1. ¿Tlen kineki toTajtsin Dios matikchiuakan axkan?

 TOTAJTSIN DIOS kineki matitetlapouikan tlen kichiuas iTekiuajkayo itech nochi tlaltikpak (Mar. 13:10; 1 Tim. 2:3, 4). Nin tekitl sapanoua ipati porque iaxka Jehová, ik non, okipejpenki iKone para makiyekana. Ye kuali techyekana, ik non, ijkuak tlamis nochi tlen amo kuali, Jehová yolpakis porque otitetlapouijkej ken ye kineki (Mat. 24:14, TNM).

2. ¿Tlen tikitaskej axkan?

² Axkan tikitaskej Jesús techmaka tlen moneki ika “tlakeuali yolmelajki uan ixtlamatki” uan noijki techpaleuia matikchiuakan se ueyi tekitl, matitetlapouikan (Mat. 24:45). Noijki tikitaskej ken uelis tikpaleuiskej Jesús uan “tlakeuali yolmelajki uan ixtlamatki”.

3. ¿Tlen kikauilia Jehová makichiua Jesús?

³ Jesús techyekana matitetlapouikan. ¿Ken tikmatij ijkon kichiua? Ijkuak yiyaskia iluikak, okinnechiko sekimej imachtijkauan itech tepetl, ompa Galilea uan okinmilui: “Notajtsi onechmaktili nochi para Ne manitlanawati itech ilwikak iwa itech tlaltíkpaktli” uan noijki okinmilui: “Xiakan xikinchiuakan nomachtijkauan itech nochi altepemej” (Mat. 28:18, 19, TNM). Ken tikitaj, Jehová kikauilia Jesús matechyekana ijkuak titetlapouiaj.

4. ¿Ken tikmatij Jesús techyekantok ijkuak titetlapouiaj?

 ⁴ Jesús okijto titetlapouiskiaj uan titlamachtiskiaj “itech nochi altepemej” uan okijto “nochipa namouan niyetos hasta itlamian tonalmej” (Mat. 28:20, TNM). Non kiteititia hasta itech ninmej tonalmej Jesús techyekantok matitetlapouijtokan.

5. ¿Ken titlapaleuiaj mamochiua profecía tlen kijtoua Salmo 110:3?

⁵ Jesús okimatiaya itlamian tonalmej yetoskiaj miakej akinmej tlapaleuiskiaj. Ye okimatiaya mochiuaskia nin profecía: “Ika miak pakilistli motemakas moaltepe itech tonal ijkuak tikteititis tikinyekana soldados” (Sal. 110:3). Tla tejuatsin titetlapouia, tikpaleuia Jesús uan noijki tlakeuali yolmelajki uan noijki titlapaleuia mamochiua non profecía. Pero onka seki tlamantli tlen amo techkauilia ijkon matikchiuakan.

6. ¿Tleka ualeua oui titetlapouiskej?

⁶ Ualeua akinmej kixnamikij ialtepe Jehová, tekiuajkej uan akinmej tlayekanaj itech religiones kijtouaj tejuan tikchiuaj tlen amo kuali. Tla tofamiliares, akinmej tikinmixmatij uan akinmej inmiuan titekipanouaj kinneltokiliaj, xamo techiluiskej ayakmo matiktekichiuilikan Jehová uan ayakmo matitetlapouikan. Itech seki altepemej kinmiluiaj sekimej tokniuan kinchiuiliskej tlen amo kuali, kinteuiaj uan kintsakuaj. Non amo techtlajtlachialtia porque Jesús okijto: “Nomechkokoliskeh por nonnechneltokah” (Mat. 24:9). Axkan techkokoliaj, non kiteititia tikchiuaj ken Jesús uan Jehová techselia (Mat. 5:11, 12). Diablo kichiua matechkokolikan pero amo kitlanilis Jesús porque ye techpaleuia matitetlapouikan itech nochi tlaltikpak.

7. ¿Ken tikita mochijtok tlen kijtoua Apocalipsis 14:6, 7?

⁷ Xamo noijki tikitaj oui titetlapouiskej porque onka miak tlajtolmej. Tlen Jesús okinextili apóstol Juan, kiteititia kema uelis titetlapouiskiaj (xiktlajtolti Apocalipsis 14:6, 7). ¿Tlen yotikchijkej para miakej tikintlapouiskej? Nochtin uelis kalakiskej itech jw.org ompa katej amatlajkuilolmej kanaj ika mil tlatlamantli tlajtolmej. Noijki Cuerpo Gobernante yokijto mamotlajtolkopa amochtli Tiyoltos uan tiyolpakis kanaj ika 700 tlajtolmej para titlamachtiskej. Noijki onka videos para akinmej amo tlakakij uan amatlajkuilolmej ika braille para akinmej amo tlachiaj. Ijkon okachi miakej kimatij tlen kichiuas iTekiuajkayo toTajtsin Dios. Yotikitakej miak profecías mochijtokej: akinmej “tlatlamantli tlajtouaj itech altepemej” momachtijtokej “tlajtoli chipauak” (Zac. 8:23; Sof. 3:9). Non kuali mochiua porque Jesús techyekantok.

