Amo, Biblia uan okseki amochmej amo kijtouaj ijkon okichiuayaj.

Itech okseki Biblias itech nin versículo kijtouaj ijkuak okatka Pablo, sekimej omoapolaktiayaj inpatka akinmej yoixpolikej. Se Biblia tlen itoka Itlajtol Totajtsi Dios kijtoua: “Tla non yomikkeh ayakmó moyolitiskeh, ¿tleka sikimeh [moapolaktiaj] impatka non yomikkeh?”.

Ma tikitakan tlen okijtojkej ome ixtlamatkej. Se ixtlamatki tlen itoka Gregory Lockwood okijto: “Nion Biblia nion okseki amochmej amo kijtouaj kox ikaj yomoapolaktijka ipatka ikaj tlen yoixpoliuik”. Okse ixtlamatki tlen itoka Gordon Fee noijki okijto: “Nion itech Biblia nion oksekan amo kijtojtok kox ikaj omoapolaktiaya ipatka akin oixpoliuik. Noijki itech NT [Nuevo Testamento] amo kanaj kijtoua akinmej opejkej kichiuaj ken Cristo ijkon omoapolaktiayaj nion itech okseki religiones”.

Itech Biblia ijkuilitok tlen Jesús okijto: “Xikinchiuakan nomachtijkauan itech nochi altepemej, xikinapolaktikan [...], xikinmachtikan ma kichiuakan nochi tlen onamechnauati” (Mat. 28:19, 20, TNM). Nin techmachtia tla ikaj okinekiaya moapolaktis, omonekiaya kixmatis Jehová uan Jesús, intech tlaneltokaskia uan omonekiaya kintlakamatis. Ikaj tlen yoixpoliuik amo uelis ijkon kichiuaskia nion uelis ikaj ipatka kichiuaskia (Ecl. 9:5, 10; Juan 4:1; 1 Cor. 1:14-16).

¿Tlen kijtosneki tlen okijto Pablo itech 1 Corintios 15:29, TNM?

Sekimej tlen ochantiayaj Corinto amo okineltokayaj toTajtsin Dios kinyolitiskia akinmej yoixpolikej (1 Cor. 15:12). Pablo okinmititi amo melauak tlen okineltokayaj. Ye okinmilui san tlen tonal uelis ixpoliuiskia. Maski ok oyoltoka uan otlajyouiaya, okineltokaya ijkuak ixpoliuiskia satepan toTajtsin Dios kiyolitiskia ken se espíritu uan kipiaskia miak chikaualistli ken Jesús (1 Cor. 15:30-32, TNM, 42-44).

Nonmej tokniuan tlapejpenalmej omonekiaya kajsikamatiskej achto tlajyouiskiaj miak, mikiskiaj uan satepan toTajtsin Dios kinyolitiskia. Ijkuak omoapolaktiayaj ika itoka Jesús okijtosnekiaya omoapolaktiayaj ‘itech imikilisʼ (Rom. 6:3). Non kijtosneki tlajyouiskiaj uan mikiskiaj uan kinyolitiskiaj para yetoskej iluikak ijkon ken Jesús.

Ijkuak Jesús omoapolakti uan opanok ome xiuitl, okinmilui ome iapóstoles: “De milajka nomejwah nontlaijyowiskeh iwa nontlaxikoskeh kemi Ne” (Mar. 10:38, 39). Jesús okijto uelis kinmixpoloskiaj tla nochipa kitekichiuiliskiaj toTajtsin Dios. Pablo okijto tlapejpenalmej noijki tlajyouiskiaj ijkon ken Jesús pero satepan noijki yaskiaj iluikak ijkon ken ye (Rom. 8:16, 17; 2 Cor. 4:17). Nin kijtosneki achto omonekiaya ixpoliuiskiaj para uelis kinyolitiskiaj uan yaskiaj iluikak.

Ik non, tlen okijto Pablo uelis ijkin motlajtolkopas: “Tla amo ijkon yetoskia, ¿tlen kichiuaskej akinmej moapolaktiaj tla mikiskej? Tla akinmej yoixpolikej amo kinyolitiaj, ¿tleka moapolaktiaj?”.