Itech xiuitl 2020 miak otlaxixinki uan opejki coronavirus. ¿Tlen okichijkej iTlaixpantijkauan Jehová para kinpaleuiskej akinmej otlajyouijkej?

 Itech tekitl tlen omochi 2020, a Comité de Coordinadores del Cuerpo Gobernante okijtojkej ma motekitilti kanaj 550 millones de pesos (28 millones de dólares b [E.U.A] para otlapaleuijkej kanin otlaxixinki. Ika non tomin okinpaleuijkej kanin miak otlaxixinki. Okinpaleuijkej akinmej okintlajyouilti coronavirus, okinpaleuijkej kanin oejekakiauik uan okinpaleuijkej ompa África kanin otlatenki. Noijki ompa Venezuela okinpaleuijkej akinmej amo okipiayaj tlen kikuaskej uan noijki okinpaleuijkej ompa Zimbabue kanin otlauaki. Ika non tomin okikojkej tlakuali, atl, tlakemitl, pajtli uan kanin mokalotiskiaj tokniuan. Noijki okikojkej tlen ika tlachipauaskiaj, tlen ika tlayektlaliskiaj uan tlen ika kinyektlaliskiaj kalmej. Ma tikitakan tlen yokichijkej.

 CORONAVIRUS. Ipan nochi tlaltikpak nin kokolistli okintlajyouilti tokniuan, ik non, okintlalijkej 800 comités ma tlapaleuikan. Yejuan kitaj tlen kinpoloua tokniuan uan kinmiluiaj tokniuan tlen tlapaleuiaj itech Comité de Coordinadores. Ijkon yejuan kintitlaniliaj tlen kinpoloua.

 Itech non xiuitl, tokniuan tlen pouij itech comité tlen tlapaleuiaj okinmakakej tokniuan tlakuali, atl, tlen ika motlachipauiskiaj uan pajtli. Itech seki altepemej okinpaleuijkej tokniuan tlayekankej para kitaskiaj tekiuajkej ma kinpaleuikan tokniuan.

 Akinmej amo itlaixpantijkauan Jehová kitaj ken tikinpaleuiaj tokniuan. Se tlakatl tlen kinyekana policías itoka Field Simwinga uan chanti Nakonde ompa Zambia, okinmilui tokniuan: “Amo tikmatij ken timechkopiliskej porque onankinpaleuijkej akinmej tlajyouijtokej”.

 Amo okipiayaj tlen kikuaskej ompa Angola. Akinmej chantij Angola amo okipiayaj tlen kikuaskej uan otlapatiouak porque onka kokolistli coronavirus. Tokniuan amo ueli okikouayaj tlen kikuaskej.

 Ik non, okinmiluijkej tokniuan tlen tlapaleuiaj itech kali Betel tlen kajki Brasil, ma kintitlanilikan tlakuali tokniuan tlen chantij Angola. Tokniuan okitakej ken kikouaskiaj tlakuali uan ken kititlaniskiaj para kuali kitekitiltiskiaj tomin tlen kitemakaj. Okitakej okachi kuali kikouaskiaj miak. Okitekitiltijkej kanaj 437 pesos (22 dólares) tlen ika okikojkej sejse bulto tlakuali uan okititlankej. Sejse bulto okipiaya kanaj 20 kilos uan okipiaya arroz, etl uan aceite. Yokititlankej 33,544 bultos. Nochi okipiaya 654 toneladas. Nochi nin uan okseki tlamantli otlapaleui ma kintlamakakan kanaj 50,000.

 ¿Tlen mokuayejyekouaj tokniuan? Se tokni itoka Alexandre tlen chanti itech se altepetsintli ompa Angola, okijto: “Nikita Jehová nechtlasojtla. Amo nika noselti uan ialtepe Jehová sapanoua nechpatioita”. Mariza tlen iselti kiskaltia ikone, okijto: “Jehová onechkaki ijkuak oniktlatlaujti. Niktlasojkamatilia miak uan noijki ialtepe”.

 Otlauaki ompa Zimbabue. Itech tekitl tlen omochi 2020, otlauaki ompa Zimbabue, ik non, yiixpoliuiskiaj sapanoua miakej porque amo okipiayaj tlen kikuaskej. Miakej tokniuan amo okipiayaj miak tlakuali.

 Okintlalijkej makuili comités ma tlapaleuikan uan ijkon kintitlaniliskiaj tlakuali tokniuan. Miakej tokniuan tlen tetlapouiaj okiyektenkej tlakuali, okintlamamaltijkej camiones uan okintetlanetijkej incamion. c Itech tekitl tlen omochi 2020, tokniuan okitekitiltijkej trece millones setecientos treinta y nueve mil doscientos cuarenta y dos pesos (691,561 dólares). Ijkon okintlamakakej kanaj 22,700.

 Sekimej tokniuan ijkuak okiselijkej tlen okintitlanilijkej yokitlamijkaj tlakuali tlen okipiayaj, ik non, okitlasojkamatilijkej Jehová uan sekimej noijki okitlakuikilijkej.

 Ome tokniuan tlen ayakmo kipiaj innamik omonechikojkej itech inmialtepe iuan akinmej pouij itech ONG (organización no gubernamental) tlen kinpaleuiskiaj. Pero ijkuak ompa yokatkaj opejki motlapouiaj itech política, tokniuan okijtojkej amo kichiuaskiaj tlen okinmiluijkej. Ijkuak oyajkej, nochtin okinpinauijkej uan okinmiluijkej: “Amo satepan nanuitsej nantechtlajtlanilikiuij tlen nankikuaskej”. Pero kaxtoli tonal satepan tokniuan oajsitoj kanin yejuan ochantiayaj uan okinmakakej tlen kikuaskiaj nonmej ome tokniuan. Yejuan achto okinpaleuijkej, uan oksekimej ayamo okinpaleuiaya (ONG).

 Tlen opanok ompa Zimbabue okinpaleui oksekimej. Ma tikitakan tlen okipanok Prisca. Ye chanti itech se altepetsintli. Prisca otetlapouiaya miércoles uan viernes maski otlajyouijtoka porque otlauaki. Noijki otetlapouiaya ijkuak otlaxouayaj. Akinmej chantij kanin ye chanti okipinauiayaj uan okiluiayaj: “Apismikiskej akinmej inmiuan tichanti porque san titetlapouijtinemi”. Prisca okinmiluiaya: “Jehová amo keman kinkaua akinmej kitekichiuiliaj”. Amo uejkika, ialtepe toTajtsin Dios okititlanili tlakuali. Sekimej tlen ochantiayaj ik kanin ye ochantiaya omotlajtlachialtijkej uan okiluijkej: “ToTajtsin Dios amo keman mitskaua. Tiknekij tikixmatiskej”. Axkan, chikome tlen ik ompa chantij kikakij itech radio tlen timomachtiaj.

 Okachi tlaxixinis ijkuak nochi yitlamis (Mateo 24:3, 7, TNM). Timechtlasojkamatiliaj porque nankitemakaj namotomin ika nochi namoyolo itech donate.dan124.com uan itech okseki tlamantli. Non tomin ika kinpaleuiskej tokniuan tlen tlajyouijtokej.