Mateo 4:1-25
4 Satepan espíritu santo okiyekanki Jesús kanin tlauaki uan ompa Diablo okiyejyeko.
2 Jesús oapismikiaya porque yokipiaya 40 tonal amo otlakuaya.
3 Diablo okajsito uan okilui: “Tla tiikone Dios, xikinmilui ninmej temej* mamokopakan pan”.
4 Pero ye okinankili: “ITlajtol Dios kijtoua: ‘Moneki tikchiuaskej nochi tlen kijtoua Jehová uan amo san moneki titlakuaskej para tiyoltoskej’”.
5 Satepan Diablo okiuikak Jesús ikpak* templo ompa Jerusalén
6 uan okilui: “Tla tiikone Dios, ximotlamotla porque iTlajtol Dios kijtoua: ‘Ye kinnauatis iángeles mamitspaleuikij’ uan ‘mitskitskiskej para amo timokxiuitekis ika se tetl’”.
7 Jesús okinankili: “ITlajtol Dios noijki kijtoua: ‘Amo xikyejyeko Jehová moDios’”.
8 Satepan Diablo okiuikak ipan se tepetl sapanoua uejkapan. Ompa okinmititi altepemej uan nochi tlen okipiayaj
9 uan okilui: “Nochi nin nimitsmakas tla noixpan timotlankuaketsas uan san se uelta techueyichiuas”.
10 Jesús okinankili: “¡Xio Satanás! Porque iTlajtol Dios kijtoua: ‘Xikueyichiua Jehová moDios uan san ye xiktekichiuili’”.
11 Ijkuakon Diablo oyajki uan sekimej ángeles okiyolchikauakoj Jesús.
12 Satepan Jesús oyajki Galilea ijkuak okimatki okitsakej Juan.
13 Jesús amo omoka altepetl Nazaret, ye ochantito Capernaúm tlen kajki itempa mar itech altepemej Zabulón uan Neftalí.
14 Ijkon omochi tlen okijto profeta Isaías:
15 “¡Galilea kanin ochantiayaj akinmej amo judíos, itech altepemej Zabulón uan Neftalí. Tika okse lado itempa aueyatl Jordán, kanin panoua ojtli tlen ajsi itempa mar!
16 Nochtin akinmej okatkaj kanin tlayoua okitakej se ueyi tlauili. Omonexti se tlauili inpan akinmej okatkaj itlampa iekauilo mikilistli”.
17 Ijkuakon Jesús opejki tetlapouia uan okijtouaya: “Ximoyolkopakan porque yiuits Tekiuajkayotl tlen kajki iluikak”.
18 Se tonal, Jesús onejnentiaya itempa mar Galilea. Ompa okinmitak ome iknimej okitlamotlayaj se michayatl ijtik mar porque yejuan omichkitskiayaj. Se omotokayotiaya Simón uan okiluiayaj Pedro. Okse omotokayotiaya Andrés.
19 Ye okinmilui: “Nouan xiualakan uan namechititis ken nankintemoskej tlakamej ijkon ken nanmichkitskiaj”.
20 Yejuan san niman iuan oyajkej uan ayakmo omichkitskijkej.
21 Satepan Jesús okinmajsito Santiago uan Juan itelpochuan Zebedeo. Yejuan uan inpapa okatkaj itech barco okiyektlalijtokaj tlen ika omichkitskiayaj. Jesús okinnotski,
22 yejuan san niman iuan oyajkej uan okikajtejkej inbarco uan inpapa.
23 Jesús otlamachtiaya itech sinagogas* ompa Galilea. Noijki otetlapouiaya kuali tlajtoli tlen kijtoua toTajtsin Dios ualtlanauatis ipan tlaltikpak. Noijki okinpajtiaya kokoxkej.
24 Nochi tlen okichiuaya omomatki ompa Siria. Okinuikiliayaj kokoxkej uan ye okinpajtiaya. Okinpajtiaya akinmej okinpiayaj ejekamej,* akinmej omimikiayaj uan akinmej amo onejnemiayaj.
25 Ikinon okitemouayaj miakej tlen ochantiayaj Galilea, Decápolis,* Jerusalén, Judea uan akinmej ochantiayaj itempa okse lado aueyatl Jordán.
Notas
^ Noso “tepejximej”.
^ Noso “ikuapak”.
^ Xikita diccionario.
^ Noso “demonios”.
^ Noso “majtlaktli altepemej”.
