1. ¿Ken uelis tiknotsaskej Jehová?

 IFAMILIA Jehová kiueyichiuaj, ompa poui miakej ángeles uan Jesús akin achto okichijchi Jehová (Col. 1:15; Sal. 103:20). Ijkuak Jesús okatka nikan tlaltikpak okiteititi uelis tiknotsaskej Jehová ken toTajtsin. Se tonal ijkuak Jesús omotlapouijtoka iuan imachtijkauan okijto Jehová “Notajtsi, Akin noiwa Nomotata” (Juan 20:17). Ijkuak otimotemakakej ixpan Jehová uan otimoapolaktijkej tokniuan omochijkej tofamilia (Mar. 10:29, 30).

2. ¿Tlen timomachtiskej?

² Sekimej tokniuan kitaj oui kitaskej Jehová ken intajtsin akin tetlasojtla. Oksekimej xamo kitaj oui kintlasojtlaskej oksekimej tokniuan. Itech nin tlamachtil tikitaskej ken Jesús techpaleuia ma tikitakan Jehová ken toTajtsin akin techtlasojtla uan kineki iuan ma timouikakan. Noijki tikitaskej ken uelis tikintlasojtlaskej tokniuan ijkon ken Jehová kichiua.

3. ¿Tleka tlatlaujtilistli padrenuestro techpaleuis okachi ma timouikakan iuan Jehová?

³ Jesús kineki ma tikitakan Jehová ken toTajtsin akin techtlasojtla uan nochipa uelis iuan timotlapouiskej. Amo kineki ma tikitakan ken akin san technauatijtok. Jesús ijkon okinmititi imachtijkauan ijkuak omotlatlaujti okijto: “Totajtsi” (Mat. 6:9). Jesús uelis kijtoskia ma tiknotsakan Jehová “akin kipia miak chikaualistli”, “akin oKichijchi nochi” noso “Torey non nochipa yolitok” porque non noijki ijkuilitok itech Biblia (Gén. 49:25; Is. 40:28; 1 Tim. 1:17). Pero ye otechititi ma tiknotsakan “toTajtsin”.

4. ¿Ken tikmatij Jehová kineki iuan ma timouikakan?

 ⁴ ¿Oui tikitaj Jehová ken toTajtsin akin techtlasojtla? Sekimej kema ijkon techpanoua. Xamo ijkon techpanoua porque ijkuak otikatkaj tikonemej otitlajyouijkej. Techyolseuia tikmatiskej Jehová techajsikamati uan kineki touan mouikas. Ik non, iTlajtol techiluia: “[Ximotokikan] inawak Dios, iwa Ye [motokis] nomonawak” (Sant. 4:8). Jehová san ye uelis yetos toTajtsin porque sapanoua techtlasojtla.

5. Ijkon ken kijtoua Lucas 10:22, ¿tleka Jesús uelis techpaleuis ma timouikakan iuan Jehová?

⁵ Jesús uelis techpaleuis ma timouikakan iuan Jehová. Kuali kixmati uan kipia iyelis ijkon ken iTajtsin, ik non, okijto: “Akin yonechitak kijtosneki yokitak Notajtsi” (Juan 14:9). Jesús yetoskia ken se tokni tlen okachi ueyi, techititia moneki ma tiktlakaitakan, ma tiktlakamatikan toTajtsin uan ma tikyolpaktikan. Ijkuak Jesús okatka nikan tlaltikpak okiteititi Jehová yolkuali uan techtlasojtla (xiktlajtolti Lucas 10:22). Ma tikitakan ken okichi.

6. Xikijto ken Jehová okikak Jesús.

⁶ Jehová kinkaki ikoneuan. Ma tikitakan ken okikakili Jesús. Ijkuak okatka nikan tlaltikpak nochipa okitlatlaujti Jehová uan ye nochipa okikakiaya (Luc. 5:16). Ijkon okichi ijkuak kinpejpenaskia 12 apóstoles (Luc. 6:12, 13). Jehová noijki okikakili Jesús ijkuak sapanoua omotekipachouaya. Ijkuak Judas yikinemakaskia, sapanoua okitlatlaujti Jehová porque oui tlen kixnamikiskia. Jehová amo san okikak iKone, ye okiualtitlanili se ángel ma kiyolchikauaki (Luc. 22:41-44).

