1, 2. (1) ¿Ken kipiaj intlaneltokilis sekimej tokniuan? (2) ¿Tlen tlajtlanilmej tikinnankiliskej?

SE TOKNI tlen chanti Canadá, okijto: “Okachi niyolpaki uan nikixnamiki nochi ouijkayotl porque nikpia chikauak notlaneltokilis”. Okse tokni tlen chanti Brasil, okijto: “Nosiua uan ne tiyolpaki yikanaj veintitrés xiuitl porque timochijchikauaj tikpiaskej chikauak totlaneltokilis”. Okse tokni tlen chanti Filipinas, okijto: “Nechpaleuia nikpia chikauak notlaneltokilis porque nikpia yolseuilistli uan okachi kuali nimouika iuan tokniuan”.

² Techpaleuia tikpiaskej chikauak totlaneltokilis. ¿Ken uelis okachi chikauak tikpiaskej totlaneltokilis uan ijkon okachi kuali tiyetoskej? Achto ma tikajsikamatikan tlen kijtoa Biblia ijkuak ikaj kipia chikauak itlaneltokilis. Axkan timomachtiskej eyi tlajtlanilmej. ¿Tlen kijtosneki tikpiaskej chikauak totlaneltokilis? ¿Tlen neskayomej techpaleuiskej ma tikpiakan okachi chikauak totlaneltokilis? ¿Ken techpaleuis tikpiaskej “itlayejyekolis in Cristo”?

3. Ijkon ken kijtoa Biblia, ¿tleka okse tlamantli kichiua akin kipia iespíritu toTajtsin Dios uan okse tlamantli kichiua akin amo kipia?

³ Tlatitlanil Pablo okiyekijto tlen kijtosneki “se tlakatl katlej amo kipia iEspíritu in toTajtzin Dios” uan “se tlakatl katlej kipia iEspíritu in toTajtzin Dios” (xiktlajtolti 1 Corintios 2:14-16, NHY). Okijto “tlakatl katlej amo kipia iEspíritu in toTajtzin Dios mach kimomaka kuenta tlan iEspíritu in toTajtzin Dios techmachtia, porke para yej kita kej yeskia se tontojyotl”. Pero “tlakatl katlej kipia iEspíritu in toTajtzin Dios” ye “weli kimomaka kuenta nochi tlamantle kox kuale o noso amo kuale” porque kipia “itlayejyekolis in Cristo”. ¿Tleka tlatlamantli kichiuaj?

4, 5. ¿Tlen kichiuaj akinmej amo kipiaj iespíritu toTajtsin Dios?

⁴ Achto ma tikitakan ken mokuayejyekoa “tlakatl katlej amo kipia iEspíritu in toTajtzin Dios”. Ijkon ken okijto Pablo, non tlakatl san kichiua tlen “kiwilita non tlanawatia kan ejekatl, iwa axa kinyakantok akimeh amo kitlakitah Dios” (Efes. 2:2). San kichiua tlen oksekimej kichiuaj. Ik non, kichiua tlen kita kuali uan amo mochijchikaua kintlakamatis itlanauatiluan toTajtsin Dios. San kitekipachoa ken kitaj oksekimej uan kineki kipias miak tlamantli noso okachi kipatioita tlen kineki kipias.

⁵ “Tlakatl katlej amo kipia iEspíritu in toTajtzin Dios” ‘kichiwa tlan kiyoltilana ikuerpo’ (Gál. 5:19-21). Ijkuak Pablo okinmijkuilili achto carta tokniuan tlen ochantiayaj Corinto, okijto seki tlamantli tlen kichiuaj akinmej amo kipiaj iespíritu toTajtsin Dios. Okijto san kanin mokajkalakiaj, kinekij kinxexeloskej oksekimej, amo tetlakamatij, kinteluiaj oksekimej inmixpan tekiuajkej, amo kintlakamatij tekiuajkej, sapanoa kinpaktia tlakuaskej uan tlakoniskej. Noijki amo kimoxikoltiaj tlajtlakoli (Prov. 7:21, 22). Judas okijto yejuan amo kipiaj iespíritu toTajtsin Dios (Judas 18, 19, TNM).

6. ¿Tlen kichiuaj akinmej kipiaj iespíritu toTajtsin Dios?

