TLAMACHTIL 3
¿Ken uelis tikmaluiskej toyolo?
“Onka miak tlamantli tlen moneki tikmaluis pero okachi xikmalui moyolo” (PROV. 4:23).
TLAKUIKALI 36 Ma tikmaluikan toyolo
XIKILNAMIKTO *
1, 2. (1) ¿Tleka Jehová sapanoa okitlasojtlaya Salomón? (2) ¿Tlen tlateochiualistli okiseli Salomón?
SALOMÓN sapanoa okatka ok telpochtli ijkuak okitlalijkej ma kinnauati israelitas. Ijkuak opejki tlanauatia Salomón, Jehová okimonextili ijkuak okochtoka uan okilui ma kitlajtlanili tlen okinekiaya. Salomón okilui Jehová amo okimatiaya tlen kichiuas, ik non, okilui ma kipaleui ma kitlakamati ika nochi iyolo (1 Rey. 3:5-10). Ijkuak ijkon okijto, okiteititi okatka yolyamanki. Ik non, tikajsikamatij tleka Jehová sapanoa okitlasojtlaya Salomón (2 Sam. 12:24). Jehová okipakti tlen okitlajtlanki uan okipaleui ma tetlakamati (1 Rey. 3:12).
2 Jehová sapanoa okiteochi Salomón porque okatka yolmelajki. Ye okichijchi teokali para itoka toTajtsin Dios (1 Rey. 8:20). Miakej okimatkej Jehová okimakak ixtlamatilistli. Noijki Salomón okinmijkuilo eyi amochmej tlen moajsij itech Biblia. Se amochtli ye Proverbios.
3. ¿Tlen tlajtlanilmej tikinnankiliskej?
3 Itech amochtli Proverbios kanaj cien veces tlajtoa itech toyolo. Ma tikitakan Proverbios 4:23 kanin kijtoa: “Onka miak tlamantli tlen moneki tikmaluis pero okachi xikmalui moyolo”. ¿Tlen kijtosneki nin texto ijkuak tlajtoa itech toyolo? Nin tlamantli timomachtijtiaskej itech nin tlamachtil. Noijki tikinnankiliskej ome tlajtlanilmej tlen miak inpati: ¿Ken kineki Satanás kijtlakos toyolo? ¿Tlen tikchiuaskej para tikmaluiskej toyolo? Tla tikmatiskej nin tlamantli, techpaleuis ma tiyetokan tiyolmelajkej ixpan Jehová.
¿TLEN KIJTOSNEKI IJKUAK BIBLIA TLAJTOA ITECH TOYOLO?
4. ¿Ken techpaleuia Salmo 51:6 ma tikajsikamatikan tlen kijtosneki “toyolo”?
4 Ijkuak Proverbios 4:23 kijtoa “toyolo”, kijtosneki tlen “tikpiaj tlaijtik” noso tlen “san tejuan tikmatij” (xiktlajtolti Salmo 51:6). Nin kijtosneki tlen timokuayejyekoaj, tlen tikmachiliaj, tlen techpaktia uan tlen tiknekij tikchiuaskej. Nin amo san moneki motas ken toyelis. Noijki moneki ma mota ken tikatej ik tlaijtik.
5. Tla tikpatioitaj tikmatiskej kox kanaj techkokoa, ¿tleka noijki ipati ma tikitakan kox kuali kajki toyolo?
5 Tla tikitaskej ken tikatej ik tlaijtik, yetoskia ken tikitaskej kox kanaj techkokoa. Tla tiknekij tichikajtoskej, moneki kuali titlakuaskej uan nochipa tikchiuaskej ejercicio. Noijki ijkon tikchiuaskej tla tiknekij tikpiaskej chikauak totlaneltokilis. Moneki nochipa ma tiktlajtoltikan Biblia, amatlajkuilolmej uan ma tikteititikan titlaneltokaj itech Jehová. Noijki ma tikchiuakan tlen timomachtiaj uan ma tikintlapouikan oksekimej tlen tikneltokaj (Rom. 10:8-10; Sant. 2:26). Ualeua mota tichikajtokej pero tlaijtik kanaj techkokoa. Noijki ualeua mota tikpiaj chikauak totlaneltokilis pero timokuayejyekoaj tikchiuaskej tlen amo kuali (1 Cor. 10:12; Sant. 1:14, 15). Ma tikilnamiktokan Satanás kineki ma timokuayejyekokan ken ye. ¿Tlen ika tlakajkayaua Satanás uan ken uelis timomaluiskej?
