1, 2. (1) ¿Tlen tikmatij tiitekipanojkauan Jehová? (2) ¿Tlen tikitaskej?

 NOCHTIN tiitekipanojkauan Jehová tikmatij titlajyouiskej porque Biblia kijtoua: “Sapanoua titlajyouiskej para tikalakiskej itech iTekiuajkayo toTajtsin Dios” (Hech. 14:22, TNM). Axkan tikmatij titlajyouiaj uan nochi tlamis ijkuak tiyetoskej itech xochitlali kanin “ayakmó yetos mikílistli, nion chokílistli, nion neyolkókoli, nion tekipanólistli” (Apoc. 21:4).

² Maski Jehová kikaua matitlajyouikan, ye techpaleuia matitlaxikokan. Matimokuayejyekokan tlen okinmilui Pablo tokniuan tlen ochantiaya Roma. Ijkuak okinmilui ken otlajyouijtokaj okinmijkuilili: “Matitlatlanikah porke Ye techtlasojtla” (Rom. 8:35-37). Non kijtosneki maski titlajyouiaj Jehová kuali techpaleuis. Axkan tikitaskej tlen okipanok José, maski otlajyoui nochi tlen okichi kuali okiski porque Jehová okipaleui. Noijki tikitaskej ken uelis Jehová techpaleuis.

3. ¿Ken omopatlak inemilis José?

³ Nochtin tikmatij Jacob sapanoua okitlasojtlaya José (Gén. 37:3, 4). Ikinon ikniuan José opejkej kikokolia uan satepan okinemakiltijkej madianitas. Yejuan okiuikakej Egipto kanin uejka okatka. Ompa oksepa okinemakakej José, okinemakiltijkej se tlakatl  tlen omotokayotiaya Potifar, ye okiyekanaya isoldados faraón. San niman omopatlak inemilis José porque itajtsin sapanoua okitlasojtlaya pero satepan omokopki se tlakeuali ompa Egipto (Gén. 39:1).

4. ¿Tlen uelis techpanos ijkon ken José?

⁴ Biblia kijtoua: “Tinochtin titlajyouiaj uan uelis itlaj amo kuali techpanotikisa” (Ecl. 9:11). Tejuan titlajyouiaj ijkon ken ualeua nochtin kinpanoua (1 Cor. 10:13). Noijki techpinauiaj, techtlajyouiltiaj noso techkokoliaj porque tikchiuaj ken Cristo (2 Tim. 3:12). Maski san tlen techpanos, Jehová techpaleuis para kuali makisa tlen tikchiuaj. Matikitakan ken okipaleui José.

5. ¿Tlen okitak Potifar? (Génesis 39:2-6).

⁵ (Xiktlajtolti Génesis 39:2-6). Potifar okitak José kuali otekipanouaya. Ye okitak “Jehová okatka iuan José uan Jehová okipaleuiaya kuali makisa tlen okichiuaya”. b Satepan Potifar okilui José makipaleui uan opejki kimaluia ikalijtik. Ikinon Jehová sapanoua okiteochi non tlakatl.

6. ¿Ken xamo omomachiliaya José?

⁶ Matimokuayejyekokan tlen okipanok José. ¿Tlen okinekiaya kichiuas? ¿Okinekiaya kiyolpaktis Potifar para makimaka seki tlamantli? Xamo José okinekiaya yetos ikalijtik iuan itajtsin. Maski okipiaya miak tekitl ye ok okatka itlakeual Potifar akin okiueyichiuaya okseki teotsitsintin. Jehová amo okinauati Potifar makikajkaua José para mamokopa ikalijtik, noijki satepan okachi tlajyouiskia.

7. ¿Tleka okachi otlajyoui José? (Génesis 39:14, 15).

⁷ Génesis capítulo 39 kijtoua isiua Potifar okipakti José uan okinekiaya iuan  motekas. Pero ye nochipa ocholo. Isiua Potifar sapanoua okualanki uan okijto José okinekiaya kipijpinatis (xiktlajtolti Génesis 39:14, 15). Ijkuak Potifar okimatki, otlanauati makitsakuakan José ikinon seki xiuitl otsaktoka (Gén. 39:19, 20). ¿Ken okatka kanin otsaktoka? Tlajtoli hebreo tlen okijto José para kijtos kanin otsaktoka kuali motlajtolkopas ken “tlakoyoktli” noso “cisterna”. Ikinon tikijtouaj okatka iselti uan amitlaj omotaya kanin okatka José (Gén. 40:15, nota). Noijki Biblia kijtoua satepan José okitlalilijkej tepostli ipan ikxiuan uan ipan ikech (Sal. 105:17, 18). Ye okachi otlajyoui porque okitsakej maski okatka itlakeual Potifar.

