1. ¿Tlen tiknekij tikchiuaskej akinmej tiktekichiuiliaj toTajtsin Dios uan tleka? (Xikita ixko revista).

JESUCRISTO okinnauati imachtijkauan: “Xiakan xikinchiuakan nomachtijkauan itech nochi altepemej” (Mat. 28:19, TNM). Akinmej tiktekichiuiliaj Jehová tiknekij tikmatiskej ken uelis okachi tiktekichiuiliskej (2 Tim. 4:5). Tikmatokej miak ipati titetlapouiskej uan moneki totoka ma tikchiuakan. Pero ualeua amo nochipa titetlapouiaj ken tiknekiskiaj.

2. ¿Tleka ualeua amo timajxiliaj okachi tiktekichiuiliskej Jehová?

² Ualeua tikchiuaj okseki tlamantli miak ipati uan amo timajxiliaj uan timosotlauaj. Xamo sapanoa titekipanoaj para tikinmakaskej tokalchanejkauan tlen ika mopanoltiskej. Xamo tikixnamikij okseki ouijkayotl porque se tokalchanejka mokokoa, yikipia miak xiuitl noso ikaj moyolkokoa. ¿Ken uelis tikixnamikiskej nochi nin tlamantli uan noijki okachi tiktekichiuiliskej Jehová?

3. ¿Tlen moneki tikchiuaskej ijkon ken kijtoa Mateo 13:23?

³ Amo ma timoyolkokokan tla amo okachi titetlapouiaj. Jesús yokimatiaya amo tinochtin nochipa titetlapouiskiaj (xiktlajtolti Mateo 13:23). Jehová kipatioita tla timochijchikauaj tiktekichiuiliskej ika nochi toyolo (Heb. 6:10-12). Pero ualeua xamo tikijtoskej ayakmo timajxiliaj okachi tiktekichiuiliskej. Ik non, axkan timomachtiskej tlen okachi moneki tikpatioitaskej, tleka  amo ma tiktemokan miak tlamantli uan ken uelis okachi tiktekichiuiliskej Jehová. Pero achto ma tikitakan tlen kijtosneki okachi tiktekichiuiliskej Jehová.

4. ¿Tlen kijtosneki timochijchikauaskej okachi tiktekichiuiliskej Jehová?

⁴ Tiktekichiuiliskej Jehová kijtosneki timochijchikauaskej titetlapouiskej uan titlamachtiskej. Jehová amo kita keski hora titetlapouiaj. Pero kita tleka titetlapouiaj. Tla tiktlasojtlaj toTajtsin Dios uan oksekimej, tiktekichiuiliskej ika nochi toyolo * (Mar. 12:30, 31; Col. 3:23, TNM). Nin kijtosneki nochipa timochijchikauaskej titetlapouiskej. Tla sapanoa tikpatioitaj titetlapouiskej, timochijchikauaskej nochtin tikintlapouiskej.

5, 6. Xikijto ken uelis tikteititiskej okachi tikpatioitaj tiktekichiuiliskej Jehová.

⁵ Ma timokuayejyekokan se telpochtli kipaktia kiuikatinemis se carro uan kiuikatinemi ijkuak majxilia. Satepan kitlakeuaj ma kiuikatinemi se carro. Pero amo kajxilia tlen ompa kitlani. Ik non, tlapaleuia kinchijchiua kalmej uan peua tekipanoa lunes uan tlami viernes. Maski okachi miak tonal tlapaleuia kinchijchiua kalmej, okachi kipaktia kiuikatinemis se carro. Ik non, ijkuak majxilia mochijchikaua okachi kuali kiuikatinemis se carro.

⁶ Xamo tejuan amo okachi timajxiliaj titetlapouiskej ken tiknekij. Pero okachi tikpatioitaj titetlapouiskej. Ik non, timochijchikauaj nochtin tikintlapouiskej. Pero ualeua xamo amo timajxiliaj uan xamo timotlajtlaniaj ken uelis okachi tiktekichiuiliskej Jehová.

7. ¿Ken uelis tikchiuaskej ken Jesús?

⁷ Jesús okiteititi ken moneki tiktekichiuiliskej Jehová. Ye okachi okipatioitak  tetlapouis (Juan 4:34, 35). Uejka onejnemiaya uan ijkon miakej okintlapoui iTlajtol toTajtsin Dios. Ye oyajki otetlapouito tekalijtik uan noijki kanin miakej opanoayaj. Omochijchika nochipa kitekichiuilis Jehová.

8. ¿Ken uelis tikchiuaskej ken Jesús ijkuak tiktekichiuiliaj Jehová?

