1, 2. (1) ¿Tleka Jesús otechmachti amo miak tlamantli ma tikchiuakan ijkuak tikilnamikij imikilis? (2) ¿Tlen okseki tikitaskej?

¿UELIS tikijtoskej tlen tikchiuaj ijkuak tikilnamikij imikilis Cristo? Kema, uelis tikijtoskej porque amo oui. Pero xamo ikaj motlajtlanis: “¿Tleka amo miak tlamantli tikchiuaj tla nin tonal miak ipati?”.

² Ijkuak Jesús nikan okatka, amo oui otlamachti iTlajtol toTajtsin Dios uan kuali okajsikamatiayaj akinmej okikakiayaj (Mat. 7:28, 29). Noijki ijkon otechnauati amo miak tlamantli ma tikchiuakan ijkuak tikilnamikij imikilis. Pero nin tonal miak ipati. Ma tikitakan tlen tikchiuaj nin tonal, tlen okichi Jesús uan tlen okijto. Nin tlamantli techpaleuis okachi ma tikajsikamatikan tleka Jesús okatka yolyamanki, yolchikauak uan otetlasojtlaya. Noijki tikitaskej tlen techpaleuis okachi tikchiuaskej ken Jesús.

3. (1) Tlen otiktlajtoltijkej itech Mateo 26:26-28, ¿tleka tikijtoaj amo miak tlamantli okichi Jesús ijkuak okichi iCena? (2) ¿Tlen kineskayotia pan tlen amo okipiaya levadura uan tlen kineskayotia vino?

³ Jesús okichi iCena inmixpan once itlatitlaniluan. Nin tonal san okitekitilti se pan tlen amo okipiaya levadura uan vino tlen omoka ijkuak okichijkej Pascua (xiktlajtolti Mateo 26:26-28). Okinmilui itlatitlaniluan pan  okineskayotiaya itlalnakayo tlen amo kipia tlajtlakoli uan estli kineskayotia tlen satepan inpatka kitemakaskia. Itlatitlaniluan amo omotlajtlachialtijkej ijkuak okichi nin yankuik cena maski amo okichijkej miak tlamantli. ¿Tleka amo omotlajtlachialtijkej?

4. ¿Ken techpaleuia tlen Jesús okiyekilui Marta amo moneki tikchiuaskej miak tlamantli ijkuak tikilnamikiskej imikilis?

⁴ Ma tikilnamikikan tlen opanok seki metstli ijkuak Jesús yikajxitiskia eyi xiuitl otetlapouijtoka. Ye okitlajpaloto Lázaro, Marta uan María uan opejki kinmachtia. Marta sapanoa otlakualchijtoka para kitlamakaskia Jesús. Pero Jesús okiyekilui Marta amo omonekiaya sapanoa tlakualchiuaskia (Luc. 10:40-42). Satepan ijkuak Jesús yimikiskia, okichi ken okilui Marta. Okichi se iluitl pero amo sapanoa otlakualchi. ¿Tlen techmachtia tlen okichi Jesús?

5. ¿Tlen techmachtia Jesús ijkuak otlanauati amo miak tlamantli ma tikchiuakan ijkuak tikilnamikiskej imikilis uan ken mouika iuan Filipenses 2:5-8?

⁵ Nochi tlen okichi Jesús uan tlen okijto okiteititi okatka yolyamanki. Ik non, amo tetlajtlachialti non yoak ok okatka yolyamanki (Mat. 11:29). Okimatiaya topatka mikiskia, satepan Jehová kiyolitiskia uan kitlaliskia tekiua ompa iluikak. Noijki amo okijto miak tlamantli ma kichiuakan ijkuak kilnamikiskiaj imikilis. Jesús okinmilui imachtijkauan sejse xiuitl ma kilnamikikan ken moneki uan amo miak tlamantli ma kichiuakan (Juan 13:15; 1 Cor. 11:23-25). Nochi non okiteititi amo omoueyinekiaya. Tiyolpakij porque toueyi tekiua Jesús yolyamanki (xiktlajtolti Filipenses 2:5-8).

6. ¿Ken uelis tikteititiskej tiyolyamankej ken Jesús ijkuak tikixnamikiskej ouijkayotl?

⁶ ¿Ken tikteititiskej tiyolyamankej ken Jesús? Ma timotekipachokan itech tokniuan (Filip. 2:3, 4). Ma timokuayejyekokan tlen okichi Jesús se yoak ijkuak yimikiskia. Maski okimatiaya sapanoa kitlajyouiltiskiaj ijkuak kimiktiskiaj, ye omotekipacho itech imachtijkauan. Non yoak Jesús okinmachti imachtijkauan, okinyolchika uan  okinyolseui (Juan 14:25-31). Ye okachi okintekipachoaya oksekimej. Jesús techmachtia melauak okatka yolyamanki.

