1, 2. ¿Tlen kijtoua Biblia panoskia axkan?

 ITECH 2015 ijkuak otlalolinki ompa altepetl Nepal sekimej tlen omomakixtijkej okijtojkej: “Ijkuak opejki tlalolini san niman oxixinkej kalmej”. “Miakej omomojtijkej [...]. Miakej okijtojkej amo ouejka pero ne onikmachili kema”. Tla tejuan noijki ijkon techpanoskia, amo keman tikilkauaskiaj.

² Axkan tinochtin itlaj techpanotok. Yetoskia ken Jehová kintsetselotok nochi altepemej uan yiuejkika ijkon kichijtok. Ijkon okijto profeta Ageo: “Nin tlen kijtoua Jehová akin kinyekana soldados: ‘Ayakmo poliui miak oksepa nikintsetselos iluikak uan tlaltikpak, mar uan kanin tlauaki’” (Ageo 2:6).

3. ¿Tlen okijkuilo Ageo kijtosneki tlalolinis?

³ Tlen okijkuilo Ageo amo kijtosneki tlalolinis uan tlaxixinis, kijtosneki kuali tlen panoskia. Ijkon okijto Jehová: “Nikintsetselos nochi altepemej uan nochi tlen inmiaxka altepemej tlen miak ipati kalakis nokalijtik uan nikchiuas ma ueyitito” (Ageo 2:7). ¿Ken omochi non profecía ijkuak okatka Ageo uan akinmej ijkuakon ochantiayaj? ¿Ken mochiua axkan? Itech nin tlamachtil tikinnankiliskej nonmej tlajtlanilmej uan tikitaskej ken uelis titlapaleuiskej ijkuak yetoskia ken Jehová kintsetseloua altepemej.

4. ¿Tleka Jehová okititlanki profeta Ageo?

⁴ Jehová okilui profeta Ageo itlaj miak ipati ma kichiua.  Ma tikitakan tleka. Judíos tlen okinuikakej Babilonia oksepa omokopkej Jerusalén itech 537 achto itech xiuitl 1, xamo Ageo noijki inmiuan omokopki. Ijkuak itekipanojkauan Jehová oajsitoj Jerusalén san niman opejkej kichijchiuaj kali kanin kiueyichiuaskiaj (Esd. 3:8, 10). Pero san niman opejkej kinmixnamikej, ik non, omoyolkokojkej uan ayakmo okitlamijkej kali (Esd. 4:4; Ageo 1:1, 2). Pero itech 520 Jehová okilui Ageo ma kinyolchikaua uan ma kitlamikan (Esd. 6:14, 15). *

5. ¿Tleka okinyolchika judíos tlen okinmilui Ageo?

⁵ Tlen Ageo okinmilui judíos okinyolchika uan non okinpaleui okachi ma tlaneltokakan itech Jehová. Profeta Ageo okatka yolchikauak, ik non, okinmilui judíos tlen omoyolkokouayaj: “Nochtin tlen nikan nanchantij xiyetokan nanyolchikauakej, ijkon kijtoua Jehová, xitekipanokan. Porque ne namouan niyetos, ijkon kijtoua Jehová akin kinyekana soldados” (Ageo 2:4). Ijkuak okikakej tlajtoli “Jehová akin kinyekana soldados”, okinyolchika. Tla judíos okinekiayaj kitlamiskej teokali, omonekiaya kineltokaskej san ye uelis kinpaleuiskia porque kinpia miakej ángeles.

6. ¿Tlen panoskia ijkuak mochiuaskia tlen okijto profeta Ageo?

⁶ Jehová okilui Ageo ma kinmilui judíos yetoskia ken kintsetseloskia altepemej. Tlen Ageo okijto okinpaleui akinmej ayakmo otlapaleuijtokaj ma mochijchiua teokali, ma kajsikamatikan yetoskia ken Jehová kitsetseloskia altepetl tlen okachi oueyititoka, Persia. Ijkuakon non altepetl otlanauatiaya itech okseki altepemej ¿Tlen panoskia ijkuak Jehová ijkon kichiuiliskia? Ijkuakon uelis kitlamiskiaj teokali. Noijki akinmej amo okatkaj judíos ompa inmiuan uelis kiueyichiuaskiaj Jehová. Tlen Ageo okinmilui judíos sapanoua okinyolchika (Zac. 8:9).

