Hechos 28:1-31
28 Ijkuak tinochtin kuali yotikatkaj, otikmatkej non isla itoka Malta.
2 Akinmej ompa ochantiayaj otechiknomatkej, kuali otechselijkej uan otlatlatijkej porque okiauiaya uan oseuaya.
3 Pablo okololo seki tlakotl uan okitlamotlak ijtik tlitl. Ijkuakon oualkiski se kouatl porque okimachili totonik tlitl uan omopilo itech ima Pablo.
4 Akinmej ompa ochantiayaj okitakej kouatl omopilo itech ima uan okimoluijkej: “Nin tlakatl temikti. Maski amitlaj okipanok itech mar, Melajkayotl* amo kikauilia mayolto”.
5 Pablo okitsetselo ima uan kouatl ouetsito ijtik tlitl pero ye amitlaj okipanok.
6 Yejuan okichixtokaj mapojposaui uan san niman maixpoliui. Uejkika omochixtokaj pero amitlaj okipanok, ikinon okse tlamantli omokuayejyekojkej* uan okijtojkej ye okatka se dios.
7 Ik ompa okatkaj seki tlalmej tlen okatkaj iaxkauan se tlakatl itoka Publio. Non tlakatl otlanauatiaya itech non isla. Ye kuali otechseli uan otechkaloti eyi tonal.
8 Ipapa Publio ouetoka ipan cama porque okipiaya totonik uan chikauak okikokouaya ijtik. Pablo okalak kanin okatka, omotlatlaujti, ipan okintlali imauan uan okipajti.
9 Ijkuak ijkon opanok, akinmej omokokouayaj itech non isla okitatoj Pablo uan ye okinpajti.
10 Yejuan otechtlatliokolijkej uan ijkon okiteititijkej otechtlakaitayaj. Noijki otechmakakej miak tlamantli ijkuak yititlejkoskiaj itech barco.
11 Otikatkaj eyi metstli itech non isla. Satepan otiajkej itech se barco tlen oualaya Alejandría uan omochixki itech non isla ijkuak oseuaya. Non barco iyekapan okipiaya se imagen kanin omotayaj ikoneuan Zeus.
12 Satepan otiajsitoj altepetl Siracusa uan ompa otimokajkej eyi tonal.
13 Satepan otiajkej uan otiajsitoj altepetl Regio. Mostlatika opejki ejeka ik sur uan ipan ome tonal otiajsitoj altepetl Puteoli.
14 Ompa otikinmajsitoj sekimej tokniuan uan yejuan otechtlatlaujtijkej inuan matimokauakan chikome tonal. Satepan otiajkej Roma.
15 Ijkuak tokniuan okimatkej ompa otiayaj, otechnamikitoj tiankisko Apio uan kanin kiluiaj Tres Tabernas. Pablo omoyolchika ijkuak okinmitak tokniuan uan okitlasojkamatili toTajtsin Dios.
16 Ijkuak otiajsitoj Roma, Pablo okikauilijkej mamokaloti san iuan se soldado tlen okimaluijtoka.
17 Eyi tonal satepan, Pablo okinnotski judíos tlen okachi oueyititokaj. Ijkuak nochtin omonechikojkej okinmilui: “Nokniuan, ompa Jerusalén onechtemaktijkej inmak tekiuajkej romanos maski amo onikixnamik toaltepe nion tlen otlamachtijkej touejkatatajuan.
18 Okinekiayaj nechkajkauaskej ijkuak onechtlajtlanijkej tlen onikchi, porque okitakej amitlaj onikchi para nechmiktiskej.
19 Pero judíos amo okinekej ikinon onikijto manechuikakan ixpan César. Ijkon onikijto pero amo nikneki nikixnamikis noaltepe.
20 Ikinon onamechnotski para namouan nimotlapouis. Nilpitok ika nin cadena porque nikneltoka tlen kichiaj israelitas”.
21 Yejuan okiluijkej: “Ompa Judea amo otechtitlanilijkej se carta kanin kijtoua tlen otikchi. Tokniuan tlen ompa oualajkej noijki amo okijtojkej kox itlaj otikchi.
22 Pero tejuan tiknekij tikkakiskej tlen timokuayejyekoua,* porque tikmatij nouian kiteneuaj non yankuik religión”.
23 Ijkuakon okitlalijkej okse tonal iuan motlapouiskej. Satepan okachi miakej oyajkej kanin Pablo omokalotijtoka. Desde kualkan hasta tiotlak ye okinyekilui tlen kijtosneki iTekiuajkayo toTajtsin Dios. Ye okinekiaya makineltokakan Jesús, ikinon okintlapoui tlen kijtoua iTlanauatil Moisés uan tlen okijkuilojkej profetas.
24 Sekimej okineltokakej tlen okijtouaya pero oksekimej amo okineltokakej.
25 Yejuan oyajkej porque tlatlamantli omokuayejyekouayaj* ikinon Pablo okinmilui:
“Espíritu santo okimatilti profeta Isaías tlen kinmiluiskia namouejkatatajuan.
26 Ye okilui: ‘Xio kanin yejuan katej uan xikinmilui: “Namejuan nantlakakiskej pero amo keman itlaj nankajsikamatiskej. Nantlachiaskej pero amo keman itlaj nankitaskej.
27 Porque namejuan yonanyoltlakuauakej. Nanmonakastsakuaj para amo nantlakakiskej uan nankintsakuaj namoixtololouan para amo nantlachiaskej. Ikinon amitlaj nankajsikamatij nion amo nanmoyolkopaj para manamechpaleui toTajtsin Dios”’.
28 Axkan akinmej amo judíos kinmatiltiskej ken techmakixtis toTajtsin Dios. Yejuan kema kikakiskej”.
29 *
30 Pablo ompa omoka ome xiuitl itech se kali tlen okitlanetijkej. Ye kuali okinseliaya nochtin tlen oyayaj kitlajpalotiuij.
31 Noijki okintlapouiaya tlen kijtosneki iTekiuajkayo toTajtsin Dios uan okinmachtiaya akin toTeko Jesucristo. Ye amo omomojtiaya uan amitlaj okitsakuiliaya ijkuak ijkon okichiuaya.
Notas
^ Ika griego moijtoua Díkē. Nin xamo kijtosneki se diosa tlen momakopa noso kijtosneki kinamiki tlen okipanok.
^ Noso “omonejneuilijkej”.
^ Noso “timonejneuilia”.
^ Noso “omonejneuiliayaj”.
^ Seki biblias kipiaj nin versículo pero tlen yiuejkika omoijkuilo ika griego amo kipia.
