Hechos 3:1-26
3 Se tonal, Pedro uan Juan oyajkej* templo kanaj las 3 tiotlak. Non hora nochtin omotlatlaujtiayaj.
2 Ompa okatka se tlakatl tlen amo onejnemiaya porque ijkon oneski.* Ye mojmostla okiuikayaj itech templo kanin kajki puerta tlen itoka Kuajkualtsin. Ompa okitlaliayaj uan okintlajtlaniliaya tomin akinmej okalakiayaj templo.
3 Ijkuak ye okitak Pedro uan Juan yikalakiskiaj itech templo, san niman okintlajtlanili tomin.
4 Pedro uan Juan okitakej tlakatl uan Pedro okilui: “Techita”.
5 Ye okinyekitak uan okichixtoka itlaj makimakakan.
6 Pero Pedro okilui: “Amo nikpia plata nion oro pero nimitsmakas tlen nikpia. ¡Ika itoka Jesucristo Nazareno, nimitsiluia xinejnemi!”.
7 Satepan okikitskili iyekma uan okiketsalti. San niman omochikajkej ikxiuan uan ikotsuan.*
8 Tlakatl omoketeuak uan opejki nejnemi. Okalak inuan itech templo, oajkotsikuintia uan okiueyichijtia toTajtsin Dios.
9 Nochtin okitakej onejnemiaya uan okiueyichiuaya toTajtsin Dios.
10 Noijki okixmatkej non tlakatl omotlaliaya itech templo uan okitlajtlaniaya tomin kanin kajki puerta tlen itoka Kuajkualtsin. Yejuan sapanoua omotlajtlachialtijkej ijkuak okitakej tlen okipanok.
11 Ijkuak non tlakatl okinkitskijtoka Pedro uan Juan, miakej omotlalojkej okinmitatoj kanin kajki korredor tlen itoka Salomón. Nochtin sapanoua omotlajtlachialtiayaj.
12 Ijkuak Pedro okinmitak, okinmilui: “Tlakamej tlen nanchantij Israel, ¿tleka nanmotlajtlachialtiaj? ¿Tleka nantechitaj ken yetoskia ika tochikaualis otikchijkej manejnemi nin tlakatl noso otikchijkej porque tiktekichiuiliaj toTajtsin Dios ika nochi toyolo?
13 IDios Abrahán, Isaac uan Jacob, inDios touejkatatajuan okiueyitlali Jesús akin kitekichiuilia. Namejuan onankitemaktijkej imak Pilato uan amo onankinekej makikajkaua maski ye okijto kikajkauaskia.
14 Namejuan onankitlajtlankej makikajkauakan se tlakatl temikti, uan amo makikajkauakan non tlakatl yolkuali tlen okiueyichiuaya toTajtsin Dios.
15 Onankimiktijkej akin techpaleuia matiyoltokan. Pero toTajtsin Dios okiyoliti uan tejuan otikitakej.
16 Nin tlakatl tlen nankitaj uan nankixmatij, omochikajkej ikxiuan ika itoka Jesús uan tejuan tikneltokaj itoka. Tejuan tikneltokaj ikinon nin tlakatl namoixpan opajtik.
17 Nokniuan, namejuan amo onankimatiayaj tlen onankichiuayaj ijkon ken tekiuajkej tlen namechnauatiaj.
18 Pero ijkon toTajtsin Dios okichi tlen okinmilui profetas makijtokan. Nochtin yejuan okijtojkej Cristo tlajyouiskia”.
19 “Ximoyolkopakan uan ayakmo xikchiuakan tlen nankichiuaj. Ijkon Jehová namechtlapojpoluilis namotlajtlakol, kichiuas kuali xiyetokan
20 uan kiualtitlanis Cristo Jesús manamechpaleui.
21 Ye moneki yetos iluikak hasta ijkuak toTajtsin Dios nochi kiyektlalis, ijkon ken yiuejkika okinmilui makijtokan profetas yolkualmej.
22 Moisés okijto: ‘Jehová namoDios kitlalis se profeta ijkon ken ne itech ialtepe. Moneki nankikakiskej uan nankichiuaskej tlen ye namechiluis.
23 Pero toTajtsin Dios kixpolos akin amo kichiuas tlen kijtos non profeta’.
24 Samuel uan nochtin profetas tlen satepan okatkaj noijki okijtojkej tlen axkan panoskia.
25 Nonmej profetas okijtojkej acuerdo* tlen toTajtsin Dios okichi inuan namouejkatatajuan. Non acuerdo* noijki namechpaleuis porque toTajtsin Dios okilui Abrahán: ‘Ika moxuiuan nikinteochiuas nochtin familias tlen katej ipan tlaltikpak’.
26 Ijkuak toTajtsin Dios yokitlali Jesús ken itlakeual, achto onamechualtitlanili para manamechteochiua uan manamechpaleui ayakmo xikchiuakan tlen amo kuali”.
Notas
^ Noso “otlejkokej”.
^ Noso “otlakatki”.
^ Noso “ikxikechtlanuan”.
^ Noso “pacto”. Xikita diccionario.
^ Noso “pacto”. Xikita diccionario.
