1. ¿Tleka okijto Jesús ma tiknechikokan ompa iluikak tlen miak ipati?

SEKI tlamantli tlen okachi ipati amo mota. Ijkuak Jesús otlamachti itech tepetl, okijto tlamantli tlen uits iluikak okachi ipati uan amo tlamantli tlen onka nikan tlaltikpak. Noijki okijto: “Kan kajki tlan momejwah nonkimoliah ipati, ompa kajki nomoyolo” (Mat. 6:19-21). Ijkuak itlaj tikpatioitaj, tiktemouaj ken tikpiaskej. Tiknechikouaj ompa “ilwikak tlan milák ipati” ijkuak kuali timouikaj iuan toTajtsin Dios uan timochijchikauaj ma techseli. Jesús okijto amikaj uelis techichtekilis non tlamantli miak ipati.

2. (1) ¿Tlen okijto Pablo itech 2 Corintios 4:17, 18? (2) ¿Tlen timomachtiskej?

² Tlatitlanil Pablo okijto: “Amo tiktlaliah totlachialis itech tlan mota” (xiktlajtolti 2 Corintios 4:17, 18). Seki tlamantli tlen amo mota ye nochi tlen tikseliskej itech xochitlali ijkon ken yokijto toTajtsin Dios. Axkan timomachtiskej naui tlamantli miak ipati tlen amo mota. Timouikaj iuan toTajtsin Dios, tiktlatlaujtiaj, techpaleuia ika iespíritu santo uan ijkuak titetlapouiaj techpaleuia Jehová, Jesús uan ángeles. Noijki tikitaskej ken tiktlasojkamatiskej nochi nin tlamantli.

3. ¿Tlen okachi ipati tikpiaj uan tlen techpaleuia ma tikpiakan?

³ Okachi miak ipati timouikaskej iuan Jehová (Sal.  25:14). ¿Ken uelis timouikaskej iuan toTajtsin Dios tla titlajtlakolejkej uan ye santo? Uelis iuan timouikaskej porque Jesús topatka omotemakak uan “kitekixtilis nochi intlajtlakol n tlaltikpaktlakah” (Juan 1:29). Jehová yokimatiaya iKone tlaxikoskia uan techmakixtiskia. Ik non, omouikaya iuan akinmej okatkaj ijkuak ayamo okimiktiayaj Jesús (Rom. 3:25).

4. Xikijto sekimej tlen okatkaj iyolikniuan Jehová ijkuak Jesús ayamo oualaya tlaltikpak.

⁴ Ma tikitakan tlen okichijkej sekimej tlen omouikayaj iuan toTajtsin Dios ijkuak Jesús ayamo oualaya tlaltikpak. Abrahán okipiaya chikauak itlaneltokilis. Jehová okijto okatka iyolikni maski yokipiaya kanaj mil xiuitl oixpoliuik (Is. 41:8). Nin kiteititia Jehová ok techitas ken tiiyolikniuan maski tiixpoliuiskej. Ye kilnamiktok Abrahán uan kiyolitis (Luc. 20:37, 38). Job noijki omouikaya iuan toTajtsin Dios. Se tonal ijkuak ángeles omonechikojkej ompa iluikak, Jehová okijto Job nochipa kitlakamatiskia. Okijto: “Ye se tlakatl tlen kipia iyolo ajsitok, akin kimauilia Dios uan amo kichiua tlen amo kuali” (Job 1:6-8). Jehová okitlasojtlaya Daniel porque okitekichiuili kanaj ochenta xiuitl kanin okinueyichiuayaj teotsitsintin. Ijkuak Daniel yokipiaya miak xiuitl, ángeles eyi uelta okiluijkej Jehová ‘sapanoua kitlasojtla’ (Dan. 9:23; 10:11, 19). Jehová san kichixtok tonal ijkuak kinyolitis iyolikniuan (Job 14:15).

5. ¿Tlen moneki tikchiuaskej tla tiknekij timouikaskej iuan Jehová?

