1, 2. ¿Tleka tiyolpakij ijkuak timoapolaktiaj?

 SAPANOUA tipakij ijkuak timoapolaktiaj porque yitipouij itech ifamilia Jehová. Akinmej kuali mouikaj iuan Jehová noijki mokuayejyekouaj ijkon ken David okijto: “Mayolpaki tlakatl tlen te [Jehová] otikpejpenki uan tikualika para machanti mokaltempa” (Sal. 65:4).

² Pero san Jehová uelis kijtos akin kalakis ikaltempa. Jehová san mouika inuan akinmej inauak motokiaj ijkon ken otikitakej itech okse tlamachtil (Sant. 4:8). Peua kuali timouikaj iuan Jehová ijkuak ixpan timotemakaj uan timoapolaktiaj. Jehová techiluia: “Nankitaskej ken [...] niknokis se tlateochiualistli hasta ijkuak ayakmo itlaj namechpolos” (Mal. 3:10; Jer. 17:​7, 8).

3. ¿Tlen moneki tikchiuaskej akinmej yotimotemakakej ixpan Jehová uan yotimoapolaktijkej? (Eclesiastés 5:​4, 5).

³ Ijkuak timoapolaktiaj peua tiktekichiuiliaj Jehová. Tinochtin akinmej tikchiuaj ken Cristo tiknekij tikchiuaskej tlen yotikiluijkej Jehová ijkuak ixpan otimotemakakej. Ijkon tikchiuaskej maski techtlajyouiltiskej porque titlaneltokaj noso ijkuak itlaj techyoltilanas (xiktlajtolti Eclesiastés 5:​4, 5). Nin tlamachtil techpaleuis matikchiuakan ijkon ken Jesús okichi. Noijki techpaleuis matikchiuakan tlen ye otechnauati (Mat. 28:​19, 20; 1 Ped. 2:21).

 MATIKCHIUAKAN IJKON KEN JESÚS OKICHI MASKI ITLAJ TIKIXNAMIKISKEJ NOSO ITLAJ TECHYOLTILANAS

4. ¿Tleka Jesús okijto titlajyouiskej akinmej tikchiuaj ken ye okichi? (Luc. 9:23).

⁴ Amo matimokuayejyekokan nochipa kuali tiyetoskej maski yotimoapolaktijkej. Jesús okijto akin kichiua ken ye okichi “nochipa makiseli makitlajyouiltikan” (xiktlajtolti Lucas 9:23). ¿Kijtosneki Jesús okijto nochipa titlajyouiskej? Amo. Porque toTajtsin Dios noijki techteochiuas. Pero ualeua titlajyouiskej uan timoyolkokoskej (2 Tim. 3:12).

5. ¿Tlen okijto Jesús tikseliskej tla okachi tiktekichiuiliskej toTajtsin Dios?

⁵ Xamo titlajyouiaj porque tofamilia amo kipaktia matimomachtikan Biblia. Xamo tiknekij okachi tiktekichiuiliskej toTajtsin Dios ikinon amo tikpiaj miak tlamantli (Mat. 6:33). Tla ijkon techpanoua, matikilnamiktokan Jehová kimati nochi tlen tikchiuaj para uelis okachi tiktekichiuiliskej (Heb. 6:10). Xamo yotikitakej panoua ijkon ken okijto Jesús. Ye okijto: “Akin okika ichan, ikniuan, imama, ipapa, ikoneuan noso itlaluan porque omochi nodiscípulo uan kitematiltia kuali tlajtoli, axkan kiselis 100 veces okachi tlen okika. Kinselis kalmej, ikniuan, imama, ikoneuan uan itlaluan maski kitlajyouiltiskej. Uan satepan nochipa yoltos” (Mar. 10:​29, 30). Jehová sapanoua yotechteochi maski yotitlajyouijkej (Sal. 37:4).

6. ¿Tleka ok moneki tikixtopeuaskej tlen kineki tocuerpo maski yotimoapolaktijkej?

