Ika hebreo uelis moajsikamatis ome tlamantli. Ik non, ma tikitakan tleka ijkon omotlajtolkuepki:

1. Ma tikitakan tlen kijtoaj okseki versículos. Ijkuak versículo 12 kitekitiltia akin, kijtosneki tlateochiualistli tlen kijtoaj versículos 12 a 14 uan nin kipiaj akinmej yolmelauakej, yejuan kijtoaj itech versículo 11 ma kinmakixti toTajtsin Dios porque kintlajyouiltiaj. Ik non, tlajtoli “yolpaki” moajsi ome uelta itech versículo 15 uan san kinnamiki akinmej yolmelauakej noso altepetl akin iDios ye Jehová.

2. Nin mouika iuan okseki versículos kanin kijtoa toTajtsin Dios kinteochiuas akinmej amo kikauaj. Salmo 144 kiteititia David okineltokaya toTajtsin Dios kinmakixtiskia israelitas uan kinmakaskia miak tlateochiualistli (Lev. 26:9, 10; Deut. 7:13; Sal. 128:1-6). Se neskayotl tikajsij itech Deuteronomio 28:4, kijtoa: “Kinteochiuaskej mokoneuan uan noijki tlen tiktokas uan noijki kinteochiuaskej inkoneuan moyolkauan uan inkoneuan mochkauan”. Ijkon opanok ijkuak ikone David omochi ueyi tekiua. Ijkuakon akinmej ochantiayaj itech non altepetl sapanoa oyolpakej uan amo keman ijkon okinpanoaya. Ijkon ken otlanauati Salomón, okiteititi ken tlanauatis Mesías (1 Rey. 4:20, 21; Sal. 72:1-20).

Ik non, tlen kijtoa Salmo 144 kichiua okachi kuali ma tikajsikamatikan Biblia. Uan salmo kiteititia tlen sapanoa kichiaj iTlaixpantijkauan Jehová. Ma kinmixpolo Jehová akinmej amo yolkualmej uan nochipa ma kipiakan yolseuilistli uan ma yolpakikan akinmej yolmelauakej (Sal. 37:10, 11).