1, 2. ¿Tlen okinmilui se ángel siuamej tlen okitemotoj Jesús uan tlen okinnauati?

XIUITL 33, 16 de nisán ijkuak yotlanestiualaya, sekimej siuamej tlen omoyolkokouayaj oyajkej otlachiatoj kanin yiome tonal otoktoka Jesucristo. Ninmej siuamej okitemotoj porque okiyektlalijkej nochi ajuiak uan aceite tlen ajuiak uan kixauiliskiaj itlalnakayo Jesús. Omotlajtlachialtijkej ijkuak oajsitoj porque ayakmo ompa okatka. Se ángel okinmilui Jesús okiyolitijkej uan noijki okinmilui: “Ye tlayakanas Galilea iwa ompa nonkitaskeh” (Mat. 28:1-7; Luc. 23:56; 24:10).

² Ijkuak siuamej oyajkej, Jesús innauak omotoki uan okinmilui: “Xikinmilitih nokniwah mawiah Galilea, iwa ompa nechitaskeh” (Mat. 28:10). Sapanoua miak ipati tlen kinmiluiskia imachtijkauan porque ijkuak okiyolitijkej san niman opejki kinmiluia ma monechikokan.

3, 4. ¿Tleka amo san tlatitlanilmej omonekiaya kichiuaskej tlen kijtoua Mateo 28:19, 20, TNM? (Xikita ixko revista).

³ (Xiktlajtolti Mateo 28:16-20, TNM). Ijkuakon, Jesús okinmilui imachtijkauan kichiuaskiaj se tekitl miak ipati ijkon ken axkan tikchiuaj. Okinmilui: “Xiakan xikinchiuakan nomachtijkauan itech nochi altepemej, [...] xikinmachtikan ma kichiuakan nochi tlen onamechnauati”.

 ⁴ Jesús kineki nochtin imachtijkauan ma tetlapouikan. Amo san okinnauati itlatitlaniluan yolmelajkej ma tetlapouikan. ¿Tleka ijkon tikijtouaj? Porque itech tepetl Galilea amo san itlatitlaniluan ompa okatkaj ijkuak okinmilui omonekiaya tetlapouiskiaj. Ma tikilnamikikan se ángel okinmilui siuamej kitaskiaj Jesús ompa Galilea. Xamo ijkuakon ompa okatkaj siuamej tlen otlaneltokayaj. Noijki tlatitlanil Pablo okijto Jesús “okinmonextili mákuili siento tokniwah” (1 Cor. 15:6). ¿Kanin okinmonextili?

5. ¿Tleka tikneltokaj 1 Corintios 15:6 tlajtoua ijkuak omonechikojkej itech tepetl Galilea tlen moijtoua Mateo capítulo 28?

⁵ Uelis tikneltokaskej Pablo otlajtojtoka ijkuak omonechikojkej ompa Galilea tlen moijtoua itech Mateo 28. ¿Tleka? Porque imachtijkauan Jesús ochantiayaj ompa Galilea. Ik non, okinnechiko itech tepetl ompa Galilea uan amo okinnechiko itech se kali ompa Jerusalén. Noijki Jesús yomonechikojka iuan 11 itlatitlaniluan ompa Jerusalén ijkuak okiyolitijkej. Tla san yejuan tlamachtiskiaj, ayakmo kinmiluiskia siuamej uan oksekimej imachtijkauan ma yakan itech tepetl ompa Galilea (Luc. 24:33, 36).

6. ¿Ken kiteititia Mateo 28:20, TNM, axkan moneki tikinpaleuiskej oksekimej ma mochiuakan imachtijkauan Jesús uan ken mochijtok?

⁶ Noijki Jesús amo san okinmilui 11 itlatitlaniluan yolmelajkej ma tlamachtikan. ¿Ken tikmatij? Saiktlami Jesús okinmilui imachtijkauan: “Nochipa namouan niyetos hasta itlamian tonalmej” (Mat. 28:20, TNM). Ijkon ken okijto Jesús axkan miakej mochijtokej imachtijkauan. Ma tikitakan tleka ijkon tikijtouaj. Sejse xiuitl kanaj 300,000 (trescientos mil) mochiuaj imachtijkauan Jesús, moapolaktiaj uan mochiuaj iTlaixpantijkauan Jehová.

7. ¿Tlen timomachtiskej uan tleka?