8. ¿Tlen panotok porque titetlapouiaj?

⁸ Axkan kanaj 8 millones akinmej chantij itech 240 altepemej uan altepetsitsintin katej itech ialtepe Jehová uan sejse xiuitl okachi miakej moapolaktiaj. Amo okachi ipati keski moapolaktiaj, okachi ipati porque kipiaj innemilis ken Jehová kineki, Biblia kijtoua ‘moyolpatlatiuih’ (Col. 3:8-10). Miakej ayakmo auilnemij, ayakmo tlateuiaj, ayakmo techikoitaj uan ayakmo mokuayejyekouaj inmialtepe okachi ipati.  Mochijtok tlen kijtoua Isaías 2:4: “Nion momachtiskej guerra”. Ijkuak timochijchikauaj tikpiaskej tonemilis ken Jehová kineki, oksekimej noijki kinekiskej pouiskej itech ialtepe uan noijki tikteititiskej tikchiuaj ken Cristo (Juan 13:35; 1 Ped. 2:12). Pero amo san toselti ueli tikchiuaj, Jesús techpaleuia.

9. Ijkon ken kijtoua Mateo 24:45-47, ¿tlen okijto Jesús panoskia itlamian tonalmej?

⁹ (Xiktlajtolti Mateo 24:45-47, TNM). Jesús okijto itlamian tonalmej yetoskia se “tlakeuali yolmelajki uan ixtlamatki” tlen techpaleuiskia matimouikakan iuan toTajtsin Dios. Ik non, uelis tikneltokaskej non tlakeuali hasta axkan tekipanojtok. Jesús kinyekana sekimej tlapejpenalmej para makinmakakan tlen moneki itekipanojkauan toTajtsin Dios uan akinmej kinekij kixmatiskej. Nonmej tokniuan amo ‘technajnawatiah kenomi tikpiaskeh totlaneltokális’ (2 Cor. 1:24). Yejuan kineltokaj Jesucristo kiyekana uan kinauatia ialtepe toTajtsin Dios (Is. 55:4).

10. Ijkon ken mota itech dibujos, ¿tlen amochtli omitspaleui xikixmati Jehová?

¹⁰ Itech 1919 “tlakeuali yolmelajki” opejki kinchijchiuaj amatlajkuilolmej para miakej makinpaleui tlen tlamachtia Biblia. Para kiteititiskej tlen melauak tlamachtia Biblia, itech 1921 “tlakeuali yolmelajki” okikixti amochtli El Arpa de Dios. Satepan okseki amochmej okinchijchijkej. ¿Tlen amochtli omitspaleui xikixmati uan xiktlasojtla Jehová? Xamo omitspaleui se amochtli tlen nikan katej: “Sea Dios veraz”, La verdad que lleva a vida eterna, Usted puede vivir  para siempre en el paraíso en la Tierra, El conocimiento que lleva a vida eterna, ¿Tlen melauak techmachtia Biblia? noso ¿Tlen techmachtia Biblia?, xamo axkan timomachtijtok ika amochtli Tiyoltos uan tiyolpakis. Nonmej amochmej okinchijchijkej para matitlamachtikan uan sapanoua yotechpaleuijkej.

11. ¿Tleka tinochtin moneki tikpiaskej tlen ika timomachtiskej?

¹¹ Amo san moneki momachtiskej Biblia akinmej tikinmachtiaj, tinochtin moneki timomachtiskej. Apóstol Pablo okijto: “Akimeh yochikawak intlaneltokalis, ya weletih kikuah nochi tlákuali”. Noijki okijto tla tikchiuaj tlen yotimomachtijkej tikmatiskej “tlan kuali iwa tlan amokuali” (Heb. 5:14). Axkan miakej kichiuaj tlen amo kuali, ik non, xamo kitaskej oui kitlakamatiskej Jehová. Pero Jesús techpaleuia matimouikakan iuan Jehová uan matikneltokakan porque techmaka tlen moneki itech Biblia. Jesús kiyekana “tlakeuali yolmelajki” para matechmaka nochi tlen moneki.