⁶ Moneki tikixtopeuaskej tlen kineki tocuerpo maski yotimoapolaktijkej (1 Juan 2:16). Ijkon moneki tikchiuaskej porque ok titlajtlakolejkej. Xamo techpanoua ijkon ken okipanok apóstol Pablo. Ye okijto: “Noyolipan nechpaktia itlanauatil toTajtsin Dios, pero itech nocuerpo kajki okse tlanauatil tlen kixnamiki itlanauatil notlayejyekol. Tlanauatil tlen kajki itech nocuerpo ye tlajtlakoli uan nechnauatia” (Rom. 7:​22, 23). Xamo timoyolkokouaj porque timokuayejyekouaj tikchiuaskej tlen amo kuali. Pero uelis titlaxikoskej tla tikilnamiktokej tlen otikiluijkej Jehová tikchiuaskej ijkuak ixpan otimotemakakej. Tla tikilnamiktokej tlen otikiluijkej Jehová techpaleuis amo matikchiuakan tlen amo kuali. ¿Tleka ijkon tikijtouaj?

7. ¿Ken techpaleuia ijkuak timotemakaj ixpan Jehová?

⁷ Ijkuak timotemakaj ixpan Jehová ayakmo tikchiuaj san tlen tejuan tiknekij. Ikinon ayakmo tikchiuaj tlen amo kipaktia Jehová (Mat. 16:24). Ijkon tikmatiskej tlen tikchiuaskej ijkuak itlaj tikixnamikiskej. Tejuan nochipa tiknekij tiktlakamatiskej Jehová uan tikyolpaktiskej. Noijki ayakmo tikchiuaj tlen oksekimej kichiuaj. Tiknekij tikchiuaskej ijkon ken Job okichi. Ye otlajyoui pero okijto: “¡Nikpias noyolo ajsitok!” (Job 27:5).

8. ¿Ken techpaleuia ijkuak timokuayejyekouaj tlen otikiluijkej Jehová?

⁸ Ijkuak timokuayejyekouaj otikiluijkej Jehová nochipa tiktekichiuiliskej, techpaleuia matikixtopeuakan tlen amo kuali. Ikinon amo keman tikijtoskej techpaktia ikaj tlen yomonamikti. Porque ijkuak otimotemakakej ixpan Jehová otikiluijkej amo keman ijkon tikchiuaskej. Amo timoyolkokoskej tla amo timokuayejyekouaj tlen amo kuali. Ijkon amo tikchiuaskej ken akinmej kichiuaj tlen amo kuali (Prov. 4:​14, 15).

9. ¿Tleka techpaleuis kuali matikpejpenakan tlen tikchiuaskej tla tikilnamiktokej yotimotemakakej ixpan Jehová?

 ⁹ ¿Tlen tikchiuaskej tla techiluiaj okachi matitekipanokan pero ayakmo uelis timonechikoskej? Amo matikselikan non tekitl. Tejuan yotikijtojkaj amo tikseliskej non tekitl. Ikinon amo tikijtoskej tikseliskej tekitl porque tlamo satepan ayakmo uelis tiktekichiuiliskej Jehová. Tlen okichi Jesús uelis techpaleuis porque ye nochipa okiyolpakti iTajtsin. Tejuan noijki tiknekij nochipa tikyolpaktiskej toTajtsin Dios uan san niman tikixtopeuaskej tlen amo kipaktia (Mat. 4:10; Juan 8:29).

10. ¿Ken techpaleuis Jehová matikchiuakan ijkon ken Jesús maski yotimoapolaktijkej?

¹⁰ Ijkuak itlaj tikixnamikij uan itlaj techyoltilana, techpaleuia matikteititikan tiknekij tikchiuaskej ijkon ken Jesús okichi. Pero tikilnamiktokej Jehová techpaleuis. Porque Biblia kijtoua: “ToTajtsin Dios kichiua tlen kijtoua uan amo kitekauilis manamechyoltilana tlen amo uelis nankixikoskej. Ye namechpaleuis xitlaxikokan ijkuak itlaj namechyoltilanas” (1 Cor. 10:13).

¿KEN UELIS TIKCHIUASKEJ IJKON KEN JESÚS OKICHI?

11. ¿Ken uelis nochipa tikchiuaskej ijkon ken Jesús okichi? (Noijki xikinmita fotos).

