1, 2. ¿Tlen techmachtia tlen okipanok Angelito uan tlen moneki tikchiuaskej?

TLA motatajuan iTlaixpantijkauan Jehová amo kijtosneki te noijki kuali iuan timouikas toTajtsin Dios. Maski totatajuan kitekichiuiliaj Jehová noso amo, tisejse moneki timochijchikauaskej timouikaskej iuan Jehová.

² Ma tikitakan tlen okipanok se tokni itoka Angelito. Akinmej inmiuan chanti yejuan iTlaixpantijkauan Jehová. Ijkuak omoskalti okimachiliaya amo omouikaya iuan toTajtsin Dios. Okijto: “Oniktekichiuiliaya Jehová porque ijkon kichiuaj akinmej inmiuan nichanti”. Pero satepan opejki kitlajtoltia Biblia uan omokuayejyekouaya tlen okitlajtoltiaya uan opejki nochipa motlatlaujtia. Okijto tlen okipanok: “Onikitak omonekiaya kuali nikixmatis toTajtsin Dios tla oniknekiaya iuan nimouikas”. Tlen okipanok nin telpochtli techpaleuia ma timotlajtlanikan. ¿Tleka tikmatiskej akin Jehová amo kijtosneki kuali tikixmatij? ¿Ken uelis tikixmatiskej Jehová?

3. ¿Tleka tikmatiskej akin Jehová amo kijtosneki kuali tikixmatij?

³ Xamo tikijtouaj tikixmatij Jehová porque tikmatij itoka noso tikmatij seki tlamantli tlen yokijto kichiuas uan tlen yokichi. Pero moneki tikchiuaskej okseki tlamantli.  Moneki timajxiliskej timomachtiskej tlen kichiuas uan ma tikmatikan ken iyelis. Non techpaleuis ma tikajsikamatikan ken mokuayejyekoua Jehová uan tleka kineki kichiuas seki tlamantli. Ijkon tikmatiskej kox kipaktia tlen timokuayejyekouaj uan tlen tikchiuaj. Tla yitikmatij tlen kipaktia moneki ijkon ma tikchiuakan.

4. ¿Ken techpaleuis tla timomachtiskej tlen okichi Moisés uan David?

⁴ Xamo sekimej techpinauiaj porque tiknekij tiktekichiuiliskej Jehová uan okachi kualanij ijkuak peua timonechikouaj. Pero ma tikneltokakan tlen kijtoua Jehová uan ma tikmatokan ye amo keman toselti techkauas. Non techpaleuis nochipa iuan ma timouikakan. ¿Melauak uelis kuali tikixmatiskej Jehová? Kema. Moisés uan David omouikakej iuan Jehová maski okatkaj tlajtlakolejkej. Axkan tikitaskej tlen okichijkej, tlen okinpaleui ma kixmatikan Jehová uan ken techpaleuis tla noijki ijkon tikchiuaskej.

5. ¿Tlen okichi Moisés?

⁵ Moisés okichi tlen omomachti. Ijkuak okipiaya kanaj cuarenta xiuitl, opejki kinpaleuia israelitas tlen Jehová okinpejpenki uan amo “okinek makinotsakah ikone ichpoch n rey de Egipto” (Heb. 11:24). Moisés amo okinek kipias miak tlamantli. Ye okinpaleui israelitas porque sapanoua okintlajyouiltiayaj, oyajki ixpan faraón uan nin tekiua san ompa okajuak porque omomachiliaya okatka ken se teotsin. Pero Moisés otlaneltokaya uan okimatiaya Jehová kipaleuiskia. Non okipaleui ma mouika iuan Jehová (Prov. 3:5).

6. ¿Tlen techmachtia tlen okichi Moisés?