⁵ Axkan miakej mouikaj iuan toTajtsin Dios maski tlajtlakolejkej. Ipan nochi tlaltikpak katej miakej tlakamej, siuamej uan konemej tlen kiteititiaj kipiaj kuali inyelis uan mouikaj iuan Jehová. Biblia kijtoua Jehová san mouika iuan akinmej yolmelauakej (Prov. 3:32). Mouikaj iuan Jehová porque kineltokaj Jesús topatka omotemakak. Ik non, Jehová kinkauilia ixpan ma motemakakan uan ma moapolaktikan. Ijkuak ijkon tikchiuaj, timouikaj iuan akin okachi ueyititok ipan nochi semanauak uan tipouij itech ialtepe.

6. ¿Ken tiktlasojkamatiliskej Jehová porque techkauilia iuan ma timouikakan?

⁶ ¿Ken tiktlasojkamatiliskej Jehová porque techkauilia iuan ma timouikakan? Ma tikchiuakan ken Abrahán uan Job. Yejuan amo keman okikajkej Jehová. Tejuan noijki amo keman ma tikkauakan maski yimiak xiuitl tiktekichiuilijtokej. Noijki okachi ma tikpatioitakan timouikaj iuan Jehová ijkon ken okichi Daniel (Dan. 6:7, 10, 16, 22). Jehová techpaleuis ma titlaxikokan maski san tlen ouijkayotl tikixnamikiskej uan ijkon nochipa iuan timouikaskej (Filip. 4:13).

7. (1) Ijkon ken kijtoua Proverbios 15:8, ¿tlen kichiua Jehová ijkuak tiktlatlaujtiaj? (2) ¿Ken technankilia Jehová ijkuak tiktlatlaujtiaj?

⁷ Jehová techkauilia ma tiktlatlaujtikan. Akinmej kuali mouikaj kinpaktia motlapouiskej uan kimoiluiaj tlen kimachiliaj. Noijki ijkon tikchiuaj ijkuak timouikaj iuan Jehová. Ye techtlapouia ika Biblia uan ijkon tikmatij tlen mokuayejyekoua uan tlen kimachilia. Tejuan  tikiluiaj tlen timokuayejyekouaj uan tlen tikmachiliaj ijkuak tiktlatlaujtiaj. Jehová kipaktia techkakis (xiktlajtolti Proverbios 15:8). Ye techtlasojtla, ik non, technankilia uan amo san techkaki. Ualeua san niman technankilia pero ualeua moneki miak uelta tiktlatlaujtiskej. Ye technankilis ijkuak monekis uan kimati ken techpaleuis. Xamo ye amo technankilis ken tejuan tiknekij. Ye amo techkixtilis tlen techtlajyouiltia pero techpaleuis ma titlaxikokan (1 Cor. 10:13).

8. ¿Ken tiktlasojkamatiliskej Jehová porque techkauilia ma tiktlatlaujtikan?

⁸ ¿Ken tiktlasojkamatiliskej Jehová porque techkauilia ma tiktlatlaujtikan? Nochipa ma tiktlatlaujtikan (1 Tes. 5:17). Jehová amo techchiualtia ma tiktlatlaujtikan. Ye techkauilia ma tikpejpenakan tlen tikchiuaskej uan techiluia: “Nochipa ximotiotsajtsilijtokah” (Rom. 12:12). Tikteititiaj tiktlasojkamatiliaj Jehová ijkuak miak uelta tiktlatlaujtiaj se tonal. Amo ma tikilkauakan ma tiktlasojkamatilikan uan ma tikueyichiuakan ijkuak tiktlatlaujtiaj (Sal. 145:2, 3).

9. (1) ¿Ken motlatlaujtia tokni Chris? (2) ¿Ken timotlatlaujtia tejuatsin?

⁹ Okachi tikpatioitaj tiktlatlaujtiaj Jehová ijkuak tikitaj ken technankilia uan yiuejkika tiktekichiuiliaj. Se tokni itoka Chris uan yikipia cuarenta y siete xiuitl kitekichiuilia Jehová, okijto: “Nechpaktia kualkan nimeuas uan niktlatlaujtia Jehová porque amitlaj nechkuejsoua. Sapanoua kualtsin iuan nimotlapouia ijkuak tlanestiuits uan tonaltsin kitlauilia ajuachtli. Niktlasojkamatilia Jehová porque techmaka miak tlamantli kualtsin uan techkauilia ma tiktlatlaujtikan. Ijkuak yinikochis noijki niktlatlaujtia uan ijkon kuali nikochi”.

10. ¿Tleka moneki ma tikpatioitakan iespíritu santo toTajtsin Dios?

