1, 2. ¿Tlen ome tlamantli techpaktia tiktematiltiskej?

SAPANOUA miak ipati ma moteititi san Jehová kinamiki tlanauatis uan ma mochipaua itoka. Tiitlaixpantijkauan Jehová techpaktia tiktematiltiskej nin tlamantli. ¿Mouikaj ninmej ome tlamantli? Kema.

² Tinochtin tikmatij moneki ma mochipaua itoka toTajtsin Dios uan ma moteititi san ye kuali tlanauatia. Ma tikpatioitakan ninmej ome tlamantli.

3. ¿Tlen kiteititia itoka toTajtsin Dios?

³ Itoka toTajtsin Dios kiteititia ken iyelis uan ken tlanauatia. Ik non, tla tiknekij ma mochipaua itoka toTajtsin Dios, moneki tikteititiskej san ye kuali tlanauatia. Itoka kiteititia ken tlanauatia ipan nochi semanauak (xikita recuadro “ ¿Tlen moneki moteititis?”).

4. (1) ¿Tlen kijtoua Salmo 135:13 itech itoka toTajtsin Dios? (2) ¿Tlen tlajtlanilmej tikinnankiliskej?

⁴ Itoka toTajtsin Dios miak ipati uan san ye kinamiki ijkon motokayotis (xiktlajtolti Salmo 135:13). ¿Tleka miak ipati itoka toTajtsin Dios? ¿Akin achto okixnamik itoka toTajtsin Dios? ¿Ken kichipaua itoka? ¿Ken uelis tikchipauaskej itoka? Itech nin tlamachtil tikinnankiliskej ninmej tlajtlanilmej.

5. ¿Tlen motlajtlaniaj sekimej ijkuak kikakij ma mochipaua itoka toTajtsin Dios?

⁵ Jesús okijto miak ipati ma tikiluikan toTajtsin  Dios ‘ma mochipaua itoka’ ijkuak timotlatlaujtiaj (Mat. 6:9, TNM). ¿Tlen kijtosneki? Ma mochipaua kijtosneki ma yeto santo. Xamo sekimej motlajtlaniaj: “¿Nin kijtosneki itoka toTajtsin Dios amo chipauak nion santo? ¿Tleka moneki ma tikchipauakan?”. Tla tiknekij tikinnankiliskej ninmej tlajtlanilmej, achto moneki tikmatiskej tlen kijtosneki se tokayotl.

6. ¿Tleka miak ipati ken techitaj oksekimej?

⁶ Se tokayotl amo san moijkuiloua uan moijtoua. Biblia kijtoua: “Moneki tikpejpenaskej se kuali tokayotl uan amo miak tomin” (Prov. 22:1; Ecl. 7:1). ¿Tleka miak ipati? Porque nin amo san kijtosneki ken timotokayotiaj. Noijki kijtosneki ken tikpiaj toyelis uan ken techitaj oksekimej. Okachi ipati ken techitaj oksekimej ijkuak kikakij ken timotokayotiaj uan amo ken moijkuiloua totoka noso ken moijtoua.

7. ¿Tlen kichiua akin kiteneua Jehová?

⁷ Ijkuak ikaj kiteneua Jehová, kijtoua amo kuali iyelis uan kisokiotia itoka. Achto okixnamikej itoka toTajtsin Dios ompa itech xochitlali Edén. Ma tikitakan tlen techmachtia tlen ompa opanok.

8. (1) ¿Tlen okimatiaya Adán uan Eva? (2) ¿Ken tikmatij Adán uan Eva okilkajkej tlen Jehová okinmakak?

⁸ Adán uan Eva okimatiayaj ken motokayotia toTajtsin Dios. Noijki okimatiayaj ye otlachijchi, ye okichi ma yoltokan, okinmakak se xochitlali uan amo okatkaj tlajtlakolejkej (Gén. 1:26-28; 2:18). Pero yejuan okilkajkej tlen Jehová okinmakak uan ayakmo itlaj okitlasojkamatilijkej. Tikmatij ijkon okichijkej porque okitlakamatkej Satanás ijkuak ye okinyejyeko.

