Salomón okipiaya se ikone tlen omotokayotiaya Rehoboam uan kanaj cuarenta xiuitl otlanauati itech altepetl Israel (1 Rey. 11:42). Salomón omikik itech xiuitl 997 achto itech xiuitl se. Uan Rehoboam oyajki Siquem tlen kajki ik norte ompa Jerusalén para yetoskia tekiua (2 Crón. 10:1). ¿Omomojtiaya yetos tekiua? Salomón okatka ixtlamatki. Pero Rehoboam noijki kiteititiskia kox okatka ixtlamatki ijkuak kiyektlaliskia ouijkayotl.

Ijkuak Rehoboam opejki tlanauatia, israelitas otlajyouiayaj uan okintitlankej sekimej tlakamej ma kiluitij tlen okinekiayaj: “Motajtsin okichi ma titlajyouikan. Pero tla te tikchiuas okachi amo oui ma titekitikan uan amo techtlajyouiltis ken motajtsin, tejuan timitstekichiuiliskej” (2 Crón. 10:3, 4).

Xamo Rehoboam amo okimatiaya tlen kichiuas. Tla kichiuaskia tlen okinekiayaj israelitas, ye uan ikalchanejkauan ayakmo kipiaskia seki tlamantli. ¿Tlen okichi? Achto okintlajtlani tlayekankej tlen okipaleuiayaj Salomón. Satepan okintlajtlani telpokamej uan okiluijkej ma kintlajyouilti okachi israelitas uan ijkon okichi. Okinmilui: “Ne okachi namechtlajyouiltis ijkon ken yonikijto. Notajtsin onamechtlajyouiltiaya ika mekatl pero ne namechtlajyouiltis ika mekatl tlen yakauijuitso” (2 Crón. 10:6-14).

¿Tlen techmachtia tlen okichi? Moneki ma tikinkakikan akinmej yikipiaj miak xiuitl tlen kipiaj chikauak intlaneltokilis. Yejuan ixtlamatkej uan kimatij tlen techpaleuis, ik non, ma tikinkakikan (Job 12:12).

Oyajki iuan isoldados para moteuiskiaj. Pero Jehová amo okikauili uan okilui Semaya ma kiluiti: “Amo ximoteuitij iuan namokniuan israelitas. Ximokuepakan namokalijtik porque ne  onitlanauati ma mochiua tlen panotok” (1 Rey. 12:21-24). *

¿Tlen kichiuaskia Rehoboam? Xamo sapanoa okualanki. ¿Tlen kijtoskiaj nochtin akinmej okinmilui kintlajyouiltiskia uan axkan ayakmo moteuiskia? (Xikita ika 2 Crónicas 13:7). Pero ye uan isoldados “okitlakamatkej tlen okinmilui Jehová uan omokuepkej inkalijtik ijkon ken Jehová okinmilui”.

¿Tlen techmachtia nin? Ma tiktlakamatikan toTajtsin Dios maski techpinauiskej. Uan Jehová nochipa kinteochiua akinmej kitlakamatij (Deut. 28:2).

¿Okiteochijkej Rehoboam porque otetlakamatki? Ye otetlakamatki uan amo omoteui iuan altepetl. Maski Rehoboam otlanauatiaya itech altepetl Judá uan altepetl Benjamín, okinyektlali okseki altepemej (2 Crón. 11:5-12). Ijkuakon okintlakamatki itlanauatiluan Jehová. Maski ik norte kanin otlanauatiaya Jeroboán opejki kinueyichiuaj teotsitsintin, miakej oualayaj Jerusalén para kiueyichiuaskej Jehová uan kipaleuiskiaj Rehoboam (2 Crón. 11:16, 17). Rehoboam otetlakamatki, ik non, kuali okatkaj akinmej okinnauatiaya.

