1. ¿Tlen okipanok José uan tlen okichi?

 JOSÉ itelpoch Jacob itlaj oui okipanok. Se siuatl okiluiaya iuan mamoteka. Maski non siuatl okatka isiua iteko José, amo okichi tlen okiluiaya. Xamo ikaj mokuayejyekoua tleka José amo omotekak iuan non siuatl. Potifar amo ompa okatka uan José san okatka itlakeual. Noijki tla amo kichiuaskia tlen okiluiaya isiua Potifar uelis kitlajyouiltiskia. Pero maski nochipa ijkon okiluiaya José amo ijkon okichi. ¿Tleka amo ijkon okichi? Ye okijto: “¿Ken uelis nikchiuas nin tlamantli sapanoua amo kuali uan nitlajtlakolchiuas ixpan toTajtsin Dios?” (Gén. 39:7-12).

2. ¿Tleka José okineltokaya toTajtsin Dios amo kipaktia matiauilnemikan?

² ¿Tleka José okineltokaya toTajtsin Dios amo kipaktia matiauilnemikan? Matimokuayejyekokan ok opoliuiaya 200 xiuitl para Moisés kijkuiloskia amo kuali matiauilnemikan (Éx. 20:14). José kuali okixmatiaya Jehová, ik non, okimatiaya ken okitaya ijkuak ikaj oauilnemiaya. Ye okimatiaya toTajtsin Dios okitlali san se tlakatl iuan se siuatl mamonamiktikan. Xamo noijki okikak Jehová ome uelta okipaleui isitsin Sara, ijkuak ome tekiuajkej okinekiaya iuan motekaskej. Noijki ijkuak Jehová okipaleui Rebeca, isiua ikoltsin Isaac (Gén. 2:24; 12:14-20; 20:2-7; 26:6-11). Ijkuak José omokuayejyeko tlen opanok, okajsikamatki tlen kipaktia Jehová uan tlen amo. Ye sapanoua okitlasojtlaya Jehová, ik non, okinekiaya kitlakamatis.

3. ¿Tlen tikitaskej?

 ³ ¿Tikpatioita toTajtsin Dios kichiua tlen kuali? Kema. Pero tinochtin titlajtlakolejkej, ik non, moneki timomaluiskej para amo timokuayejyekoskej ken oksekimej porque san yejuan kipejpenaj tlen kuali uan tlen amo kuali (Is. 5:20; Rom. 12:2). Tikitaskej tlen kijtosneki toTajtsin Dios kichiua tlen kuali uan tleka moneki tikpatioitaskej. Noijki tikitaskej eyi tlamantli tlen techpaleuis okachi matiktlakamatikan itlanauatiluan Jehová.

4. ¿Tlen uelis kichiuas ayakmo matikteititikan tikchiuaj tlen kuali ijkon ken toTajtsin Dios?

⁴ Ijkuak Jesús okatka nikan tlaltikpak, teopixkej omokuayejyekouayaj okichiuayaj tlen kuali. Jesús okijto nonmej teopixkej amo melauak ijkon okichiuaya porque amo okintlasojtlaya oksekimej uan san yejuan okipejpenayaj tlen kuali uan tlen amo kuali (Ecl. 7:16; Luc. 16:15). Axkan miakej kichiuaj ken yejuan mokuayejyekouaj nochipa kichiuaj tlen kuali, moueyinekij uan kinteneuaj oksekimej. Non amo kiteititia amo kichiuaj tlen kuali uan Jehová amo kipaktia ijkuak ijkon kichiuaj.

