¿TEJUATSIN itlaj yotikixnamik uan otimomachili amikaj omitspaleui? Axkan techpanoua miak tlamantli oui uan ualeua tikitaj oui titlaxikoskej ikinon uelis timoyolkokoskej uan tikmachiliskej tikatej toselti. Pero amo moneki toselti tikixnamikiskej nochi tlen techpanoua (2 Tim. 3:1). Biblia kijtoua toyolikniuan uelis techpaleuiskej “ijkuak timoyolkokouaj” (Prov. 17:17).

Apóstol Pablo okinpiaya iyolikniuan tlen iuan oyajkej ijkuak ye uejka otetlapouito uan okipaleuijkej miak uelta (Col. 4:​7-11). Yejuan okipaleuijkej ijkuak Pablo otsaktoka Roma uan okichijkej seki tlamantli tlen ye amo ueli okichiuaya. Ijkon okipaleui Epafrodito ijkuak okiuikili seki tlamantli tlen okititlanilijkej tokniuan tlen ochantiayaj Filipos (Filip. 4:18). Tíquico okintemakato cartas tlen Pablo okinmijkuilili tokniuan tlen omonechikouayaj okseki altepemej (Col. 4:7). Ijkon Pablo otetlapoui maski otsaktoka itech se kali uan ijkuak oksekan okitsakuatoj porque okipaleuijkej iyolikniuan. ¿Tejuan ken uelis tikinpaleuiskej toyolikniuan?

Axkan miakej tokniuan kichiuaj seki tlamantli para kinpaleuiskej inyolikniuan uan ijkon kinmititiskej kinpatioitaj. Matikitakan tlen okipanok se tokni itoka Elísabet tlen chanti ompa España uan tlapaleuia ken precursora regular. Ijkuak imama okiluijkej okipiaya cáncer, se iyolikni okintitlaniliaya mensajes kanin okinmijkuilili seki textos tlen katej itech Biblia. Elísabet okijto: “Nonmej mensajes tlen onechintitlanili, onechpaleui amo manimomachili noselti uan onechyolchikajkej manikixnamiki tlen onechpanotoka” (Prov. 18:24).

Okachi timouikaskej inuan toyolikniuan tla tikinpaleuiaj okachi makitekichiuilikan Jehová. Ikinon matikitakan kox uelis tikuikaskej se tokni tlen yikipia miak xiuitl mamonechikoti noso matetlapouiti. Tla tikinpaleuiaj tokniuan uelis timosepanyolchikauaskej (Rom. 1:12). Pero sekimej tokniuan amo ueli kisaj inkalijtik. ¿Ken uelis tikinpaleuiskej?

Sekimej tokniuan amo ueli monechikotiuij porque mokokouaj noso kinpanoua okseki tlamantli. Ijkon okipanok se tokni itoka David. Ye okiluijkej okipiaya cáncer uan kanaj tlajko xiuitl okichiuilijtokaj quimioterapia. Ijkuak okipajtijtokaj ye uan isiua omonechikouayaj ika videoconferencia.

¿Ken okinpaleuijkej tokniuan? Ijkuak otlamiaya nechikol sekimej tokniuan omotlapouiayaj iuan David uan Lidia ika videoconferencia. Noijki okintitlaniliayaj mensajes para kinyolchikauaskej ijkuak  otlanankiliayaj itech nechikolmej. ¿Ken omomachilijkej? David uan Lidia okimachilijkej okintlasojtlayaj inyolikniuan.

Matimokuayejyekokan kox uelis titetlapouiskej inuan tokniuan tlen amo ueli kisaj inkalijtik. Tla tikpatlaj seki tlamantli uan timochijchikauaj inuan titetlapouiskej, tikinmititiskej amo tikinmilkauaj (Prov. 3:27). Uelis inuan titetlapouiskej ika teléfono noso inuan tikinmijkuiloskej cartas. Tlayekankej uelis kinmiluiskej tokniuan mayetokan ika videoconferencia ijkuak timonechikouaj para titetlapouiskej. David uan Lidia sapanoua omotlasojkamatkej porque tlayekankej ijkon okichijkej. David okijto: “Sapanoua otechyolchikauaya ijkuak otikinmitayaj tokniuan yaskiaj tetlapouitiuij uan otikinkakiayaj seki textos bíblicos ika videoconferencia. Noijki sapanoua otechpaleuiaya tlen okijtouayaj ijkuak omotlatlaujtiayaj”. Tla ikaj tikmachtiaj, uelis tikiluiskej tokni tlen amo ueli kisa ikalijtik kox uelis tikuikaskej ikalijtik para ompa iuan timomachtiskej. Satepan uelis tikiluiskej akin tikmachtiaj kox uelis yas ikalijtik tokni.

Ijkuak okachi tikatej inuan tokniuan tlen amo ueli kisaj inkalijtik, okachi inuan timouikaj porque tikitaj ken kipiaj kualtsin inyelis. Okachi tikinpatioitaj ijkuak tikinmitaj kualtsin tlamachtiaj ika Biblia uan kinpaleuiaj oksekimej mamouikakan iuan Jehová. Uelis okachi tikinpiaskej toyolikniuan tla ijkon tikinpaleuiaj tokniuan (2 Cor. 6:13).

Pablo omoyolseui porque iyolikni tlen omotokayotiaya Tito iuan okatka (2 Cor. 7:​5-7). Non techititia uelis tikinyolseuiskej tokniuan ijkuak inuan tikatej uan tikchiuaj seki tlamantli para tikinpaleuiskej uan amo san ijkuak itlaj tikinmiluiaj (1 Juan 3:18).

Tokniuan tlen chantij Rusia techmachtiaj miak tlamantli porque yejuan mosepanpaleuiaj. Matikitakan tlen okipanok se tokni itoka Serguéi uan isiua tlen itoka Tatiana. Policías oajsitoj inkalijtik uan otlatemojkej. Satepan okinuikakej para itlaj kintlajtlaniskej. Satepan okikajkej Tatiana mamokopa ikalijtik. Serguéi okijto tlen opanok ijkuak isiua oajsito ikalijtik: “Se tokni okatka yolchikauak porque oajsito tokalijtik. Satepan oajsitoj oksekimej tokniuan uan otechpaleuijkej otitlayektlalijkej”.

Noijki okijto: “Nechpaktia miak Proverbios 17:17 porque ompa kijtoua: ‘Se melauak toyolikni nochipa kiteititia techtlasojtla uan ye se tokni tlen kajki ijkuak timoyolkokouaj’. Nikita melauak tlen kijtoua nin texto porque axkan techtlajyouiltiaj uan amo uelis titlaxikoskiaj toselti. Jehová techinmaka toyolikniuan tlen yolchikauakej uan amo techkauaj toselti”. a

Axkan panotok miak tlamantli amo kuali ikinon moneki matechpaleuikan toyolikniuan. Noijki ijkuak panotos ueyi tlajyouilistli okachi monekis matechpaleuikan. Ikinon desde axkan matimochijchikauakan matikinpaleuikan tokniuan uan ijkon tikinpiaskej toyolikniuan (1 Ped. 4:​7, 8).