¿KEN KINEKI SATANÁS KIJTLAKOS TOYOLO?
6. ¿Tlen kineki Satanás ma tikchiuakan uan ken kineki techkajkayauas?
6 Satanás tlaixneki uan teixnamiki uan amo kineki ma tikintlakamatikan itlanauatiluan Jehová. Kineki ma timokuayejyekokan uan ma tikchiuakan ken ye. Amo uelis kichiuas ma tikchiuakan ken ye kineki, ik non, kineki techkajkayauas ika okseki tlamantli. Biblia kijtoa techyaualoaj akinmej yokinkajkaya Satanás (1 Juan 5:19). Satanás kineki ma timouikakan iuan akinmej amo kitekichiuiliaj Jehová. Tejuan kuali tikmatij techpatiliskej ken timokuayejyekoaj uan kinekij ma tikchiuakan ken yejuan (1 Cor. 15:33). Ijkon okichi ma kichiua Salomón. Ye omonamikti iuan miakej siuamej uan amo okiueyichiuayaj toTajtsin Dios. Nonmej siuamej yolik okichijkej Salomón ayakmo ma kitlakamati Jehová ika nochi iyolo (1 Rey. 11:3).
¿Ken uelis tikmaluiskej toyolo para amo ma techijtlako tlen mokuayejyekoa Satanás? (Xikita párrafo 7). *
7. (1) ¿Tlen okseki tlamantli kitekitiltia Satanás para ma tikchiuakan tlen ye mokuayejyekoa? (2) ¿Tleka moneki ma timomaluikan?
7 Satanás kintekitiltia películas uan itech televisión kipanoltiaj tlen ika kineki techkajkayauas. Satanás amo san kineki ma timotonalpolokan ika nin tlamantli. Noijki kineki ma tikpatlakan ken timokuayejyekoaj, tlen tikmachiliaj uan tlen tiknekij tikchiuaskej. Jesús ijkon okiteititi ijkuak otlamachti ika seki tlamantli. Ye otlajto itech tlen okichi se samaritano uan itech se telpochtli tlen okauilti itomin (Mat. 13:34; Luc. 10:29-37; 15:11-32). Nin techmachtia akinmej yokinmijtlako Satanás noijki uelis kitekitiltiskej seki tlamantli tlen ika kinekij techijtlakoskej. Ik non, ma timomaluikan. Ualeua onka seki películas tlen uelis tikinmitaskej uan amo techijtlakoliskej totlalnamikilis. Pero moneki kuali ma tikinpejpenakan. Ijkuak tikpejpenaskej tlen tikitaskej, ma timotlajtlanikan: “Nin película noso tlen panotok itech televisión, ¿kiteititia amo tlajtlakoli tla nikchiuas tlen amo kuali?” (Gál. 5:19-21; Efes. 2:1-3). Tla kipanoltiaj tlen Satanás mokuayejyekoa, san niman ma tikkauakan ken yetoskia se kokolistli tlen uelis techajsis.
8. ¿Ken uelis kinpaleuiskej tetajmej inkoneuan ma kimaluikan inyolo?
