Amo non kijtosneki. Non versículo kijtoua ijkuak ikaj ‘uetsiʼ, kijtosneki ijkuak ikaj kixnamiki nochipa ouijkayotl uan ijkuak kijtoua ‘moketsaʼ, kijtosneki ueli kixikoua tlen kipanoua.

Ma tikitakan tlen kijtouaj okseki versículos: “Amo ximotlati uan amo san xitlachixto ik kanin chanti akin yolmelauak para tikchiuilis tlen amo kuali, amo xikxijxitini kanin chanti. Akin yolmelauak uelis uetsis chikome uelta uan oksepa moketsas pero akin amo yolkuali kiuetsitis tlajyouilistli. Ijkuak uetsis akin mitskokolia amo xiyolpaki uan ijkuak mokxitlanuis noijki amo xiyolpaki” (Prov. 24:15-17).

Sekimej mokuayejyekouaj versículo 16 tlajtoua itech ikaj tlen otlajtlakolchi pero moyolkopa uan oksepa kuali mouika iuan toTajtsin Dios. Ome teopixkej tlen chantij Gran Bretaña okijtojkej: “Akinmej otetlapouiayaj yiuejkika uan akinmej axkan tetlapouiaj okiyekijtojkej ijkon kijtosneki non texto”. Yejuan noijki okijtojkej: “Se tlakatl yolkuali nochipa uelis tlajtlakolchiuas pero ok kitlasojtlas toTajtsin Dios uan kiselis tla moyolkopas”. Xamo non kipaktia kikakis akin amo kineki mochijchikauas para amo tlajtlakolchiuas. Xamo mokuayejyekoua maski miak uelta tlajtlakolchiuas toTajtsin Dios kitlapojpoluis.

Amo ijkon kijtosneki versículo 16.

Ika hebreo tlajtoli “uetsis” tlen ijkuilitok itech versículos 16 uan 17 tlatlamantli kijtosneki. Xamo kijtosneki ijkuak ikaj uetsi, ijkuak se toro uetsi itech ojtli, ijkuak ikaj kajki ikuapak kali uan uetsiki noso ijkuak se tetl uetsiti ipan tlali (Deut. 22:4, 8; Amós 9:9). Pero non tlajtoli noijki uelis itlaj kineskayotis, ijkon ken kijtoua nin versículo: “Ijkuak Jehová kipaktia tlen kichiua se tlakatl, kiyekana. Maski uetsis, amo ompa uetos porque Jehová kimakitskijtok” (Sal. 37:23, 24; Prov. 11:5; 13:17; 17:20).

Comentario bíblico Beacon kijtoua ika hebreo tlajtoli “uetsis” amo kijtosneki ijkuak ikaj tlajtlakolchiua. Okse ixtlamatki okijto versículo 16 ijkin kijtoua: “Amo kuali yetos tla kintlajyouiltiaj itekipanojkauan toTajtsin Dios porque yejuan momakixtiaj pero akinmej amo yolkualmej amo momakixtiaj”.

Ik non, tlen kijtoua Proverbios 24:16 amo kijtosneki ijkuak ikaj tlajtlakolchiua. Kijtosneki ijkuak ikaj nochipa tlajyouia. Axkan miakej mokokouaj noso kinpanoua okseki tlamantli, xamo noijki tekiuajkej sapanoua kintlajyouiltiaj. Pero uelis kineltokaskej toTajtsin Dios kinpaleuis ma tlaxikokan uan kuali yetoskej. ¿Yotikitak tlen kichiuaj itekipanojkauan Jehová nochipa kuali kisa? ¿Tleka? Biblia kijtoua: “Jehová kinkitskia nochtin akinmej yiuetsiskej uan kinmeualtia nochtin akinmej kuelpachitokej” (Sal. 41:1-3; 145:14-19).

Ik non, akin yolmelauak amo yolpaki ijkuak oksekimej tlajyouiaj. Yolpaki ijkuak kimati kuali yetoskej akinmej kitlakamatij toTajtsin Dios (Ecl. 8:11-13; Job 31:3-6; Sal. 27:5, 6).