⁶ ¿Tlen techmachtia tlen okichi Moisés? Tinochtin moneki tikpejpenaskej kox tiktekichiuiliskej toTajtsin Dios uan kox tipouiskej iuan ialtepe. Tla tikpejpenaskej tiktekichiuiliskej Jehová, xamo monekis tikkauaskej seki tlamantli uan techtlajyouiltiskej akinmej amo kitlakamatij. Jehová techpaleuis tla tikneltokaj tlen ye techiluia.

7, 8. ¿Tlen okachi omomachtijtia Moisés?

⁷ Moisés omomachti ken iyelis Jehová uan okichi tlen okinauati. Ma tikitakan ken okichi. Ijkuak Jehová okilui Moisés ma kinkixtiti israelitas, ye miak uelta okijto amo uelis ijkon kichiuaskia. Pero toTajtsin Dios okiknomatki uan okipaleui (Éx. 4:10-16). Ijkon Moisés okilui faraón tlen kipanoskia tla amo kinkauaskia ma yakan israelitas. Moisés okitak Jehová okitekitilti ichikaualis ijkuak okinmakixti israelitas. Noijki okimikti faraón itech mar Rojo uan nochtin isoldados (Éx. 14:26-31; Sal. 136:15).

⁸ Satepan ijkuak Moisés okinkixti israelitas ompa Egipto, yejuan nochipa omokuejsouayaj. Ijkuakon Moisés okitak Jehová kimati mochias ijkuak okinmajsikamatki israelitas (Sal. 78:40-43). Noijki okitak Jehová yolyamanki. Porque Moisés okilui ma kipatla seki tlamantli uan ye ijkon okichi (Éx. 32:9-14).

9. ¿Ken kiteititia Hebreos 11:27, Moisés omouikaya iuan Jehová?

⁹ Moisés kuali omouikaya iuan Jehová. Okitaya ken iTajtsin (xiktlajtolti Hebreos 11:27). Biblia kijtoua: “Jehová omotlapouiaya iuan Moisés ijkon ken se tlakatl ikaj iuan motlapouia” (Éx. 33:11).

10. ¿Tlen tikchiuaskej tla tiknekij kuali tikixmatiskej Jehová?

 ¹⁰ ¿Tlen techmachtia tlen okichi Moisés? Amo san moneki tikmatiskej ken iyelis Jehová. Moneki tikchiuaskej tlen ye kineki uan ijkon tikteititiskej tikixmatij. ¿Tlen kineki ma tikchiuakan? Biblia kijtoua: “Ye kineki mamomakixtikah nochteh iwa makixmatikah tlan milák” (1 Tim. 2:3, 4). Tikchiuaj tlen Jehová kineki ijkuak tikinmachtiaj oksekimej ma kixmatikan akin ye.

11. ¿Tleka okachi tikixmatij Jehová ijkuak tikinpaleuiaj oksekimej ma kixmatikan?

¹¹ Okachi tikixmatij Jehová ijkuak tikinpaleuiaj oksekimej ma kixmatikan. Tikitaj teiknomati ijkuak tikajsij ikaj tlen kineki ma tikmachtikan (Juan 6:44; Hech. 13:48). Tikitaj iTlajtol toTajtsin Dios tlapaleuia ijkuak akinmej tikinmachtiaj kikauaj costumbres uan kipatlaj inyelis (Col. 3:9, 10). Tikitaj Jehová kimati mochias porque miak uelta techkauilia ma tikintlapouitij oksekimej uan ijkon uelis momakixtiskej (Rom. 10:13-15).

12. Ijkon ken kijtoua Éxodo 33:13, ¿tlen okitlajtlanki Moisés uan tleka?

¹² Moisés okipatioitaya mouikas iuan Jehová. Moisés okilui Jehová ma kikauili okachi kixmatis maski okipaleui ma kichiua milagros (xiktlajtolti Éxodo 33:13). Moisés yokipiaya kanaj ochenta xiuitl pero okilnamiktoka omonekiaya okachi kixmatis Jehová.

13. ¿Ken tikteititiaj tikpatioitaj timouikaskej iuan toTajtsin Dios?