5. Ijkon ken kijtoua Biblia, ¿ken tikteititiaj tikchiuaj tlen kuali? Xikijto.

⁵ Jehová kineki matikchiuakan tlen kuali, non kijtosneki moneki tikchiuaskej tlen kipaktia. Itech Biblia ijkuak motlajtolkopa ikaj kichiua tlen kuali, kijtosneki kichiua tlen Jehová technauatia. Jehová okinnauati akinmej tlanemakaj kuali matlatamachiuakan (Deut. 25:15). Ik non, akin kitekichiuilia Jehová amo moneki tlachtekis ijkuak tlanemakas. Ijkuak ikaj kipatioita Jehová kichiua tlen kuali, amo kipaktia ijkuak kita amo kinchiuiliaj tlen kuali oksekimej, ik non, kikauilia makipaleui toTajtsin Dios kipejpenas tlen kichiuas porque kineki kiyolpaktis (Col. 1:10).

6. ¿Tleka tikneltokaj Jehová kimati tlen kuali uan tlen amo kuali? (Isaías 55:8, 9).

⁶ Biblia kiteititia san Jehová kichiua tlen kuali, non kijtosneki ye nochipa ijkon kichiuaj (Jer. 50:7). San ye kinamiki kijtos tlen kuali uan tlen amo kuali porque otechchijchi. Tejuan titlajtlakolejkej, ik non, amo ueli tikajsikamati tlen kuali uan tlen amo kuali, Jehová amo tlajtlakole, ik non, san ye kimati tlen kuali uan tlen amo kuali (Prov. 14:12; xiktlajtolti Isaías 55:8, 9). Jehová otechchijchi ken ye, ik non, ¿uelis tikchiuaskej tlen kuali? (Gén. 1:27). Tinochtin techpaktia ijkon tikchiuaskej porque tiktlasojtlaj Jehová uan tiknekij tikchiuaskej ken ye (Efes. 5:1, TNM).

7. ¿Tleka moneki yetos tlanauatilmej? Xikijto.

⁷ Kuali tikatej ijkuak tiktlakamatij tlen technauatia Jehová itech tlen kuali uan tlen amo kuali. Matikitakan, ¿tleka ijkon tikijtouaj? Ximokuayejyeko te tikneki tias itech se altepetl pero achto ompa tias uelis tikitas tlen moneki tikchiuas para ompa tiajsiti. Noijki ximokuayejyeko tla itech hospital tepajtijkej uan enfermeras, san yejuan kinekij tlapajtiskej ken mokuayejyekouaj xamo sekimej uelis mikiskej. Yotikitakej sekimej kitlaliaj seki tlanauatilmej uan ijkuak tikintlakamatij, techpaleuiaj. Noijki ijkon ijkuak tikintlakamatij itlanauatiluan toTajtsin Dios techpaleuiaj.

8. ¿Ken kinteochiuas Jehová akinmej kipatioitaj kichiuaj tlen kuali?

 ⁸ Akinmej kitlakamatij itlanauatiluan Jehová, ye kinteochiuas. Ye kijtoua: “Yolmelauakej yetoskej tlaltikpak uan nochipa itech chantiskej” (Sal. 37:29). ¿Timokuayejyekouaj ken tiyetoskej tla nochtin tiktlakamatij itlanauatiluan Jehová? Tiyolpakiskej, san sekan tiyetoskej uan kuali timouikaskej. Jehová kineki ijkon techteochiuas. Yotikitakej tleka moneki tikpatioitaskej Jehová kichiua tlen kuali. ¿Tlen uelis tikchiuaskej para okachi tikpatioitaskej? Matikitakan eyi tlamantli tlen uelis techpaleuis.

9. ¿Tlen techpaleuis matikpatioitakan tikchiuaskej tlen kuali?

⁹ Se, matiktlasojtlakan akin okintlali tlanauatilmej. Tla tikneki tikchiuaskej tlen kuali, moneki tiktlasojtlaskej akin okintlali tlanauatilmej tlen kiteititia tlen kuali uan tlen amo kuali. Tiknekiskej tikintlakamatiskej itlanauatiluan toTajtsin Dios, tla sapanoua tiktlasojtlaj. Matimokuayejyekokan tla Adán uan Eva sapanoua kitlasojtlaskia Jehová, nochipa kitlakamatiskia (Gén. 3:1-6, 16-19).