8 Tetajmej moneki xikinmaluikan namokoneuan porque Satanás kineki kinmijtlakolis inyolo. Namejuan nanmochijchikauaj amo ma kinmajsi se kokolistli namokoneuan. Nanmochijchikauaj ma yeto chipauak namokalijtik uan nankitlamotlaj nochi tlen uelis namechkokoliskuitis. Noijki ijkon moneki nankinmaluiskej namokoneuan ijkuak kinmitaj películas noso tlen panotok itech televisión, videojuegos uan itech Internet. Nin tlamantli uelis kinmijtlakos namokoneuan porque kipia seki tlamantli tlen Satanás ika kineki kinkajkayauas. Jehová yonamechnauati xikinmaluikan namokoneuan ma kipiakan chikauak intlaneltokilis (Prov. 1:8; Efes. 6:1, 4). Ik non, amo ximomojtikan ijkuak nankinmiluiskej namokalchanejkauan tlen tlanauatilmej moneki kintlakamatiskej uan nonmej tlanauatilmej ma kisakan itech principios bíblicos. Xikinmiluikan namokoneuan tlen uelis tikitaskej uan xikinyekiluikan tleka ijkon nankinnauatiaj (Mat. 5:37). Ijkon ijkuak moskaltijtiaskej kimatiskej tlen kuali uan tlen amo kuali uan kichiuaskej ken kijtoaj itlanauatiluan Jehová (Heb. 5:14). Konemej kichiuaskej tlen nankinnauatiaj. Pero okachi tetlakamatiskej tla namejuan noijki nankichiuaskej tlen nankinmiluiaj (Deut. 6:6, 7; Rom. 2:21).
9. ¿Tlen kineki Satanás ma tiktemokan uan ken techijtlakos?
9 Satanás kineki techijtlakolis toyolo porque kineki ma timokuayejyekokan tejuan tiixtlamatkej uan amo ma tikneltokakan toTajtsin Dios (Col. 2:8). Ye kineki ma tikneltokakan okachi kuali ma tikpiakan tomin. ¿Tleka amo kuali ijkon timokuayejyekoskej? Porque akinmej ijkon mokuayejyekoaj sapanoa kitemoaj ken kipiaskej tomin uan amo kitaj kox uelis mokokoskej, ayakmo kuali mouikaj iuan inkalchanejkauan uan ayakmo kuali mouikaj iuan Jehová (1 Tim. 6:10). Tiktlasojkamatiliaj Jehová porque techiluia amo ma san tiktemojtokan tomin (Ecl. 7:12; Luc. 12:15).
¿KEN UELIS TIKMALUISKEJ TOYOLO?
Ijkon ken yiuejkika otlamaluiayaj ipan tepamitl uan kanin okatkaj puertas, tejuan noijki ma timotlachilikan uan san niman ma tikixtopeuakan tlen uelis kijtlakos toyolo. (Xikita párrafo 10 uan 11). *
10, 11. (1) ¿Tlen tikchiuaskej tla tiknekij timomaluiskej? (2) ¿Tlen okichiuayaj akinmej yiuejkika otlamaluiayaj uan ken uelis noijki ijkon kichiuas totlalnamikilis?
10 Tla tiknekij tikmaluiskej toyolo, moneki tikmatiskej tlen techijtlakos uan san niman moneki itlaj tikchiuaskej. Tlen kijtoa Proverbios 4:23 techilnamiktia tlen okichiuayaj akinmej yiuejkika otlamaluiayaj. Yejuan otlamaluiayaj ipan tepamitl. San niman okintsajtsiliayaj oksekimej ijkuak okitayaj itlaj kinchiuiliskiaj. Tlen okichiuayaj techilnamiktia ma timomaluikan porque tlamo Satanás techijtlakolis totlalnamikilis.
11 Yiuejkika akinmej otlamaluiayaj ipan tepamitl, omopaleuiayaj iuan akinmej otlamaluiayaj kanin okatkaj puertas (2 Sam. 18:24-26). San sekan okitayaj ma tlatsakto ijkuak ualaskiaj akinmej okinekiayaj itlaj kinchiuiliskej (Neh. 7:1-3). Ma tikmachtikan totlalnamikilis ika tlen kijtoa Biblia * uan ijkon yetos ken akinmej otlamaluiayaj yiuejkika. ¿Ken techpaleuis? Ijkuak Satanás kinekis kijtlakos toyolo, totlalnamikilis san niman techtsajtsilis. Nin kijtosneki techtsajtsilis ijkuak Satanás kinekis ma timokuayejyekokan tlen amo kuali, tlen tikmachiliaj, tlen techpaktia uan tlen tiknekij tikchiuaskej. Nochipa ma tikkakikan totlalnamikilis ijkuak techiluia tlen techijtlakos uan san niman ma tikixtopeuakan. Yetoskia ken san niman ma titlatsakuakan ken yiuejkika okichiuayaj.
12, 13. ¿Tlen uelis tiknekiskej tikchiuaskej uan tleka moneki ma tikixtopeuakan?