¹³ ¿Tlen techmachtia tlen okichi Moisés? Ma tikpatioitakan timouikaskej iuan Jehová maski yimiak xiuitl tiktekichiuilijtokej noso amo. Tikteititiaj tikpatioitaj timouikaj iuan Jehová tla tiktlatlaujtiaj.

14. ¿Tleka moneki ma tiktlatlaujtikan Jehová tla tiknekij tikixmatiskej?

¹⁴ Kuali timouikaj iuan oksekimej tla kuali inmiuan timotlapouiaj. Ik non, nochipa ma tiktlatlaujtikan Jehová uan ijkon kuali iuan timouikaskej. Amo ma timomojtikan tikiluiskej tlen timokuayejyekouaj uan tlen tikmachiliaj (Efes. 6:18). Se tokni itoka Krista uan chanti Turquía, okijto: “Ijkuak nikiluia Jehová tlen nimokuayejyekoua uan nikita ken nechpaleuia, okachi niktlasojtla uan okachi nikneltoka. Nikita ken nechnankilia uan non nechpaleuia ma nikita ken notajtsin uan noyolikni”.

15. ¿Tlen okijto Jehová okichiuaya David?

¹⁵ Ijkuak oneski tekiua David nochtin akinmej inmiuan ochantiaya okiueyichiuayaj toTajtsin Dios. Pero ye amo okiueyichiuaya Jehová porque ijkon okichiuaya ifamilia. Ye kuali okixmatki Jehová uan opejki iuan mouika uan Jehová noijki sapanoua okitlasojtlaya. Jehová okijto David okiyolpaktiaya (Hech. 13:22). ¿Tlen okipaleui David kuali ma mouika iuan Jehová?

16. ¿Tlen omomachti David ijkuak okitaya ken otlachijchi Jehová?

¹⁶ David okixmatki Jehová porque okitaya tlen okichijchi. Ijkuak okatka telpochtli, okitlajpialiaya itajtsin uan uejkika okatka iuan ichkamej. Xamo ijkuakon omokuayejyekouaya nochi tlen okichijchi Jehová. Ma tikitakan ken okichiuaya. Ijkuak ye okitaya iluikak, amo san okinmitaya  sitlalimej. Noijki okitaya ken iyelis Jehová akin otlachijchi. Ik non, David okijkuilo: “Nochi iluikak kitematiltia iueyichiualis toTajtsin Dios; semanauak kitematiltia tlen ye okichijchi ika imauan” (Sal. 19:1, 2). Noijki okitaya Jehová ixtlamatki porque sapanoua kuajkualtsin otechchijchi (Sal. 139:14). Ijkuak David omokuayejyekouaya ken okichijchi toTajtsin Dios nochi tlen onka, omomachiliaya amitlaj ipati (Sal. 139:6).

17. ¿Tlen timomachtiskej tla timokuayejyekoskej tlen okichijchi Jehová?

¹⁷ ¿Tlen techmachtia tlen okichi David? Ma tikitakan tlen okichijchi Jehová. Ma tikpatioitakan tichantij itech nin kuajkualtsin tlaltikpak uan ma tiyolpakikan. Ijkuak itlaj tikchiuaj ma timokuayejyekokan tlen techmachtia Jehová ijkuak tikitaj xochitl, kuajyo, yolkamej uan ken otechchijchi. Ijkon nochipa tikilnamiktoskej tlen techmachtia Jehová akin techtlasojtla ken se teta (Rom. 1:20). Tla ijkon tikchiuaskej, okachi timouikaskej iuan Jehová.

18. Ijkon ken kijtoua Salmo 18, ¿tlen okijto David?

¹⁸ David okitak ken okipaleui Jehová. Ma tikitakan ken okichi. Ijkuak se león uan se oso okinekiayaj kinkuaskej ichkamej, ye okijto okimikti león uan oso porque Jehová okipaleui. Noijki okitak okiyekanaya Jehová ijkuak okipaleui okimikti se tlakatl uejkapantik itoka Goliat (1 Sam. 17:37). Noijki okitak Jehová okipaleui ijkuak okicholili Saúl tlen ochauatiaya (Sal. 18, kanin peua). Akin moueyineki amo ijkon kijtoskia. David okatka yolyamanki, ik non, okitak Jehová okipaleui (Sal. 138:6).

