1, 2. (1) ¿Tlen okinmiluijkej eyi iapóstoles Jesús ma kichiuakan uan ken otlanankilijkej? (2) ¿Tlen timomachtiskej?

 ITECH xiuitl 32 ijkuak yopanok Pascua, apóstoles Pedro, Santiago uan Juan itlaj okinmititi Jehová. Xamo itech tepetl Hermón, Jesús inmixpan opetlanki. Biblia kijtoua: “Ixkotsi otsotlania kemi n tonati iwa itlake omókopki istak kemi tláwili” (Mat. 17:1-4). Saiktlami okikakej toTajtsin Dios okijto: “Ye ni Nokone non niktlasojtla, non Ne onikpejpenki xikkakikah itlajtol” (Mat. 17:5). Iapóstoles Jesús melauak okikakej noso okitlakamatkej tlen toTajtsin Dios okinmilui iuan tejuan noijki tiknekij tikkakiskej.

² Itech okse tlamachtil otikitakej ijkuak tikkakij Jesús kijtosneki ayakmo ma tikchiuakan seki tlamantli. Axkan timomachtiskej ome tlamantli tlen Jesús okijto ma tikchiuakan.

3. Ijkon ken kijtoua Mateo 7:13, 14, ¿tlen moneki tikchiuaskej?

³ (Xiktlajtolti Mateo 7:13, 14). Jesús okijto yetoskiaj ome puertas tlen teuikaskia itech tlatlamantli ojtli, se “patlawak” uan okse “tsopijtik” noso pitsauak. Amo onka okse ojtli, ik non, tisejse tikpejpenaskej ik kanin tiaskej. Moneki kuali tikpejpenaskej porque non techpaleuis nochipa ma tiyoltokan.

4. ¿Tlen kijtosneki ojtli “patlawak”?

 ⁴ Moneki kuali tikmatoskej tlatlamantli ome ojtli. Itech ojtli “patlawak” miakej yauij porque amo oui kitaj ompa yaskej. Teyolkoko miakej ik ompa yauij ijkon ken kichiuaj oksekimej. Amo kajsikamatij Satanás noso Diablo kineki ompa ma yakan porque ijkon mikiskej (1 Cor. 6:9, 10; 1 Juan 5:19).

5. ¿Tlen yokichijkej miakej para kajsiskej ojtli pitsauak uan ompa yaskej?

⁵ Itech ojtli “patlawak” miakej yauij pero ojtli pitsauak Jesús okijto amo miakej kajsij. ¿Tleka? Jesús okijto ma timomaluikan porque yetoskiaj “profetas tekajkayakeh” (Mat. 7:15). Ixtlamatkej yokitakej onka miak religiones uan akinmej ompa monechikouaj kijtouaj tlamachtiaj tlen melauak. Ik non, miakej amo kimatij akinmej melauak kiueyichiuaj ken toTajtsin Dios kineki uan ayakmo kitemouaj akinmej ijkon kichiuaj. Pero Jesús okijto: “Tla nomejwah nochipa nonkitlakitaskeh notlajtol, milák nonyetoskeh notlamachtijkawah. Iwa nonkixmatiskeh tlan milák, iwa tlan milák nomechmakixtis” (Juan 8:31, 32). Tiyolpakij tejuatsin amo otikchi ken oksekimej uan otimochijchika timomachtis tlen melauak. Otipe timomachtia tlen kijtoua iTlajtol toTajtsin Dios uan tlen otlamachti Jesús uan otiktlakamatki. Otimomachti amo tikkakis ken tlamachtiaj okseki religiones tlen amo kichiuaj tlen kijtoua Biblia nion tiiluichiuas nion tikchiuas okseki tlamantli tlen yejuan kichiuaj. Noijki yotikitak ualeua oui tikchiuas tlen Jehová techiluia ma tikchiuakan uan tlen amo moneki ma tikchiuakan (Mat. 10:34-36). Xamo tejuatsin otikitak oui ijkon tikchiuas pero otiktlasojtlak Jehová uan otiknekiaya tikyolpaktis, ik non, otimochijchika uan ye kiyolpaktia ijkon otikchi (Prov. 27:11).

6. Ijkon ken kijtoua Salmo 119:9, 10, 45, 133, ¿tlen techpaleuis nochipa ma tiakan itech ojtli pitsauak?

⁶ Tla yitikatej itech ojtli pitsauak, ¿tlen techpaleuis nochipa ompa ma tiakan? Ma tikitakan se tlamantli. Itech seki altepemej ojtli tlen kajki itech tepemej itlaj kipia innakastlan para kinpaleuis akinmej kiuikaj incarro, non kinpaleuia amo sepa ma yakan inakastlan carretera uan ijkon amo uetsiti. Nion se akin kiuika icarro kijtos tleka okitlalijkej itlaj inakastlan carretera. Ijkon itlanauatiluan Jehová, tlen katej itech Biblia, yetoskia tlen itlaj okitlalijkej inakastlan carretera, techpaleuia nochipa ma tiakan itech ojtli pitsauak tlen techpaleuis nochipa ma tiyoltokan (xiktlajtolti Salmo 119:9, 10, 45, 133).