¹¹ Jesús okitekichiuili Jehová ika nochi iyolo uan iuan okatka porque omotlatlaujtiaya (Luc. 6:12). Uelis tikchiuaskej ijkon ken Jesús okichi tla tikchiuaskej seki tlamantli tlen techpaleuis okachi matimouikakan iuan Jehová maski yotimoapolaktijkej. Biblia kijtoua: “Maski yitikmatij tikchiuaskej miak tlamantli, nochipa matikchijtokan ijkon ken tikchijtiuitsej” (Filip. 3:16). Ualeua  tikmatiskej tlen okichijkej sekimej tokniuan para okachi kitekichiuiliskej Jehová. Xamo okiselitoj tlamachtil para matetlapouikan Tekiuajkayotl noso ochantitoj kanin okachi moneki matetlapouikan. Te noijki uelis ijkon tikchiuas tla tiueli. Porque akinmej tiktekichiuiliaj Jehová nochipa tikitaj ken uelis okachi titetlapouiskej (Hech. 16:9). Pero ¿tlen tikchiuas tla tikita amo tiueli? Amo ximokuayejyeko amitlaj mopati. Okachi miak ipati xitlaxiko (Mat. 10:22). Amo matikilkauakan Jehová yolpaki ijkuak timochijchikauaj tikchiuaj nochi tlen tiuelij. Ijkon uelis nochipa tikchiuaskej ken Jesús okichi maski yotimoapolaktijkej (Sal. 26:1).

12, 13. ¿Tlen uelis tikchiuaskej tla tikitaj ayakmo tiyolpakij? (1 Corintios 9:​16, 17; noijki xikita recuadro “ ¿Tlen uelis tikchiuaskej tla tiknekij ‘tiktlamiskej timotlaloskej’?”).

¹² ¿Tlen tikchiuaskej tla tikitaj ayakmo timotlatlaujtiaj ika nochi toyolo? Noso ¿ayakmo tiyolpakij ijkuak titetlapouiaj uan ijkuak tiktlajtoltiaj Biblia? Tla ijkon techpanoua, amo matimokuayejyekokan ayakmo techpaleuia iespíritu santo Jehová. Tejuan titlajtlakolejkej ikinon ualeua amo kuali timomachiliaj. Matimokuayejyekokan tlen okichi apóstol Pablo tla tikitaj ayakmo tiyolpakij. Ye omochijchikauaya kichiuas ijkon ken Jesús okichi pero ualeua okitaya oui ijkon kichiuas (xiktlajtolti 1 Corintios 9:​16, 17). Ye okijto: “Pero tla nikchiuas maski amo nikneki, moneki nikchiuas porque onechnauati toTajtsin Dios”. Tlen okijto Pablo okiteititi okinekiaya tetlapouis maski ualeua amo kuali omomachiliaya.

¹³ Tejuan noijki kuali matikpejpenakan  tlen tikchiuaskej maski ualeua amo kuali timomachiliaj. Matimochijchikauakan tikchiuaskej tlen kuali maski ualeua amo tiknekij ijkon tikchiuaskej. Satepan kuali timomachiliskej tla tikchiuaj tlen kuali. Nochipa tikchiuaskej ijkon ken Jesús okichi tla nochipa timomachtiaj Biblia, timotlatlaujtiaj, timonechikouaj uan titetlapouiaj. Noijki tokniuan moyolchikauaskej ijkuak techitaskej nochipa ijkon tikchiuaj (1 Tes. 5:11).

‘NOCHIPA MATIKITAKAN KOX MELAUAK TITLANELTOKAJ’

14. ¿Tleka ualeua moneki matikitakan kox kuali tlen tikchijtokej? (2 Corintios 13:5).