Ijkuak nochi altepetl kuali okatka, Rehoboam itlaj okichijtikiski. Ayakmo okintlakamatki itlanauatiluan Jehová uan opejki kinueyichiua teotsitsintin. ¿Tleka ijkon okichi? ¿Okilui inantsin akin okatka ammonita ma kinueyichiua teotsitsintin? (1 Rey. 14:21). Amo tikmatij tlen opanok pero nochtin tlen okinnauatiaya noijki ijkon okichijkej. Ik non, Jehová okikauili Sisaq tlen otlanauatiaya Egipto, ma kinmoaxkati miakej altepemej tlen Rehoboam okinyektlalijka (1 Rey. 14:22-24; 2 Crón. 12:1-4).

Okachi opejki kipiaj ouijkayotl ijkuak Sisaq oajsito Jerusalén kanin otlanauatiaya Rehoboam. Ijkuakon Semaya tlen otlajtoaya ipatka toTajtsin Dios okilui Rehoboam uan príncipes: “Namejuan onannechkajkej uan ne noijki onamechka imak Sisaq”. ¿Tlen okijto Rehoboam ijkuak Jehová okiyektlali? Otetlakamatki. Biblia kijtoa: “Ijkuakon príncipes tlen okatkaj Israel uan ueyi tekiua omoyolkuepkej uan okijtojkej: ‘Jehová yolmelauak’”. Ik non, Jehová okipaleui uan amo okipojpolojkej Jerusalén (2 Crón. 12:5-7, 12).

Satepan Rehoboam ok okinnauati ome altepemej tlen katej sur. Ijkuak ayamo omikiaya, okintliokoli miak tlamantli ikoneuan, xamo ijkon okichi porque amo okinekiaya ma kixnamikikan Abías akin okatka ikni uan yetoskia tekiua (2 Crón. 11:21-23). Ijkuak ijkon okichi, okiteititi okachi ixtlamatki okatka ken ijkuak okatka telpochtli.

Rehoboam okichi miak tlamantli kuali pero toTajtsin Dios amo okiseli. Biblia kijtoa Rehoboam okichi tlen amo kuali. ¿Tleka ijkon moijtoa? Porque amo okitemo Jehová ika nochi iyolo (2 Crón. 12:14).

¿Tlen techmachtia tlen okichi Rehoboam? Maski ualeua otetlakamatiaya uan okipaleuiaya altepetl, amo kuali omouikaya iuan Jehová uan amo okinekiaya kiyolpaktis. Ik non, opejki kichiua tlen amo kuali uan opejki kinueyichiua teotsitsintin. Xamo timotlajtlania: ijkuak Rehoboam otetlakamatiaya, ¿melauak omoyolkuepaya porque okinekiaya kiyolpaktis Jehová? Noso ¿ijkon okichiuaya porque oksekimej okiluiayaj? (2 Crón. 11:3, 4; 12:6). Satepan Rehoboam oksepa okichi tlen amo kuali. Pero David akin okatka ikojkol amo ijkon okichi. Maski David noijki otlajtlakolchi, ye omoyolkuepki, nochipa okitlasojtlak Jehová uan okipatioitak kiueyichiuas (1 Rey. 14:8; Sal. 51:1, 17; 63:1).

Tlen okipanok Rehoboam techmachtia itlaj miak ipati. Amo san moneki tikinmakaskej tlen kinpoloa tokalchanejkauan uan tiktekichiuiliskej  Jehová. Okachi ipati ma techseli Jehová, ma tikueyichiuakan uan kuali iuan ma timouikakan.

Uelis ijkon tikchiuaskej tla timochijchikauaj nochipa tiktlasojtlaj Jehová. Tla tiknekij ma xotlato tlitl moneki titlatlatijtoskej, noijki ijkon tla tiknekij nochipa tiktlasojtlaskej Jehová, moneki mojmostla timomachtiskej iTlajtol, itech timokuayejyekoskej uan nochipa ma timotlatlaujtikan (Sal. 1:2; Rom. 12:12). Uan tla tiktlasojtlaj Jehová, tikchiuaskej tlen kiyolpaktia. Noijki tla tiktlasojtlaj Jehová, techpaleuis ma timoyolkuepakan ijkuak titlajtlakolchiuaskej. Amo keman tikkauaskej Jehová uan ijkon amo tikchiuaskej ken Rehoboam (Jud. 20, 21).