¹⁰ Noijki moneki tikpatioitaskej iespíritu santo toTajtsin Dios. Jesús okijto nochipa ma tiktlajtlanilikan toTajtsin Dios iespíritu santo (Luc. 11:9, 13). Jehová techpaleuia ika iespíritu santo ma titlaxikokan (2 Cor. 4:7; Hech. 1:8). Ijkon tikxikoskej san tlen ouijkayotl.

11. ¿Ken techpaleuia espíritu santo?

¹¹ Espíritu santo techpaleuia kuali ma tiktekichiuilikan toTajtsin Dios. Techpaleuia ma tikmatikan tlen tikchiuaskej uan ma tiyetokan tiixtlamatkej. Tikmatij nochi kuali kisa ijkuak tiktekichiuiliaj Jehová porque techmaka iespíritu santo.

12. Ijkon ken kijtoua Salmo 139:23, 24, ¿tlen uelis tikiluiskej Jehová?

¹² Noijki tikpatioitaj espíritu santo ijkuak tikiluiaj Jehová ma techpaleui ma tikmatikan tla itlaj amo kuali timokuayejyekouaj (xiktlajtolti Salmo 139:23, 24). Jehová technankilia uan ika iespíritu santo techpaleuia ma tikitakan kox moneki itlaj tikyektlaliskej. Tla moneki itlaj tikyektlaliskej, ma tiktlajtlanilikan iespíritu santo uan ijkon ayakmo timokuayejyekoskej tlen amo kuali. Ijkon tikteititiskej amo tiknekij titlajtlakolchiuaskej uan ye techpaleuis ika iespíritu santo (Efes. 4:30).

13. ¿Ken okachi tikpatioitaskej espíritu santo?

¹³ Okachi tikpatioitaskej espíritu santo tla timokuayejyekouaj ken techpaleuijtok axkan. Ijkuak Jesús yiyaskia iluikak, okinmilui imachtijkauan: “Nonkiseliskeh weletílistli iwa nonyaskeh nontetlapowitiweh notlajtol itech [...] nochi n tlaltíkpaktli” (Hech. 1:8). Axkan mochijtok tlen okijto Jesús. Iespíritu santo Jehová yokinpaleui kanaj ocho millones uan  tlajko ma kitekichiuilikan ipan nochi tlaltikpak. Noijki tikatej ika yolseuilistli porque espíritu santo techpaleuia ma tikpiakan kuali toyelis. Titetlasojtlaj, tiyolpakij, kuali timouikaj, nochi tikxikouaj, tiyolkualmej, titeiknomatij, titlaneltokaj, tiyolyamankej uan kuali timonauatiaj. Nin kiteititia tikkauiliaj ma techyekana espíritu santo (Gál. 5:22, 23). Nin se tetliokolil miak ipati.

14. ¿Akinmej techpaleuiaj ijkuak titetlapouiaj?

¹⁴ Maski amo tikitaj, Jehová, Jesús uan ángeles techpaleuiaj uan moneki ma tikpatioitakan (2 Cor. 6:1). Yejuan techpaleuiaj ijkuak titetlapouiaj. Pablo okijto: “San titlapalewijkeh itech iteki Dios” (1 Cor. 3:9). Tikchijtokej tlen Jesús otechnauati ijkuak titetlapouiaj. Ye okinmilui imachtijkauan: “Xikinmachtikah nochteh n tlaltikpaktlakah para mamochiwakah notlamachtijkawah”. Noijki okinmilui: “Ne nochipa niyetos nomowah” (Mat. 28:19, 20). ¿Ken techpaleuiaj ángeles? Tikintlasojkamatiliaj porque techyekanaj ijkuak tiktematiltiaj “kualitlájtoli [...] ipan tlaltíkpaktli” (Apoc. 14:6).

15. ¿Ken kiteititia Biblia Jehová techpaleuia ijkuak titetlapouiaj?