9. Ijkon ken kijtoua Génesis 2:16, 17 uan 3:1-5, ¿tlen okinnauatijkej Adán uan Eva uan tlen okijto Satanás?

 ⁹ (Xiktlajtolti Génesis 2:16, 17; 3:1-5). Satanás okitekitilti se kouatl uan ijkon okikajkaya Eva, okilui: “¿Kox melauak Dios onamechilui amo xikkuakan itlakilo nochi kuauitl tlen kajki itech xochitlali?”. Satanás okikajkaya Eva ijkuak ijkon okitlajtlani. ToTajtsin Dios okinmilui uelis kikuaskiaj itlakilo nochi kuauitl, san itlakilo se kuauitl amo kikuaskiaj. Adán uan Eva okipiayaj miak tlakilotl tlen uelis kikuaskiaj (Gén. 2:9). Nin kiteititia Jehová okinmakak miak tlamantli. San okinnauati amo ma kikuakan itlakilo se kuauitl. Ik non, ijkuak Satanás ijkon okitlajtlani Eva, okijto Jehová amo melauak nochi okinmakak. Xamo Eva omokuayejyeko toTajtsin Dios amo okinekiaya kinmakas itlaj kuali.

10. ¿Ken otlakajkaya Satanás uan tlen opanok?

¹⁰ Eva okimatiaya toTajtsin Dios kinamiki tlanauatis. Ijkon tikmatij porque Eva okilui Satanás tlen toTajtsin Dios okinnauati. Noijki okilui nion omonekiaya kikitskiskej non kuauitl. Okimatiayaj mikiskiaj tla amo tetlakamatiskiaj. Ijkuakon, Satanás okilui: “Amo nanmikiskej” (Gén. 3:2-4). Satanás okijto Jehová tlakajkayaua. Non se ueyi tlajtlakoli porque okisokioti itoka. Ijkon Satanás omochi Diablo uan tekajkaya. Eva okineltokili Satanás (1 Tim. 2:14). Amo okitlakamatki toTajtsin Dios uan okikua tlakilotl. Satepan Adán noijki ijkon okichi (Gén. 3:6).

11. ¿Tlen omonekiaya kichiuas Adán uan Eva?

¹¹ ¿Tlen omonekiaya Eva kiluis Satanás? Uelis kiluiskia: “Amo nimitsixmati. Ne san nikixmati noTajtsin Jehová. Niktlasojtla uan nikneltokilia tlen ye nechiluia. Ye otechmakak nochi tlen tikpiaj. ¿Tleka tikteneua? ¡Xio, amo techkuejso!”. Ijkon Jehová yolpakiskia porque Eva kiteititiskia kitlasojtla uan kitlakamati (Prov. 27:11). Pero Eva uan Adán amo okitlasojtlayaj Jehová. Ik non, amitlaj okijtojkej ijkuak Satanás okitene Jehová.

12. ¿Ken okikajkayajkej Eva uan tlen okichi ye uan Adán?

¹² Satanás okichi Eva ma kineltoka  toTajtsin Dios amo yolkuali. Satepan Adán uan Eva okixnamikej Jehová. Yejuan okineltokilijkej Satanás uan okikajkej Jehová. Axkan Satanás noijki ijkon kineki techkajkayauas. Kijtoua toTajtsin Dios amo yolkuali uan akinmej kineltokiliaj amo kinekij ma kinnauati Jehová.

13. Ijkon ken kijtoua Ezequiel 36:23, ¿tlen miak ipati techmachtia Biblia?

¹³ ¿Amitlaj okijto Jehová ijkuak Satanás okitene? Kema. Ye omopaleui. Nochi Biblia kijtoua Jehová kiteititia amo melauak tlen okijto Satanás itech xochitlali Edén (Gén. 3:15). Biblia techiluia itlaj miak ipati, Jehová kichipaua itoka ika iTekiuajkayo tlen kiyekana Jesucristo. Nin tekiuajkayotl kichiuas ma tiyetokan ika yolseuilistli. Biblia techpaleuia ma tikajsikamatikan ken kichipaua Jehová itoka (xiktlajtolti Ezequiel 36:23).

14. ¿Tlen opejki kichiua Jehová ijkuak okixnamikej itech xochitlali Edén para kichipauas itoka?

¹⁴ Satanás kichiua miak tlamantli para amo ma mochiua tlen Jehová kineki. Pero Jehová amikaj kitsakuilis. Biblia kiteititia tlen yokichi Jehová uan amo onka okse ken ye. Jehová omoyolkoko ijkuak Satanás okixnamik uan kiyolkokoua miakej kipaleuiaj Satanás (Sal. 78:40). Pero ye kimati tlen kichiuas porque ixtlamatki, kimati mochias uan yolmelauak. Noijki miak uelta yokiteititi ye kipia chikaualistli. Nochi tlen kichiua kiteititia techtlasojtla (1 Juan 4:8). Jehová kichiua miak tlamantli uan ijkon kichipaua itoka.

