DIANA okipiaya ochenta xiuitl. Inamik nochi okilkauaya uan ochantik seki xiuitl kanin kinmaluiaj akinmej yikipiaj miak xiuitl uan ompa oixpoliuik. Noijki ome ikoneuan oixpolikej uan ye okipiaya cáncer. Pero Diana nochipa oyolpakiaya ijkuak omonechikoaya uan ijkuak otetlapouiaya.

John okatka tlayekanki itech circuito 43 xiuitl. Okipaktiaya kichiuas non tekitl. Pero satepan ayakmo okatka tlayekanki itech circuito porque omonekiaya kimaluis se ikalchanejka. Tokniuan tlen kixmatij John ijkuak kitaj itech se ueyi nechikol ye nochipa yolpaki.

¿Tlen okipaleui Diana uan John ma yolpakikan? ¿Tleka oyolpakik tla tlajyouiaj? ¿Tleka yolpaki tla ayakmo kichiua tlen okachi okipaktiaya? Biblia kijtoa: “Akin yolmelauak moyolpaktis itech Jehová” (Sal. 64:10). Tikajsikamatiskej tla tikmatij tlen techyolpaktia uan tlen amo.

Tikmatij seki tlamantli kichiua ma tiyolpakikan. Ijkuak ikaj monamiktis sapanoa yolpaki. Noijki yolpaki se teta ijkuak kipias ikonetsin noso se tokni kiselia kichiuas se tekitl itech tlanechikol. Nin tlamantli sapanoa techyolpaktia porque Jehová techtliokolia. Ye Jehová okitlali ma timonamiktikan, ma tikinpiakan tokoneuan uan noijki ma tiktekichiuilikan (Gén. 2:18, 22; Sal. 127:3; 1 Tim. 3:1).

Pero onka seki tlamantli tlen amo techpaleuia nochipa ma tiyolpakikan. Ijkuak ikaj kikajkayaua inamik ayakmo yolpakij noso ijkuak ikaj miki (Ezeq. 24:18; Os. 3:1). Sekimej telpokamej uan ichpokamej amo kintlakamatij intatajuan nion kichiuaj tlen toTajtsin Dios kineki, ik non, kinkixtiaj itech tlanechikol. Ikoneuan Samuel amo okitekichiuilijkej toTajtsin Dios uan David sapanoa okintlajyouilti ikalchanejkauan porque otlajtlakolchi iuan  Bat-seba (1 Sam. 8:1-3; 2 Sam. 12:11). Nochi nin tlamantli sapanoa techtlajyouiltia uan amo ma tiyolpakij.

Noijki ijkon techpanoa ijkuak ayakmo ueli okachi tiktekichiuiliskej Jehová. Porque ualeua moneki tikmaluiskej se tokalchanejka noso timokokoaj. Noijki ijkuak tokniuan techiluiaj axkan okse tlamantli tikchiuaskej. Miakej akinmej ijkon kinpanoa kijtoaj moyolkokoaj.

Nochi non tlamantli amo techpaleuia nochipa ma tiyolpakikan. Ik non, ¿tlen techpaleuis nochipa ma tiyolpakikan maski titlajyouiskej? Onka seki tlamantli tlen techpaleuis ma tiyolpakikan. Samuel uan David oyolpakej maski sapanoa otlajyouijkej.

Jesús melauak oyolpakik. Ijkuak okatka iluikak ye nochipa oyolpaktoka (Prov. 8:30). Ijkuak ouala tlaltikpak okixnamik ouijkayotl. Pero oyolpakik porque okichi tlen kineki iTajtsin (Juan 4:34). ¿Oyolpakik ijkuak yimikiskia? Biblia kijtoa: “Iwa mach omotekipacho kox saikpanoa tepinati ijkuak se mikki” itech se tlaketsali (Heb. 12:2). Ik non, moneki ma tikitakan ome tlamantli tlen Jesús okipaleui ma yolpaki.

Se tonal, setenta imachtijkauan Jesús okintitlanki ma tetlapouitij uan ijkuak omokopatoj sapanoa oyolpakiayaj. Oyolpakiayaj porque okichijkej itlaj tetlajtlachialti uan noijki okinkixtilijkej oksekimej amo kuali ejekamej. Pero Jesús okijto: “Amo xipakikah porke nomechtlakitah n espíritus amokualteh, yej xipakikah porke nomotokah ya ijkuilitok ilwikak” (Luc. 10:1-9, 17, 20). Maski techyolpaktia tiktekichiuiliaj Jehová, okachi miak ipati ma techseli uan non kichiua ma tiyolpakikan.