10. ¿Tlen okichi Abrahán para kajsikamatis ken mokuayejyekoua Jehová?

¹⁰ Tejuan amo tiknekij tikchiuaskej ijkon ken Adán uan Eva. Ik non, moneki kuali tikixmatiskej Jehová, tikpatioitaskej tlen ye kichiuaj uan matimochijchikauakan para timokuayejyekoskej ken ye. Tla ijkon tikchiuaj, sapanoua tiktlasojtlaskej. Matikitakan tlen okichi Abrahán, ye sapanoua okitlasojtlaya Jehová, nochipa okitlakamatki maski ualeua amo okajsikamatiaya. Ye omochijchika kuali kixmatis. ¿Tlen okichi ijkuak okimatki kimixpoloskia akinmej ochantiayaj Sodoma uan Gomorra? Ye achto omomojti porque “akin Juez itech nochi tlaltikpak” kinmixpoloskia akinmej yolkualmej inmiuan akinmej amo yolkualmej. Abrahán amo omokuayejyeko toTajtsin Dios amo keman ijkon kichiuaskia, ik non, okiteititi okatka yolyamanki ijkuak okitlajtlani. Jehová amo okualanki uan okinankili. Ijkuak otlanki iuan motlapouia, Abrahán okajsikamatki Jehová kita tlen tikpiaj itech toyolo uan amo kintlajyouiltia akinmej yolkualmej inmiuan akinmej amo yolkualmej (Gén. 18:20-32).

11. ¿Ken okiteititi Abrahán okitlasojtlaya uan okineltokaya Jehová?

¹¹ Abrahán amo keman okilka ijkuak omotlapoui iuan Jehová itech Sodoma uan Gomorra. Non okipaleui okachi makitlasojtla Jehová uan makitlakaita. Satepan Abrahán kiteititiskia tla melauak okineltokaya Jehová. Ye okilui makimikti Isaac. Ijkuakon Abrahán kuali yokixmatiaya Jehová, ik non, amitlaj okitlajtlani. Maski oui okitak kitlakamatis Jehová okichi tlen okilui. Ye omokuayejyeko tlen okimatiaya itech Jehová uan okilnamikiaya ye amo tetlajyouiltia uan nochipa kichiua tlen kuali. Apóstol Pablo okijto Abrahán okajsikamatki Jehová uelis kiyolitiskia Isaac (Heb. 11:17-19). Non melauak panoskia, Jehová yokijtojka Isaac kinpiaskia miakej ikoneuan. Abrahán sapanoua okitlasojtlaya Jehová, ik non, okineltokaya  ye kichiuaskia tlen kuali. Ye melauak otlaneltokak, maski oui okitak okitlakamatki Jehová (Gén. 22:1-12).

12. ¿Ken uelis tikchiuaskej ken Abrahán? (Salmo 73:28).

¹² ¿Ken uelis tikchiuaskej ken Abrahán? Moneki okachi tikixmatiskej Jehová. Tla ijkon tikchiuaskej, okachi kuali iuan timouikaskej uan sapanoua tiktlasojtlaskej (xiktlajtolti Salmo 73:28). Noijki timokuayejyekoskej ijkon ken Jehová (Heb. 5:14). Ijkuak ikaj techiluis matikchiuakan itlaj tlen amo kuali, amo tikchiuaskej. Amo keman matimokuayejyekokan tikchiuaskej itlaj tlen kiyolkokos Jehová uan kichiuas ayakmo iuan matimouikakan. ¿Ken uelis okachi tikteititiskej tikpatioitaj Jehová kichiua tlen kuali?

13. ¿Tleka moneki timochijchikauaskej okachi tikchiuaskej tlen kuali? (Proverbios 15:9).

