Mateo 18:1-35
18 Non tonal discípulos omotokijkej inauak Jesús uan okitlajtlanijkej: “¿Akin okachi ueyititok itech Tekiuajkayotl tlen kajki iluikak?”.
2 Jesús okinotski se chokotsin, okitlali tlatlajkotia
3 uan okinmilui: “Ne namechiluia, amo keman nankalakiskej itech Tekiuajkayotl tlen kajki iluikak, tla amo nankipatlaj ken nanmokuayejyekouaj* uan tla amo nanmochiuaj ken konemej.
4 Porque akin yetos yolyamanki ken nin chokotsin, ye okachi ueyititos itech Tekiuajkayotl tlen kajki iluikak.
5 Akin nechtlakaita kiselis se chokotsin uan ne noijki nechselis.
6 Pero tla ikaj kichiuas ayakmo matlaneltoka akin yolyamanki, okachi kuali makikechpililikan se ueyi tetl* uan makitlamotlakan ijtik mar kanin okachi tlauejkatlan”.
7 “¡Mialmastin akinmej kichiuaj oksekimej matlajtlakolchiuakan! Nin melauak ijkon panoua, pero mialma akin kichiua oksekimej ayakmo matlaneltokakan.
8 Tla moma noso mokxi kichiua xitlajtlakolchiua, xikmotekili uan uejka xiktlamotla. Okachi kuali tiyoltos maski timakotonki* noso tiikxikotonki,* uan amo sepa mamitsixpolokan ijtik tlitl ika ome momauan uan ome mokxiuan.
9 Noijki tla moixtololo kichiua xitlajtlakolchiua, xikmokixtili uan uejka xiktlamotla. Okachi kuali tiyoltos maski san ika se moixtololo uan amo mamitstlamotlakan ika ome moixtololouan ijtik Gehena* kanin milintok tlitl.
10 Amo keman xikintlauelitakan akinmej yolyamankej. Porque ne namechiluia inmiángeles nochipa kitaj noTajtsin tlen kajki iluikak”.
11 *
12 “¿Tlen nankijtouaj? Tla se tlakatl kinpia 100 ichkamej uan se poliuis, ¿amo kinkajteuas 99 ichkamej itech tepeyo uan kitemoti tlen opoliuik?
13 Ne namechiluia, ye okachi pakis tla kajsis ichka tlen opoliuik maski kinpias 99 ichkamej tlen amo opolikej.
14 NoTajtsin tlen kajki iluikak noijki amo kineki mapoliui nion se yolyamanki”.
15 “Tla mokni mitstoktia itlaj amo kuali, iuan ximotlapouiti uan xikilui tlen okichi. Tla mitskakis, oksepa kuali nanmouikaskej.
16 Pero tla amo kineki mitskakis, xikuika se testigo noso xikinuika ome testigos para nochi tlamantli kuali mamoajsikamati ika tlen kijtoskej ome noso eyi testigos.
17 Pero tla amo kineki kinkakis, xikinmilui tokniuan.* Uan tla amo kinkaki tokniuan,* xikita ken ikaj tlen amo tlaneltoka uan ken se tominololo”.
18 “Ne namechiluia, tla itlaj kilpiskej iluikak, namejuan nankilpiskej ipan tlaltikpak. Noijki tla itlaj kitotomaskej iluikak, namejuan nankitotomaskej ipan tlaltikpak.
19 Noijki namechiluia, tla nikan tlaltikpak namome yonanmokajkej nankitlajtlaniskej itlaj miak ipati, noTajtsin tlen kajki iluikak namechmakas.
20 Porque ne nika kanin katej ome noso eyi tlen kichiuaj ken ne nikchiua”.
21 Pedro omotoki inauak Jesús uan okitlajtlani: “NoTeko, ¿keski uelta moneki niktlapojpoluis nokni tla nechtoktis itlaj amo kuali? ¿Hasta chikome uelta?”.
22 Jesús okinankili: “Amo nimitsiluia xiktlapojpolui san chikome uelta, xiktlapojpolui hasta 77 uelta”.
23 “Tekiuajkayotl tlen kajki iluikak yetoskia ken se tekiua tlen okinekiaya makikopilikan tlen okiuikiliayaj itlakeualuan.
24 Okiualikilijkej se tlakeuali tlen okiuikiliaya 60 millones de denarios.*
25 Tlakeuali amo okipiaya tlen ika kikopilis tlen okiuikiliaya, ikinon tekiua otlanauati makinemakakan tlakeuali, isiua uan ikoneuan. Noijki makinemakakan nochi tlen okipiaya uan ijkon uelis kikopaskia tlen okiteuikiliaya.
26 Tlakeuali omotlankuaketski ixpan tekiua uan okitlatlaujti: ‘Techchia uan nimitskopilis nochi tlen nimitsuikilia’.
27 Tekiua okiknomatki ikinon okilui mauia uan ayakmo makikopili tlen okiuikiliaya.
28 Pero ijkuak tlakeuali oyajki, okinamik okse tlakeuali tlen okiuikiliaya 100 denarios.* Ye okikitski uan opejki kikechtlanpatska uan okilui: ‘¡Techkopili nochi tlen techuikilia!’.
29 Tlakeuali ixpan omotlankuaketski uan okitlatlaujti: ‘Techchia uan nimitskopilis tlen nimitsuikilia’.
30 Pero ye amo okinek kikakis. Oyajki uan otlanauati makitsakuakan hasta makikopili tlen okiuikiliaya.
31 Ijkuak oksekimej tlakeualmej okimatkej tlen opanok, okualankej uan okiluitoj tekiua nochi tlen opanok.
32 Tekiua otlanauati makinotsatij tlakeuali uan okilui: ‘¡Te amo tiyolkuali! Ne onimitsilui ayakmo techkopili tlen otechuikiliaya ijkuak otechtlatlaujti manimitschia.
33 ¿Amo omonekiaya tikiknomatis okse tlakeuali ijkon ken ne onimitsiknomatki?’.
34 Tekiua okualanki uan otlanauati makitsakuakan hasta makitlaxtlaua nochi tlen okiteuikiliaya.
35 NoTajtsin tlen kajki iluikak noijki ijkon namechtoktis tla amo nankintlapojpoluiaj namokniuan ika nochi namoyolo”.
Notas
^ Noso “nanmonejneuiliaj”.
^ Nin se tetl tlen ika okikuechouayaj trigo uan burros okimalakachouayaj non tetl.
^ Noso “timatepo”.
^ Noso “tiikxitepo”.
^ Xikita diccionario.
^ Seki biblias kipiaj nin versículo pero tlen yiuejkika omoijkuilo ika griego amo kipia.
^ Ika griego moijtoua “tlanechikol”.
^ Ika griego moijtoua “tlanechikol”.
^ Ika griego kijtoua 10,000 (diez mil) talentos. Xikita diccionario.
^ Xikita diccionario.