⁸ Uelis titetlapouiskej san kanin ijkon ken okichi Jesús. Tiknekij tikchiuaskej nin tekitl maski tikkauaskej miak tlamantli (Mar. 6:31-34, TNM; 1 Ped. 2:21). Sekimej tokniuan uelis yetoskej precursores especiales, precursores regulares noso precursores auxiliares. Oksekimej momachtiaj okse tlajtoli uan yauij tetlapouitiuij kanin okachi moneki. Oksekimej tokniuan noijki mochijchikauaj tetlapouiaj. Tinochtin timochijchikauaj titetlapouiaj. Maski Jehová amo techiluia keski horas moneki titetlapouiskej, kineki ma tiyolpakikan ijkuak tiktematiltiaj “kuali tlajtoli” porque ye sapanoa yolpaki (1 Tim. 1:11, TNM; Deut. 30:11).

9. (1) ¿Tlen okichi Pablo maski otekipanoaya? (2) Ijkon ken kijtoa Hechos 28:16, 30, 31, ¿tlen nochipa okichiuaya Pablo?

⁹ Tlatitlanil Pablo noijki ijkon otetlapoui. Ijkuak okatka ompa Corinto, okinchijchiuaya mantajkalmej uan ijkon okimotlaniliaya tlen ika mopanoltiskia porque amo okachi okipiaya tomin. Nochipa omajxiliaya tetlapouis. Ye okinchijchiuaya mantajkalmej para kitlaniskia tlen ika mopanoltis uan ijkon okintlapouiaya akinmej ochantiayaj Corinto (2 Cor. 11:7). Maski omonekiaya kimotlanilis tlen ika mopanoltis, omochijchika kitekichiuilis Jehová uan noijki otetlapouiaya nochi sábados. Ijkuak opejki okachi kimotlanilia tlen ika mopanoltis, “okachi okimosenmák iteki; otetlapowiaya de n kualitlájtoli de Dios iwa okimiliaya Jesús Ye n Cristo akin okichixtokah” (Hech. 18:3-5; 2 Cor. 11:9). Satepan okitsakej ompa Roma kanaj ome xiuitl. Pero ye okintlapouiaya akinmej oyayaj kitlajpalotiuij uan noijki okinmijkuiloaya cartas (xiktlajtolti Hechos 28:16, 30, 31). Okachi okipatioitak kitekichiuilis Jehová. Okijkuilo: “Amo matimosotlawakah, porke Dios [...] yotechmaktili nin tekitl” (2 Cor. 4:1). Ijkon ken Pablo ma tikpatioitakan tiktekichiuiliskej Jehová maski moneki titekipanoskej.

10, 11. ¿Ken uelis okachi tiktekichiuiliskej Jehová maski timokokoaj?

¹⁰ ¿Tlen tikchiuaskej tla ayakmo okachi titetlapouiaj inkalijtik oksekimej porque timokokoaj noso yitikpiaj miak xiuitl? Ma tiktemokan ken titetlapouiskej. Itech achto siglo, tokniuan okintlapouiayaj san akinmej okinnamikiayaj. Yejuan oyayaj tetlapouitiuij tekalijtik, kanin miakej opanoayaj uan san kanin oyayaj (Hech. 17:17; 20:20). ¿Tlen tikchiuaskej tla amo okachi ueli tinejnemij? Uelis timotlaliskej kanin miakej panoaj uan ompa ma titetlapouikan. Uelis titetlapouiskej itech teléfono, uelis tikinmijkuiloskej cartas uan san kanin uelis titetlapouiskej.

¹¹ Uelis tiktekichiuiliskej Jehová maski timokokoaj. Oksepa ma timotlapouikan itech Pablo. Ye okijto: “Weletílistli  amo toaxka, yej wits de Dios” (2 Cor. 4:7). Non “weletílistli” okipaleui ma tetlapoui maski omokokoaya. Okinmilui akinmej ochantiayaj Galacia: “Kuali nonkimatokeh ijkuak sikinika onomechmachti n kualitlájtoli de Dios non techmakixtia, ne onimokokoaya” (Gál. 4:13). Tejuan noijki uelis tikintlapouiskej akinmej tlapajtiaj uan akinmej ompa tekipanoaj. Porque miakej tekipanoaj ijkuak tiauij inkalijtik.

12. ¿Tlen kijtosneki san se tlamantli itech ma titlachixtokan?

¹² Jesús okijto: “Nomoixtololowah kateh kemi se tláwili non kitlawiliah nomokuerpo” tla tlachixtokej san itech se tlamantli (Mat. 6:22). ¿Tlen kijtosneki nin tlajtoli? Kijtosneki amo ma tiktemokan miak tlamantli. San sekan ma titlachixtokan uan amitlaj ma techtlapololti. Jesús ijkon okiteititi porque ye nochipa okitekichiuili Jehová uan noijki ijkon okinmachti imachtijkauan ma kipaleuikan Tekiuajkayotl. Tejuan noijki timochijchikauaj achto tiktemoaj Tekiuajkayotl uan imelajkayo toTajtsin Dios (Mat. 6:33).