7. ¿Ken timomachilia tejuatsin ijkuak tiktlatlaujtia Jehová uan mitsnankilia?

⁷ Axkan noijki ijkuak tiktlatlaujtiaj Jehová ye techkaki uan techpaleuia ijkuak moneki (Sal. 116:1, 2). Ijkon okipanok se tokni siuatl tlen chanti ompa altepetl India. Sapanoua omotekipachojtoka  uan okilui Jehová ma kipaleui. Ye okijto: “JW Broadcasting^® tlen okiski itech mayo 2019 kijtoua tlen uelis tikchiuaskej para amo okachi ma timotekipachokan. Onikitak tlen oniktlatlaujti Jehová onechnankili”.

8. ¿Ken okititi Jehová kitlasojtla Jesús?

⁸ Jehová techtlasojtla ijkon ken okitlasojtlak iKone ijkuak okatka nikan tlaltikpak (Juan 5:20). Okipaleui para ma kipia chikauak itlaneltokilis, okiyolchika uan okipaleui para ma kipia tlen ika mopanoltiskia. Nochipa okitlasojtlak uan okipatioitaya tlen okichiuaya (Mat. 3:16, 17). Jesús amo keman omomachili iselti, okimatiaya iTajtsin nochipa kipaleuiskia (Juan 8:16).

9. ¿Ken techititia Jehová techtlasojtla?

⁹ Ijkon ken Jesús tinochtin yotikitakej Jehová techtlasojtla. Ma timokuayejyekokan nin: Jehová techpaleuia ma tikixmatikan uan techkauilia ma tiyetokan iuan tokniuan ken yetoskia tofamilia, inmiuan timotlasojtlaj, kuali timouikaj uan non kichiua ma tiyolpakikan uan kuali ma timomachilikan (Juan 6:44). Noijki techpaleuia ma tikpiakan tlen moneki uan ijkon ma tikpiakan chikauak totlaneltokilis uan techpaleuia nochipa ma tikpiakan tlen ika timopanoltiskej (Mat. 6:31, 32). Ijkuak timokuayejyekouaj Jehová sapanoua techtlasojtla, tejuan noijki okachi tiktlasojtlaj.

10. ¿Ken uelis tikintlasojtlaskej tokniuan ijkon ken kichiua Jehová?

¹⁰ Jehová kintlasojtla tokniuan pero xamo tejuan tikitaj oui tikinmititiskej tikintlasojtlaj. Xamo tikitaj oui porque oksekan toaltepe uan okse tlamantli otechiskaltijkej. Tinochtin titlajtlakolejkej uan ualeua timotlapololtiaj, ik non, tlen tikchiuaj uelis kinkuejsos oksekimej. Maski ijkon techpanoua uelis timochijchikauaskej tikintlasojtlaskej tokniuan ijkon ken Jehová kichiua (Efes. 5:1, TNM, 2; 1 Juan 4:19). Ma tikitakan ken kichiua Jehová.

11. ¿Ken okiteititi Jesús oteiknomatiaya ijkon ken Jehová?

¹¹ Jehová kiteititia techiknomati (Luc.1:78). Akin teiknomati kitekipachoua ijkuak kita oksekimej tlajyouiaj, kinyolchikaua uan kinpaleuia. Jesús okitak ken kinpaleuiskia oksekimej, ijkon okiteititi oteiknomatiaya ken Jehová (Juan 5:19). Biblia kijtoua: “Okimitak n tlakah, okimiknoma ken sa tlawel osotlawatokah iwa oyetokah inselti kemi ichkameh non amo kipiah tlajpixki non kinyakanas” (Mat. 9:36). Jesús oteiknomatki, ik non, otlapaleui. Okinpajti akinmej omokokouayaj uan okinpaleui akinmej sapanoua otekipanouayaj uan osotlauayaj (Mat. 11:28-30; 14:14).