7. Ijkuak okijto Jesús ken mochiuaskia iCena, ¿ken okiteititi Jesús okatka yolchikauak?

⁷ Ijkuak Jesús okijto ken mochiuaskia iCena, okiteititi okatka yolchikauak. ¿Ken okiteititi okatka yolchikauak? Jesús okichi tlen Jehová okinekiaya maski kipinauiskiaj uan kiteluiskiaj okiuijuikalti toTajtsin Dios uan okimiktijkej (Mat. 26:65, 66; Luc. 22:41, 42). Okipiaya iyolo ajsitok uan okiueyichi itoka toTajtsin Dios. Noijki okijto san toTajtsin Dios kinamiki tlanauatis uan noijki omotemakak para ma kipiakan yolilistli tlen amo keman tlamis akinmej moyolkopaskiaj. Noijki okinmilui imachtijkauan tlen ouijkayotl kixnamikiskiaj.

8. (1) ¿Tlen okinmilui Jesús itlatitlaniluan? (2) ¿Ken okiteititijkej imachtijkauan Jesús okatkaj yolchikauakej satepan ijkuak ye okimiktijkej?

⁸ Jesús noijki okiteititi okatka yolchikauak ijkuak okitak ken kinpaleuiskia itlatitlaniluan. Ijkuak okilui Judas ma uia, okichi iCena uan nin kinmilnamiktiskia tlapejpenalmej ken kinpaleuia ieso Jesús tlen okinoki uan pouiskiaj itech yankuik tlajtolsenkaualistli (1 Cor. 10:16, 17). Jehová uan Jesús okinekiayaj itlaj ma kichiuakan imachtijkauan tla okinekiayaj yaskej iluikak (Juan 15:12-15). Noijki okinmilui tlen ouijkayotl kixnamikiskiaj. Satepan okinmilui ma yetokan yolchikauakej ken ye okatka (Juan 16:1-4a, 33). Satepan, imachtijkauan miak xiuitl okichijkej  ken ye uan noijki okinpaleuijkej oksekimej maski otlajyouijkej (Heb. 10:33, 34).

9. ¿Ken uelis tiyetoskej tiyolchikauakej ken Jesús?

⁹ Axkan noijki timochijchikauaj tiyetoskej tiyolchikauakej ken Jesús. ¿Ken tikteititiaj? Tikinpaleuiaj tokniuan tlen kintlajyouiltiaj porque tlaneltokaj. Ualeua miakej kintsakuaj maski amitlaj okichijkej. Ik non, moneki timochijchikauaskej tikinpaleuiskej (Filip. 1:14; Heb. 13:19). Noijki tikteititiskej tiyolchikauakej tla nochipa titetlapouiaj (Hech. 14:3). Tejuan yotikpejpenkej titetlapouiskej itech Tekiuajkayotl maski oksekimej amo kinekij techkakiskej uan maski techtlajyouiltiskej porque tiknekij tikchiuaskej ken Jesús. Pero ¿tlen tikchiuaskej tla ualeua timomachiliaj amo tiyolchikauakej?

10. ¿Tlen moneki tikchiuaskej ijkuak yiajsis tonal tikilnamikiskej imikilis Jesús uan tleka?

¹⁰ Techpaleuis ma tiyetokan tiyolchikauakej tla timokuayejyekoaj tlen kichiuas toTajtsin Dios uan nin mochiuas porque Jesús omotemakak (Juan 3:16; Efes. 1:7). Noijki tikteititiskej tiktlasojkamatij Jesús omotemakak ijkuak yiajsis tonal tikilnamikiskej imikilis. Ma tiktlajtoltikan Biblia kanin tlajtoa itech Jesús uan kuali itech ma timokuayejyekokan tlen opanok ijkuak okimiktijkej. Non techpaleuis kuali ma tikajsikamatikan tlen kijtosneki pan uan vino. Noijki tikajsikamatiskej tleka miak ipati tlen okichijkej. Nin techpaleuia ma tikajsikamatikan tlen okichi Jesús uan Jehová para tejuan uan akinmej  tikintlasojtlaj. Ik non, okachi tikneltokaj tlen kichiuas toTajtsin Dios uan okachi timochiuaj tiyolchikauakej uan ijkon titlaxikoskej ijkuak tlamis tlen amo kuali (Heb. 12:3).

11, 12. ¿Tlen tlamantli yotimomachtijkej?

¹¹ Axkan yotikitakej amo san moneki tikpatioitaskej iCena toTeko porque topatka omotemakak. Noijki techpaleuia ma tiyetokan tiyolyamankej uan ma tiyetokan tiyolchikauakej ken Jesús. Ika nochi toyolo timotlasojkamatij porque kualtsin iyelis toteopixki tlen kajki iluikak uan techpaleuia ma timouikakan iuan toTajtsin Dios (Heb. 7:24, 25). Noijki tikteititiaj timotlasojkamatij ijkuak timonechikoaj tikilnamikiskej imikilis Cristo (Luc. 22:19, 20). Sejse xiuitl tikilnamikij uan tikchiuaj itech tonal 14 metstli nisán. Nin tonal sapanoa miak ipati.

¹² Tikitaj Jesús amo omoueyineki uan noijki okipiaya okse tlamantli tlen okipaleui topatka ma miki. Ye okiteititi ijkuak okatka nikan tlaltikpak. Ma tikitakan tlen tlamantli.