15. ¿Ken yotlakajkaya Satanás?

¹⁵ Axkan Satanás ok kiteneua Jehová. Kineki ma tikneltokakan Jehová  amo kipia chikaualistli, amo yolkuali, amo ixtlamatki nion techtlasojtla. Noijki kineki ma tikneltokakan toTajtsin Dios amo kajki. Pero tla tikneltokaj kajki toTajtsin Dios, Satanás kijtoua itlanauatiluan oui tikintlakamatiskej. Ye kijtoua Jehová kintlajyouiltia miakej ijtik tlitl. Akinmej kineltokiliaj, ayakmo kinekij ma kinnauati Jehová. Satanás ok tlakajkayajtok uan kinekis ma tikkauakan toTajtsin Dios hasta ijkuak kipojpoloskej. ¿Kichiuas tlen kineki?

16. ¿Ken uelis tikchiuaskej tlen Adán uan Eva amo okichijkej?

¹⁶ Maski titlajtlakolejkej, Jehová techkauilia ma tikchipauakan itoka. Tejuan uelis tikchiuaskej tlen Adán uan Eva amo okichijkej. Uelis tikteititiskej Jehová santo, yolmelauak, yolkuali uan techtlasojtla maski axkan miakej kiteneuaj uan kiuijuikaltiaj (Is. 29:23). Uelis tikteititiskej tiknekij ma technauati. Noijki ma tikinmatiltikan oksekimej san iTekiuajkayo kichiuas ma tikpiakan yolseuilistli uan tinochtin ma tiyolpakikan (Sal. 37:9, 37; 146:5, 6, 10).

17. ¿Ken okichipa Jesús itoka toTajtsin Dios?

¹⁷ Tikchiuaj ken Jesucristo ijkuak tikchipauaj itoka toTajtsin Dios (Juan 17:26). Jesús otlamachti akin Jehová uan amo san okitematilti itoka. Fariseos okijtouayaj Jehová tetlajyouiltia, amo teiknomati uan amo techajsikamati pero Jesús otlamachti iTajtsin kuali iyelis, amo san niman kualani, tetlasojtla uan teiknomati. Noijki nochipa okiteititi ken iyelis iTajtsin (Juan 14:9).

18. ¿Ken tikteititiaj amo melauak tlen kijtouaj akinmej kikokoliaj Jehová?

¹⁸ Ma tikchiuakan ken okichi Jesús.  Ma tikinmachtikan oksekimej Jehová techtlasojtla uan yolkuali. Ijkon tikteititiaj amo melauak tlen kijtouaj akinmej kikokoliaj Jehová. Tikchipauaj itoka toTajtsin Dios ijkuak tikinmiluiaj oksekimej ye santo. Uelis tikchiuaskej ken Jehová maski titlajtlakolejkej (Efes. 5:1, 2). Tikchipauaj itoka toTajtsin Dios ijkuak oksekimej kitaj tikchiuaj tlen kuali. Noijki tikchipauaj itoka ijkuak tikinpaleuiaj oksekimej ma kixmatikan Jehová. Noijki tikteititiaj tikueyichiuaj Jehová ijkuak amo tikkauaj maski titlajtlakolejkej (Job 27:5).

19. Ijkon ken kijtoua Isaías 63:7, ¿tlen tikchiuaj ijkuak titlamachtiaj?

¹⁹ Uelis tikchiuaskej okse tlamantli para tikchipauaskej itoka toTajtsin Dios. Ijkuak tikinmachtiaj oksekimej, tikinmiluiaj san toTajtsin Dios kinamiki tlanauatis. Pero tikinpaleuiaj ma kitlasojtlakan Jehová uan amo keman ma kikauakan uan amo san tiknekij ma kinmatikan itlanauatiluan. Ik non, ma tikinmiluikan ken iyelis Jehová uan amo san ma kimatikan ken itoka (xiktlajtolti Isaías 63:7). Tla ijkon tikchiuaj, akinmej tikinmachtiaj kitlasojtlaskej Jehová uan kinekiskej kitlakamatiskej.

20. ¿Tlen tlajtlanilistli tiknankiliskej itech okse tlamachtil?

²⁰ Itech okse tlamachtil tiknankiliskej nin tlajtlanilistli: ¿Ken tikmatij tikueyichiuaj Jehová ika tlen tikchiuaj uan ijkuak titlamachtiaj?