¹³ Ome, mojmostla matimochijchikauakan okachi tikpatioitaskej Jehová kichiua tlen kuali. Para okachi tikpatioitaskej itlanauatiluan Jehová, yetoskia ken ijkuak tikkuaj tlen techpaleuia uan tikchiuaj ejercicio uan ijkon mojmostla uelis tikchiuaskej. Jehová kajsikamati amo nochi uelis tikchiuaskej (Salmo 103:14). Ik non, techiluia ye kintlasojtla akinmej mochijchikauaj kichiuaskej tlen kuali (xiktlajtolti Proverbios 15:9). Ijkuak tikijtoua itlaj tikchiuaskej, timochijchikauaj ijkon tikchiuaskej. Noijki ijkon, tiknekij mojmostla tikchiuaskej tlen kuali. Jehová techpaleuis para matikchijtiakan tlen kuali (Sal. 84:5, 7).

14. ¿Tlen kijtosneki “koto de tépostli” uan tleka moneki matikmotlalilikan?

¹⁴ Jehová kineki matikmatokan amo oui tiktlakamatiskej (1 Juan 5:3). Tla tiktlakamatij, kuali tiyetoskej. Matimokuayejyekokan itech tepostli tlen okijto Pablo (Efes. 6:14-18). ¿Tlen tlamantli tlen okipiaya non tepostli okipaleuiaya soldado? “Koto de tépostli”,  non kijtosneki itlanauatiluan Jehová. Ijkon ken tepostli kimaluia ikaj iyolo, itlanauatiluan Jehová kimaluia toyolo. Ik non, miak ipati matikmotlalilikan non tepostli, para kuali timouikaskej iuan Jehová (Prov. 4:23).

15. ¿Ken tikmotlalilia “koto de tépostli”?

¹⁵ ¿Ken tikmotlalilia “koto de tépostli”? Mojmostla moneki itlaj tikpejpenaskej, ik non, moneki tikitaskej tlen kijtouaj itlanauatiluan Jehová. Matimokuayejyekokan achto itlaj tikijtoskej, tlen tlakuikali tikkakiskej, tlen ika timoyolpaktiskej noso tlen tiktlajtoltiskej. Moneki timotlajtlaniskej: “¿Tlen nechyolinis manikchiua? ¿Kiyolpaktis Jehová? Noso ¿Nechyoleua manikchiua tlen amo kipaktia Jehová ken ijkuak auilnemij, moteuiaj, tlaixnekij uan ijkuak kichiuaj tlen kinekij?” (Filip. 4:8). Tla tikchiuaj tlen Jehová kipaktia, itlanauatiluan uelis kipaleuis toyolo para amo matikchiuakan ken oksekimej.

16, 17. Ijkon ken kijtoua Isaías 48:18, ¿uelis tiktlakamatiskej itlanauatiluan Jehová?

¹⁶ ¿Techtekipachoua amo nochipa tiktlakamatiskej Jehová? Matimokuayejyekokan ken kineskayotia Jehová ijkon ken kijtoua Isaías 48:18 (xiktlajtolti). Jehová kijtoua tla tikchiuaj tlen kuali, yetos “ken olas tlen kipia ueyi atl”. Matimokuayejyekokan tikatej itempa mar uan ompa uitsej olas. ¿Mitstekipachos ayakmo tikinmitas olas? Amo. Tikmatij olas yimiak xiuitl uitsej itech mar uan nochipa ijkon kichiuaskej.

¹⁷ Ik non, ijkuak tikchiuaj tlen kuali, tla tiknekij mayeto ken olas tlen kipia mar ¿tlen ok uelis tikchiuaskej? Ijkuak tikpejpenaskej tlen tikchiuaskej achto matimokuayejyekokan ken kita Jehová. Xamo oui tlen tikpejpenaskej pero Jehová kineki mojmostla techpaleuis para matiktlakamatikan (Is. 40:29-31).

18. ¿Tleka amo moneki matitlaixkomakakan?

