1, 2. ¿Tleka miak ipati ma tikmatikan tlen panos ijkuak toTajtsin Dios kinyolitis tlapejpenalmej?

TINOCHTIN tiknekij tikmatiskej ken kinyolitiskej akinmej yaskej iluikak. Uan akinmej yokinpejpenkej uan ok katej nikan tlaltikpak kinekij okachi kimatiskej. Uan noijki tiknekij tikmatiskej akinmej timiakej timokauaskej nikan tlaltikpak porque noijki techpaleuis.

² ToTajtsin Dios okinyekanki sekimej imachtijkauan Jesús para ma kijkuilokan ken kinyolitiskej akinmej yaskej iluikak. Apóstol Juan okijto: “Tejuan tiikoneuan toTajtsin Dios pero ayamo momati ken tiyetoskej. Tikmatij ijkuak ye techmonextilis tiyetoskej ken ye porque tikixmatiskej” (1 Juan 3:2, TNM). Tlapejpenalmej amo kimatij ken yetoskej iluikak uan noijki amo kimatij tlen kijtosneki yetoskej espíritus. Pero kimatij ijkuak kinyolitiskej kitaskej Jehová. Biblia san kijtoua seki tlamantli ijkuak kinyolitiskej tlapejpenalmej. Apóstol Pablo okijto yetoskej iuan Jesús ijkuak kinpojpolos “nochteh n wejweyi tlayakankeh, n tekiwajkeh iwan chikawálisteh” uan noijki “mikílistli”. Satepan Jesús uan tlapejpenalmej kikauiliskej  toTajtsin Dios nochi ma kiyekana (1 Cor. 15:24-28). ¡Melauak yetos tlakualtsin! *

3. Ijkon ken kijtoua 1 Corintios 15:30-32, TNM, ¿tlen okichi Pablo porque okineltokaya Jehová kiyolitiskia?

³ Pablo okineltokaya toTajtsin Dios kiyolitiskia, ik non, okixiko nochi tlen okipanok (xiktlajtolti 1 Corintios 15:30-32, TNM). Ye okinmilui tokniuan tlen ochantiayaj Corinto san tlen tonal uelis ixpoliuiskia uan noijki okijto omoteui iuan tekuanimej ompa Éfeso. (2 Cor. 1:8; 4:10; 11:23). Pablo xamo omoteui iuan tekuanimej tlen okatkaj itech circo (Hech. 19:26- 34; 1 Cor. 16:9). Maski otlajyoui okilnamiktoka Jehová kiteochiuaskia (2 Cor. 4:16-18).

4. ¿Tlen kinyolchikauaj miakej tokniuan? (Xikita dibujo itech página 1).

⁴ Axkan tikixnamikij miak ouijkayotl. Sekimej tokniuan kintlajyouiltiaj. Oksekimej tokniuan chantij kanin onka guerras uan oksekan amo kinkauiliaj ma tetlapouikan pero tokniuan kitekichiuiliaj Jehová maski uelis kintlajyouiltiskej noso kinmiktiskej. Maski ijkon kinpanoua mochijchikauaj kitechiuiliskej uan non techyolchikaua. Amo momojtiaj porque kimatokej Jehová kinyolitis.

5. ¿Tlen uelis kichiuas ayakmo ma tikneltokakan Jehová kinyolitiskej akinmej yoixpolikej?

⁵ Pablo okijto sekimej tokniuan omokuayejyekouayaj tlen uelis kinmijtlakoskia. Pablo okijto tlen yejuan omokuayejyekouayaj: “Tla milák non yomikkeh ayakmó moyolitiskeh, okachi kuali matikchiwakah kemi sikimeh kijtoah: ‘Matitlakuakah iwa matikonikah, porke mostla timikiskeh’”. Yiuejkika miakej ijkon omokuayejyekouayaj. Xamo Pablo okijto tlen ijkuilitok itech Isaías 22:13. Ompa kijtoua israelitas san omoyolpaktiayaj uan amo okinekiayaj mouikaskej iuan Jehová. Axkan miakej kijtouaj ijkon ken Israelitas: “Ximoyolpakti porque san niman tiixpoliuiskej”. Pero israelitas sapanoua otlajyouijkej (2 Crón. 36:15-20).

6. ¿Tlen moneki tikchiuaskej tla tikneltokaj Jehová kinyolitis akinmej yoixpolikej?

