Romanos 4:1-25
4 ¿Tlen tikijtoskej okitlanki touejkatata Abrahán?
2 Tla Abrahán kitaskiaj yolkuali porque okichi tlen kuali, uelis moueyinekiskia pero amo ixpan toTajtsin Dios.
3 ¿Tlen kijtoua iTlajtol toTajtsin Dios? Ompa kijtoua: “Abrahán okineltokak Jehová ikinon ye okitak okatka se tlakatl yolkuali”.
4 Ijkuak se tlakatl tekipanoua para kimotlanilis tlen ika mopanoltis, itlaxtlauil amo kijtosneki kitliokoliaj. Kimakaj itlaxtlauil porque kinamiki kiselis.
5 Pero toTajtsin Dios kita yolkuali akin tlaneltoka uan amo san ika tlen kichiua. Porque toTajtsin Dios uelis kinmitas yolkualmej akinmej tlajtlakolchiuaj.
6 David noijki okijto paki tlakatl tlen toTajtsin Dios kita yolkuali maski amo okichi nochi tlen kijtoua tlanauatil. Ye okijto:
7 “Pakij akinmej kintlapojpoluiaj tlen amo kuali okichijkej. Noijki pakij akinmej kintlapojpoluiliaj intlajtlakol.
8 Jehová amo kilnamiktok itlajtlakol tlakatl ikinon tlakatl paki”.
9 ¿Non pakilistli kipiaj san akinmej okimochiuilijkej circuncisión noso noijki akinmej amo okimochiuilijkej? Porque tikijtouaj: “Abrahán okitakej okatka se tlakatl yolkuali porque otlaneltokaya”.
10 ¿Keman okitakej okatka yolkuali? ¿Ijkuak yokimochiuili circuncisión noso ijkuak ayamo okimochiuiliaya? Okitakej okatka yolkuali ijkuak ayamo okimochiuiliaya circuncisión.
11 ToTajtsin Dios okilui Abrahán makimochiuili circuncisión para kiteititiskia okatka yolkuali porque otlaneltokaya ijkuak ayamo okimochiuiliaya circuncisión. Ikinon ye omochi inpapa akinmej tlaneltokaj maski amo kimochiuiliaj circuncisión, ijkon toTajtsin Dios kinmita yolkualmej.
12 Abrahán inpapa akinmej kimochiuiliaj circuncisión. Pero noijki inpapa akinmej tlaneltokaj ken ye uan amo san inpapa akinmej kimochiuiliaj circuncisión. Topapa Abrahán otlaneltokak ijkuak ayamo okimochiuiliaya circuncisión.
13 Abrahán uan ixuiuan okinmiluijkej ye kiseliskia tlaltikpak. Pero amo kiseliskia porque okitlakamatiaya* tlanauatil, kiseliskia porque otlaneltokaya uan toTajtsin Dios okiseliaya.
14 Tla akinmej kitlakamatij* tlanauatil kinmaxkatiliskej tlen yomoijto, amitlaj ipati titlaneltokaskej uan noijki amitlaj ipati tlen okiluijkej Abrahán.
15 Porque kitlajyouiltiskej akin amo kitlakamati* iTlanauatil Moisés, pero amikaj uelis kixnamikis tlanauatil tla amo onka tlanauatil.
16 Abrahán okiluijkej tlen kiseliskia porque otlaneltokak uan ijkon toTajtsin Dios okiteititi kitetliokolia tlen kuali. Ixuiuan Abrahán noijki okinmiluijkej tlen ye okiluijkej. Amo san okinmiluijkej akinmej okitlakamatiayaj* iTlanauatil Moisés. Noijki okinmiluijkej akinmej tlaneltokaj ijkon ken topapa Abrahán.
17 (Ijkon ken ijkuilitok: “Onimitstlali titepapa itech miakej altepemej”). Abrahán okiteititi okineltokaya toTajtsin Dios. ToTajtsin Dios kinyolitia akinmej yoixpolikej uan kijtoua tlen ayamo panoua ken yetoskia yomochi.
18 Abrahán okichiaya uan okineltokaya yetos tepapa itech miakej altepemej maski omotaya amo ijkon panoskia. Ye okineltokak tlen toTajtsin Dios okilui: “Ijkon miakej yetoskej moxuiuan”.
19 Maski ye otlaneltokaya, okimatiaya ayakmo uelis kinpiaskia ikoneuan porque yokipiaya kanaj 100 xiuitl. Noijki okimatiaya Sara yokipiaya miak xiuitl uan ayakmo uelis kinpiaskia ikoneuan.
20 Pero ye okineltokak ika nochi iyolo tlen toTajtsin Dios okilui. Ye okatka chikauak porque otlaneltokaya uan okiueyichi toTajtsin Dios.
21 Noijki okineltokak ika nochi iyolo toTajtsin Dios uelis kichiuaskia tlen okilui.
22 Ikinon “okitakej okatka se tlakatl yolkuali”.
23 Pero ninmej tlajtolmej: “Okitakej okatka se tlakatl yolkuali” amo omoijkuilo san para ye.
24 Noijki okijkuilojkej para tejuan porque titlaneltokaj uan techitaskej tiyolkualmej. Tejuan tikneltokaj toTajtsin Dios akin okiyoliti toTeko Jesús.
25 ToTajtsin Dios okitekauili topatka makimiktikan Jesús porque titlajtlakolejkej, pero okiyoliti uan ijkon techita tiyolkualmej.