12. Ijkon ken Jesús, ¿tlen tikchiuaj para tiktlakaitaskej itoka toTajtsin Dios?

¹² Ijkon ken okichi Jesús tejuan tiktlakaitaj itoka toTajtsin Dios (Juan 17:6, 26). Matikitakan ken yotikchijkej. Itech 1931 otimotokayotijkej tiiTlaixpantijkauan Jehová. Ijkon tikteititiaj tiknekij tiktematiltiskej itoka toTajtsin Dios porque tikpatioitaj (Is. 43:10-12) uan Octubre itech non xiuitl itech nin revista página se, tlen okiski ika inglés, opejki tiktlaliaj itoka. Noijki itech Traducción del Nuevo Mundo otikijkuilojkej itoka kanin moneki kipias. Amo ijkon kichiuaj religiones tlen tlamachtiaj tlen amo melauak porque  yejuan amo kijkuilouaj itoka toTajtsin Dios kanin moneki ijkuak kitlajtolkopaj Biblia.

13. ¿Tleka tikneltoka axkan Jesús kitekitiltia “tlakeuali yolmelajki uan ixtlamatki”? (Juan 6:68).

¹³ Ika “tlakeuali yolmelajki uan ixtlamatki” Jesús kinyekana imachtijkauan san sekan makiueyichiuakan toTajtsin Dios. ¿Tlen timokuayejyekoua? Xamo timokuayejyekoua ken Pedro, ye okijto: “¿Akin ok se íwa tiaskeh? Sanwel Tejwatsi tikpia non tlájtoli non kitemaka yolílistli non ayik tlami” (Juan 6:68). ¿Ken tiyetoskiaj tla amo tikixmatiskiaj ialtepe Jehová? Ika non altepetl Jesucristo techpaleuia matikpiakan tlen moneki para timouikaskej iuan Jehová uan techmachtia para kuali tikinmachtiskej oksekimej. Noijki techpaleuia ‘matimoyolpatlakah’ para tikyolpaktiskej Jehová (Efes. 4:24).

14. ¿Ken yomitspaleui tipoui itech ialtepe Jehová axkan ijkuak onka kokolistli COVID-19?

¹⁴ Ijkuak itlaj amo kuali panoua, Jesús kuali techyekana. Ijkon omotak ijkuak opejki kokolistli COVID-19. Miakej amo okimatiayaj tlen kichiuaskej pero Jesús kuali techyekana para kuali timomaluiskej. Otechyolejkej matikmotlalilikan cubrebocas ijkuak tiyetoskiaj kanin miakej katej uan amo matimotokikan innauak oksekimej. Tlayekankej okinmiluijkej mamotlapouijtokan inmiuan tokniuan para kimatiskej tla itlaj kinpoloua uan makinpaleuikan kuali mamouikakan iuan Jehová (Is. 32:1, 2). Noijki sapanoua techpaleuia uan techyolchikaua ijkuak  Cuerpo Gobernante techiluia tlen panotok sejse metstli.

15. ¿Tlen otechiluijkej matikchiuakan ijkuak opejki COVID-19 uan ken yotechpaleui?

¹⁵ Ijkuak opejki COVID-19 otechiluijkej ken omonekiaya titetlapouiskej uan ken timonechikoskej. San niman opejki timonechikouaj uan tikpiaj uejueyij nechikolmej ika videoconferencia, noijki opejki titetlapouiaj ika teléfono uan ika carta. Ijkuak timochijchikauaj Jehová techteochiua. Tokniuan tlen tlapaleuiaj kalmej Betel kijtouaj okachi miakej opejki tetlapouiaj. Noijki techyolchikaua tlen okinpanok miakej tokniuan (xikita recuadro “ Jehová techteochiua ijkuak titetlapouiaj”).

16. ¿Tlen moneki tikneltokaskej?

¹⁶ Xamo sekimej tokniuan mokuayejyekouaj amo moneki sapanoua matechmalui ialtepe Jehová axkan ijkuak panotok kokolistli. Pero yotikitakej tlen technauatia ialtepe melauak techpaleuia (Mat. 11:19). Tla timokuayejyekouaj ken Jesús techyekana, satepan maski san tlen panos uelis tikneltokaskej Jehová uan Jesús techpaleuiskej (xiktlajtolti Hebreos 13:5, 6).

17. ¿Ken timomachilia ijkuak Jesús mitsyekana xiktekichiuili Jehová?

¹⁷ ¡Sapanoua tiyolpakij Jesús techyekantok para matiktekichiuilikan Jehová! Maski tlatlamantli toaltepe, tlatlamantli otechiskaltijkej uan tikpiaj okse totlajtol, tinochtin tipouij itech ialtepe Jehová uan kuali timouikaj. Techmaka tlen moneki para matimouikakan iuan Jehová uan techmachtiaj ken titetlapouiskej. Tejuan ok timoyolpatlatokej uan tiknekij tikintlasojtlaskej oksekimej. ¡Tiktlasojtlaj Jesucristo porque ye techyekana!