1. ¿Tleka Jesús okijto imachtijkauan okatkaj ken ichkamej?

 JESÚS kuali omouikaya iuan imachtijkauan uan non okineskayoti ken se tlajpixki uan ichkauan (Juan 10:14). Kuali ijkon okichi porque ichkamej kixmatij intlajpixki. Se tlakatl ijkon okijto: “Tlen inmiuan otiayaj okinekiayaj kinkixtiliskej fotos ichkamej pero amo omotokijkej kanin otikatkaj porque amo otechkakilijkej. Pero kema okikakilijkej se chokotsin tlen ompa oajsito porque ye okintlajpiaya”.

2, 3. (1) ¿Ken kiteititiaj imachtijkauan Jesús kikakij itlajtol? (2) ¿Tlen tikitaskej itech nin tlamachti uan tlen okse?

² Tlen okipanok non tlakatl techititia tlen Jesús okijto kichiuaskiaj imachtijkauan. Ye okijto: “Yejwah nechtenkakiskeh” (Juan 10:16). Pero Jesús kajki iluikak, ik non, ¿ken uelis tikkakiskej? Ma tikchiuakan tlen ye otlamachti (Mat. 7:24, 25).

³ Itech nin tlamachtil uan tlen okse tikitaskej seki tlamantli tlen Jesús otlamachti. Ye okijto tlen ayakmo moneki tikchiuaskej uan tlen moneki tikchiuaskej. Achto tikitaskej ome tlamantli tlen okijto ayakmo ma tikchiuakan.

4. Ijkon ken kijtoua Lucas 12:29, ¿tlen uelis kichiuas sapanoua ma timotekipachokan?

⁴ (Xiktlajtolti Lucas 12:29). Jesús okinmilui  imachtijkauan ‘amo mamotekipachojtinemikan’ kipiaskej tlen ika mopanoltiskej. Tlen ye okijto ma tikchiuakan tikmatij melauak techpaleuis. Pero ualeua tikitaj oui tiktlakamatiskej. ¿Tleka ijkon techpanoua?

5. ¿Tleka sekimej tokniuan sapanoua motekipachouaj?

 ⁵ Xamo sekimej tokniuan sapanoua kintekipachoua ken kipiaskej tlen kikuaskej, tlen kimokentiskej noso kanin chantiskej. Xamo itech inmialtepe amo onka tekitl. Xamo amo miak tomin kitlanij kanin tekipanouaj. Xamo akin okimakaya ifamilia tlen ika mopanoltiskej oixpoliuik uan oksekimej xamo se infamilia ayakmo kinpaleuia, ik non, ayakmo kipiaj tlen ika mopanoltiskej. Uan ken onka kokolistli COVID-19 miakej ayakmo kipiaj tekitl uan noijki ayakmo kipiaj tomin (Ecl. 9:11). Tla ijkon yotechpanok, ¿ken uelis ayakmo san timotekipachojtoskej ijkon ken okijto Jesús?

6. Xikijto tlen okipanok apóstol Pedro.

⁶ Se tonal apóstol Pedro uan oksekimej apóstoles oyayaj itech mar de Galilea uan opejki ejekakiaui. Pedro okilui Jesús: “Noteko, tla milák Tejwatsi, xitlanawati maninejnemi ixko atl”. Jesús okijto “xiwiki”, “Pedro opé nejnemi ixko atl, iwa konajsiskia n Jesús. Pero ijkuak okimachili chikawak oejekatoka, omaujki iwa opé apolaki. Ijkuakó otsajtsik: ‘¡Noteko, techmakixti!’”. Jesús okimakitski uan okimakixti. Pedro ueli onejnenki ipan atl maski sapanoua oejekakiauiaya porque okitaya  Jesús pero ijkuak okitak ejekakiauitl omomojti uan opejki apolaki (Mat. 14:24-31).

7. ¿Tlen techmachtia tlen okipanok Pedro?

⁷ Itlaj techmachtia tlen okipanok Pedro. Ijkuak otemok itech barca uan opejki nejnemi itech atl amo omokuayejyeko kox kimojtiskia ejekakiauitl. Ye okinekiaya kinamikiti Jesús pero amo okajsito porque okitak ejekakiauitl. Tejuan amo uelis tinejnemiskej ipan atl pero techpanoua tlen amo kuali uan non kichiua ma mota tla melauak titlaneltokaj. Tla ayakmo timokuayejyekouaj ken Jehová uan ayakmo tikneltokaj tlen ye kichiuas, uelis ayakmo iuan timouikaskej. Maski san tlen amo kuali techpanos, ma tiktekichiuilijtokan Jehová uan ma tikkauilikan ma techpaleui. ¿Ken uelis ijkon tikchiuaskej?

8. ¿Tlen techpaleuis amo okachi ma timotekipachokan tla amo tikpiaj tlen ika timopanoltiskej?