⁶ Tikneltokaj Jehová kinyolitis akinmej yoixpolikej, ik non, ayakmo ma timouikakan iuan akinmej uelis kichiuaskej ayakmo ijkon ma tikneltokakan. Tokniuan tlen ochantiayaj Corinto amo omonekiaya mouikaskej iuan akinmej amo okineltokayaj toTajtsin Dios kinyolitiskia akinmej yoixpolikej. ¿Tlen techmachtia non? Amo techpaleuis tla timouikaj iuan akinmej san kinekij moyolpaktiskej. Tla inmiuan timouikaj, ayakmo kuali tikpiaskej toyelis uan hasta uelis tikchiuaskej tlen Jehová kikokolia. Ik non, Pablo okijto: “Nomejwah ximoyolpatlakah iwa ximilajkanemikah, iwa ayakmó xitlajtlakolchiwakah” (1 Cor. 15:33, 34).

7. Ijkon ken kijtoua 1 Corintios 15:35-38, ¿tlen uelis techtlajtlaniskej sekimej?

⁷ (Xiktlajtolti 1 Corintios 15:35-38). Xamo ikaj amo kinekis xikneltoka  toTajtsin Dios kinyolitis akinmej oixpolikej, ik non, uelis mitsiluis: “¿Ken kinyolitis toTajtsin Dios akinmej oixpolikej?”. Ma timokuayejyekokan tlen okijto Pablo porque miakej kineltokaj ijkuak ikaj ixpoliui, ok kanaj yoltok. ¿Pero tlen kijtoua Biblia?

8. ¿Ken uelis tikyekijtoskej ken kinyolitia toTajtsin Dios tlapejpenalmej?

⁸ Ijkuak ikaj ixpoliui, itlalnakayo ijtlakaui. Pero tla Jehová okichijchi semanauak, uelis kiyolitis akin oixpoliuik (Gén. 1:1; 2:7). Pablo okiyekijto toTajtsin Dios okse tlamantli uelis kimakas iyolilis akin kiyolitia. Ye otlajto itech se semilla tlen ikaj kitoka uan satepan ixua. Ijkuak moskaltia ayakmo mota ken se semilla.

9. ¿Ken kiteititia 1 Corintios 15:39-41 ken kajki nochi tlen toTajtsin Dios okichijchi?

⁹ (Xiktlajtolti 1 Corintios 15:39-41). Pablo okijto tlatlamantli kajki nochi tlen toTajtsin Dios okichijchi. Yolkamej, totomej uan michimej tlatlamantli katej. Pablo noijki okijto tonaltsin uan metstli tlatlamantli katej uan “sítlalteh tlatlámantli intlawilnextilis kipiah”. Maski tejuan amo tikitaj, ixtlamatkej kijtouaj onka tlatlamantli sitlalimej: sekimej uejueyij, sekimej tsikitsitsintin, sekimej chichiltikej, sekimej kostikej ken tonaltsin. Pablo noijki okijto “kan ilwikak iwa kan tlaltíkpaktli onkateh kuerpos”. ¿Tlen okinekiaya kijtos? Akinmej tichantij nikan tlaltikpak tikpiaj totlalnakayo pero akinmej chantij iluikak yejuan espíritus, ken ángeles.

10. ¿Ken yetoskej akinmej yaskej iluikak?

¹⁰ Pablo noijki okijto: “Ijkó tlamochiwas ijkuak moyolitiskeh non yomikkeh. Kintookah iwa palani, pero majkokuis se kuerpo non ayakmó ijtlakawis”.  Ijkuak ikaj ixpoliui itlalnakayo ijtlakaui uan mochiua tlalpinoli (Gén. 3:19). Ik non, ¿ken uelis toTajtsin Dios ikaj kiyolitis uan “ayakmó ijtlakawis” itlalnakayo? Elías, Eliseo iuan Jesús okinyolitijkej sekimej nikan tlaltikpak, pero Pablo amo otlajto itech akinmej nikan okinyolitijkej. Pablo okijto sekimej kinyolitiskej ken espíritus (1 Cor. 15:42-44).

11, 12. ¿Ken okiyoliti Jehová Jesús uan ken kinyolitis tlapejpenalmej?

¹¹ Ijkuak Jesús okatka nikan tlaltikpak, okipiaya itlalnakayo. Pero ijkuak Jehová okiyoliti, okiyoliti ken se espíritu uan oyajki iluikak. Noijki ijkon toTajtsin Dios kinyolitis tlapejpenalmej ken espíritus. Pablo okiyekijto: “Se mota kemi tlakatl de nin tlali, noijkó se motas kemi non owala de ilwikak” (1 Cor. 15:45-49).

