Romanos 11:1-36
11 Axkan namechtlajtlania, ¿toTajtsin Dios okika ialtepe? ¡Amo! Ne noijki niisraelita, niixui Abrahán uan nipoui itech ifamilia Benjamín.
2 ToTajtsin Dios amo okika ialtepe tlen achto okipejpenki. ¿Amo nankimatij tlen kijtoua iTlajtol toTajtsin Dios ijkuak Elías omotlatlaujti uan okintelui israelitas?
3 Elías okijto: “Jehová, yokinmixpolojkej moprofetas uan yokinxixinijkej moaltares. San ne onimoka uan kinekij nechmiktiskej”.
4 Pero ¿tlen okilui toTajtsin Dios? Ye okilui: “Ok nikinpia 7,000 tlakamej tlen amo keman motlankuaketsaj ixpan Baal”.
5 Axkan noijki katej sekimej tlen toTajtsin Dios okinpejpenki porque kitetliokolia tlen kuali.
6 Non kijtosneki okinpejpenki porque kitetliokolia tlen kuali uan amo okinpejpenki por tlen okichijkej. Porque tla toTajtsin Dios kinpejpenaskia por tlen okichijkej, kijtosneki amo okinpejpenki porque kitetliokolia tlen kuali.
7 ¿Tlen tikijtoskej? Israelitas amo okiselijkej tlen okinekiayaj, pero akinmej okinpejpenkej kema okiselijkej. Oksekimej oyoltlakuauakej
8 ijkon ken ijkuilitok: “ToTajtsin Dios okichi amitlaj makajsikamatikan ken yetoskia kochij. Ijkon amo matlachiakan uan amo matlakakikan, uan hasta axkan ijkon katej”.
9 David noijki okijto: “Iluitl tlen kichiuaj, mayeto ken se mekatl tlen kinmikxitlanuis para mauetsikan uan matlajyouikan.
10 Maixtlapoyauilikan para ayakmo matlachiakan. Noijki xikchiua nochipa makuitlapantoloniuikan”.
11 Axkan namechtlajtlania: ¿kijtosneki ijkuak omokxitlanuijkej uan ouetskej ayakmo ouelik omoketskej? ¡Amo! Pero akinmej amo judíos uelis momakixtiskej porque judíos ouetskej. Nin opanok para mamoxikokan judíos.
12 Tla nochtin okinteochijkej ijkuak judíos ouetskej, uan tla okinteochijkej akinmej amo judíos porque judíos ayakmo okachi okinteochijkej, ¡okachi miak tlateochiuali yetos ijkuak nochtin moajxitiskej!
13 Axkan namechtlapouia namejuan akinmej amo nanjudíos. Ne niapóstol uan onechtitlankej innauak akinmej amo judíos. Nikpatioita niktekichiuilis toTajtsin Dios.
14 Porque nikneki nikchiuas mamoxikokan akinmej judíos ken ne para sekimej mamomakixtikan.
15 ToTajtsin Dios okinka judíos uan ijkon opejki mouika inuan oksekimej. Tla ye oksepa kinselis yetoskia ken oksepa kinyolitis porque oixpolikej.
16 Noijki tla chipauak pan tlen achto kimakaj toTajtsin Dios, kijtosneki okseki pan noijki chipauak. Tla chipauak ineluayo kouitl, kijtosneki imamayo noijki chipauak.
17 ToTajtsin Dios okitsonteki seki imamayo olivoskouitl, uan te ompa omitssalo maski tiimamayo olivoskouitl tlen moskaltia kojtla. Te noijki mitspaleuia ineluayo non kouitl.
18 Ikinon amo ximokuayejyeko* okseki imamayo kouitl amo kuali uan te okachi tikuali. Tla timokuayejyekoua* okachi tikuali, xikilnamiki ineluayo kouitl mitschikajtok uan amo te tikchikajtok.
19 Te tikijtos: “Seki imamayo kouitl okitsontekej uan ne ompa onechsalojkej”.
20 ¡Non melauak! Okintsontekej porque amo otlaneltokakej uan te ompa tika porque titlaneltoka. Ikinon kuali xikita tlen tikchiua uan amo ximokuayejyeko* okachi tikuali.
21 Tla toTajtsin Dios okitsonteki imamayo olivoskouitl, te noijki uelis mitstsontekis.
22 Te uelis tikitas toTajtsin Dios tetlasojtla pero noijki tetlajyouiltia. Ye kintlajyouiltia akinmej ouetskej porque amo otlaneltokakej, pero te mitstlasojtlas tla nochipa tiyetos itech itlasojtlalis, tlamo te noijki mitstsontekiskej.
23 Tla judíos peuas tlaneltokaskej, oksepa kinsaloskej itech kouitl porque toTajtsin Dios uelis oksepa kinsalos.
24 Te omitstsontekej itech se olivoskouitl tlen moskaltia kojtla, uan omitssalojkej itech se olivoskouitl tlen okitokakej. Ikinon okachi amo oui kisaloskej imamayo olivoskouitl tlen okitsontekej.
25 Nokniuan, xikilnamiktokan nin tlamantli santo tlen amo omomatiaya para amo xikmoluikan namixtlamatkej: sekimej israelitas oyoltlakuauakej uan ijkon yetoskej hasta ijkuak kinmajxitiskej akinmej amo judíos tlen toTajtsin Dios okinpejpenki.
26 Ijkon nochtin israelitas momakixtiskej. ITlajtol toTajtsin Dios kijtoua: “Ompa Sion kisas akin temakixtis. Ye kipojpolos tlen amo kuali okichijkej ixuiuan Jacob.
27 Nin acuerdo* tlen inuan nikchiua ijkuak nikintlapojpoluilis intlajtlakol”.
28 Sekimej judíos kikokoliaj kuali tlajtoli uan non namechpaleuia. Pero toTajtsin Dios okinpejpenki uan kintlasojtla porque ijkon okinmilui inuejkatatajuan.
29 Porque toTajtsin Dios amo kitekixtilia tlen kitetliokolia uan amo kilkaua akin kinotsa.
30 Namejuan achto amo onankitlakamatiayaj* toTajtsin Dios, pero axkan ye namechiknomati porque judíos amo otetlakamatkej.*
31 Ye onamechiknomatki porque judíos amo otetlakamatkej,* ikinon ye noijki uelis kinmiknomatis judíos.
32 ToTajtsin Dios okitekauili nochtin matsaktokan porque amo tetlakamatij* para uelis kinmititis kinmiknomati.
33 ¡ToTajtsin Dios sapanoua techteochiua! Ye ixtlamatki uan kimati miak tlamantli. Amikaj uelis kajsikamatis ken tlaixkomaka uan tejuan amo uelis tikmatiskej nochi tlen kichiua.
34 Porque “¿akin kimati tlen mokuayejyekoua* Jehová? ¿Noso akin uelis kiluis tlen moneki kichiuas?”.
35 “¿Akin itlaj okimakak toTajtsin Dios uan ye oksepa kikopilis?”.
36 Ye okichijchi nochi tlen onka, kichiua nochi mayeto uan iaxka nochi tlen onka. Ye nochipa makiueyichiuakan. Amén.
Notas
^ Noso “ximonejneuili”.
^ Noso “tiknejneuilia”.
^ Noso “ximonejneuili”.
^ Noso “pacto”. Xikita diccionario.
^ Noso “onankiuelkakiayaj”.
^ Noso “otlauelkakej”.
^ Noso “otlauelkakej”.
^ Noso “tlauelkakij”.
^ Noso “monejneuilia”.