⁸ Tla tikneltokaj Jehová techpaleuis, non kichiuas ayakmo okachi ma timotekipachokan. Ma tikilnamikikan tla okachi tikpatioitaj tiktekichiuiliskej Jehová, ye techmakas tlen ika timopanoltiskej (Mat. 6:32, 33). Nochipa kichiua tlen otechilui (Deut. 8:4, 15, 16; Sal. 37:25). Tla Jehová kimaluia xochitl uan totomej, techpaleuis ma tikpiakan tlen tikkuaskej noso tlen tikmokentiskej (Mat. 6:26-30; Filip. 4:6, 7). Tetajmej kintlasojtlaj inkoneuan, ik non, kinmakaj tlen ika mopanoltiskej, ijkon toTajtsin Dios techtlasojtla, ik non, ye techmakas tlen ika timopanoltiskej. Uelis tikneltokaskej Jehová nochipa techmaluis.

9. ¿Tlen mitsmachtia tlen okipanok se tokni iuan isiua?

⁹ Ma tikitakan tlen okinpanok sekimej tokniuan uan ijkon tikitaskej Jehová kema uelis techpaleuis ma tikpiakan tlen ika timopanoltiskej. Se tokni uan isiua oyajki itech icarro uan okinnotikiskej sekimej tokniuan siuamej para kinuikaskiaj ma monechikotij. Tokni okijto: “Ijkuak otlanki otimonechikojkej otikinmiluijkej tokniuan touan ma tlakuatij pero satepan otikilnamikej amitlaj otikpiayaj”. ¿Tlen opanok? Tokni okijto: “Ijkuak otiajsitoj tokalijtik itech puerta okinkajtejkej ome bolsas uan okipiaya tlakuali. Amo otikmatiayaj akin ompa okinkajte, Jehová otechmalui”. Satepan incarro nonmej tokniuan oijtlakauik, ika otetlapouijtinemiayaj pero amo okipiayaj tomin para kiyektlaliskej. Okiuikakej kanin kinyektlaliaj carros para kimatiskiaj kech kitlaxtlauaskiaj. Ijkuakon oajsito se tlakatl uan otlajtlanki akin icarro, tokni okijto iaxka uan omonekiaya kiyektlalilis se tlamantli. Tlakatl okijto: “Nosiua kineki se carro ken nin. ¿Kech tikneki?”. Tokni okimakakej tomin uan okiko okse. Ye okijto: “Sapanoua otiyolpakej non tonal. Tikmatokej Jehová otechpaleui”.

10. ¿Ken techpaleuia tlen kijtoua Salmo 37:5 amo okachi ma techtekipacho tikpiaskej tlen ika timopanoltiskej?

¹⁰ Tikmatokej Jehová techmakas tlen ika timopanoltiskej tla tikchiuaj  tlen Jesús okijto uan ayakmo okachi timotekipachouaj (xiktlajtolti Salmo 37:5; 1 Ped. 5:7). Itech  párrafo 5 otikitakej uelis techpanos tlen amo kuali. Xamo axkan Jehová kichiua akin kiyekana tofamilia noso tonamik ma techmaka tlen ika timopanoltiskej noso tejuan tikpiaj tekitl. Pero tla akin kiyekana tofamilia ayakmo ueli techmaka tlen ika timopanoltiskej noso ayakmo tikpiaj tekitl, Jehová techpaleuis. Axkan ma tikitakan okse tlamantli tlen Jesús okijto ayakmo ma tikchiuakan.

11. Ijkon ken kijtoua Mateo 7:1, 2, ¿tlen okijto Jesús ayakmo ma tikchiuakan uan tleka ualeua oui?

¹¹ (Xiktlajtolti Mateo 7:1, TNM, 2). Jesús okimatiaya titlajtlakolejkej uan san tikitaj tlen amo kuali kichiuaj oksekimej. Ik non, ye okijto ayakmo ma titlateneuakan. Maski amo tiknekij tikinteneuaskej tokniuan ualeua ijkon tikchiuaj. ¿Tlen techpaleuis ayakmo ijkon ma tikchiuakan? Ma tiktlakamatikan tlen Jesús okijto uan ayakmo ma titlateneuakan.

12, 13. ¿Tlen okichi Jehová uan ken techpaleuia amo ma tikinteneuakan oksekimej?

¹² Ma tikchiuakan ken Jehová kichiua, ye kita tlen kuali tikchiuaj. Ijkon okichi iuan David maski otlajtlakolchi. Omomekati uan Bat-Seba uan hasta okichi ma kimiktikan inamik (2 Sam. 11:2-4, 14, 15, 24). Amo san ye omotlajyouilti, noijki okitlajyouilti ifamilia (2 Sam. 12:10, 11). Okse tonal okiteititi amo otlaneltokaya porque okinpouak keski soldados okatkaj. Xamo omoueyineki, ik non, okinpouak. ¿Tlen opanok? 70.000 israelitas oixpolikej porque omokokojkej (2 Sam. 24:1-4, 10-15).

