JESÚS okijto saiktlami tonalmej itekipanojkauan Jehová sapanoa miak pixkaskiaj (Mat. 9:37; 24:14, TNM). Melauak ijkon kichijtokej itech altepetl Transcarpatia (Ucrania). Eyi altepetsitsintin tlen amo uejka katej itech non altepetl, katej 50 tlanechikolmej uan tetlapouiaj kanaj 5,400 tokniuan. * Tla tikinpouaskej tlen ompa chantij itech eyi altepetsitsintin de naui tlaltikpaktlakamej se iTlaixpantijka Jehová.

¿Itech ninmej altepetsitsintin kikakij iTlajtol toTajtsin Dios? Se tokni itoka Vasile, okijto: “Yejuan kipatioitaj Biblia, kichiuaj tlen kuali, san sekan katej iuan inkalchanejkauan uan mochijchikauaj mopaleuiskej”. Noijki okijto: “Amo nochipa kineltokaj tlen tikinmachtiaj. Pero techkakij ijkuak tikintlajtoltiliaj se texto”.

Tokniuan kixnamikij seki tlamantli porque ompa miakej tetlapouiaj. Se neskayotl, se tlanechikol kinpia 134 tokniuan tlen tetlapouiaj uan kinpiaj san 50 kalmej kanin tetlapouiskej. ¿Tlen kichiuaj tokniuan?

Sekimej tokniuan mochijchikauaj tetlapouitiuij kanin okachi moneki. Se tokni itoka Ionash tlen yikipia 90 xiuitl, okijto: “Itech notlanechikol sejse tokniuan tetlapouiaj san itech ome kalmej. Axkan san nikan nitetlapouia. Pero ijkuak ayamo onimokokoaya, oniaya kanaj 160 kilómetros nitetlapouiti kanin okachi omonekiaya uan onitetlapouiaya ika tlajtoli húngaro”. Akinmej tetlapouiaj moneki melauak mochijchikauaskej para ompa tetlapouitiuij. Ionash okijto: “Omonekiaya nimeuas kualkan kanaj las cuatro para niaskia itech tren. Uan onitetlapouiaya hasta las seis tiotlak ijkuak tren oualmokuepaya. Sejse semana oniaya eyi uelta”. ¿Ken momachilia axkan tokni? Ye okijto: “Sapanoa oniyolpakiaya ompa nitetlapouiti. Uan sekimej onikinmachti tlen uejka ochantiayaj”.

Tikinmajsikamatij tokniuan amo uelis uejka yaskej tetlapouitiuij. Maski yikipiaj miak xiuitl, nochtin mochijchikauaj tetlapouiskej ompa kanin chantij. Uan itech 2017 ijkuak otikilnamikej imikilis Jesús, itech nonmej eyi altepetsitsintin sapanoa miakej omonechikojkej. Nin kiteititia tikpiaskej miak tekitl maski san kanin tiktekichiuilijtoskej toTajtsin Dios (1 Cor. 15:58).