8. ¿Tlen moneki tikneltokaskej maski sapanoua titlajyouiskej?

⁸ ¿Mitspanotok itlaj amo kuali uan maski otiktlatlaujti Jehová ok otitlajyoui? Xamo ijkon omitspanok. Jehová kikaua matitlajyouikan uan noijki axkan tlanauatijtok Satanás (1 Juan 5:19). Pero tikmatij toTajtsin Dios kitekipachoua tlen techpanoua uan ye kineki techpaleuis (Mat. 10:29-31; 1 Ped. 5:6, 7). Ye techiluia: “Ayik nimitskajtewas moselti, nion nimitsilkawas” (Heb. 13:5). Tlen okipanok José techmachtia Jehová techpaleuis matitlaxikokan maski sapanoua matitlajyouikan.

9. ¿Ken tikmatij Jehová okipaleui José ijkuak otsaktoka? (Génesis 39:21-23).

⁹ (Xiktlajtolti Génesis 39:21-23). Maski José otlajyouijtoka Jehová okipaleui. ¿Ken okichi? Ijkon ken okipanok Potifar, tlakatl akin otlayekanaya kanin otsaktoka José okitak ye kuali otekipanouaya ikinon okikauili noijki matlayekana. Biblia kijtoua: “Akin otlayekanaya telpiloyan amo okitaya tekitl tlen okichiuaya José” porque kuali otekipanouaya. Ikinon José amo san omotekipachouaya. Melauak techtlajtlachialtiaj se tlakatl okitlalijkej matlayekana maski okijtojkej okinekiaya kipijpinatis isiua se tlakatl tlen okitekichiuiliaya faraón. Pero Biblia kijtoua tleka ijkon opanok, Génesis 39:23 kijtoua: “Jehová okatka iuan José uan Jehová okipaleuiaya kuali makisa tlen okichiuaya”.

10. ¿Tleka tikijtouaj José amo omokuayejyekouaya nochi kuali okichiuaya?

¹⁰ Oksepa matimokuayejyekokan tlen okipanok José. ¿Omokuayejyekouaya nochi kuali okichiuaya maski okitsakej porque okijtojkej itlaj tlen amo melauak? ¿Tlen okachi okinekiaya kichiuas José? ¿Okinekiaya mouikas iuan akin otlayekanaya kanin otsaktoka? Xamo ye okinekiaya makikajkauakan. Ijkuak se tlakatl kisaskia, José okilui makitlapoui faraón tlen okipanok para ye noijki makikajkauakan (Gén. 40:14). Pero non tlakatl amo san niman okitlapoui faraón uan José ok otsaktoka ome xiuitl (Gén. 40:23; 41:1, 14). Pero Jehová okipaleuiaya José para kuali makisa tlen okichiuaya. ¿Tleka ijkon tikijtoua?

11. ¿Ken Jehová okipaleui José uan ken omochi tlen Jehová kineki?

¹¹ Ijkuak José otsaktoka Jehová okichi faraón ome uelta matemiki. Faraón okinekiaya kimatis tlen okijtosnekiaya tlen okitemik. Ikinon ijkuak okimatki  José uelis kiluiskia tlen okijtosnekiaya, otlanauati makinotsakan. Jehová okipaleui José makilui faraón tlen kijtosneki tlen okitemik uan noijki okilui tlen omonekiaya kichiuas. Faraón sapanoua okitlajtlachialti tlen okilui José, okitak Jehová okipaleuiaya uan okitlali makimalui nochi tlakuali tlen okatka Egipto (Gén. 41:38, 41-44). Opanok seki xiuitl uan amo okipiaya tlen kikuaskej Egipto uan noijki ompa Canaán kanin ochantiaya ifamilia José. Ijkon José okinpaleui akinmej satepan yetoskiaj iuejkatatajuan Mesías.

12. ¿Tlen okichi Jehová para nochipa kipaleuis José?

¹² Matimokuayejyekokan ken omopatlak inemilis José. ¿Akin okichi Potifar makita kuali otekipanouaya José maski okatka se tlakeuali? ¿Akin okichi tlakatl tlen otlayekanaya kanin otsaktoka José noijki makitlali matlayekana? ¿Akin okichi faraón matemiki uan akin okipaleui José makilui tlen okinekiaya kijtos tlen okitemik? ¿Akin okiyolini faraón para makitlali José makimalui tlakuali tlen okatka Egipto? (Gén. 45:5). Nochtin tikmatij Jehová okipaleui José para nochi tlen okichiuaya kuali makisa. Ikniuan José okinemakakej pero Jehová nochipa okipaleui uan ijkon omochi tlen ye kineki.

