Tito 3:1-15
3 Nochipa xikinmilnamikti makintlakamatikan* tekiuajkej uan akinmej tlanauatiaj, uan makinkauilikan makinyekanakan. Makichiuakan nochi tlen kuali.
2 Amikaj makiteneuakan,* amo mamokualanikan, mateajsikamatikan uan nochipa mayetokan yolyamankej inuan oksekimej.
3 Porque achto tejuan noijki amitlaj otikmatiayaj, amo otitetlakamatiayaj,* otechkajkayauayaj, san otikchiuayaj tlen otechyoltilanaya, san otimoyolpaktiayaj, amo kuali otikpiayaj tonemilis, otitlaixnekiayaj, otikatkaj amo tiyolkualmej uan otimokokoliayaj.
4 Pero toTajtsin Dios tlen techmakixtia yokiteititi yolkuali uan kintlasojtla akinmej chantij tlaltikpak.
5 Ye otechmakixti porque otechiknomatki uan amo porque otikchijkej tlen kuali. Otechmakixti ijkuak otechchipa uan okichi matiyoltokan. Noijki ijkuak otechyankuili ika iespíritu santo.
6 Ye otechmakak sapanoua miak espíritu santo ika Jesucristo tlen techmakixtia.
7 Ijkon okichi para matikchiakan nochipa tiyoltoskej ijkon ken ye okijto. Tejuan uelis nochipa tiyoltoskej porque ye kitetliokolia tlen kuali uan non kichiua matechita tiyolkualmej.
8 Nin tlajtoli uelis kineltokaskej, uan nikneki nochipa xikinmilnamikti nin tlamantli akinmej kineltokaj toTajtsin Dios para nochipa makichiuakan tlen kuali. Nin tlamantli kuali uan nochtin kinpaleuia.
9 Pero amo ximokualani ika tlen tetlapololtia, amo ximokualani inuan akinmej kitemouaj intoka inuejkatatajuan, amo ximokualani inuan akinmej tlananankiliaj, amo ximokualani inuan akinmej mokualaniaj ika iTlanauatil Moisés porque non amitlaj ipati uan amitlaj tiktlanis.
10 Tla se tlakatl peua tlamachtia okse tlamantli uan yotiknejmachti ome uelta pero amo tlakaki, ayakmo iuan ximouika.
11 Porque tikmati non tlakatl ayakmo tlaneltoka, tlajtlakolchiua uan iselti motlajtlakoltia.
12 Ijkuak nimitstitlanilis Ártemas noso Tíquico, ximochijchikaua techitati Nicópolis porque yonikijto ompa nimokauas ijkuak seuas.
13 Ximochijchikaua tikinmakas tlen ika yaskej Apolos uan Zenas tlen tlamachtia iTlanauatil Moisés.
14 Pero tokniuan noijki mamomachtikan nochipa makichiuakan tlen kuali. Ijkon uelis tlapaleuiskej ijkuak monekis uan kichiuaskej tlen kuali.
15 Mitsontlajpalouaj nochtin akinmej nouan katej. Noijki techintlajpalili tokniuan tlen techtlasojtlaj.
ToTajtsin Dios nochipa nannochtin manamechtliokoli tlen kuali.