⁷ Miakej ajsi itech inyolo tlen tlamachtia Biblia uan moapolaktiaj. Pero sekimej amo mixeuiaj mochiuaskej imachtijkauan Jesús. Kinpaktia tlen momachtiaj pero amo kichiuaj tlen momachtiaj, ik non, amo moapolaktiaj. Tinochtin tiknekij tikinpaleuiskej akinmej tikinmachtiaj Biblia ma kichiuakan tlen kijtoua uan ma mochiuakan imachtijkauan Jesús. Nin tlamachtil techpaleuis ma tikinpaleuikan ma ajsi itech inyolo tlen momachtiaj uan ma kipiakan chikauak intlaneltokilis. ¿Tleka moneki ijkon ma tikchiuakan? Porque ajsis tonal ijkuak tikitaskej kox ok tikinmachtiskej noso ayakmo.

8. ¿Tleka ualeua akinmej tikinmachtiaj oui kitaj kitlasojtlaskej Jehová?

⁸ Jehová kineki ma tiktekichiuilikan porque tiktlasojtlaj. Ik non, tiknekij tikinpaleuiskej akinmej tikinmachtiaj ma kimatikan Jehová kinmajsikamati uan sapanoua kintlasojtla. Tiknekij ma kitakan Jehová “inTajtsin iknomej uan kinmaluia siuamej tlen yoixpoliuik innamik” (Sal. 68:5). Ijkuak akinmej tikinmachtiaj kajsikamatij toTajtsin Dios kintlasojtla, kinpaleuia okachi ma kitlasojtlakan. Pero sekimej amo kajsikamatij toTajtsin Dios techtlasojtla porque intatajuan amo keman okintlasojtlakej (2 Tim. 3:1, 3). Ik non, ma tikinmiluikan ken iyelis toTajtsin Dios ijkuak tikinmachtiaj. Ma tikinpaleuikan ma kajsikamatikan Jehová kineki nochipa ma yoltokan uan noijki kineki kinpaleuis ma  kichiuakan tlen moneki. ¿Ken uelis okachi tikinpaleuiskej?

9, 10. ¿Ika tlen amochmej moneki titlamachtiskej uan tleka?

⁹ Ma tikinmachtikan ika amochtli ¿Tlen techmachtia Biblia? uan “Xiyetokan itech itlasojtlalis toTajtsin Dios”. Ninmej ome amochmej techpaleuiskej ma ajsi itech inyolo tlen tlamachtia Biblia akinmej tikinmachtiaj. Ma tikitakan ken tikchiuaskej. Amochtli tlen itoka Techmachtia, capítulo 1 kinnankilia ninmej tlajtlanilmej: ¿Totech motekipachoa toTajtsin Dios? ¿Ken momachilia toTajtsin Dios ijkuak titlajyouiaj? ¿Uelis timouikas iuan Jehová? Amochtli tlen itoka “Xiyetokan itech itlasojtlalis toTajtsin Dios” uelis ika tikinpaleuiskej akinmej tikinmachtiaj ma moyekanakan ika principios bíblicos. Non kinpaleuis kuali ma yetokan uan kuali ma mouikakan iuan Jehová. Maski oksekimej yotikinmachtijkej ika ninmej amochmej, moneki nochipa kuali ma timomachtikan uan ijkon uelis sejse tikinpaleuiskej.

 ¹⁰ Ma tikijtokan akin tikmachtiaj kineki momachtis okse tlamantli tlen kajki itech okse amatlajkuilol tlen amo ika titlamachtiaj. Ma tikiluikan iselti ma kitlajtolti non amatlajkuilol uan ma tikmachtikan ika amochmej tlen yotikinmijtojkej.

11. ¿Keman moneki peuas timotlatlaujtiskej ijkuak titlamachtiaj uan tlen uelis tikchiuaskej?

¹¹ Ma timotlatlaujtikan ijkuak peua titlamachtiaj. ¿Keman peuas timotlatlaujtiskej ijkuak titlamachtiaj? Amo ma tikkauakan ma pano miakej semanas. San niman ma timotlatlaujtikan ijkuak peua titlamachtiaj. Ma tikinmiluikan akinmej tikinmachtiaj uelis tikajsikamatiskej Biblia tla tiktlajtlaniliskej iespíritu toTajtsin Dios. Sekimej tokniuan ijkuak kinmiluiaj akinmej kinmachtiaj tleka moneki motlatlaujtiskej, kintlajtoltiliaj Santiago 1:5, ompa kijtoua: “Tla seme de nomejwah amo kipia ixtlamatílistli, makitlajtlanili Dios”. Satepan kintlajtlaniaj: “¿Ken uelis tiktlajtlaniliskej iespíritu santo toTajtsin Dios?”. Xamo inselti kijtoskej moneki timotlatlaujtiskej.

12. ¿Ken uelis tikinpaleuiskej ika Salmo 139:2-4 akinmej tikinmachtiaj ma kitlatlaujtikan Jehová?