¹³ Tla tichantiskiaj yiuejkika itech Israel, ¿tlen timokuayejyekoskiaj? ¿Tikteneuaskiaj David uan tikijtoskiaj amo okinamikiaya toTajtsin Dios ma kiknomati? Jehová amo ijkon omokuayejyeko. Ye okitak akin nochipa okitlakamatki uan okitak omoyolkopki ika nochi iyolo, ik non, okitlapojpolui. Jehová okimatiaya David okitlasojtlaya uan okinekiaya kichiuas tlen kuali. ¿Axkan tejuan tiktlasojkamatiliaj toTajtsin Dios porque kita kuali tlen tikchiuaj? (1 Rey. 9:4; 1 Crón. 29:10, 17).

14. ¿Tlen yokinpaleui sekimej tokniuan amo ma kinteneuakan oksekimej?

¹⁴ Maski titlajtlakolejkej Jehová techajsikamati, ik non, noijki ma tikinmajsikamatikan oksekimej uan ma tikitakan tlen kuali kichiuaj. San niman uelis tikitaskej motlapololtiaj uan tikinteneuaskej pero tla tikchiuaj ken Jehová kuali inmiuan timouikaskej. Ijkuak ok tetl se diamante amo kualtsin mota pero se ixtlamatki kimati satepan kualtsin motas tla kiteki uan kiyektlalia. Noijki ijkon ma tikchiuakan ken Jehová uan Jesús, ma tikitakan tlen kuali kichiuaj oksekimej uan amo tlen amo kuali kichiuaj.

15. ¿Ken techpaleuia tla timokuayejyekouaj tlen kinpanoua oksekimej?

¹⁵ Ma tikitakan tlen kuali kichiuaj  oksekimej, ¿tlen techpaleuis amo ma tikinteneuakan? Ximokuayejyeko ken innemilis. Se tonal ijkuak Jesús okatka itech teokali okitak se siuatl tlen ayakmo okipiaya inamik okintlali kanin okitlaliayaj tomin ome tomintsitsintin. Ye amo okijto tleka amo miak okitlali, okitak tlen okatka itech iyolo uan okilui kuali tlen okichi (Luc. 21:1-4).

16. ¿Tlen mitsmachtia tlen okipanok Verónica?

¹⁶ Tlen okipanok Verónica techititia ma timokuayejyekokan tlen kinpanoua oksekimej. Kanin ye omonechikouaya okatka tokni siuatl tlen okipiaya ichokotsin. Verónica okijto: “Onikitaya amo nochipa omonechikouayaj uan amo nochipa otetlapouiayaj. Ik non, onikitaya amo kuali tlen okichiuayaj. Pero se tonal onitetlapouito iuan non tokni, onechilui ichokotsin omokokouaya. Tekipanoua para kipias tlen ika mopanoltis uan mochijchikauaj para kuali mouikaskej iuan Jehová. Ichokotsin omokokouaya, ik non, ualeua oksekan omonechikouayaj”. Satepan Verónica okijto: “Amo keman onimokuayejyeko sapanoua otlajyouiayaj. Axkan okachi niktlasojtla uan niktlakaita porque mochijchikaua kitekichiuilia Jehová”.

17. ¿Tlen kijtoua Santiago 2:8 ma tikchiuakan uan ken uelis tikchiuaskej?

 ¹⁷ ¿Tlen moneki tikchiuaskej tla tikitaj otiktenejkej se tokni? Ma tikilnamikikan moneki tikintlasojtlaskej tokniuan (xiktlajtolti Santiago 2:8). Noijki ma tiktlatlaujtikan ma techpaleui Jehová para ayakmo tikteneuaskej tokni. Satepan ma timotlapouikan iuan tokni uan ijkon okachi tikixmatiskej. Noijki ma tikyoleuakan touan ma tetlapouiti noso touan ma tlakuati. Ijkuak okachi tikixmatiskej ma tikchiuakan ken Jehová uan Jesús, ma tikitakan tlen kuali kichiua. Ijkon ayakmo titlateneuaskej ken Jesús otechnauati.

18. ¿Ken tikkakij Jesús?

¹⁸ Ijkon ken ichkamej kikakij intlajpixki, noijki ijkon akinmej tiimachtijkauan Jesús tikkakij itlajtol. Jehová uan Jesús techteochiuaskej tla timochijchikauaj ayakmo ma techtekipacho tlen ika timopanoltiskej uan ayakmo titlateneuaj. Tla tipouij iuan tlapejpenalmej noso iuan oksekimej “ichkameh”, tinochtin ma tiktlakamatikan tlen Jesús technauatia (Luc. 12:32; Juan 10:11, 14, 16). Itech okse tlamachtil tikitaskej tlen ome tlamantli okijto Jesús ma tikchiuakan.