13. ¿Tlen tikchiuaskej tla tiknekij okachi tiktekichiuiliskej Jehová?

¹³ Tla tiknekij nochipa tiktekichiuiliskej Jehová, amo ma tiktemokan miak tlamantli uan ijkon okachi timajxiliskej  tikinpaleuiskej oksekimej ma kixmatikan Jehová. Uelis titekipanoskej san kanaj keski tonal uan ijkon okachi titetlapouiskej. * Noijki ayakmo okachi ma timoyolpaktikan porque non xamo amo techkauilia okachi ma titetlapouikan.

14. ¿Tlen okichi se tokni uan isiua?

¹⁴ Ma tikitakan tlen okichi se tokni itoka Elías uan isiua. Tokni okijto: “Amo otikatkaj precursores pero omonekiaya itlaj tikchiuaskej uan ijkon okachi tiktekichiuiliskiaj Jehová. Otikchijkej seki tlamantli uan ijkon okachi tiktekichiuiliskiaj Jehová. Ayakmo okachi otimotlakouiayaj uan ayakmo okachi otimoyolpaktiayaj. Nochi non tlamantli amo otechkauiliaya ma timajxilikan. Noijki ayakmo okachi otitekipanoayaj. Non otechpaleui ma titetlapouitij nochi tiotlak, otitlamachtiayaj uan tlajko semana noijki otitetlapouiayaj. Sapanoa otiyolpakiayaj”.

15. Ijkon ken kijtoa 1 Timoteo 4:13, 15, ¿ken uelis okachi kuali titlamachtiskej?

¹⁵ Tla tiknekij okachi kuali tiktekichiuiliskej Jehová, moneki okachi kuali titlamachtiskej. Sekimej ixtlamatkej kijtoaj nochtin akinmej kinekij tekipanoskej moneki momachtijtiaskej miak tlamantli. Tejuan noijki moneki timomachtijtiaskej okachi kuali titlamachtiskej (Prov. 1:5; xiktlajtolti 1 Timoteo 4:13, 15).

16. Ijkon ken kijtoa 1 Timoteo 4:13, 15, ¿tlen okseki tlamantli techpaleuis okachi kuali ma titlamachtikan? (Xikita recuadro “ Seki tlamantli tlen techpaleuis okachi kuali ma tiktekichiuilikan Jehová”).

 ¹⁶ ¿Ken uelis okachi kuali titlamachtiskej? Kuali ma tiktekitiltikan ijkuak techmachtiaj tlen tiktekitiltiskej itech nechikol. Ompa techmachtiaj ken uelis okachi titetlapouiskej. Ma tikkakikan ijkuak tokni kinmiluia tlen kichiuaskej tokniuan ijkuak panoaj tlayekapan uan ma tikitakan tlen techpaleuis. Non techpaleuis ijkuak titetlapouitiuij tlen melauak tlamachtia Biblia. Noijki uelis tikiluiskej tokni tlen kiyekana tetlapouilistli ma techpaleui ken uelis titetlapouiskej noso ma tikiluikan touan ma tetlapouiti. Noijki ma tikinmiluikan ma techpaleuikan tokniuan tlen kuali tetlapouiaj, precursores noso tlayekanki itech circuito. Ijkon okachi tiyolpakiskej ijkuak titetlapouiskej uan titlamachtiskej.

17. ¿Ken timomachiliaj ijkuak okachi kuali titetlapouiaj?

¹⁷ Melauak tikpatioitaj Jehová techkauilia ma tikpaleuikan (1 Cor. 3:9). Ijkuak tikitaj “tlan okachi kuali” uan okachi titetlapouiaj, sapanoa tiyolpakij ijkuak tiktekichiuiliaj Jehová (Filip. 1:10; Sal. 100:2). Tikmatij toTajtsin Dios techmakas chikaualistli para okachi tiktekichiuiliskej maski tikixnamikiskej ouijkayotl noso okseki tlamantli (2 Cor. 4:1, 7; 6:4). Tiyolpakij tiktekichiuiliskej Jehová maski amo okachi titetlapouiaj (Gál. 6:4). Noijki tikteititiaj tiktlasojtlaj Jehová uan oksekimej ijkuak okachi kuali titetlapouiaj. ¿Tleka ijkon tikijtoaj? Biblia kijtoa: ‘Tla ijkó tikchiwaskeh, amo san tewah timomakixtiskeh, yej noiwa momakixtiskeh akimeh techkakiskeh’ (1 Tim. 4:16).