12 Ma tikitakan okse tlamantli tlen techpaleuis ma timomaluikan amo ma techijtlako Satanás. Jehová yotechmachti amo ma tiauilnemikan nion ma tikchiuakan okseki tlamantli pitsotik (Efes. 5:3). Pero ¿tlen tikchiuaskej tla akinmej inmiuan titekipanoaj noso akinmej inmiuan timomachtiaj peua motlapouiaj itech tlen pitsotik? Kuali tikmatij moneki tikixtopeuaskej nochi tlen amo kuali uan nochi tlen kiyekana Satanás (Tito 2:12). Ijkuakon totlalnamikilis san niman techiluis tlen techijtlakos (Rom. 2:15). ¿Tlen tikchiuaskej? ¿Tikkakiskej totlalnamikilis ken akinmej otlamaluiayaj ipan tepamitl uan akinmej otlatsakuayaj? Xamo tiknekiskej tikinkakiskej tlen motlapouiaj noso tiknekiskej tikinmitaskej fotos tlen itech motlapouijtokej. Pero moneki san niman ma tikpatlakan tlen itech timotlapouijtokej noso san niman ma tiakan.
13 Moneki tiyetoskej tiyolchikauakej para amo tikchiuaskej tlen oksekimej kinekij ma tikchiuakan noso ma timokuayejyekokan itech tlen amo kuali. Jehová kita timochijchikauaj tikixtopeuaskej tlen ika tlakajkayaua Satanás. Jehová techpaleuis uan techmakas ixtlamatilistli para ma tikixtopeuakan nochi non tlamantli (2 Crón. 16:9; Is. 40:29; Sant. 1:5). ¿Tlen okseki tlamantli techpaleuis ma tikmaluikan toyolo?
MA TIMOTLACHILIKAN
14, 15. (1) ¿Tlen moneki ma kalaki itech toyolo uan ken tikchiuaj? (2) ¿Ken techpaleuia Proverbios 4:20-22 okachi ma tiktlajtoltikan Biblia? (Xikita recuadro “ ¿Ken uelis timokuayejyekoskej?”).
14 Amo san tikixtopeuaskej tlen amo kuali tla tiknekij tikmaluiskej toyolo. Moneki noijki tikseliskej tlen kuali. Oksepa ma timokuayejyekokan itech tepamitl tlen okiyaualoaya altepetl. Akin otlamaluijtoka kanin okatka puerta otlatsakuaya ijkuak ikaj okinekiaya kalakis uan kichiuas tlen amo kuali. Pero okintlatlapoliayaj akinmej okiuikayaj tlakuali uan okseki tlamantli. Tla amo kintlatlapoliskiaj akinmej okiuikayaj tlakuali, apismikiskiaj akinmej ompa ochantiayaj. Tejuan noijki moneki nochipa ma tiktlapokan toyolo para ompa ma kalaki tlen techmachtia Jehová.
15 Biblia techiluia tlen mokuayejyekoa toTajtsin Dios. Ik non, ijkuak tiktlajtoltiaj, tikkauiliaj ma techpaleui kox kuali tlen timokuayejyekoaj, kox kuali tlen tikmachiliaj uan tlen tiknekij tikchiuaskej. Moneki tikchiuaskej ome tlamantli tla tiknekij ma techpaleui tlen tiktlajtoltiaj itech Biblia. Achto moneki ma timotlatlaujtikan. Se tokni okijto: “Achto niktlatlaujtia Jehová ma nechpaleui ma nikpatioita iTlajtol uan satepan peua niktlajtoltia” (Sal. 119:18). Okse tlamantli, moneki timokuayejyekoskej itech tlen tiktlajtoltiaj. Tla ijkon tikchiuaskej, iTlajtol toTajtsin Dios kalakis itech toyolo uan tikpatioitaskej ken mokuayejyekoa Jehová (xiktlajtolti Proverbios 4:20-22; Sal. 119:97).