7. Xikijto ken titlapaleuijtokej axkan.

⁷ ¿Ken tikajsikamatij axkan tlen okijto Ageo? Axkan Jehová noijki yetoskia ken kintsetselotok altepemej uan tejuan tikpaleuijtokej. Ma timokuayejyekokan nin: Jehová okikauili Jesucristo ma tlanauati itech 1914 ompa iluikak (Sal. 2:6). Akinmej ijkuakon otlanauatiayaj amo okinpakti, kijtosneki ‘otlanki tlan okichijtokah n tlakah’. Non kijtosneki amikaj tlanauatiskia ipatka Jehová (Luc. 21:24). Ik non, itekipanojkauan Jehová desde 1919 kintlapouiaj oksekimej san iTekiuajkayo techpaleuis. Non tekitl tlen kichiuaj yetoskia ken yokintsetselo miakej akinmej chantij itech nochi tlaltikpak (Mat. 24:14).

8. Ijkon ken kijtoua Salmo 2:1-3, ¿tlen kichiuaj miakej ijkuak tikintlapouiaj?

⁸ ¿Tlen kichiuaj miakej ijkuak tikintlapouiaj? Miakej amo kinekij kikakiskej (xiktlajtolti Salmo 2:1-3). Miakej amo kinpaktia. Amo kinekij kineltokaskej Jehová yokitlali ikaj ma tlanauati. Noijki amo kineltokaj ijkuak tikintlapouiaj tlen kichiuas iTekiuajkayo toTajtsin Dios. Ik non, itech seki altepemej ayakmo kinekij ma titetlapouikan. Maski miakej tekiuajkej kijtouaj tlaneltokaj itech toTajtsin Dios amo kinekij ye  ma kinnauati. Ijkon ken okichijkej tekiuajkej ijkuak okatka Jesús, axkan noijki miakej kixnamikej uan kintlajyouiltiaj itekipanojkauan Jehová (Hech. 4:25-28).

9. ¿Tlen kichiua Jehová ijkuak kita miakej amo kineltokaj tlen tikintlapouiaj?

⁹ ¿Tlen kichiua Jehová ijkuak kita miakej amo kineltokaj tlen tikintlapouiaj? Salmo 2:10-12 kijtoua: “Nochtin tekiuajkej, xiyetokan nanixtlamatkej uan xikselikan ma namechyektlalikan, namejuan akinmej nanjueces itech tlaltikpak. Xiktekichiuilikan Jehová uan xiktlakaitakan uan sapanoua xiyolpakikan. Xiktlakaitakan tekone tlamo toTajtsin Dios kualanis uan nanmikiskej itech ojtli porque ye totoka kualani. Yolpakij akinmej itech mopaleuiaj”. Jehová yolkuali uan ok kinkauilijtok tekiuajkej ma kipatlakan tlen mokuayejyekouaj uan ma kineltokakan ye ualtlanauatis. Pero moneki yikipejpenaskej ijkon kichiuaskej porque yitikatej itlamian tonalmej (2 Tim. 3:1; Is. 61:2). Axkan okachi moneki miakej ma kixmatikan Jehová uan tlen kijtoua iTlajtol, ijkon uelis kichiuaskej tlen ye kineki.

10. Ijkon ken kijtoua Ageo 2:7-9, ¿ken yokinpaleui miakej porque toTajtsin Dios yetoskia ken ‘kintsetseloua’ nochi altepemej?

¹⁰ Ijkuak Ageo okijto toTajtsin Dios yetoskia ken ‘kintsetseloskia’ altepemej, non kinpaleuiskia sekimej. Ye noijki okijto “inmiaxka altepemej tlen miak ipati [akinmej yolkualmej]” kiueyichiuaskej Jehová (xiktlajtolti Ageo 2:7-9). * Isaías uan Miqueas okijtojkej ijkon panoskia “itlamian tonalmej” (Is. 2:2-4, Miq. 4:1, 2).

11. ¿Tlen okichi se tokni ijkuak okitlapouijkej itech iTekiuajkayo toTajtsin Dios?

¹¹ Tlen kijtoua Biblia yetoskia ken okitsetselo se tokni tlen itoka Ken, ye tlapaleuia Betel tlen kajki ompa central mundial. Yikipia 40 xiuitl okitlapouijkej itech  iTekiuajkayo toTajtsin Dios. Ye okijto: “Ijkuak onechtlapouijkej tlen kijtoua Biblia, oniyolpakik porque onikmatki tikatej itlamian tonalmej. Onikajsikamatki tla oniknekiaya niyoltos nochipa uan ma nechseli Jehová, omonekiaya ayakmo nikchiuas ken oksekimej uan nikchiuas tlen ye kineki. San niman onimotlatlaujti. Ayakmo onikchi ken oksekimej uan opejki nikneltoka tlen kichiuas iTekiuajkayo toTajtsin Dios yetoskia ken amikaj uelis kitsetselos”.