¹⁸ Eyi, matikauilikan Jehová matlaixkomaka. Maski timochijchikauaj tikchiuaskej tlen kijtoua itlanauatiluan Jehová, amo matikinmixkomakakan oksekimej uan amo matimokuayejyekokan tejuan nochi kuali tikchiuaj. Amo matimoueyinekikan inmixpan oksekimej uan amo matikteititikan tejuan technamiki tikinmixkokamakaskej. Matikilnamiktokan san Jehová kinamiki ijkon kichiuas porque ye “Juez itech nochi tlaltikpak” (Gén. 18:25). Ye amo otechtlali matiyetokan jueces. Ik non, Jesús okijto amo matitlaixkomakakan tla amo tiknekij matechixkomakakan (Mat. 7:1, TNM). *

19. ¿Ken okiteititi José san Jehová kinamiki tlaixkomakas?

¹⁹ Oksepa matikitakan tlen okichi José, ye okichi tlen kuali. Maski okichiuilijkej tlen amo kuali amo otlaixkomakak. Ikniuan okitlajyouiltijkej, okinemakakej uan okiluijkej itajtsin ye oixpoliuik. Satepan José uan ikniuan oksepa omotakej. Xamo ye uelis kinmixkomakaskiaj uan momakopaskia porque okatka ueyi tekiua. Maski omoyolkopkej ika tlen okichiuilijkej. Yejuan omomojtiayaj porque omokuayejyekouayaj  José ijkon kinchiuiliskia pero ye okinmilui: “Amo ximomojtikan, ¿kox nika ipatka toTajtsin Dios?” (Gén. 37:18-20, 27, 28, 31-35; 50:15-21). José okatka yolyamanki uan okikauili Jehová makinmixkomaka ikniuan.

20, 21. ¿Tlen techpaleuis amo matimokuayejyekokan nochipa tikchiuaj tlen kuali?

²⁰ Tejuan tikchiuaj ken José porque tikkauiliaj Jehová matlaixkomaka. Amo matikijtokan yitikmatij tleka ijkon kichiuaj tokniuan. Amo ueli tikitaj tlen kipiaj itech inyolo, san “Jehová kita tleka ijkon kichiua” (Prov. 16:2). Ye nochtin techtlasojtla, maski tlatlamantli toaltepe uan ken otechiskaltijkej, ye technauatia matikintlasojtlakan nochtin tokniuan (2 Cor. 6:13). Ijkon tiknekij tikchiuaskej iuan nochtin tokniuan uan amo tiknekij tikinmixkomakaskej.

²¹ Noijki amo tikinmixkomakaj akinmej amo kitekichiuiliaj Jehová (1 Tim. 2:3, 4). Amo tikinmixkomakaj tofamiliares uan amo timokuayejyekouaj yejuan amo keman tlaneltokaskej. Tla ijkon tikchiuaj, tikteititiskej timoueyinekij uan nochipa tikchiuaj tlen kuali (Hech. 17:30). Matikilnamiktokan, akinmej mokuayejyekouaj nochipa kichiuaj tlen kuali Jehová amo ijkon kita.

22. ¿Tlen mitsyolinia tikpatioitas tikchiuas tlen kuali?

²² Oksekimej kuali kitaskej tlen tikchiuaj, tla tikpatioitaj Jehová kichiua tlen kuali uan tiyolpakiskej. Noijki non kichiuas matechtlasojtlakan uan makitlasojtlakan toTajtsin Dios. Nochipa matikchiuakan nochi “ika milajkachiwálistli [noso matikchiuakan tlen kuali]” (Mat. 5:6). Tikneltokaj Jehová kita uan yolpaki porque mojmostla timochijchikauaj tiktlakamatiskej itlanauatiluan. Axkan miakej amo kichiuaj tlen kuali pero tejuan amo matimosotlauakan. Matikilnamiktokan Jehová kintlasojtla akinmej kichiuaj tlen kuali (Sal. 146:8).