⁶ Akinmej kipia iespíritu toTajtsin Dios okse tlamantli kichiuaj. Kipatioitaj mouikaskej iuan toTajtsin Dios uan mochijchikauaj kichiuaskej ken ye (Efes. 5:1, TNM). Kijtosneki mokuayejyekoaj ken ye uan kitaj nochi tlamantli ken ye kita. Kimatij melauak onka toTajtsin Dios. Itech nochi innemilis kintlakamatij itlanauatiluan Jehová (Sal. 119:33; 143:10). Mochijchikauaj kichiuaskej tlen poui itech espíritu santo uan amo kichiuaj tlen amo kuali (Gál. 5:22, 23). Ma tiktlalikan se neskayotl tlen techpaleuis ma tikajsikamatikan tlen kijtosneki tikpiaskej chikauak totlaneltokilis. Ijkuak ikaj kimati tlanemakas moixmati ken tlanemakak. Noijki ijkon akinmej kinekij kiyolpaktiskej toTajtsin Dios kipiaj chikauak intlaneltokilis.

7. ¿Tlen kijtoa Biblia itech akinmej kipiaj chikauak intlaneltokilis?

⁷ Jesús okijto yolpakij akinmej kipiaj chikauak intlaneltokilis. Lucas 11:28 kijtoa: “¡Okachi kuali yolpakilisojkeh akimeh kikakih itlajtol Dios iwa kitlakitah!”. Uan Romanos 8:6 kijtoa tleka okachi kuali tikpiaskej chikauak totlaneltokilis. Ompa kijtoa:  “Iwa akin sa kilnamiktok kichiwas tlan ikuerpo kelewia, san semi moixpolos. Pero akin motekipachoa kichiwas tlan n Espíritu kineki, yolitos iwa kipias yolsewílistli”. Tla timochijchikauaj tikpiaskej chikauak totlaneltokilis, kuali timouikaskej iuan toTajtsin Dios uan tikpiaskej yolseuilistli uan satepan tiyoltoskej nochipa.

8. ¿Tleka moneki ma timochijchikauakan ma tikpiakan chikauak totlaneltokilis?

⁸ Akinmej amo kitekichiuiliaj toTajtsin Dios uelis techijtlakoskej. Yejuan amo mokuayejyekoaj ken toTajtsin Dios, ik non, moneki tikmaluiskej tokuayejyekol. Ijkuak ikaj ayakmo mokuayejyekoa ken toTajtsin Dios, san mokuayejyekoa uan kineki moyolpaktis ken akinmej amo kitekichiuiliaj toTajtsin Dios. ¿Tlen techpaleuis amo ijkon ma techpano? ¿Uan ken tikpiaskej okachi chikauak totlaneltokilis?

9. (1) ¿Tlen techpaleuis okachi chikauak ma tikpiakan totlaneltokilis? (2) ¿Itech akinmej timotlapouiskej?

⁹ Ijkon ken konemej kichiuaj tlen kuali kichiuaj intatajuan, tejuan noijki moneki tikchiuaskej ken akinmej kipiaj chikauak intlaneltokilis. Uan tikmatij tlen amo moneki tikchiuaskej ijkuak tikitaj tlen kichiuaj akinmej ‘kinyoltilana tlan kineki inkuerpo’ (1 Cor. 3:1-4). Itech Biblia moajsij neskayomej itech akinmej okipiayaj chikauak intlaneltokilis uan akinmej amo. Axkan timotlapouiskej tlen okichi Jacob, María uan Jesús. Non techpaleuis okachi ma tikpiakan chikauak totlaneltokilis.

10. ¿Ken okiteititi Jacob okipiaya chikauak itlaneltokilis?

¹⁰ Achto ma tikitakan tlen okichi Jacob. Ye otlajyoui ken axkan titlajyouiaj. Ikni tlen omotokayotiaya Esaú okinekiaya kimiktis. Noijki imonta miak uelta okikajkaya.  Pero Jacob okipiaya chikauak itlaneltokilis maski oksekimej amo. Otlaneltokaya itech tlen toTajtsin Dios okilui Abrahán uan nochipa okinmalui ikalchanejkauan porque intech mochiuaskia tlen okijto toTajtsin Dios (Gén. 28:10-15). Tlen Jacob okichi uan okijto okiteititi okinpatioitaya itlanauatiluan Jehová uan itlanekilis. Se neskayotl, ijkuak Jacob okimatki Esaú okinekiaya kimiktis, okitlatlaujti Jehová ma kimakixti. Uan Jehová okilui: “Melauak nimitschiuilis tlen kuali uan nikinmiaktilis mokoneuan ken xali tlen kajki itempa ueyi atl tlen amo ikaj ueli kipoa’” (Gén. 32:6-12). Inemilis Jacob okiteititi otlaneltokaya itech tlen Jehová okilui uan tlen okinmilui ikojkoluan.

