1. ¿Tlen techmachtia iTlajtol toTajtsin Dios?

JEHOVÁ ye akin okachi kuali techmachtia. Ye techpaleuia ma tikixnamikikan nochi ouijkayotl (Is. 30:20, 21). ITlajtol toTajtsin Dios techiluia tlen moneki para ‘kuali matimoixtlamachtikah’ uan ijkon tikmatiskej ‘kenijki tikchiwaskeh nochi tlan kuali’ (2 Tim. 3:17). Ijkuak tejuan timoyekanaj ika ixtlamatilis Jehová, okachi timochiuaj tiixtlamatkej uan amo “inmixtlamatilis n tlaltikpaktlakah” (1 Cor. 3:19; Sal. 119:97-100).

2. ¿Tlen timomachtiskej?

² Axkan tikitaskej akinmej amo kitekichiuiliaj Jehová san kinekij ma tikchiuakan tlen tiknekij. Xamo ualeua tiknekij tikchiuaskej ken yejuan uan tiknekij timokuayejyekoskej ken yejuan. Ik non, Biblia kijtoa: “Ximotlachilikah; amo kichiwa nomechkuatlapololtiskeh iwa nomechkajkayawaskeh nekateh tlamachtijkeh ika tlamachtílisteh non amitla impati” (Col. 2:8). Axkan tikitaskej ome tlamantli tlen ika tlakajkayaua Satanás uan sapanoa miakej yokinkajkaya. Tikitiaskej tleka “inmixtlamatilis n tlaltikpaktlakah” amitlaj ipati. Noijki tikitaskej tleka ixtlamatilis toTajtsin Dios okachi ipati ika ma timoyekanakan.

3, 4. ¿Tlen opanok itech kanaj siglo veinte?

³ Kanaj itech siglo veinte miakej opejki mokuayejyekoaj amo tlajtlakoli auilnemiskej. Ijkuak ayamo ijkon omokuayejyekoayaj, okijtoayaj san yejuan akinmej yomonamiktijkej uelis san sekan motekaskej uan amikaj teixpan  omotlapouiaya tleka se tlakatl omotekaya iuan isiua. Pero okipatlakej ken omokuayejyekoayaj uan opejki auilnemij.

⁴ Pero kanaj itech xiuitl 1920 miakej yetoskia ken okachi otlapolojkej porque okipatlakej ken omokuayejyekoayaj. Se ixtlamatki okijto: “Opejki mota auilnemilistli itech películas, itech teatros, tlatsotsonali opejki tlajtoa itech auilnemilistli, itech novelas uan noijki ijkuak kijtoaj itlaj kinemakaj”. Itech nonmej tonalmej ayakmo kualtsin omijtotiayaj uan ayakmo kualtsin omotlakentiayaj. Ijkon ken kijtoa Biblia opejki ‘moyolpaktijtinemih ika tlan amo kuali kelewia inkuerpo’ (2 Tim. 3:4).

5. ¿Tlen opejki kichiuaj uan tlen opejki mokuayejyekoaj kanaj itech xiuitl 1960?

⁵ Kanaj itech 1960 miakej opejki kijtoaj amo tlajtlakoli tla se tlakatl mosiuakopas noso se siuatl motlakakopas. Noijki akinmej yomonamiktijkej tla okinekiayaj uelis mokajkauaskiaj inmixpan tekiuajkej uan tla se tlakatl okinekiaya yetos iuan se siuatl amo omonekiaya monamiktis. Noijki opejki moyolpaktiaj kanin omotaya auilnemij. ¿Tlen panoa axkan? Se siuatl tlen tlajkuiloa okiyekijto: “Axkan sapanoa tetikipacho porque miakej ayakmo kichiuaj nion mokuayejyekoaj tlen kuali”. Ik non, miakej ayakmo kuali katej inmiuan inkalchanejkauan uan mokajkauaj. Moyolkokoaj uan oksekimej san kineki kitaskej pornografía. Nochi nin tlamantli kiteititia “inmixtlamatilis n tlaltikpaktlakah” amitlaj ipati porque san mokokoliskuitiaj (2 Ped. 2:19).

6. ¿Tlen kineki Satanás miakej ma kichiuakan?

⁶ Satanás kineki miakej ijkon ma kichiuakan. Ye kipaktia ma auilnemikan uan amo ma motlakaitakan akinmej yomonamiktijkej. Pero toTajtsin Dios okitlali ma timonamiktikan (Efes. 2:2). Akinmej auilnemij amo kipatioitaj kinpiaskej inkoneuan uan amo kipiaskej yolilistli tlen amo keman tlamis (1 Cor. 6:9, 10).

7, 8. ¿Tleka Biblia okachi kuali techiluia ken moneki tikitaskej ijkuak se tlakatl moteka iuan isiua uan amo ken mokuayejyekoaj oksekimej?

