YISEXIUITL miakej iTlaixpantijkauan Jehová itech nochi tlaltikpak okintlalijkej ken tlayekankej uan siervos ministeriales. Xamo tejuatsin omitsmakakej nin tekitl uan sapanoa tiyolpaki.

Xamo tepitsin timomojtia pero amo ximotekipacho tinochtin ijkon techpanoa. Se tlayekanki akin ok telpochtli okijto: “Ijkuak onechtlalijkej nitlayekanki, onikmachiliaya onikpiaya miak tekitl uan amo uelis nikchiuaskia”. Moisés uan Jeremías noijki ijkon okinpanok ijkuak okijtojkej amo uelis kichiuaskiaj tekitl tlen okinnauati Jehová (Éx. 4:10; Jer. 1:6). ¿Ualeua ijkon timomachilia? ¿Tlen tikchiuas para ayakmo ijkon timomachilis uan okachi kuali titekitis? Ma tikitakan ineskayo Timoteo (Hech. 16:1-3).

Timoteo xamo okipiaya kanaj 20 xiuitl ijkuak Pablo okilui iuan ma uia uejka ma tetlapouitij. Ijkuak opejki xamo omokuayejyekoaya amo uelis tlapaleuiskia itech tlanechikol (1 Tim. 4:11, 12; 2 Tim. 1:1, 2, 7). Pero satepan Pablo okinmilui tokniuan tlen ochantiayaj Filipos: “Tla Toteko Cristo Jesús kimonekiltis, san nima niktitlanis n Timoteo manomechonitati [...]. Porke sanwel Timoteo satlawel motlamia por nomejwah kemi ne” (Filip. 2:19, 20).

¿Tlen okipaleui Timoteo kuali ma tekiti ken tlayekanki? Ma tikitakan chikuase tlamantli tlen noijki mitspaleuis.

1. Omotekipachoaya itech oksekimej. Pablo okinmilui tokniuan tlen ochantiayaj Filipos, Timoteo melauak intech omotekipachoaya (Filip. 2:20). Okiteititi melauak intech omotekipachoaya. Okinekiaya kinpaleuis ma kipiakan chikauak intlaneltokilis.

Amo xikchiua ken akin kiuika se autobús, ye okachi kitekipachoa totoka ajsiti uan amo mochia ijkuak ikaj kineki tlejkos. William akin yikipia kanaj 20 xiuitl tekiti ken tlayekanki, kinmiluia oksekimej tlayekankej: “Xikintlasojtlakan tokniuan. Kuali xikitakan tlen kinpoloa uan amo san xikchiuakan namomoteki porque ijkon ijkuilitok”.

2. Ye okachi okipatioitaya achto tetlapouis. Pablo okijto Timoteo amo okichiuaya ken oksekimej tlen san “okachi kintekipachoa san tlan yejwah kinekih iwa amo tlan Cristo Jesús kimonekiltia” (Filip. 2:21). Pablo okatka Roma ijkuak okijkuilo tlen yotikijtojkej uan okitak tokniuan okachi okintekipachoaya tlen yejuan okinekiayaj. Amo omochijchikauayaj okachi kitekichiuiliskej toTajtsin Dios. Pero Timoteo amo ijkon okichi. Ijkuak omonekiaya okachi tetlapouis ye okichiuayaj ken Isaías akin okijto: “¡Nikan nika! Techtitlani” (Is. 6:8).

¿Tlen tikchiuas para amo san ma mitstekipacho tlen okachi tikneki tikchiuas? Se tlamantli, xikita tlen okachi moneki achto tikchiuas. Ijkon ken Pablo okijto ma tikitakan “tlan okachi kuali” tikchiuaskej (Filip. 1:10). Xikita tlen okachi kipatioita toTajtsin Dios uan noijki xikpatioita. Okse tlamantli, ayakmo xiktemo tlen amo moneki. Xikkaua nochi tlen kichiua ayakmo ximajxili uan tlen mitssotlaua. Pablo okinejmachti Timoteo: “Xikcholili tlan amokuali kinyoltilana n telpokameh. Te nochipa xikchiwa tlan kuali, nochipa xitlaneltoka, iwa ika tlasojtlálistli iwa yolsewílistli” (2 Tim. 2:22).