19. ¿Tlen techmachtia tlen okichi David?

¹⁹ ¿Tlen techmachtia tlen okichi David? Amo san ma tikiluikan Jehová ma techpaleui. Noijki ma tikitakan ken techpaleuia uan keman kichiua. Ma tiyetokan tiyolyamankej uan ma tikilnamiktokan amo nochi uelis tikchiuaskej. Ijkon Jehová techmakas tlen techpoloua. Ijkuak tikitaskej ken techpaleuia okachi iuan timouikaskej. Ijkon okipanok Isaac. Se tokni tlen chanti Fiyi uan yikipia miak xiuitl kitekichiuilijtok Jehová, okijto: “Ijkuak nikita ken nikpia nonemilis, nikita Jehová sapanoua yonechpaleui ijkuak opejki nimomachtia Biblia. Non nechpaleuia ma nikita Jehová melauak kajki”.

20. ¿Ken okipaleui David omouikak iuan Jehová uan tlen techmachtia?

²⁰ David okipiaya iyelis ken Jehová. ToTajtsin Dios otechchijchi ma tikchiuakan ken ye (Gén. 1:26). Tikchiuaskej ken Jehová tla tikmatiskej ken iyelis. David okinmitaya oksekimej ken Jehová kinmita porque ye kuali okixmatiaya. Ma tikitakan tlen okipanok. David otlajtlakolchi ixpan Jehová porque omomekati iuan Bat-Seba uan satepan otlanauati ma kimiktikan inamik. Pero Jehová okiknomatki maski ijkon okichi (2 Sam. 11:1-4, 15). ¿Tleka Jehová okiknomatki? Porque okichiuaya ken ye uan okinmiknomatiaya oksekimej. David kuali omouikaya iuan Jehová. Ik non, toTajtsin Dios okitlali ma yeto tekiua. Sapanoua okitlasojtlayaj David uan Jehová okinmilui oksekimej tekiuajkej ye kuali otlanauatiaya (1 Rey. 15:11; 2 Rey. 14:1-3).

21. Ijkon ken kijtoua Efesios 4:24 uan 5:1, TNM, ¿ken techpaleuis tla tikchiuaskej ken Jehová?

²¹ Tlen okichi David techmachtia moneki  tikchiuaskej ken Jehová. Tla ijkon tikchiuaskej, techpaleuis uan okachi tikixmatiskej Jehová. Tikteititiskej tiikoneuan toTajtsin Dios tla timochijchikauaj tikpiaskej toyelis ken ye (xiktlajtolti Efesios 4:24; 5:1, TNM).

22, 23. ¿Ken techpaleuis tla tikchiuaskej tlen techmachtia Jehová?

²² Ijkon ken yotikitakej, Jehová kineki ma tikixmatikan ika tlen okichijchi uan tlen kijtoua iTlajtol. Biblia techiluia miakej okitekichiuilijkej uan uelis tikchiuaskej ken yejuan. Ijkon ken okichi Moisés uan David. Jehová yokichi miak tlamantli tlen techpaleuia ma tikixmatikan. Pero tejuan moneki timochijchikauaskej tikixmatiskej.

²³ Nochipa timomachtijtoskej tlen kichiua toTajtsin Dios (Ecl. 3:11). Pero amo san moneki tikmatiskej tlen kichiua. Noijki moneki tikchiuaskej tlen ye kineki. Nochipa timouikaskej iuan Jehová tla tikchiuaj tlen timomachtiaj uan tikchiuaj ken ye (Sant. 4:8). ITlajtol toTajtsin Dios kijtoua ye amo keman techkauas tla timochijchikauaj tikixmatiskej.