Romanos 2:1-29
2 Amo mitsnamiki tikinteneuas* oksekimej maski san akin tiyetos. San te moselti timotlajtlakoltia ijkuak titlateneua* porque te noijki tikchiua tlen yejuan kichiuaj.
2 Tejuan tikmatij toTajtsin Dios tlaixkomaka ken moneki uan kinmixnamiki akinmej ijkon kichiuaj.
3 ¿Tikneltoka timopaleuis ijkuak toTajtsin Dios mitsixkomakas tla tikinteneua* akinmej kichiuaj tlen te noijki tikchiua?
4 ¿Amo tikmati ye mitstlasojtla, mitsxikojtok uan mitschixtok? ¿Amo tikajsikamati toTajtsin Dios yolkuali uan kineki mitspaleuis ximoyolkopa?
5 Pero te tiyoltlakuauak uan amo tikneki timoyolkopas, ikinon toTajtsin Dios mitstlajyouiltis ijkuak ajsis tonal kualanis. Ijkuakon kiteititis tlaixkomaka ken moneki.
6 Ye kitas tlen okichijkej nochtin uan kinteochiuas noso kintlajyouiltis ken kinnamiki.
7 Nochipa yoltoskej akinmej kichiaj makinueyitlalikan, makintlakaitakan uan akinmej kichiaj incuerpo amo maijtlakaui, porque tlaxikouaj ijkuak kichiuaj tlen kuali.
8 Pero toTajtsin Dios kualanis uan kintlajyouiltis akinmej mokualaniaj uan amo kichiuaj tlen melauak porque kichiuaj tlen amo kuali.
9 Akinmej kichiuaj tlen amo kuali, kipiaskej ouijkayotl uan tlajyouiskej. Achto judíos uan satepan griegos.
10 Pero akinmej kichiuaj tlen kuali, kinueyitlaliskej, kintlakaitaskej uan kipiaskej yolseuilistli. Achto judíos uan satepan griegos.
11 Porque toTajtsin Dios amo techikoita.
12 Nochtin tlen otlajtlakolchijkej uan amo okixmatkej tlanauatil, mikiskej maski amo okixmatkej tlanauatil. Pero nochtin tlen otlajtlakolchijkej uan okixmatiayaj tlanauatil, kinmixkomakaskej ken kijtoua tlanauatil.
13 ToTajtsin Dios amo kinmita yolkualmej akinmej san kikakij tlanauatil. Ye kinmita yolkualmej akinmej kichiuaj tlen kijtoua tlanauatil.
14 Akinmej amo judíos kichiuaj tlen kijtoua itlanauatil toTajtsin Dios maski amo kixmatij. Non kiteititia tlanauatil kajki inyolipan.
15 Tlen yejuan kichiuaj kiteititia tlanauatil yetoskia ken ijkuilitok inyolipan. Noijki intlalnamikilis kinmiluia kox kuali noso amo kuali tlen kichiuaj. Ijkon intlayejyekol* kinmiluia kox itlaj intlajtlakol noso amo.
16 Nin panos ijkuak toTajtsin Dios kinauatis Cristo Jesús makixkomaka nochi tlen san ichtaka kichiuaj akinmej chantij tlaltikpak. Ijkon kijtoua kuali tlajtoli tlen niktematiltia.
17 Tla te tikijtoua tijudío, tikneltoka tlanauatil uan timoueyineki porque timouika iuan toTajtsin Dios,
18 tla tikmati tlen kineki toTajtsin Dios uan tikajsikamati tlen kuali porque omitsmachtijkej iTlanauatil Moisés,
19 tla tikneltoka uelis tikinyekanas akinmej amo tlachiaj, uelis tikintlauilis akinmej katej kanin tlayoua,
20 uelis tikinyektlapouis akinmej amo ixtlamatkej, uelis tikinmachtis akinmej katej ken konemej, uan tla tikajsikamati tlen okachi ipati uan tlen melauak tlamachtia iTlanauatil Moisés...,
21 pero tla tikinmachtia oksekimej, ¿tleka amo moneuian timomachtia? Tla tikinmiluia oksekimej amo matlachtekikan, ¿tleka titlachteki?
22 Tla tikinmiluia oksekimej amo maauilnemikan,* ¿tleka tiauilnemi?* Tla tikinkokolia imágenes, ¿tleka titlachteki itech templos?
23 Tla timoueyineki porque tikixmati tlanauatil, ¿tleka amo tiktlakaita uan tikixnamiki iTlanauatil Moisés?
24 Ikinon iTlajtol toTajtsin Dios kijtoua: “Namejuan namotlajtlakol kiuijuikaltiaj itoka toTajtsin Dios itech okseki altepemej”.
25 Circuncisión mitspaleuis tla tiktlakamati* tlanauatil. Pero amitlaj ipati otikmochiuili circuncisión tla amo tiktlakamati* tlanauatil.
26 Tla se tlakatl kitlakamati* tlen kijtoua iTlanauatil Moisés maski amo okimochiuili circuncisión, ¿amo yetoskia ken okimochiuili circuncisión ixpan toTajtsin Dios?
27 Tlakatl tlen kitlakamati* iTlanauatil Moisés maski amo okimochiuili circuncisión, mitsixkomakas porque amo tiktlakamati* tlanauatil maski tikpia tlanauatil tlen okijkuilojkej uan maski otikmochiuili circuncisión.
28 Akin kijtoua ye judío amo kijtosneki melauak judío. Noijki amitlaj ipati tla okimochiuili circuncisión.
29 Tlen onka iyolipan se tlakatl kiteititia melauak judío. Ika espíritu santo kimochiuilia circuncisión itech iyolo uan amo ijkuak kitlakamati* tlanauatil tlen okijkuilojkej. ToTajtsin Dios kiueyitlalia non tlakatl maski oksekimej amo kiueyitlaliaj.
Notas
^ Noso “tikinmijtos”, “tikinpojpouas”.
^ Noso “titeijtoua”, “titepojpoua”.
^ Noso “tikinmijtoua”, “tikinpojpoua”.
^ Noso “intlanemilil”.
^ Noso “amo makikajkayauakan insiua noso innamik”.
^ Noso “tikkajkayaua mosiua noso monamik”.
^ Noso “tikuelkaki”.
^ Noso “tikuelkaki”.
^ Noso “kiuelkaki”.
^ Noso “kiuelkaki”.
^ Noso “tikuelkaki”.
^ Noso “kiuelkaki”.