12. ¿Ken kiueyichiuaj Jehová axkan itlamian tonalmej?

¹² Itech ninmej tonalmej Jehová kiteochijtok ialtepe. Axkan okachi timiakej tiktekichiuiliaj Jehová. Itech 1914 okachi amo timiakej otikatkaj pero axkan tikatej ocho millones tlen tiktekichiuiliaj Jehová. Uan sejse xiuitl okachi timiakej timonechikouaj ijkuak tikilnamikij imikilis Jesús. “Tlen inmiaxka altepemej tlen miak ipati”, yetoskia ken yotenkej itech iteokal Jehová, kijtosneki nochi tlen Jehová yokichi para ma tikueyichiuakan. Ijkuak yejuan kipatlaj innemilis ijkon ken Jehová kineki noijki kiueyichiuaj (Efes. 4:22-24).

13. ¿Tlen okseki profecías kiteititia noijki mochijtok? (Xikita dibujo itech página 1).

¹³ Tlamantli kualtsin tlen axkan panotok kiteititia noijki mochijtok okseki profecías. Itech amochtli Isaías capítulo 60 versículo 22, ompa kijtoua: “Tlen tsikitsin mochiuas mil, uan tlen amo ueyi mochiuas se altepetl chikauak. Ne Jehová noneuian, nikchiuas totoka ma mochiua ijkuak monekis”. Sapanoua tiyolpakij ijkuak miakej peuaj kitekichiuiliaj Jehová. Kiteititiaj ika tlen kimatij kinekij kinmatiltiskej oksekimej tlen kichiuas iTekiuajkayo toTajtsin Dios. Ialtepe Jehová kitekitiltiaj tlen kimatij kichiuaskej nonmej tokniuan uan ijkon yetoskia ken kitekitiltiaj “inleche altepemej” ijkon ken okijto Isaías (Is. 60:5, 16). Miakej tlakamej uan siuamej tetlapouiaj itech 240 altepemej uan altepetsitsintin uan ika 1,000 tlajtolmej motlajtolkopaj amatlajkuilolmej.

14. ¿Tlen moneki kichiuaskej miakej?

¹⁴ Axkan tikatej itlamian tonalmej. Ik non, yetoskia ken Jehová kintsetselojtok altepemej uan non yokichi miakej ma kipejpenakan tlen moneki kichiuaskej. ¿Kipaleuiskej iTekiuajkayo toTajtsin Dios noso kinpaleuiskej tekiuajkej? Tiitekipanojkauan Jehová tikintlakamatij tekiuajkej pero amo timokajkalakiaj itech política (Rom. 13:1-7). Tikmatokej san iTekiuajkayo toTajtsin Dios kiyektlalis tlen tinochtin techtlajyouiltia uan non Tekiuajkayotl amo poui iuan tekiuajkej tlen axkan katej (Juan 18:36, 37).

15. ¿Ken kiteititia amochtli Apocalipsis itekipanojkauan Jehová kinyejyekoskej?

¹⁵ Itech amochtli Apocalipsis kiyekijtoua itlamian tonalmej motas tla tiitekipanojkauan Jehová nochipa tiktlakamatiskej. Non kijtosneki ok sapanoua techtlajyouiltiskej. Tekiuajkej kinekiskej ma tikinpaleuikan uan tla amo tikchiuaj tetlajyouiltiskej (Apoc. 13:12, 15). Biblia kijtoua: “Nochteh n tlakah, tsitsikitikeh iwa wejweyih, próbesteh iwa akimeh kitlawelpiah tomi, akimeh tenawak tekitih, iwa akimeh inselti monawatiah, nochteh makinmixneskayotikah” (Apoc. 13:16). Yiuejkika tlakeualmej okintlaliliayaj se marca tlen okiteititiaya akin okatka inteko. Noijki ijkon axkan tekiuajkej kinekiskej nochtin ma kipiakan ken yetoskia se marca intech inma noso inmixkuapak. Kijtosneki kinekiskej nochtin ma kiteititikan kinpaleuiaj tekiuajkej ika tlen kichiuaskej uan ika tlen mokuayejyekoskej.

16. ¿Tleka axkan moneki ma tiktlakamatikan Jehová ika nochi toyolo?