¹² Ma tikilnamikikan Jehová amo okiyoliti Jesús ika itlalnakayo. Pablo ijkon okiyekijto: “Tonakayo iwan toesso [amo] weletis [kimoaxkatiskej] kan ilwikak” (1 Cor. 15:50). Ik non, apóstoles uan oksekimej tlapejpenalmej amo yaskiaj iluikak ika intlalnakayo tlen noijki ijtlakaui. ¿Keman kinyolitiskiaj? Pablo okiyekijto amo san niman kinyolitiskiaj, non panoskia satepan. Ijkuak Pablo okijkuilo 1 Corintios, sekimej imachtijkauan Jesús ken Santiago, ayakmo oyoltokaj. Satepan noijki ixpoliuiskiaj oksekimej apóstoles uan tlapejpenalmej (1 Cor. 15:6; Hech. 12:1, 2).

13. ¿Tlen panoskia ijkuak Cristo yitlanauatijtoskia?

¹³ Jesús uan Pablo okijtojkej, yetoskia guerras, tlaloliniskia, noijki yetoskia kokolistli uan panoskia okseki tlamantli itech nochi tlaltikpak ijkuak  Cristo yitlanauatijtoskia. Ijkon opejki panoua desde 1914 uan noijki panotok okse tlamantli tlen miak ipati. Jesús okijto tlen kichiuas iTekiuajkayo toTajtsin Dios motetlapouiskia “itech nochi tlaltikpak para ma kimatikan nochi altepemej” uan satepan “nochi tlamis” (Mat. 24:3, 7-14, TNM). Pablo okiteititi ijkuak Cristo yitlanauatijtoskia, tlapejpenalmej tlen yoixpolikaj, kinyolitiskiaj uan yaskiaj iluikak (1 Tes. 4:14-16; 1 Cor. 15:23).

14. ¿Tlen kinpanoua tlapejpenalmej tlen axkan ixpoliuij?

¹⁴ Tlapejpenalmej tlen axkan ixpoliuij, toTajtsin Dios san niman kinyolitia uan yauij iluikak. ¿Ken tikmatij? Porque Pablo ijkon okijto itech 1 Corintios 15:51, 52: “Amo tinochteh timikiskeh. Pero Dios tinochteh techpatilis tokuerpo. Totokatijkak, kemi ijkuak [tikintsakuaj uan tikintlapouaj toixtololouan], ijkuak mokakis n saiksemi tlapítsali”. Axkan mochijtok tlen okijto. Ijkuak kinyolitiskej nochtin tlapejpenalmej nochipa yolpakiskej uan nochipa yetoskej “iwan Toteko” (1 Tes. 4:17).

15. ¿Tlen kichiuaskej tlapejpenalmej?

¹⁵ Biblia kijtoua tlen kichiuaskej tlapejpenalmej. Jesús kinmiluia: “Akin tlatlanis iwa kichijtinemis tlan Ne nikwelita makichiwa asta n iksemi tonatijmeh, Ne nikchiwas matlanawati itech nochteh n paísmeh, iwa kinawatijtos kemi akin chikawak tlanawatia ika se tlakotl [de tepostli] iwa asta kintlatlapatsas kemi yaskiah xoktsimeh de barro,  ijkó kemi Notajtsi okichi noiwa Ne manitlanawati” (Apoc. 2:26, 27). Tlapejpenalmej kipaleuiskej Jesús uan kinmixpoloskej akinmej amo yolkualmej ken yetoskia ika “se basto [de tepostli]” (Apoc. 19:11-15).

16. ¿Tlen kinpanos miakej?

¹⁶ Tlapejpenalmej nochipa yoltoskej (1 Cor. 15:54-57). Yejuan tlapaleuiskej ijkuak kinmixpoloskej nochtin tlen amo yolkualmej itech guerra Armagedón. Ijkuak uits ueyi tlajyouilistli miakej momakixtiskej uan mokauaskej nikan tlaltikpak (Apoc. 7:14). Yejuan noijki kitaskej okseki tlamantli: toTajtsin Dios kinyolitis miakej tlen yiuejkika oixpolikej. ¡Nochtin yolpakiskej! (Hech. 24:15). Nochtin akinmej kitlakamatiskej Jehová, nochipa yoltoskej nikan tlaltikpak.

17. ¿Tlen moneki tikchiuaskej ijkon ken kijtoua 1 Corintios 15:58?

¹⁷ Tinochtin akinmej tiktekichiuiliaj Jehová tiktlasojkamatij tlen Pablo okinmijkuilili tokniuan tlen ochantiayaj ompa Corinto. Ik non, ma tikchiuakan tlen okijto Pablo: “Nochipa xiyeknemikah iwan Toteko, xikmopantikah iteki n Toteko” (xiktlajtolti 1 Corintios 15:58). Tla tiktlakamatij Jehová uan timochijchikauaj tiktekichiuiliskej, nochipa tiyolpakiskej. Ijkuakon tikitaskej amo san nenka tiktekichiuiliaj Jehová.