11. ¿Ken tikmatij María okipiaya chikauak itlaneltokilis?

¹¹ Axkan ma timotlapouikan itech María. Ye okipiaya chikauak itlaneltokilis, ik non, Jehová okipejpenki ma yeto inantsin Jesús. Okipiaya chikauak itlaneltokilis uan omotak ijkuak okiueyichi Jehová ijkuak okitlajpaloto Zacarías uan Elisabet (xiktlajtolti Lucas 1:46-55). Tlen okijto María okiteititi okipatioitaya iTlajtol toTajtsin Dios uan okimatiaya tlen okijtoaya Escrituras Hebreas (Gén. 30:13; 1 Sam. 2:1-10; Mal. 3:12). Ijkuak María omonamikti iuan José omomaluijkej amo san niman omotekakej, yejuan omochixkej ma nesi Jesús. Okachi okipatioitayaj kichiuaskej tlen Jehová okinnauati uan amo san moyolpaktiskiaj (Mat. 1:25). María nochipa okitak tlen okijto uan tlen okichi Jesús uan “nochi noni okitlaatiaya itech iyolo” (Luc. 2:51). María okipatioitaya ma mochiua tlen omoijto itech Mesías. Ma timokuayejyekokan ken tikchiuaskej ken María uan ken tikchiuaskej tlen kineki toTajtsin Dios.

12. (1) ¿Ken okimokixti Jesús iTajtsin? (2) ¿Ken uelis tikchiuaskej ken Jesús? (Xikita tlaixkopinal tlen ika peua tlamachtil).

¹² Axkan ma timotlapouikan itech Jesús. Ye akin okachi chikauak kipia itlaneltokilis. Ijkuak okatka nikan tlaltikpak, okiteititi okinekiaya kichiuas ken iTajtsin. Tlen omokuayejyekoaya, okimachiliaya uan okichiuaya okiteititi okintlakamatiaya itlanauatiluan Jehová uan okichiuaya itlanekilis (Juan 8:29; 14:9; 15:10). Se neskayotl, Isaías okijto toTajtsin Dios teiknomati uan Marcos okijkuilo Jesús noijki oteiknomatiaya (xiktlajtolti Isaías 63:9; Marcos 6:34). ¿Titeiknomatij ken Jesús ijkuak tikinpaleuiaj oksekimej? ¿Titetlapouiaj uan titlamachtiaj itech Tekiuajkayotl ijkon ken okichi Jesús? (Luc. 4:43). Tla ijkon tikchiuaj, kijtosneki tikpiaj chikauak totlaneltokilis.

13, 14. (1) ¿Tlen techmachtiaj tokniuan tlen kipiaj chikauak intlaneltokilis uan kichiuaj ken Jesús? (2) ¿Uelis tikijtos se neskayotl?

¹³ Axkan miakej tokniuan kipiaj chikauak intlaneltokilis uan kichiuaj ken Jesús. Ika nochi inyolo tetlapouiaj, kuali kinseliaj tokniuan, teiknomatij uan kipiaj kuali inyelis. Maski tlajtlakolejkej, mochijchikauaj kipiaskej inyelis ken Jehová kineki uan kichiuaj tlen ye kineki. Se tokni tlen itoka Rachel tlen chanti Brasil, okijto: “Achto onechpaktiaya nimotlakentis ken akinmej amo kitekichiuiliaj toTajtsin Dios, pero amo kuali onimotaya. Uan ijkuak opejki nimomachtia Biblia onikajsikamatki omonekiaya nikpias chikauak notlaneltokilis. Oui onikpatlak noyelis pero axkan niyolpaki uan nikchia tlen kuali”.