7. ¿Tlen moneki mokuayejyekoskej telpochmej uan ichpochmej tla yauij itech ojtli pitsauak?

⁷ Telpochtli noso ichpochtli ¿ualeua tikita oui tikchiuas tlen Jehová technauatia? Non kineki Satanás xikneltoka. Kineki xikita akinmej yauij ojtli patlauak okachi kuali moyolpaktiaj. Kineki xikneltoka okachi tiyolpakis iuan akinmej timomachtia escuela uan akinmej tikinmita itech internet  uan kinekij xikneltoka itlanauatiluan Jehová amo mitskauiliaj melauak xiyolpaki. * Pero xikilnamiki Satanás amo kitekipachoua tlen kinpanos satepan akinmej yauij itech ojtli patlauak. Pero Jehová yomitsititi ken kinteochiuas akinmej yauij itech ojtli pitsauak (Salmo 37:29; Is. 35:5, 6; 65:21-23).

8. ¿Ken uelis kichiuaskej telpochmej uan ichpochmej ken Olaf?

⁸ Xikita ken uelis tikchiuas tlen okichi se telpochtli tlen itoka Olaf. * Akinmej inmiuan omomachtiaya okinekiayaj ma auilnemi. Ijkuak okinmilui ye iTlaixpantijka Jehová uan okichiuaya tlen kijtoua Biblia miakej ichpochmej nochipa okiluiayaj inmiuan ma moteka.  Pero ye amo okichi tlen yejuan okinekiayaj. Pero amo san non okipanok. Ye okijto: “Akinmej onechmachtiayaj okinekiayaj ma nio universidad, ijkon oksekimej nechtlakaitaskiaj uan tla amo niaskia amitlaj nikchiuaskia”. ¿Tlen okipaleui amo ma kichiua nochi tlen okiluijkej? Ye okijto: “Opejki nimouika iuan akinmej inmiuan nimonechikoua uan yejuan omochijkej ken nofamilia. Noijki onipe kuali nimomachtia Biblia. Ijkuak okachi onimomachtiaya okachi onikajsikamatiaya melauak tlen kijtoua Biblia uan non onechpaleuiaya ma niktekichiuili Jehová”.

9. ¿Tlen tikchiuaskej tla nochipa tiknekij tiaskej itech ojtli tlen pitsauak?

⁹ Satanás amo kineki ma tiakan itech ojtli tlen techpaleuis nochipa ma tiyoltokan, ye kineki ma tiakan itech ojtli kanin miakej yauij porque non kichiuas ma timikikan (Mat. 7:13). Tla tikkakij Jesús uan tikitaj techpaleuia, tiaskej itech ojtli pitsauak, amo keman tiaskej itech okse ojtli. Axkan ma tikitakan okse tlamantli tlen okijto Jesús ma tikchiuakan.

10. Ijkon ken kijtoua Mateo 5:23, 24, ¿tlen okijto Jesús ma tikchiuakan?

¹⁰ (Xiktlajtolti Mateo 5:23, 24). Jesús okinmilui judíos tlen kijtouaj nonmej versículos. Ma timokuayejyekokan ijkuak ikaj oyaya itech teokali uan okimakaya teopixki se yolkatl para kitlamanilis Jehová. Pero ijkuakon okilnamikiaya amo kuali omouikaya iuan ikni, ik non, omonekiaya kikajteuas yolkatl uan yaskia kanin okatka ikni. ¿Tleka? ¿Tlen okachi okipatioitaya Jehová? Jesús okijto: “Achto xio ximotlapojpolwiti iwa mokni”.

11. ¿Tlen okichi Jacob para ma kitlapojpolui Esau?

¹¹ Tlen yiuejkika okichi Jacob techmachtia moneki timotlapojpoluiskej iuan oksekimej. Ijkuak Jacob yokipiaya 20 xiuitl uejka ochantiaya, toTajtsin Dios okititlanki se ángel ma kilui ma mokopa ialtepe (Gén. 31:11, 13, 38). Pero ikni tlen okachi ueyi uan omotokayotiaya Esaú okinekiaya kimiktis Jacob (Gén. 27:41). Jacob sapanoua omomojti porque xamo ikni ok okikokoliaya (Gén. 32:7). ¿Tlen okichi para motlapojpoluis iuan ikni? Achto, okitlatlaujti Jehová, satepan okititlanili se tetliokolil Esaú (Gén. 32:9-15). Uan noijki ijkuak iuan omotak, ixpan omotlankuaketski chikome uelta. Okiteititi okatka yolyamanki uan okitlakaitak ikni ijkuak okinamikito, ijkon iuan omotlapojpolui (Gén. 33:3, 4).

12. ¿Tlen techmachtia tlen okichi Jacob?

¹² Jacob omoyektlali ijkuak okinamikito ikni uan kuali okitlapoui uan tejuan uelis tikchiuaskej ken ye. Achto, okilui Jehová ma kipaleui, satepan okichi ijkon ken omotlatlaujti uan okichi miak tlamantli para kuali ma kiseli ikni. Ijkuak iuan opejki motlapouia amo okualanki. Jacob okinekiaya motlapojpoluis iuan ikni. ¿Ken uelis tikchiuaskej ken ye?