16. Xikijto ken techpaleuia tla tikitaskej JW Broadcasting.
16 Noijki tla tikitaskej JW Broadcasting® tikmatiskej ken mokuayejyekoa toTajtsin Dios. Se tokni uan isiua, okijtojkej: “Nochi tlen kisa sejse metstli tikmachiliaj Jehová technankilia. Ika timoyolchikauaj uan techpaleuia tla timoyolkokoaj noso toselti timomachiliaj. Noijki ijkuak tikatej tokalijtik nochipa tikinkakij tlakuikalmej, ijkuak titlakualchiuaj, ijkuak titlachipauaj uan ijkuak tikonij té noso tsopelikatl”. Nochi nin tlamantli techpaleuia ma tikmaluikan toyolo. Techmachtia ken mokuayejyekoa Jehová uan techpaleuia ma tikixtopeuakan tlen ika kineki techkajkayauas Satanás.
17. Ijkon ken kijtoa 1 Reyes 8:61, ¿tlen panos tla tikchiuaskej tlen timomachtiaj?
17 Mochikaua totlaneltokilis ijkuak tikchiuaj tlen kuali (Sant. 1:2, 3). Tiyolpakij porque Jehová techita ken tiikoneuan uan non kichiua okachi ma tikyolpaktikan (Prov. 27:11). Ijkuak itlaj tikixnamikiskej, tikteititiskej yotimotemakakej ixpan Jehová (Sal. 119:113). Tiktlasojtlaj Jehová ika nochi toyolo uan yotikpejpenkej tikintlakamatiskej itlanauatiluan uan noijki tikchiuaskej tlen ye kineki (xiktlajtolti 1 Reyes 8:61).
18. Ijkon ken David okitlatlaujti Jehová itech Salmo 139:23, 24, ¿tlen uelis tiktlajtlaniliskej Jehová?
18 Ualeua itlaj amo kuali tikchiuaj porque titlajtlakolejkej. Ijkuak ijkon techpanos, ma tikilnamikikan tlen okipanok Ezequías. Omoyolkopki ijkuak otlajtlakolchi uan okitekichiuili Jehová ika nochi iyolo (Is. 38:3-6; 2 Crón. 29:1, 2; 32:25, 26). Ik non, ma tikixtopeuakan nochi tlen ika kineki techkajkayauas Satanás. Ma tikiluikan Jehová ma techpaleui ma tiktlakamatikan ika nochi toyolo (1 Rey. 3:9; xiktlajtolti Salmo 139:23, 24). Tiyetoskej tiyolmelajkej ixpan Jehová tla tikmaluiskej toyolo.
TLAKUIKALI 54 “Nin ojtli”
^ párr. 5 Satanás kineki techkajkayauas ika miak tlamantli para ayakmo ma tiktekichiuilikan Jehová. ¿Tikkauiliskej ma techkajkayaua noso tiyetoskej tiyolmelajkej ixpan Jehová? Nin amo kijtosneki san tikxikoskej nochi ouijkayotl. Noijki miak ipati ma tikmaluikan toyolo. ¿Tlen kijtosneki ma tikmaluikan toyolo? ¿Ken kineki techijtlakos Satanás? ¿Ken uelis tikmaluiskej toyolo? Itech nin tlamachtil tikinnankiliskej ninmej tlajtlanilmej.
^ párr. 11 TLEN OKACHI IPATI: Ijkuak Biblia tlajtoa itech “totlalnamikilis” kijtosneki toTajtsin Dios techpaleuia ma tikitakan kox kuali tlen tikmachiliaj, tlen tikchiuaj uan toneuian ma tikitakan kox kuali tlen tikchijtokej (Rom. 2:15; 9:1). Ijkuak tikmachtiaj totlalnamikilis ika tlen kijtoa Biblia kijtosneki tikmachtiaj ika itlanauatiluan Jehová uan ijkon techpaleuia ma tikmatikan kox kuali tlen timokuayejyekoaj, tlen tikchiuaj uan tlen tikijtoaj.
^ párr. 59 FOTO: Se tokni kitlatok televisión uan oualmonexti itlaj pitsotik.
^ párr. 61 FOTO: Ijkuak akinmej otlamaluiayaj ipan tepamitl okitayaj itlaj kinchiuiliskiaj tlen ompa ochantiayaj, san niman okinmiluiayaj akinmej otlamaluiayaj kanin kajki puerta uan yejuan san niman otlatsakuayaj.