 ¹⁴ Se tokni tlen itoka Reylene tlen chanti Filipinas, okse tlamantli okipanok. Maski okatka iTlaixpantijka Jehová, okinekiaya okachi momachtis, kipias se kuali tekitl uan kipiaskia miak tlamantli. Tokni okijto: “Ayakmo onikpatioitaya niktekichiuilis Jehová. Pero san niman onikitak amo nechyolpaktiskia sapanoa nitekitis. Ik non, opejki nikpatioita niktekichiuilis Jehová”. Axkan ye kineltoka tlen kijtoa Jehová itech Mateo 6:33, 34. Tokni okijto: “Jehová nechmaluis”. Xamo itech tlanechikol noijki katej tokniuan tlen noijki ijkon yokichijkej. Ijkuak tikitaj kichiuaj ken Cristo, noijki ijkon tiknekij tikchiuaskej (1 Cor. 11:1; 2 Tes. 3:7).

15. ¿Tlen techpaleuis ma tikchiuakan ken Cristo?

¹⁵ ¿Ken uelis tikchiuaskej ken Cristo? Itech 1 Corintios 2:16, NHY kijtoa ma tikpiakan “itlayejyekolis in Cristo”. Uan Romanos 15:5, NHY kijtoa ma ‘tikpiakan san se totlalnamikilis ijkón ken Cristo Jesús’. Ik non, tla tiknekij tikchiuaskej ken Jesús, moneki tikmatiskej ken iyelis, tlen mokuayejyekoa uan tlen kichiua. Jesús okachi okipatioitaya mouikas iuan iTajtsin. Okachi kuali timouikaskej iuan Jehová tla tikchiuaj ken Jesús. Ik non, moneki ma timokuayejyekokan ken Jesús.

16. ¿Ken uelis timokuayejyekoskej ken Jesús?

¹⁶ ¿Tlen techpaleuis ma timokuayejyekokan ken Jesús? Imachtijkauan Jesús okitakej ijkuak okinchi milagros, otlamachtiaya, omotlapouiaya iuan nochtin uan okintlakamatiaya itlanauatiluan Jehová. Imachtijkauan okijtojkej: “Tejwah kuali tikmatokeh nochi tlan Jesús okichi” (Hech. 10:39). Evangelios techpaleuiaj ma tikixmatikan maski amo tikitaj Jesús. Tlen ijkuilitok itech amochtli Mateo, Marcos, Lucas uan Juan techiluia ken iyelis Jesús. Tikmatiskej ken mokuayejyekoa Jesús tla tikintlajtoltiaj uan intech timokuayejyekoaj. Uan ijkon uelis tikchiuaskej ken ye otechititi uan “amo ma tikimakasikan nijkuak titlajyowiskej” ken ye otlajyoui (1 Ped. 2:21; 4:1, NHY).

17. ¿Tleka techpaleuia ma timokuayejyekokan ken Jesús?

¹⁷ ¿Tleka techpaleuia ma timokuayejyekokan ken Jesús? Ma tiktlalikan se neskayotl. Ijkuak kuali titlakuaj, tichikajtokej. Noijki ijkon tla timokuayejyekoaj ken Cristo, okachi tikpiaskej chikauak totlaneltokilis. Ijkon tikmatiskej tlen kichiuaskia ye maski san tlen panos. Non techpaleuis kuali ma tikpejpenakan tlen kiyolpaktis toTajtsin Dios uan kuali tikpiaskej totlalnamikilis. Nochi nin techyolinia “ma tiktlajtlanilikan toSeñor Jesucristo ma techpalewi ma tinemikan ken Yej” (Rom. 13:14, NHY).

18. ¿Tlen otimomachtijkej?

¹⁸ Axkan yotimomachtijkej tlen kijtosneki tikpiaskej chikauak totlaneltokilis. Noijki yotikitakej ken techpaleuia akinmej kipiaj chikauak intlaneltokilis. Uan noijki otikitakej ken techpaleuis okachi chikauak ma tikpiakan totlaneltokilis tla tikpiaj “itlayejyekolis in Cristo”. Pero ok moneki timomachtiskej okseki tlamantli. Se neskayotl, ¿ken tikmatiskej kox tikpiaj chikauak totlaneltokilis? ¿Tlen okseki tikchiuaskej para tikpiaskej okachi chikauak totlaneltokilis? ¿Ken techpaleuis tla tikpiaskej okachi chikauak totlaneltokilis? Chikome timomachtiskej.