 3. Omochijchikauaya kitekichiuilis Jehová. Pablo okinmilnamikti tokniuan tlen ochantiayaj Filipos: “Nomejwah kuali nonkimatokeh kenijki yektekiti n Timoteo, iwa nonkimatokeh noiwa kenijki onechpalewi kemi se tekone non kipalewia ita, ijkuak otitetlapowijkeh n kualitlájtol” (Filip. 2:22). Timoteo amo otlatsiuiaya. Ye uan Pablo omochijchikajkej san sekan tekitiskej, ik non, kuali omouikayaj.

Itech ialtepe Jehová onka miak tekitl tlen uelis tikchiuas uan nin mitspaleuis xiyolpaki uan kuali ximouika iuan tokniuan. Ik non, nochipa “xikmopantikah iteki n Toteko” (1 Cor. 15:58).

4. Okichi tlen omomachti. Pablo okitlajkuilili Timoteo: “Te tikchijtiwits tlan onimitsmachti, tikmati kenomi niyeknemi, tikmati tlan nikneki nikchiwas, tikixmati notlaneltokalis, tikmati kenomi nikmati nimochia, tikixmati notlasojtlalis, iwa tikmati kenomi nikxikoa nochi tlan nopa wits” (2 Tim. 3:10). Timoteo okichi tlen okimachtijkej, ik non, okachi okimakakej tekitl (1 Cor. 4:17).

¿Tikpia se moyolikni ixtlamatki tlen uelis mitspaleuis? Tlamo se xiktemo. Tom, yikipia miak xiuitl tekiti ken tlayekanki, okijto: “Se tlayekanki tlen okatka ixtlamatki opejki notech motekipachoa uan onechpaleui. Onikiluiaya ma nechpaleui ma nechilui ken nikchiuaskia seki tekitl uan onikchiuaya ken onechiluiaya. Non onechpaleui kuali ma nimomachili ijkuak nikchiua noteki”.

5. Nochipa omomachti para kipias chikauak itlaneltokilis. Pablo okilui Timoteo: “Te okachi ximomachti kenomi timotemakas ika nochi moyolo imak Dios” (1 Tim. 4:7). Akin mauiltia kipia akin kimachtia pero noijki uelis iselti kichiuas. Pablo okilui Timoteo: “Te nochipa xikimpoilijto n kualitlájtoli nochteh n tokniwah xikinyolchikawa iwa xikinmachti [...]. Xikmosenmaka nochi tlan yonimitsnajnawati, iwa ijkó nochteh kitaskeh tikyekchiwa moteki” (1 Tim. 4:13-15).

Noijki moneki tikmatis ken okachi kuali tikchiuas tekitl. Nochipa ximomachti uan xikmati tlen okachi yankuik tlanauatia ialtepe Jehová. Amo ximokajkayaua. Amo ximokuayejyeko ayakmo timomachtis porque yitikmati ken tikyektlalis seki tlamantli. Ijkon ken Timoteo ximotlachili uan xikita ken titlamachtia (1 Tim. 4:16).

6. Omoyekanki ika iespíritu Jehová. Pablo okilui Timoteo “ika ichikawalis n Espíritu Santo” ma kimalui iteki (2 Tim. 1:14). Para kimaluiskia tlen otlamachtiaya, omonekiaya moyekanas ika iespíritu Jehová.

Donald tlen yikipia miak xiuitl tekiti ken tlayekanki, okijto: “Tokniuan tlen tlayekanaj itech tlanechikol moneki ma kipatioitakan non tekitl uan kuali ma mouikakan iuan Jehová” uan ijkon okachi yetoskej chikauakej. Tla nankitlajtlaniskej iespíritu Jehová uan nochi tlamantli tlen itech poui uan noijki nankichiuaskej, melauak nanyetoskej se tlateochiualistli para tokniuan (Sal. 84:7; 1 Ped. 4:11).

Melauak tiyolpakij ijkuak kintlaliaj tlayekankej ken tejuatsin porque moskaltijti intlaneltokilis. Jason akin itech yotimotlapouijkej, okijto: “Nochi xiuitl tlen nitekititok ken tlayekanki yonimomachti miak tlamantli uan axkan okachi kuali nimomachilia nitekitis. Nechpaktia tekitl tlen nikpia uan nikita ken se tlateochiualistli”.

¿Uan tejuatsin timochijchikauas okachi ma moskalti motlaneltokilis? Xikchiua ken Timoteo. Uan ijkon tiyetos se tlateochiualistli para tokniuan.