Se tonal, Jesús miakej okinmachtijtoka. Ijkuakon, se siuatl okijto xamo inantsin Jesús sapanoa oyolpakiaya porque  kualtsin otlamachtiaya. Pero Jesús okijto: “¡Okachi kuali yolpakilisojkeh akimeh kikakih itlajtol Dios iwa kitlakitah!” (Luc. 11:27, 28). Xamo sapanoa tiyolpakij ijkuak tokoneuan kichiuaj tlen kuali. Pero okachi tiyolpakij ijkuak kuali timouikaj iuan Jehová uan tiktlakamatij.

Noijki sapanoa tiyolpakij ijkuak Jehová kiyolpaktia tlen tikchiuaj. Nochipa tiyolpakij maski ualeua titlajyouiaj. Okachi tiyolpakij ijkuak titlaxikoaj uan ijkuak tikatej tiyolmelajkej ixpan Jehová (Rom. 5:3-5). Noijki Jehová techpaleuia ika iespíritu santo uan tikmatij yolpakilistli poui itech nin tlamantli (Gál. 5:22). Ik non, Salmo 64:10 kijtoa: “Akin yolmelauak moyolpaktis itech Jehová”.

Nin techpaleuia ma tikajsikamatikan tleka Diana uan John sapanoa yolpakij maski tlajyouiaj. Diana okijto: “Nimopaleuia itech Jehová ijkon ken se konetsintli mopaleuia itech itajtsin”. Noijki okijto Jehová kiteochiua porque kikauilia ma tetlapoui uan non kichiua ma yolpaki. ¿Tlen okipaleui John ma yolpaki maski ayakmo okatka tlayekanki itech circuito? John okijto: “Itech 1998 onechiluijkej ma nikinmachti akinmej oyayaj Tlamachtil tlen kiseliaj tlayekankej uan siervos ministeriales uan non onechpaleui okachi ma nimomachti”. Nochi nin tlamantli okipaleui okachi ma tetlapoui uan noijki okipaleui ijkuak ayakmo yetoskia tlayekanki itech circuito. Okijto ye uan isiua amo omoyolkokojkej ijkuak okikajkej inteki porque yejuan okichiuayaj san tlen tekitl kinmakaskia Jehová. Noijki okijto: “Amo timoyolkokoaj porque otiktlakamatkej Jehová”.

Miakej tokniuan kijtoaj melauak ijkon kinpanoa ken kijtoa Salmo 64:10. Se tokni uan isiua otekipanojkej Betel ompa Estados Unidos kanaj treinta xiuitl. Pero satepan okinmiluijkej ma yetokan precursores especiales. Yejuan okijtojkej: “Otimoyolkokojkej porque otechpaktiaya titekipanoskej Betel”. Pero noijki okijtojkej: “Amitlaj ipati timoyolkokojtoskej”. Ik non, ijkuak oajsitoj kanin okintitlankej, san niman opejkej tetlapouiaj iuan tokniuan. Noijki okijtojkej: “Nochipa tikiluiaj Jehová tlen techtekipachoa. Techyolchikaua Jehová technankilia uan non techpaleuia ma tiyolpakikan. Noijki sekimej tokniuan omochijkej precursores uan tejuan tikinmachtijtokej ome uan mochikajti intlaneltokilis”.

Ualeua oui nochipa tiyolpakiskej porque xamo ualeua timoyolkokoaj. Pero Jehová techyolchikaua ika tlen kijtoa Salmo 64:10. Maski ualeua timoyolkokoskej uelis nochipa timoyolpaktiskej itech Jehová tla tiyolmelajkej. Noijki ma tikchiakan se yankuik iluikak uan se yankuik tlaltikpak. Ayakmo tiyetoskej titlajtlakolejkej. Tinochtin tiyolpakiskej porque Jehová kichiuas miak tlamantli (Is. 65:17, 18).

Nin kijtosneki amo keman timokokoskej uan nochipa tikpiaskej chikaualistli. Ayakmo tikilnamikiskej tlen otechpanok. Jehová techiluia “nochi tlamantli tlen achto opanok ayakmo moilnamikis, nion ayakmo yetos itech toyolo”. Noijki Jehová kinyolitis akinmej yoixpolikej uan oksepa inmiuan tiyetoskej. Tiyolpakiskej ken itatajuan takotsin tlen okiyoliti Jesús ijkuak “nochteh non okitakeh omotlajtlachialtijkeh” (Mar. 5:42). Tinochtin tiyetoskej tiyolmelauakej uan nochipa timoyolpaktiskej itech Jehová.