¹⁶ ¿Uan tejuan tlen tikchiuaskej? ¿Tikmotlaliliskej non marca uan tikinpaleuiskej tekiuajkej? Akinmej amo kinekiskej kinpaleuiskej tekiuajkej kintlajyouiltiskej. Amochtli Apocalipsis kijtoua amikaj “weletis tlakoas noso tlanemakas, sanwel akin ipan ixkuak noso itech ima ixmachotitos” (Apoc. 13:17). Tiitekipanojkauan toTajtsin Dios tikmatij tlen kinchiuilis akinmej kipiaj non marca (Apoc. 14:9, 10). Pero yejuan amo kimotlaliliskej non marca uan yetoskia ken inma kijkuiloskiaj yejuan iaxkauan Jehová (Is. 44:5). Ik non, axkan ma timochijchikauakan nochipa ma tiktlakamatikan Jehová ika nochi toyolo. Tla ijkon tikchiuaj, tikyolpaktiskej uan ye kijtos tiiaxkauan.

17. ¿Tlen moneki tikilnamiktoskej?

¹⁷ Axkan itlamian tonalmej Jehová ok mochixtok (2 Ped. 3:9). Ok kinkauilijtok oksekimej ma moyolkopakan uan ma kipejpenakan tlen kuali. Pero ye amo san nochipa mochixtos. Akinmej amo kinekij kipaleuiskej iTekiuajkayo Jehová kinpanos ijkon ken yiuejkika okipanok faraón ijkuak okatka Moisés. Jehová okilui: “Ne uelis nimitstlajyouiltiskia uan noijki moaltepe uelis nikmiktiskia ika se kokolistli uan te ayakmo tiyetoskia. Pero onimitskauili xiyolto para nimitsititis nichikauak uan para ma motematilti notoka itech nochi tlaltikpak” (Éx. 9:15, 16). Saiktlami nochtin kimatiskej san toTajtsin Jehová melauak Dios (Ezeq. 38:23). Pero ¿ken panos?

18. (1) ¿Tlen kijtosneki tlen ijkuilitok itech Ageo 2:6, 20-22? (2) ¿Ken tikmatij tlen okijkuilo Ageo panos satepan?

¹⁸ Ijkuak Ageo oixpoliuik, miak xiuitl  satepan apóstol Pablo okijto tlen ijkuilitok itech Ageo 2:6, 20-22 satepan mochiuaskia (xiktlajtolti). Ye okijkuilo: “Oksepa nikchiwas matlalolini, iwa axa amo san tlaltíkpaktli niktsejtselos, yej noiwa n ilwikak. Iwa ijkuak okijto ‘oksepa’, non tlájtoli kijtosneki pojpoliwis nochi tlan molinia, iwa mokawas sanwel [tlen kitsetseloskej]” (Heb. 12:26, 27). Itech Ageo 2:7, kiteititia toTajtsin Dios tlatsetselos pero tlen okijto Pablo kijtosneki kinmixpolos akinmej kichiuaj ken faraón porque amo kinekij ma tlanauati toTajtsin Dios.

19. ¿Tlen amo pojpoliuis uan ken tikmatij?

¹⁹ Pero ¿tlen amo kitsetseloskej noso amo kipojpoloskej? Apóstol Pablo okijto: “Iwa tejwah Dios techmaka se lojar kan Ye tlanawatijtok iwa ayik molinis. [...] Matikweyijkachiwakah ika weyílistli iwa tlasojtlálistli non Ye kipaktia” (Heb. 12:28). Ijkuak kinmixpoloskej akinmej kichiuaj tlen amo kuali, san ye iTekiuajkayo toTajtsin Dios mokauas (Sal. 110:5, 6; Dan. 2:44).

20. ¿Tlen moneki kipejpenaskej miakej uan ken uelis tikinpaleuiskej?

²⁰ Axkan miakej moneki kipejpenaskej tlen kichiuaskej: tla ok kichijtoskej ken akinmej amo kitlakamatij Jehová, kinmixpoloskej. Tla kipejpenaj kitekichiuiliskej Jehová uan kipatlaj innemilis, nochipa yoltoskej (Heb. 12:25). Tejuan titetlapouiaj uan ijkon tikinpaleuiaj oksekimej ma kipejpenakan tlen kichiuaskej. Ik non, ma timochijchikajtokan ma tikinpaleuijtokan oksekimej ma kitekichiuilikan Jehová. Uan ma tikilnamikikan tlen Jesús okijto: “Ninmej kuali tlajtolmej itech Tekiuajkayotl motetlapouis itech nochi tlaltikpak para ma kimatikan nochi altepemej, ijkuakon nochi tlamis” (Mat. 24:14, TNM).