Itech Mateo uan Lucas tlatlamantli tlajtoaj itech Jesús porque tlatlamantli tlakamej otlajkuilojkej.

Mateo tlajtoa itech José. Kijtoa tlen okichi ijkuak okimatki María kipiaskia ikonetsin, ijkuak okochtemik se ángel okilui tlen opanotoka uan okichi tlen okinauati ángel (Mat. 1:19-25). Mateo noijki kijtoa se ángel okilui José itech se kochtemikilistli, ma uia Egipto uan ikalchanejkauan uan ijkon okichi. Uan noijki se ángel okilui José itech okse kochtemikilistli ma mokuepakan Israel, ijkon okichi uan ochantik Nazaret (Mat. 2:13, 14, 19-23). Itech ome tlakotonalmej tlen ika peua Evangelio tlen okijkuilo Mateo, itoka José nesi chikome uelta uan María san naui uelta nesi.

Pero amochtli Lucas okachi tlajtoa itech María. Ompa kijtoa ángel Gabriel okitlajpaloto María uan satepan María okitato Elisabet uan okiueyichi Jehová (Luc. 1:26-56). Noijki kijtoa Simeón okilui María ken tlajyouiskia satepan Jesús. Kijtoa tlen okipanok Jesús ijkuak okipiaya 12 xiuitl uan ijkuak oyajkej itech teokali. Lucas kijtoa tlen okijto María uan amo tlen okijto José. Noijki kijtoa tlen okipanok María okipatili inemilis (Luc. 2:19, 34, 35, 48, 51). Itech ome tlakotonalmej tlen ika peua Evangelio tlen okijkuilo Lucas, itoka María nesi 12 veces pero itoka José nesi san eyi uelta. Ken tikitaj, Mateo okachi tlajtoa itech José uan Lucas tlajtoa itech María.

Noijki ijkuak kijtoaj itech tlen kalchanejkej ouala Jesús, noijki tlatlamantli tlajtoaj. Mateo okijkuilo itech tlen kalchanejkej ouala José uan kiteititia Jesús kinamiki tlanauatis ken David porque okatka itlakpakone José. ¿Tleka? Porque José oualaya itech ikalchanejkauan Salomón ikone ueyi tekiua David (Mat. 1:6, 16). Pero Lucas tlajtoa itech tlen kalchanejkej ouala María uan kiteititia Jesús kinamiki tlanauatis ken David porque “walewatok itech rey David” (Rom. 1:3). ¿Tleka? Porque María oualaya itech ikalchanejkauan Natán tlen noijki okatka ikone ueyi tekiua David (Luc. 3:31). Itajtsin María okatka Helí, ¿pero tleka Lucas kijtoa itajtsin José okatka Helí? Porque kanin okijtoaya itech tlen kalchanejkej oualajkej, san onesiayaj intoka tlakamej. Ik non, ijkuak Lucas okijto ikone Helí okatka José, omoajsikamatiaya okatka imo (Luc. 3:23).

Tlen okijkuilo Mateo uan Lucas itech tlen kalchanejkej ouala Jesús, kiteititia ye Mesías tlen omoijto ualaskia. Nochtin okimatiayaj Jesús oualaya itech ikalchanejkauan David hasta noijki fariseos uan saduceos. Tlen okijkuilo Mateo uan Lucas, kichikaua totlaneltokilis uan kichiua ma tikneltokakan toTajtsin Dios kichiuas tlen yokijto.