¹² Ma tikinmititikan akinmej tikinmachtiaj ma motlatlaujtikan. Ma tikinmiluikan Jehová kineki kinkakis ijkuak motlatlaujtiskej ika nochi iyolo. Noijki ma tikinmiluikan Jehová uelis kiluiskej nochi tlen kimachiliaj uan uelis kiluiskej nochi tlen amikaj kiluiskiaj. Noijki ma kilnamiktokan Jehová yikimati nochi tlen mokuayejyekouaj (xiktlajtolti Salmo 139:2-4). Ma tikinmiluikan ma kitlajtlanilikan toTajtsin Dios ma kinpaleui ma kipatlakan tlen mokuayejyekouaj uan ma kinpaleui ayakmo ma kichiuakan costumbres. Ualeua sekimej akinmej tikinmachtiaj ok kinpaktia iluichiuaskej. Kimatij amo kuali ijkon kichiuaskej pero kinpaktia tlen ompa kichiuaj. Ma tikinyoleuakan ma kiluikan Jehová tlen kimachiliaj uan ma kiluikan ma kinpaleui ma kitlauelitakan tlen amo kuali (Sal. 97:10).

13. (1) ¿Tleka moneki san niman ma tikinmiluikan akinmej tikinmachtiaj touan ma monechikokan? (2) ¿Tlen uelis tikchiuaskej tla tiknekij kuali ma momachilikan akinmej tikinmachtiaj ijkuak touan monechikoskej?

¹³ San niman ma tikinmiluikan touan ma monechikokan akinmej tikinmachtiaj. ¿Tleka? Porque tlen ompa momachtiskej uan tlen kitaskej, uelis ajsis itech inyolo uan kinpaleuis ma kipiakan chikauak intlaneltokilis. Ik non, moneki ma tikinmititikan video tlen itoka ¿Ken tikchiuaj tonechikoluan? uan ma tikinmiluikan touan ma monechikokan. Ma tikinmiluikan uelis tikinnotsatiuij. Noijki ma tikinpapatlakan tokniuan ijkuak tiauij tikinmachtitiuij. Ijkon kinmixmatiskej tokniuan uan kuali momachiliskej ijkuak touan monechikoskej.

14. ¿Tlen kinpaleuis akinmej tikinmachtiaj ma kitekichiuilikan toTajtsin Dios?

¹⁴ Tiknekij tikinpaleuiskej akinmej tikinmachtiaj ma kitekichiuilikan Jehová (Efes. 4:13). Ijkuak ikaj peua momachtia xamo san kita ken kipaleuia tlen momachtia. Pero ijkuak okachi peuas kitlasojtlas Jehová, xamo mokuayejyekos ken kinpaleuis oksekimej uan noijki tokniuan (Mat. 22:37-39). Noijki nochipa ma tikinmilnamiktikan se tlateochiualistli tiktemakaskej totomin uan ijkon okachi motetlapouis iTekiuajkayo toTajtsin Dios.

15. ¿Ken uelis tikinpaleuiskej akinmej tikinmachtiaj ma kixnamikikan ouijkayotl?

 ¹⁵ Ma tikinpaleuikan akinmej tikinmachtiaj ma kixnamikikan ouijkayotl. Ma tikitakan tleka moneki ma tikinpaleuikan. Se akin tikmachtiaj yitetlapouia uan ayamo moapolaktia, techiluia se tokni okiyolkoko. ¿Tlen tikchiuaskej? Amo ma tikiluikan tlen kichiuas. Ma tikititikan tlen kijtoua Biblia. Ma tikyekiluikan uelis kitlapojpoluis tokni. Pero tla amo ueli kilkaua tlen opanok, ma motlapoui iuan tokni (noijki xikita Mateo 18:15). Ma tikpaleuikan ken uelis motlapouis iuan tokni. Ma tikititikan ken kitekitiltis JW Library^®, amatlajkuilol Tlen ika momachtiaj iTlaixpantijkauan Jehová uan página jw.org^® tlen tikpiaj itech Internet. Non kipaleuis ma kiyektlali ouijkayotl tlen kipia iuan oksekimej. Tla axkan tikititiskej ken kiyektlalis ouijkayotl, satepan kuali mouikas iuan tokniuan.

16. ¿Ken techpaleuis tla tikinpapatlaskej tokniuan ijkuak titlamachtiaj?