13, 14. ¿Tlen moneki tikchiuaskej tla otikyolkokojkej se tokni?

¹³ Akinmej tiknekij nochipa tiyoltoskej  tiknekij kuali timouikaskej iuan tokniuan (Rom. 12:18). Ik non, ¿tlen moneki tikchiuaskej tla otikyolkokojkej se tokni? Ijkon ken Jacob okichi, ika nochi toyolo ma tiktlatlaujtikan Jehová uan ma tikiluikan ma techpaleui ijkuak iuan timotlapojpoluitiuij.

¹⁴ Noijki moneki tikitaskej ken kajki toyolo. Uelis timotlajtlaniskej: “¿Nimochijchikauas niyetos niyolyamanki uan nimotlapojpoluiti iuan se tokni? ¿Ken kitas Jehová uan Jesús ne nias nimotlapojpoluiti uan tokni?”. Tlen titlanankiliskej techpaleuis ma tikchiuakan tlen Jesús okijto, noijki ma tiyetokan tiyolyamanki ma timotlapojpoluitij uan se tokni. Tlen okichi Jacob uelis techpaleuis ijkon ma tikchiuakan.

15. ¿Ken techpaleuia tlen kijtoua Efesios 4:2, 3 para oksepa ma timotlapojpoluitij?

¹⁵ ¿Tlen panoskia tla Jacob kiteititiskia moueyineki ijkuak okinamikito ikni? Xamo okse tlamantli panoskia. Noijki ijkon moneki tiyetoskej tiyolyamankej ijkuak timotlapouitiuij iuan se tokni tlen oksepa tiknekij iuan timouikaskej (xiktlajtolti Efesios 4:2, 3). Proverbios 18:19 kijtoua: “Tla se tokni kimachilia okiyolkokojkej yetoskia ken se altepetl kanin amikaj uelis kalakis uan ijkuak mokualaniaj yetoskia ken ipuertas se altepetl kanin amikaj uelis kalakis”. Pero tla ika nochi toyolo tikiluiaj ma techtlapojpolui, xamo kinekis oksepa iuan ma timouikakan.

16. ¿Tlen moneki timokuayejyekoskej uan tleka?

¹⁶ Noijki achto ma timokuayejyekokan tlen tikijtoskej uan ken tikchiuaskej. Ijkuak ijkon yotikchijkej, ma timotlapouitij iuan tokni tlen touan kualani para ayakmo ma moyolkoko. Xamo techiluis tlen amo techpaktis pero amo ma tikualanikan porque non amo techpaleuis oksepa iuan ma timouikakan. Okachi miak ipati ma tikitakan ken uelis oksepa timouikaskej iuan tokni uan amo timokuayejyekoskej akin kuali okichi uan akin amo (1 Cor. 6:7).

17. ¿Tlen mitsmachtia tlen okichi tokni Gilbert?

¹⁷ Ma tikitakan tlen okichi se tokni tlen itoka Gilbert para oksepa mouikas  iuan se tokni. Ye okijto: “Amo kuali onimouikaya iuan se nofamiliar. Ome xiuitl onimochijchika kuali iuan nimotlapouis, oniknekiaya oksepa kuali iuan nimouikas”. ¿Tlen okseki okichi tokni? Ye okijto: “Achto onimotlatlaujtiaya uan onimoyektlaliaya para amo nikualanis ijkuak iuan nimotlapouijtoskia. Oniktlali itech noyolo niktlapojpoluis. Onikitak amo omonekiaya nikijtos ne kuali onikchiuaya uan onikajsikamatki omonekiaya nimochijchikauas kuali iuan nimouikas”. ¿Tlen opanok satepan? Gilbert okijto: “Axkan kuali nimomachilia porque nimouika iuan nochi nofamilia”.

18, 19. Tla ikaj otikyolkokojkej, ¿tlen moneki tikchiuaskej uan tleka?

¹⁸ ¿Tlen moneki tikchiuaskej tla otikyolkokojkej se tokni? Ma tikchiuakan tlen okijto Jesús, ma tikitakan ken timotlapojpoluitiuij. Ma tiktlatlaujtikan Jehová uan ma tikiluikan ma techpaleui iespíritu santo para ma tikitakan ken oksepa timouikaskej iuan tokni. Tla ijkon tikchiuaj, tiyolpakiskej uan tikteititiskej tiktlakamatij Jesús (Mat. 5:9).

¹⁹ Tiktlasojkamatiliaj Jehová techtlasojtla uan kikauilia Jesús ma techyekana (Efes. 5:23). Ma tiktlakamatikan ijkon ken okichijkej Pedro, Santiago uan Juan (Mat. 17:5). Uelis ijkon tikchiuaskej tla timochijchikauaj timotlapojpoluiaj iuan se tokni tlen otikyolkokojkej. Noijki tla timochijchikauaj tikchiuaskej tlen moneki para tiyoltoskej nochipa, Jehová techteochiuas uan nochipa tiyolpakiskej.