¹⁵ ¿Kuali mochijtok nin tekitl miak ipati? ITlajtol toTajtsin Dios yetoskia ken xinachtli porque seki uetsi ipan kuali tlali uan moskaltia. Nin kijtosneki akinmej kipiaj kuali inyolo uan kichiuaj tlen kijtoua Biblia (Mat. 13:18, 23). ¿Akin kichiua ma moskalti xinachtli uan ma tlaki? Jesús okijto amikaj uelis mochiuas imachtijka ‘tla amo kinotsa itajtsi’ (Juan 6:44). Biblia kiteititia ijkon panoua. Se tonal, Pablo okintlapoui sekimej siuamej ompa Filipos. Biblia kijtoua tlen okipanok Lidia tlen noijki ompa okatka: “[Jehová] okiyolyamani kuali makikaki nochi tlan Pablo okijtoaya” (Hech. 16:13-15). Axkan Jehová noijki miakej kinyoltilana ma yetokan itech ialtepe ijkon ken okiyoltilanki Lidia.

16. ¿Akin tikueyichiuaskej ijkuak kuali techkakij kanin titetlapouiaj?

¹⁶ ¿Akin tikueyichiuaskej ijkuak kuali techkakij kanin titetlapouiaj? Nin tlen okijto Pablo ijkuak otlajto itech tokniuan tlen ochantiayaj Corinto: “Ne Pablo onitook, Apolos okaateki, pero Dios, Ye akin okiskalti. Ijkó kiné, akin tooka, iwa akin kiaatekia, amitla impati, yej Dios Akin kiskaltia n tlátoktli” (1 Cor. 3:6, 7). Tla kuali techkakij kanin titetlapouiaj, moneki ma tikueyichiuakan Jehová ijkon ken okichi Pablo.

17. ¿Ken tiktlasojkamatiliskej Jehová, Jesús uan ángeles porque tikinpaleuiaj?

¹⁷ ¿Ken tiktlasojkamatiliskej Jehová, Jesús uan ángeles porque tikinpaleuiaj? Nochipa ma timochijchikauakan ma titetlapouikan. Uelis titetlapouiskej kanin miakej panouaj uan tekalijtik (Hech. 20:20). Miakej tokniuan kinpaktia tetlapouiskej san kanin yauij. Ijkuak ikaj amo kixmatij, kuali kitlajpalouaj uan mochijchikauaj iuan motlapouiskej. Tla kuali kinkaki akin kitlapouiaj, kiluiaj tlen kichiuas iTekiuajkayo toTajtsin Dios.

18, 19. (1) ¿Ken tikinpaleuiaj oksekimej ma kixmatikan Jehová? (2) ¿Ken okipaleui Jehová se tokni?

 ¹⁸ Tejuan tikpaleuiaj toTajtsin Dios, ik non, amo san moneki tiktokaskej xinachtli noijki moneki tikatekiskej. Nin kijtosneki tla ikaj kuali techkaki, oksepa ma tiktlajpalotij noso ma tikiluikan se tokni ma kimachtiti. Ijkuak ikaj tikmachtiaj uan kipatla inemilis, tiyolpakij porque peua kitlakamati Jehová.

¹⁹ Ma tikitakan tlen okipanok se tokni tlen chanti Sudáfrica uan otetlajchiuiaya. Ye okipaktiaya momachtis Biblia. Pero amo okimatiaya tlen kichiuas ijkuak okitak Biblia kijtoua amo kuali timotlapouiskej iuan akinmej yoixpolikej (Deut. 18:10-12). Yolik okikauili toTajtsin Dios ma kipaleui. Satepan ayakmo otetlajchiui maski san ijkon okimotlaniliaya tlen ika mopanoltis. Axkan tokni kipia sesenta xiuitl uan okijto: “Nikintlasojkamatilia tokniuan porque onechpaleuijkej ma nikajsi okse tekitl. Pero okachi niktlasojkamatilia Jehová porque onechpaleui ma nikpatla nonemilis uan axkan nitetlapouia uan yonimoapolakti”.

20. ¿Tlen tiknekij tikchiuaskej?

²⁰ Axkan otimomachtijkej naui tlamantli miak ipati tlen amo mota. Okachi ipati timouikaskej iuan Jehová. Tla kuali iuan timouikaj, uelis tiktlatlaujtiskej, techpaleuis ika iespíritu santo uan ijkuak titetlapouiskej ye techpaleuis uan noijki Jesús uan ángeles. Tiknekij okachi tikpatioitaskej nochi tlen Jehová techmaka maski amo mota. Nochipa ma tiktlasojkamatilikan porque techkauilia iuan ma timouikakan.