Juan 3:1-36
3 Okatka se fariseo tlen omotokayotiaya Nicodemo. Ye okinnauatiaya judíos.
2 Se youak, ye oyajki okitato Jesús uan okilui: “Rabí, tejuan tikmatij titlamachtia porque omitsualtitlanki toTajtsin Dios. Nion se tlakatl uelis kinchiuas milagros tlen te tikinchiua tla toTajtsin Dios amo iuan kajki”.
3 Jesús okinankili: “Ne nimitsiluia, akin amo oksepa nesi* amo uelis kitas iTekiuajkayo toTajtsin Dios”.
4 Nicodemo okilui: “¿Ken uelis ikaj oksepa nesis* tla yikipia miak xiuitl? ¿Kox uelis oksepa kalakis ijtik imama uan oksepa nesis?”.*
5 Jesús okinankili: “Ne nimitsiluia, akin amo moapolaktia uan amo kiselia ichikaualis toTajtsin Dios, amo uelis kalakis itech iTekiuajkayo toTajtsin Dios.
6 Pouij tlaltikpak akinmej nesij* ken konemej, pero pouij iluikak akinmej okinpejpenkej ika espíritu.
7 Amo ximotlajtlachialti porque onimitsilui: ‘Namejuan moneki oksepa nannesiskej’.*
8 Ejekatl yaui san kanin kineki uan maski tikkaki, amo tikmati kanin ualeua nion kanin yaui. Ijkon kinpanoua akinmej kinpejpenaj ika espíritu”.
9 Nicodemo okitlajtlani: “¿Ken uelis ijkon panos?”.
10 Jesús okinankili: “¿Te tikinmachtia akinmej chantij Israel uan amo tikmati?
11 Ne nimitsiluia, tejuan tikijtouaj tlen tikmatij uan tiktematiltiaj tlen yotikitakej, pero namejuan amo nankineltokaj tlen tiktematiltiaj.
12 Ne yonamechtlapoui tlen poui tlaltikpak uan namejuan amo nankineltokaj. ¿Kox nankineltokaskej tla namechtlapouis tlen poui iluikak?
13 Amikaj yitlejko iluikak, san ye iKone Tlakatl ompa oualtemok.
14 Ijkon ken Moisés okipilo kouatl kanin tlauaki, iKone Tlakatl noijki kipiloskej
15 para nochipa yoltoskej nochtin tlen kineltokaskej”.
16 “ToTajtsin Dios sapanoua okintlasojtlak akinmej chantij tlaltikpak ikinon okitemakak san ye se iKone. Ijkon akin kiteititis kineltoka amo ixpoliuis uan nochipa yoltos.
17 ToTajtsin Dios amo okiualtitlanki iKone nikan tlaltikpak para makinmixkomaka akinmej nikan chantij. Ye okiualtitlanki makinmakixtiki akinmej chantij tlaltikpak.
18 Akin kineltokas amo kixkomakaskej pero yokixkomakakej akin amo tlaneltoka, porque amo okineltokak san ye se iKone toTajtsin Dios.
19 Tlauili ouala ipan tlaltikpak, pero akinmej chantij tlaltikpak okachi okipatioitakej tlayoualotl uan amo okipatioitakej tlauili. Yejuan okichiuayaj tlen amo kuali ikinon kintlajyouiltiskej.
20 Akin kichiua tlen amo kuali kikokolia tlauili. Noijki amo yaui kanin kajki tlauili para amo mamota tlen kichiua.
21 Pero akin kichiua tlen kuali, yaui kanin kajki tlauili para mamota kichiua tlen kineki toTajtsin Dios”.
22 Satepan Jesús uan idiscípulos oyajkej itech altepetsitsintin tlen katej Judea. Ompa inuan omoka kanaj keski tonal uan oteapolaktiaya.
23 Juan noijki oteapolaktiaya ompa Enón tlen kajki ik Salim, porque ompa okatka miak atl. Miakej oyayaj kitatiuij uan ye okinapolaktiaya.
24 Ijkuakon Juan ayamo okitsakuayaj.
25 Satepan idiscípulos Juan omokualanijkej iuan se judío porque okinekiayaj kimatiskej ken mochipauaskiaj ixpan toTajtsin Dios.
26 Yejuan okiluitoj Juan: “Rabí, tlakatl tlen mouan okatka okse lado itempa aueyatl Jordán uan tlen otiktematilti akin ye, noijki teapolaktia uan nochtin yauij kitatiuij”.
27 Juan okinmilui: “Amikaj uelis itlaj kiselis tla amo kimaka toTajtsin Dios.
28 Namejuan onankikakej ijkuak onikijto: ‘Ne amo niCristo. Ne san iyekapan onechualtitlankej’.
29 Novio kimokauia novia. Pero iyolikni novio sapanoua paki ijkuak kajki inakastlan novio uan kikaki, ikinon ne sapanoua nipaki.
30 Cristo okachi miakej iuan yaskej, pero ne ayakmo miakej nouan uitsej”.
31 Akin uits tlakpak okachi ueyititok uan amo ken oksekimej. Akin ualeuatok tlaltikpak kijtoua tlen onka tlaltikpak porque ompa ualeuatok. Akin uits iluikak okachi ueyititok uan amo ken oksekimej.
32 Ye kitematiltia tlen yokitak uan tlen yokikak, pero amikaj kineltoka tlen kitematiltia.
33 Akin kineltoka, kitematiltia toTajtsin Dios kijtoua tlen melauak.
34 Akin toTajtsin Dios okiualtitlanki, kitematiltia tlen kijtoua toTajtsin Dios, porque toTajtsin Dios amo kitemaka san tepitsin iespíritu.
35 ToTajtsin kitlasojtla iKone uan yokimaktili nochi tlen onka.
36 Nochipa yoltos akin kineltoka iKone. Pero amo yoltos akin amo kitlakamati* iKone porque ipan yetos ikualanilis toTajtsin Dios.
Notas
^ Noso “tlakati”.
^ Noso “tlakatis”.
^ Noso “tlakatis”.
^ Noso “tlakatij”.
^ Noso “nantlakatiskej”.
^ Noso “kiuelkaki”.