¹⁶ Ma tikinpapatlakan tokniuan ijkuak titlamachtiaj uan noijki ma tikuikakan tlayekanki itech circuito ijkuak techtlajpaloki. ¿Tleka? Ijkon ken yotikijtojkej itech párrafo 13 tokniuan uelis kinpaleuiskej akinmej tikinmachtiaj ma kipatlakan seki tlamantli. Ma tikijtokan se akin tikmachtiaj mochijchikaua ayakmo tlachichinas pero amo ueli kikaua. Ma tikuikakan se tokni tlen otlachichinaya uan noijki oui okika tlachichinas. Xamo ye uelis kiluis tlen kipaleuis ayakmo ma tlachichina. Tla amo kuali timomachiliaj tikmachtiskej ixpan tokni, ma tikiluikan ye ma kimachti. Pero ma tikitakan ken tlamachtiaj tokniuan uan ijkon tikinpaleuiskej akinmej tikinmachtiaj. Ma tikilnamiktokan tiknekij tikinpaleuiskej akinmej tikinmachtiaj ma kipiakan chikauak intlaneltokilis.

17, 18. ¿Tlen moneki tikchiuaskej ijkuak ikaj ayakmo tikmachtiskej?

¹⁷ Tla akin tikmachtiaj amo kichiua tlen momachtia, ma timotlajtlanikan kox ok tikmachtiskej. Pero ma tikilnamiktokan amo nochtin totoka kajsikamatij tlen tikinmachtiaj. Sekimej totoka kipatlaj inyelis uan oksekimej kitaj oui ijkon kichiuaskej. Ik non, ma timotlajtlanikan: “¿Yolik kipatla iyelis akin nikmachtijtok? ¿Yopejki kichiua tlen momachtia?” (Mat. 28:20, TNM). Ualeua yolik kipatlatiuij inyelis akinmej tikinmachtiaj pero moneki ma tikitakan kox yikipatlatokej inyelis.

¹⁸ Pero ¿tlen tikchiuaskej tla akin tikmachtiaj amo kipatioita tlen tlamachtia Biblia noso sepa amo kipaktia? Ma tikijtokan yotikmachtijkej ika amochtli tlen itoka Techmachtia  uan xamo noijki yopejki tikmachtiaj ika amochtli tlen itoka “Xiyetokan itech itlasojtlalis toTajtsin Dios” pero amo keman touan monechikoua nion ijkuak tikilnamikij imikilis Jesús. Noijki ijkuak tikmachtitiuij techiluia amo kineki momachtis porque amo majxilia. Tla ijkon kichiua, moneki kuali iuan ma timotlapouikan. *

19. ¿Tlen tikchiuaskej tla akin tikmachtiaj amo kipatioita tlen tlamachtia Biblia?

¹⁹ Uelis iuan timotlapouiskej uan tiktlajtlaniskej: “¿Tlen amo mitskauilia amo ximochiua iTlaixpantijka Jehová?”. Tla yiuejkika tikmachtiaj uan kijtoua kipaktia pero amo keman mochiuas iTlaixpantijka Jehová, ma timotlajtlanikan kox ok moneki tikmachtiskej. Xamo techiluis tleka amo kichiua tlen toTajtsin Dios kineki. Xamo mokuayejyekoua amo keman uelis tetlapouis. Uelis tikpaleuiskej tla tikmatiskej tlen kitekipachoua.

20. ¿Ken techpaleuia Hechos 13:48 ma tikmatikan kox ok tikinmachtiskej akinmej tikinmachtiaj?

²⁰ Teyolkoko porque sekimej akinmej tikinmachtiaj kipiaj inyelis ken israelitas ijkuak okatka Ezequiel. Jehová okilui Ezequiel ninmej tlajtolmej: “Yetoskia ken kualtsin uan ika tlasojtlalistli tikintlakuikilia uan kuali titlatsotsona. Kikakiskej tlen tikijtos pero amo kichiuaskej” (Ezeq. 33:32). Xamo amo timixeuiaj tikinmiluiskej ayakmo tikinmachtiskej pero “ayakmó tikpiah miak tonati” (1 Cor. 7:29). Ik non, ayakmo ma tikinmachtikan akinmej amo kinekij kichiuaskej tlen toTajtsin Dios kineki. Ma tikintemokan akinmej kinekij ‘yolitoskeh nochipa’ (xiktlajtolti Hechos 13:48).

21. ¿Tlen texto motekitiltis 2020 uan tleka sapanoua techpaleuis?

²¹ Texto tlen motekitiltis 2020 techpaleuis okachi kuali ma titlamachtikan. Nin texto kijtoua tlen Jesús okijto itech tepetl ompa Galilea: “Xiakan xikinchiuakan nomachtijkauan [...] xikinapolaktikan” (Mat. 28:19, TNM).