¹⁴ Ualeua miak ipati matikitakan kox kuali tlen tikchijtokej maski yotimoapolaktijkej (xiktlajtolti 2 Corintios 13:5). Uelis tikitaskej kox nochipa timotlatlaujtiaj, tiktlajtoltiaj uan timomachtiaj Biblia, timonechikouaj uan titetlapouiaj. Matikitakan ken okachi kuali tiktekichiuiliskej Jehová uan ijkon tiyolpakiskej. Matimotlajtlanikan: “¿Kuali nikinmachtia oksekimej tlen amo oui tlamachtia Biblia? ¿Uelis itlaj nikchiuas para okachi nipakis ijkuak nitetlapouis? ¿Nikteititia nikneltoka Jehová ijkuak niktlatlaujtia uan nikiluia tlen nikneki? ¿Nimochijchikaua nochipa nimonechikos? ¿Tlen nechpaleuis kuali manitlakaki ijkuak nimonechikoua uan manitlanankili?”.

15, 16. ¿Tlen techmachtia tlen okipanok Robert?

¹⁵ Noijki moneki matikitakan tlen tikitaj oui tikchiuaskej. Matikitakan tlen okipanok se tokni. Ye itoka Robert uan okijto: “Ijkuak onikpiaya kanaj 20 xiuitl onitekipanouaya san seki tonal. Se tonal onechyole se ichpochtli tlen iuan onitekipanouaya manio ikalijtik ijkuak tlamiskia titekipanoskej. Okijto tiyetoskiaj toselti uan timoyolpaktiskiaj. Achto san itlaj onikilui para amo niaskia. Pero satepan onikilui amo niaskia uan onikyekilui tleka”. Kuali tlen okichi Robert porque amo oyajki iuan non ichpochtli. Satepan omokuayejyeko tlen okipanok uan okitak omonekiaya san niman kiluiskia amo yaskia ichan. Ye okijto: “Amo san niman onikchi ijkon ken José okichi ijkuak isiua Potifar okilui iuan mamoteka (Gén. 39:​7-9). Amo onimokuayejyekouaya nikitaskia oui nikiluiskia non ichpochtli amo iuan niaskia. Tlen onechpanok onechpaleui manikita omonekiaya okachi kuali nimouikas iuan Jehová”.

 ¹⁶ Matimokuayejyekokan tejuan noijki itlaj techyoltilana uan timochijchikauaj amo titlajtlakolchiuaskej. Pero uelis tikchiuaskej tlen okichi Robert. Matimotlajtlanikan: “¿Onikitak oui san niman nikijtos amo?”. Amo matimoyolkokokan tla ok moneki itlaj tikpatlaskej. Matiyolpakikan porque yotikitakej tlen ok moneki tikchiuaskej. Matikiluikan Jehová tlen techpanoua uan san niman itlaj matikchiuakan para okachi tiktlakamatiskej (Sal. 139:​23, 24).

17. ¿Tlen okichi Robert para amo kisokiotis itoka toTajtsin Dios?

¹⁷ Tlen okipanok Robert techmachtia okseki tlamantli. Ye okijto: “Ichpochtli onechilui kuali tlen onikchi ijkuak onikilui amo iuan niaskia. Oniktlajtlani tleka ijkon okijto. Onechyekilui se iyolikni tlen achto okatka iTlaixpantijka Jehová okilui nochtin telpochmej uan ichpochmej tlen kitekichiuiliaj Jehová san niman kichiuaj tlen amo kuali ijkuak oksekimej amo kinmitaj. Ikinon okilui iyolikni nechyoleuaskia uan kitaskia kox ne noijki ijkon nikchiuaskia. Sapanoua niyolpaki porque amo oniksokioti itoka Jehová”.

18. ¿Tlen tiknekij nochipa tikchiuaskej maski yotimoapolaktijkej? (Noijki xikita recuadro “ Mitspaleuis nin ome tlamachtil”).

¹⁸ Ijkuak timotemakaj ixpan Jehová uan timoapolaktiaj tiknekij mamochipaua itoka maski san tlen tikixnamikiskej. Matikneltokakan Jehová kita tlen tikixnamikij uan noijki kita ijkuak amo tikchiuaj tlen techyoltilana. Ye kita timochijchikauaj amo tikkauaskej uan ye techteochiuas. Jehová techpaleuis ika iespíritu santo matikchiuakan tlen kuali (Luc. 11:​11-13). Ye techpaleuis nochipa matikchiuakan ijkon ken Jesús okichi maski yotimoapolaktijkej.