12. ¿Ken titeiknomatiskej?

¹² Tla tiknekij tikinpaleuiskej uan tikinmiknomatiskej tokniuan, ma timokuayejyekokan tlen kinpanotok. Xamo se tokni sapanoua mokokoua. Xamo amo san kijtojtok tlen kipanotok pero xamo yolpakis tla tikpaleuiaj. Xamo okse tokni kita oui kichiuas tlen moneki ikalijtik. Xamo motlasojkamatis tla tikpaleuiaj titlakualchiuaj noso tikchipauaj ikalijtik. Noso ma tikijtokan se tokni ayakmo kipia tekitl, uelis tiktliokoliskej seki tomin uan amo moneki ma kimati  tejuan ijkon otikchijkej uan ijkon tikpaleuiskej hasta ma kajsi tekitl.

13, 14. ¿Ken uelis tiktemakaskej tlen tikpiaj ijkon ken kichiua Jehová?

¹³ Jehová kipaktia kitemakas tlen kipia (Mat. 5:45). Tla tiknekij tikchiuaskej ijkon ken Jehová, moneki ma kisa itech toyolo tikinpaleuiskej tokniuan. Jehová mojmostla kichiua ma kisa tonaltsin uan ye amo mochixtok ma tikiluikan ijkon ma kichiua uan amo san kinpaleuia akinmej motlasojkamatij. Jehová techititia techtlasojtla porque techmaka tlen moneki. ¡Ye yolkuali uan kipaktia kitemakas tlen kipia, ik non, sapanoua tiktlasojtlaj!

¹⁴ Miakej tokniuan kichiuaj ken toTajtsin Jehová, kinpaktia kitemakaskej tlen kipiaj. Ma tikitakan tlen opanok ompa Filipinas. Itech 2013 opanok se supertifón tlen okitokayotijkej Haiyan. Miakej tokniuan oxixinki inkal uan okipolojkej miak tlamantli. Pero tokniuan tlen chantij intech okseki altepemej san niman okinpaleuitoj. Okitemakakej tomin uan oksekimej ompa otlapaleuitoj uan ijkon tokniuan okinchijchijkej 750 kalmej ijkuak ayamo oajsiaya se xiuitl. Ijkuak yokatka kokolistli COVID-19, tokniuan okinpaleuijkej itech tlen omonekiaya. Ijkuak san niman tikitaj ken tikinpaleuiskej tokniuan, tikteititiaj tikintlasojtlaj.

15, 16. Ijkon ken kijtoua Lucas 6:36, ¿ken moneki tikchiuaskej ijkon ken toTajtsin Jehová kichiua?

¹⁵ Jehová teiknomati uan techtlapojpoluia (xiktlajtolti Lucas 6:36). Mojmostla techiknomati (Sal. 103:10-14). Jesús noijki ijkon okichiuaya, ye okinmiknomatki uan okintlapojpolui imachtijkauan. Uan hasta topatka okitemakak inemilis para ijkon toTajtsin Dios ma techtlapojpolui (1 Juan 2:1, 2). Jehová uan Jesús teiknomatij uan tetlapojpoluiaj uan non kichiua okachi inmiuan ma timouikakan.

¹⁶ Ijkuak tikintlapojpoluiaj tokniuan uan ayakmo tikilnamiktokej tlen otechchiuilijkej, okachi inmiuan timotlasojtlaj (Efes. 4:32). Maski ualeua oui  tikintlapojpoluiskej moneki timochijchikauaskej ijkon tikchiuaskej. Se tokni kijtoua sapanoua okipaleui revista Akin Tetlapouijtok, tlamachtil tlen itoka “Perdónense liberalmente unos a otros”. * Ye okijto: “Onimomachti tlen ompa kijtoua uan onechpaleui kuali ma nimokuayejyeko. Ompa kiyekijtoua ijkuak ikaj tiktlapojpoluiaj amo kijtosneki kuali tikitaj ijkuak kinyolkokoua oksekimej. Pero kema kijtosneki ayakmo iuan ma tikualanikan uan kuali iuan ma timouikakan”. Ijkuak tikintlapojpoluiaj tokniuan ika nochi toyolo, tikinmititiaj tikintlasojtlaj uan tikchiuaj ken toTajtsin Jehová.

