen ouetsiko iluikak?
36 Amikaj uelis kijtos nin amo melauak, ikinon ayakmo xikualanikan uan kuali xikitakan tlen nankichiuaskej.
37 Ninmej tlakamej tlen onankinualikakej amo tlachtektinemij itech templos nion amo kiuijuikaltiaj todiosa.
38 Tla Demetrio uan akinmej kipaleuiaj kinekij ikaj kiteluiskej, makichiuakan ijkuak monechikouaj jueces. Noijki katej tekiuajkej kanin uelis moteluiskej.
39 Pero tla nankinekij nankiyektlaliskej okse tlamantli, xikyektlalikan ijkuak tekiuajkej kijtoskej matimonechikokan.
40 Uelis techouijtilis tlen axkan opanok uan techiluiskej tiknekij tikinmixnamikiskej tekiuajkej. Noijki amo tikmatij tlen tikijtoskej tla techtlajtlaniskej tleka timokualaniaj”.
41 Nochtin oyajkej ijkuak ijkon okinmilui.
Notas
^ Noso “otemok”.
^ Xikita diccionario.
^ Noso “okinmijtouayaj”, “okinpojpouayaj”.
^ Noso “itlakenuan”, “itilmajuan”.
^ Noso “demonios”.
^ Noso “demonios”.
^ Noso “kitekitiltiskej”, “kikuiskej”.
^ Noso “demonios”.
^ Noso “demonio”.
^ Noso “demonio”.
^ Cincuenta mil.
^ Nonmej tekiuajkej okitayaj tlen iluitl mochiuaskia uan akinmej mauiltiskiaj.