⁷ Miakej san kichiuaj tlen mokuayejyekoaj oksekimej, ik non, amo kintlakamatij itlanauatiluan Jehová porque kijtoaj axkan ayakmo techpaleuia. Xamo mokuayejyekoaj tla toTajtsin Dios otechchijchi uan ye kichiua  ma tiknekikan ikaj iuan ma timotekakan, tleka techiluia amo ma tiauilnemikan. Amo kuali ijkon mokuayejyekoaj porque san kinekij moyolpaktiskej. Biblia kijtoa amo ma tikchiuakan tlen amo kuali uan nin techpaleuis ma techtlakaitakan (Col. 3:5). Jehová okitlali ma timonamiktikan, ik non, san tlakatl iuan isiua uelis motekaskej uan ijkon moyolpaktiskej (1 Cor. 7:8, 9). Ijkon tlakatl uan isiua moyolpaktiaj uan amo kinkuejsos intlalnamikilis nion kintekipachos kokoliskuiskej.

⁸ Miakej san tlen amo mokuayejyekoaj ijkuak se tlakatl moteka iuan isiua pero Biblia techiluia ken moneki tikitaskej nin tlamantli. Kijtoa moyolpaktia tlakatl iuan isiua ijkuak motekaj (Prov. 5:18, 19). Pero noijki kijtoa: “Nochi tlakatl makimati kenomi kiyeknawatis ikuerpo ika chipawálistli iwa tlakitálistli. Iwa amo xikkawilikah makelewi itla nomokuerpo kemi kichiwah akimeh amo kixmatih n Totajtsi Dios” (1 Tes. 4:4, 5).

9. (1) ¿Tlen ika omopaleuijkej itekipanojkauan Jehová para amo mokuayejyekoskiaj ken akinmej amo kitekichiuiliaj? (2) ¿Tlen techiluia 1 Juan 2:15, 16? (3) Ijkon ken kijtoa Romanos 1:24-27, ¿tlen tlamantli moneki tikixtopeuaskej?

⁹ Yikipia kanaj cien xiuitl iTlaixpantijkauan Jehová amo okinneltokilijkej akinmej ‘ayakmó opinawayah’ ijkuak okichiuayaj tlen amo kuali (Efes. 4:19). Tokniuan omochijchikajkej okintlakamatkej itlanauatiluan toTajtsin Dios. Itech revista Akin Tetlapouijtok 15 de mayo 1926 ika inglés, okijto: “Tlakamej uan siuamej moneki yetoskej chipauakej uan moneki ma yeto chipauak tlen mokuayejyekoaj, noijki chipauak ma yeto tlen kichiuaj uan okachi ijkuak mouikaj iuan tlen ayamo monamiktiaj”. Maski san tlen amo omokuayejyekoayaj itech nonmej tonalmej, itekipanojkauan Jehová nochipa okintlakamatkej itlanauatiluan toTajtsin Dios (xiktlajtolti 1 Juan 2:15, 16). Tiktlasojkamatiliaj toTajtsin Dios techmaka iTlajtol uan techpaleuia ma tikpiakan chikauak totlaneltokilis uan ijkon amo ma timokuayejyekokan ken akinmej amo kitekichiuiliaj * (xiktlajtolti Romanos 1:24-27).

10, 11. ¿Tlen okijto Biblia panoskia itlamian tonalmej?

¹⁰ Biblia kijtoa itlamian tonalmej miakej sapanoa “moweyiliskeh” (2 Tim. 3:1, 2). Ik non, amo techtlajtlachialtia miakej kinmiluiaj oksekimej ma mopatioitakan. Se enciclopedia kijtoa kanaj itech xiuitl 1970 sapanoa okinkixtijkej amochmej tlen ika mopaleuiaj ma mopatioitakan. Seki amochmej kijtoaj: “Amo moneki tikpatlaskej toyelis noso timokuayejyekoskej itlaj amo kuali tikchijtokej”. Se amochtli kijtoa moneki timotlasojtlaskej porque “sapanoa tikuajkualtsitsintin, moneki techpatioitaskej uan ayakmo onka oksekimej ken tejuan”. Noijki non amochtli okijto: “Tejuan moneki tikpejpenaskej ken tikpiaskej toyelis, tejuan tikijtoskej tlen okachi kuali uan tlen techpaleuis”.

¹¹ ¿Yotikitak miakej ijkon kichiuaj? Satanás okilui Eva ijkon ma kichiua. Okilui uelis yetoskia ken toTajtsin Dios uan ‘kimatiskia tlen kuali uan tlen amo kuali’ (Gén. 3:5). Axkan miakej kineltokaj amikaj uelis itlaj kinmiluis tlen kuali uan tlen amo kuali nion  toTajtsin Dios uelis ijkon kinmiluis. Akinmej ijkon kineltokaj yokinmijtlakojkej miakej. Noijki sekimej ayakmo kipatioitaj ijkuak monamiktiaj.

12. ¿Ken kitaj akinmej amo kitekichiuiliaj Jehová ijkuak monamiktiaj?

