¿TEJUATSIN tikinmixmati akinmej kinpaktia makinyeknotsakan, makinueyitlalikan uan okachi makinpatioitakan? Maski ijkon kinmititiaj yejuan kinekij okachi ijkon makinmititikan. Biblia kijtoua ijkon panoskia itlamian tonalmej porque miakej san yejuan motlasojtlaskiaj uan amo motlasojkamatiskiaj (2 Tim. 3:2).

Pero desde yiuejkika miakej ijkon mokuayejyekouaj. Adán uan Eva omokuayejyekojkej san yejuan omonekiaya kipejpenaskej kichiuaskej tlen kuali uan tlen amo kuali. Pero tlen okipejpenkej okichi tinochtin matitlajyouikan. Opanok miak xiuitl uan tekiua Uzías omokuayejyeko ye omonekiaya kitlatis kopali itech templo maski ye amo omonekiaya ijkon kichiuas (2 Crón. 26:​18, 19). Noijki fariseos uan saduceos omokuayejyekouayaj toTajtsin Dios okachi okinpatioitaya porque okatkaj ixuiuan Abrahán (Mat. 3:9).

Axkan miakej moueyinekij ikinon tejuan noijki uelis ijkon techpanos (Gál. 5:26). Xamo peuas timokuayejyekoskej moneki matechueyitlalikan uan okachi matechpatioitakan. ¿Tlen moneki tikchiuaskej para amo ijkon timokuayejyekoskej? Moneki matikajsikamatikan ken kinmita Jehová akinmej ijkon kichiuaj. Matikinmitakan ome principios bíblicos tlen techpaleuiskej.

Jehová kijtoua tlen kineki matikselikan. Matikitakan seki tlamantli tlen ijkon kiteititia.

• Jehová kineki siuatl makitlakaita inamik uan tlakatl makitlasojtla isiua (Efes. 5:33). Akin  yomonamikti moneki san makitlasojtla isiua noso inamik (1 Cor. 7:3). Konemej moneki makintlakamatikan inpapanuan uan tetajmej moneki makinmaluikan inkoneuan uan makinmititikan sapanoua kintlasojtlaj (2 Cor. 12:14; Efes. 6:2).

• Tejuan moneki matikintlakaitakan tlayekankej porque tekipanouaj miak kanin timonechikouaj (1 Tes. 5:12). Pero yejuan amo moneki kinnauatiskej tokniuan tlen kichiuaskej (1 Ped. 5:​2, 3).

• ToTajtsin Dios kijtoua matitlatlaxtlauakan tlen techiluiaj tekiuajkej uan matikintlakaitakan (Rom. 13:​1, 6, 7).

Jehová techtlasojtla uan techmaka miak tlamantli tlen amo tikmotlaniliaj. Tejuan titlajtlakolejkej ikinon technamiki tiixpoliuiskej (Rom. 6:23). Pero Jehová sapanoua techtlasojtla ikinon techmaka miak tlamantli tlen kuali (Sal. 103:​10, 11). Ye techteochiua uan techkauilia matikchiuakan seki tekitl miak ipati maski amo tikmotlaniliaj ijkon tikchiuaskej (Rom. 12:​6-8; Efes. 2:8).

Amo matimokuayejyekokan ijkon ken akinmej amo kitlakamatij Jehová. Uelis timokuayejyekoskej tejuan okachi topati uan moneki matechmakakan miak tlamantli. Jesús okijto se neskayotl tlen kiteititia uelis peuas ijkon timokuayejyekoskej. Okijto se tlakatl tlen okipiaya itlal, kualkan oyajki okintemoto itlakeualuan para makitekikan uvas uan ye kintlaxtlauiskia se denario. Satepan okintlakeuato oksekimej para noijki matekipanokan. Ijkuak otlayouak okintlaxtlaui se denario uan noijki ijkon okintlaxtlaui akinmej otekipanojkej san se hora. Pero akinmej achto opejkej tekipanouaj uan otonaltlatlakej omokuayejyekouayaj kintlaxtlauiskiaj okachi miak (Mat. 20:​1-16). Neskayotl tlen okijto Jesús kiteititia moneki matipakikan uan matiktlasojkamatilikan tlen techmaka toTajtsin Dios.

Matimotlasojkamatikan uan amo matiknekikan okseki tlamantli (1 Tes. 5:18). Matikchiuakan ijkon ken apóstol Pablo okichi porque ye amo okinmilui tokniuan tlen ochantiayaj Corinto makimakakan seki tlamantli maski uelis ijkon kichiuaskia (1 Cor. 9:​11-14). Ikinon matikintlasojkamatilikan oksekimej tlen techmakaj uan amitlaj matikintlajtlanilikan.

 Matiyetokan tiyolyamankej. Ijkuak ikaj moueyineki, mokuayejyekoua moneki okachi kiselis miak tlamantli. Tla tiyolyamankej techpaleuis amo ijkon matimokuayejyekokan porque non uelis techijtlakos.

Profeta Daniel okiteititi okatka yolyamanki. Ye uelis moueyinekiskia porque kualtsin omotaya, oueyititoka ifamilia, okatka ixtlamatki uan okichiuaya miak tlamantli (Dan. 1:​3, 4, 19, 20). Pero ye okatka yolyamanki ikinon Jehová okipatioitaya (Dan. 2:30; 10:​11, 12).

Axkan miakej moueyinekij ikinon moneki matimomaluikan para amo matimokuayejyekokan ijkon ken yejuan kichiuaj. Ikinon matiktlasojkamatilikan Jehová porque techteochiua uan techkauilia matikchiuakan seki tekitl miak ipati maski amo tikmotlaniliaj.