13. ¿Jehová techpaleuia itech sejse tlamantli tlen techpanoua?

¹³ Itlaj ipati techmachtia tlen okipanok José. ¿Jehová techpaleuia itech sejse tlamantli tlen techpanoua? ¿Titlajyouiaj porque Jehová satepan kichiuas itlaj tlen kuali? Biblia amo ijkon tlamachtia (Ecl. 8:9; 9:11). Pero tikmatij ijkuak titlajyouiaj Jehová kita tlen techpanoua uan techkaki ijkuak tiktlatlaujtiaj (Sal. 34:15; 55:22; Is. 59:1). Noijki Jehová techpaleuia matitlaxikokan. ¿Ken kichiua?

14. ¿Ken techpaleuia Jehová ijkuak titlajyouiaj?

¹⁴ Jehová techyolchikaua uan techyolseuia ijkuak titlajyouiaj (2 Cor.  1:3, 4). Ijkon okipanok se tokni tlen motokayotia Eziz ye chanti Turkmenistán. Ye okitsakej ome xiuitl porque iTlaixpantijka Jehová. Ye okijto: “Kualkan ijkuak nechixkomakaskiaj se tokni onechtlajtoltili Isaías 30:15: ‘Nanyetoskej chikauakej tla nanmoyolseuijtokej uan nantlaneltokaj’. Non versículo onechpaleui manimoyolseuijto uan okachi manikneltoka Jehová. Noijki non versículo onechyolchika uan onechpaleui manitlaxiko ijkuak onitsaktoka”. ¿Tikilnamiki ken Jehová omitsyolchika uan omitsyolseui ijkuak otitlajyoui?

15, 16. ¿Tlen techmachtia tlen okipanok tokni Tori?

¹⁵ Uelis amo tikitaj ken Jehová techpaleuia ijkuak titlajyouiaj hasta ijkuak ayakmo ijkon techpanotok. Se tokni tlen itoka Tori ijkon okipanok. Itelpoch tlen omotokayotiaya Mason oixpoliuik porque okipiaya cáncer chikuase xiuitl. Tori sapanoua omoyolkoko. Ye okijto: “Sapanoua techyolkokoua ijkuak ijkon techpanoua akinmej tikinpiaj tokoneuan”. Noijki okijto: “Nikneltoka akinmej tikinpiaj tokoneuan okachi techyolkokouaj ijkuak tikitaj se tokone tlajyouia uan amo ijkuak tejuan titlajyouiaj”.

¹⁶ Maski sapanoua omoyolkoko, Tori satepan omokuayejyeko ken okipaleui Jehová. Ye okijto: “Ijkuak nikilnamiki tlen onechpanok, nikita ken Jehová okiteititi nechtlasojtla uan onechmalui ijkuak Mason omokokouaya. Nokone amo kuali okinmitaya tokniuan porque sapanoua omokokouaya pero tokniuan oyayaj hospital maski  ouejkauayaj ome horas. Yejuan nochipa ompa touan okatkaj para techyolchikauaskej uan noijki otechmakayaj tomin para techpaleuiskej. Ijkuak sapanoua otitlajyouijkej amitlaj otechpolo”. Jehová okinpaleui Tori uan Mason para matlaxikokan (Xikita recuadro “ Jehová otechmakak tlen moneki ijkuak otitlajyouijtokaj”).

17, 18. ¿Tlen techpaleuis matikitakan uan matiktlasojkamatilikan Jehová techpaleuia ijkuak titlajyouiaj? (Salmo 40:5).

¹⁷ (Xiktlajtolti Salmo 40:5). Ijkuak ika kineki tlejkos itech se tepetl kineki ajsis hasta tlakpak. Pero ijkuak yaui uelis moketsas uan kitas nochi kualtsin mota. Tejuan noijki uelis timokuayejyekoskej ken Jehová techpaleuijtok ijkuak titlajyouiaj. Matimotlajtlanikan: “¿Ken nechteochijtok axkan Jehová? Maski nitlajyouijtok, ¿tlen kichijtok Jehová para nechpaleuis manitlaxiko?”. Mojmostla matimokuayejyekokan ken Jehová techteochiua.

¹⁸ Uelis tikiluiskej Jehová matechpaleui para ayakmo matitlajyouikan (Filip. 4:6). Pero amo matikilkauakan ken Jehová yotechteochi. Noijki ye techiluia techyolchikauas uan techpaleuis matitlaxikokan. Nochipa matiktlasojkamatilikan porque nochipa techpaleuia. Tla ijkon tikchiuaj, uelis tikitaskej ken Jehová techpaleuis ijkon ken okipaleui José (Gén. 41:51, 52).