¹² Biblia kijtoa tlakatl uan isiua ma motlakaitakan uan ma kichiuakan tlen okimoluijkej ijkuak omonamiktijkej. Noijki ma moyolchikauakan san sekan ma yetokan. Ik non, Biblia kijtoa: “tlakatl kikauas itajtsin uan inantsin uan mosetilis iuan isiua uan moneki mochiuaskej san se tlalnakayotl” (Gén. 2:24). Pero miakej san tlen amo mokuayejyekoaj uan kijtoaj ma tikchiuakan tlen techpaktia. Se amochtli tlen tlajtoaj itech akinmej mokajkauaj inmixpan tekiuajkej, kijtoa: “Ijkuak monamiktiaj ayakmo kijtoaj ‘san sekan tichantiskej hasta ijkuak timikiskej’. Axkan kijtoaj ‘san sekan tichantiskej hasta ijkuak ayakmo timotlasojtlaskej’”. Akinmej ijkon mokuayejyekoaj sapanoa kintlajyouiltiaj inkalchanejkauan uan kinyolkokoaj. Noijki kiteititiaj amo okipatioitakej ijkuak omonamiktijkej.

13. ¿Tleka Jehová kitlajyaltia ma timoueyinekikan?

¹³ Biblia kijtoa: “Jehová kitlajyaltia ijkuak ikaj moueyineki ika nochi iyolo” (Prov. 16:5). ¿Tleka Jehová kitlajyaltia ma timoueyinekikan? Porque akinmej ijkon kichiuaj uan kinmiluiaj oksekimej ijkon ma kichiuakan, kiteititiaj moueyinekij ken Satanás. Ye sapanoa moueyineki uan okilui Jesús akin okipaleui toTajtsin Dios okichijkej nochi tlen onka, ixpan ma motlankuaketsa uan ma kiueyichiua (Mat. 4:8, 9; Col. 1:15, 16). ToTajtsin Dios amo kipatioita “inmixtlamatilis n tlaltikpaktlakah” porque moueyinekij.

14. ¿Ken techpaleuia Romanos 12:3 amo ma timoueyinekikan?

¹⁴ Biblia kijtoa ma timotlasojtlakan san ken moneki. Ma tikitakan tlen okijto Jesús: “xiktlasojtla mokni ijkó kemi te timotlasojtla”  (Mat. 19:19). Nin kijtosneki moneki tikmatoskej okachi ma tikinpatioitakan oksekimej. Biblia amo tlamachtia tejuan moneki okachi timopatioitaskej. Kijtoa: “Amitla xikchiwakah san por aka nonkinekih nonkixpanawiskeh, noso para manomechweyilikah, yej ximoiknomatikah tenawak, iwa xikinmitakah n oksikimeh kemi okachi weyijkatitokeh” (Filip. 2:3; xiktlajtolti Romanos 12:3).

15. ¿Tleka Biblia kijtoa ma tikinmitakan oksekimej “okachi weyijkatitokeh”?

¹⁵ Axkan miakej kijtoaj amitlaj ipati ijkuak Biblia kijtoa amo ma timoueyinekikan. Kijtoaj tla tikinmitaskej “okachi weyijkatitokeh” oksekimej, techchiuiliskej san tlen yejuan kinekiskej. Pero ¿tlen kinpanoa akinmej moueyinekij? ¿Yolpakij yejuan uan inkalchanejkauan? ¿Kinpiaj inyolikniuan? ¿Mouikaj iuan toTajtsin Dios? ¿Timokuayejyekoaj okachi tlapaleuia “inmixtlamatilis n tlaltikpaktlakah” noso ixtlamatilis toTajtsin Dios?

16, 17. ¿Tlen tlamantli tiktlasojkamatiliaj Jehová uan tleka?

¹⁶ Akinmej moyekanaj ika “inmixtlamatilis n tlaltikpaktlakah” yetoskia ken ijkuak kanaj tiauij uan ikaj tiktlajtlaniaj kanin ik tiaskej uan ye noijki omoixpolo. Jesús okijto: “Amo tlachiah iwa kinyakanah oksikimeh kemi yejwah. Tla se non amo tlachia kiyakanas ok se kemi ye, san ken ome wetsiskeh itech tékochtli” (Mat. 15:14). Nin kiteititia toTajtsin Dios amo kipatioita “inmixtlamatilis n tlaltikpaktlakah”.

¹⁷ Tlen kijtoa Biblia nochipa techpaleuia “kuali matechmachtikah, ika matechnonotsakah, ika matechmilawakah iwa matechititikah kenijki tinemiskeh inawak Dios” (2 Tim. 3:16). Tiktlasojkamatiliaj Jehová porque ialtepe techpaleuia amo ma tikchiuakan ken akinmej amo kitekichiuiliaj (Efes. 4:14). Techmachtia, ik non, techpaleuia ma tikpiakan chikauak totlaneltokilis uan ma tikintlakamatikan itlanauatiluan toTajtsin Dios. ¡Se tlateochiualistli Jehová techyekana ika Biblia!