13. Ijkon ken kijtoa Juan 15:9 uan 1 Juan 4:8-10, ¿ken kiteititia Jehová uan Jesús techtlasojtlaj uan akinmej kinpaleuia?

¹³ Jesús nochipa okiteititi otetlasojtlaya ijkon ken Jehová techtlasojtla (xiktlajtolti Juan 15:9; 1 Juan 4:8-10). Ye sapanoa otechtlasojtlak, ik non, topatka okitemakak iyolilis. Tinochtin techpaleuia ma techtlasojtla Jehová uan Jesús maski titlapejpenalmej noso tichantiskej nikan tlaltikpak (Juan 10:16; 1 Juan 2:2). Axkan ma tikitakan ken kiteititia Jesús techtlasojtla uan techajsikamati ijkuak tikilnamikij imikilis.

14. ¿Ken okiteititi Jesús okintlasojtlaya imachtijkauan?

¹⁴ Nochi nin tlamantli techititia Jesús amo okinnauati tlapejpenalmej ma kichiuakan miak tlamantli ijkuak kilnamikiskiaj imikilis. Yiuejkika sejse xiuitl tikilnamikij imikilis Jesús uan ualeua sekimej tokniuan kilnamikij kanin tsaktokej (Apoc. 2:10). ¿Tiktlakamatij tlen otlanauati Jesús? Kema.

15. ¿Ken okilnamikiaya se tokni iCena toTeko maski otsaktoka?

¹⁵ Tokniuan tlen okatkaj itech achto siglo okilnamikiayaj imikilis Jesús uan axkan noijki ijkon tikchiuaj. Tokniuan mochijchikauaj kichiuaskej ken otlanauati Jesús maski ualeua oui. Ma tikitakan tlen okipanok tokni Harold King. Ye otsaktoka ompa China uan san ye iselti okitsakej pero omokuayejyeko ken kilnamikiskia imikilis Jesús. San ichtaka okiyektlaliaya tlen kitekitiltiskia itech tonal. Kuali okitaya tlen tonal kilnamikiskia imikilis Jesús. Ijkuak oajsiaya non tonal, iselti otlakuikaya, omotlatlaujtiaya uan okitemakaya se tlapoualistli.

16. ¿Ken okilnamikiayaj sekimej tokniuan imikilis Jesús maski otsaktokaj?

¹⁶ Ma tikitakan tlen opanok itech Segunda Guerra Mundial. Sekimej tokniuan okatkaj kanin otetsakuayaj nazis. Uelis kinmiktiskiaj tla kilnamikiskiaj iCena toTeko. Pero san ichtaka okichijkej porque amo omonekiaya kichiuaskej miak tlamantli. Okijtojkej: “Ipan se banco otiktlalijkej  pan uan vino. Otikitakej tla titlaxotlaltiskiaj san niman techitaskiaj, ik non, otikxotlaltijkej se cera uan otikilnamikej imikilis Jesús. Otimochijchikajkej ma mochipaua itoka toTajtsin Dios uan okachi itech otitlaneltokakej”. Ninmej tokniuan melauak otlaneltokayaj itech toTajtsin Dios. Tikteititiskej tiktlasojtlaj Jesús tla tikilnamikiskej imikilis maski san kanin tiyetoskej.

17. ¿Tlen moneki ma timotlajtlanikan?

¹⁷ Ijkuak yiajsis tonal tikilnamikiskej imikilis Jesús, ma timotlajtlanikan: “¿Ken uelis okachi nitetlasojtlas ken Jesús? ¿San notech nimokuayejyekoa noso nechtekipachoaj tokniuan? ¿Nikita tlen uelis kichiuaskej?”. Ma tikchiuakan ken Jesús uan ma tikinmajsikamatikan tokniuan (1 Ped. 3:8).

18, 19. (1) ¿Tlen nochipa tikilnamiktoskej? (2) ¿Tlen tlamantli tikchiuaskej?

¹⁸ Ayakmo miak poliui uan ayakmo tikilnamikiskej imikilis Cristo. Ijkuak Jesús “walmuikas” ijkuak panos ueyi tlajyouilistli, kinuikas iluikak tlapejpenalmej tlen ok yetoskej tlaltikpak. Ijkuak ajsis non tonal, ayakmo tikilnamikiskej imikilis Cristo (1 Cor. 11:26; Mat. 24:31).

¹⁹ Maski ayakmo tikilnamikiskej iCena toTeko, amo tikilkauaskej porque nin kiteititia Jesús yolyamanki, yolchikauak uan tetlasojtla. Nin tlamantli san ye Jesús ijkon okichi. Ijkuakon tikintlapouiskej akinmej yetoskej otikilnamikiayaj imikilis Cristo uan nin kinpaleuis ijkuak kimatiskej. Tla tiknekij okachi ma techpaleui imikilis Cristo moneki tiyetoskej tiyolyamankej, tiyolchikauakej uan titetlasojtlaskej ken Jesús. ToTajtsin Dios techteochiuas tla ijkon tikchiuaskej (2 Ped. 1:10, 11).