17. Ijkon ken kijtoua Mateo 5:16, ¿ken uelis tiktlakaitaskej toTajtsin Jehová?

¹⁷ Se ueyi tlateochiualistli yetoskej tofamilia tokniuan tlen katej itech nochi tlaltikpak. Tiknekij oksekimej noijki ma kitekichiuilikan Jehová. Ik non, amo tiknekij tikchiuaskej itlaj tlen uelis kichiuas amo kuali ma tlajtokan itech Jehová noso itech ialtepe. Nochipa tiknekij tikpiaskej chipauak tonemilis para ijkon oksekimej ma kinekikan kikakiskej tlen kijtoua Biblia (xiktlajtolti Mateo 5:16).

18. ¿Ken uelis titetlapouiskej uan amo timomojtiskej?

¹⁸ Ualeua sekimej techkokoliskej uan techtlajyouiltiskej porque tiktlakamatij Jehová. ¿Tlen uelis tikchiuaskej tla timomojtiaj tikintlapouiskej oksekimej tlen tikneltokaj? Ma tikilnamikikan Jehová uan Jesús techpaleuiskej. Jesús okinmilui imachtijkauan amo ma motekipachokan. Ye okinyekilui: “Itech non ora Dios [n]omechilis tlan nonkijtoskeh. Amo nomejwah nontlajtoskeh, yej Iespíritu Nomotajtsi akin tlajtos nomotech” (Mat. 10:19, 20).

19. ¿Ken otetlapoui se tokni uan amo omomojti?

¹⁹ Ma tikitakan tlen okipanok se tokni tlen itoka Robert. Ijkuak opejki momachtia  Biblia amo okachi okimatiaya porque yikin opejki momachtia. Omonekiaya yas itech tribunal tlen kajki ompa Sudáfrica para kinmiluitoskia tleka amo mochiuaskia soldado. Okijto amo ijkon kichiuaskia porque kintlasojtla tokniuan. Se Juez okitlajtlani: ¿Akinmej mokniuan? Robert amo okimatiaya kox non kitlajtlaniskia pero san niman okilnamik Mateo 12:50 tlen omotlajtolti non tonal, ompa kijtoua: “Akin kichiwa tlan kimonekiltia Notajtsi Dios non kajki ilwikak, ye nokni, nowelti iwa nomamá”. Maski Robert yikin omomachtijtoka Biblia kuali okinankili nochi tlen okitlajtlani non juez. ¡Jehová sapanoua oyolpakik ika tlen okichi non tokni! Noijki tikyolpaktiskej tla itech titlaneltokaj uan titetlapouiaj ijkuak tikixnamikij ouijkayotl.

20. ¿Tlen ok moneki ma tikchijtokan? (Juan 17:11, 15).

²⁰ Ma timotlasojkamatikan porque tokniuan yetoskia ken tofamilia. ToTajtsin Jehová sapanoua techtlasojtla uan noijki tokniuan techtlasojtla uan amo keman ma tikilkauakan. Satanás uan akinmej kinyekana, kinekij amo ma tikneltokakan Jehová techtlasojtla uan kichiuaj miak tlamantli para ayakmo ma timouikakan iuan. Pero Jesús topatka omotlatlaujti uan okilui Jehová ma techpaleui para kuali ma timouikakan iuan tokniuan (xiktlajtolti Juan 17:11, 15). Jehová kinankilia tlen Jesús okitlajtlanki. Ma tikchiuakan ken Jesús, nochipa ma tikneltokakan Jehová techtlasojtla, techpaleuia uan okachi ma timouikakan iuan tokniuan.