1, 2. ¿Tlen okijtojkej sekimej tokniuan ijkuak okatkaj novios?

 AKINMEJ yomochijkej novios sapanoua yolpakij uan kualtsin momachiliaj. Xamo tikneki nochi kuali makisa tlen nankichiuaskej tla yitikpia monovia noso monovio. Akinmej yomochijkej novios kinekij ijkon kichiuaskej. Se tokni itoka Tiina a uan chanti Etiopía, okijto: “Sapanoua oniyolpakik ijkuak ne uan nonamik otikatkaj tinovios. Otimotlapouiayaj seki tlamantli miak ipati. Pero noijki san sekan otimouetskitiayaj. Oniyolpakik onikixmatki ikaj akin sapanoua nechtlasojtla uan ne noijki niktlasojtla”.

² Se tokni itoka Alessio uan chanti Países Bajos okijto: “Sapanoua oniyolpakik ijkuak ne uan nosiua otikatkaj tinovios. Pero noijki otikixnamikej seki tlamantli”. Axkan tikitaskej seki tlamantli tlen kixnamikij ijkuak se telpochtli uan se ichpochtli mochiuaj novios. Noijki tikitaskej ken kinpaleuis tlen kijtoua Biblia kuali makisa tlen kinekij kichiuaskej. Noijki tikitaskej tlen uelis kichiuaskej tokniuan para kinpaleuiskej.

¿KEN KINPALEUIA TELPOCHMEJ UAN ICHPOCHMEJ MAYETOKAN NOVIOS?

3. ¿Ken kinpaleuia telpochmej uan ichpochmej mayetokan novios? (Proverbios 20:25).

³ Ijkuak se telpochtli uan se ichpochtli mochiuaj novios, yolpakij pero moneki mokuayejyekoskej kox monamiktiskej uan amo san kajauilmatiskej. Ijkuak monamiktiskej kiluiskej Jehová nochipa motlasojtlaskej uan motlakaitaskej. Ikinon moneki kuali mokuayejyekoskej tlen kichiuaskej (xiktlajtolti Proverbios 20:25). Ijkuak se telpochtli uan se ichpochtli mochiuaj  novios, okachi kuali moixmatij uan non kinpaleuis makipejpenakan kox monamiktiskej noso amo. Pero tla kijtoskej ayakmo yetoskej novios amo kijtosneki itlaj amo kuali okichijkej. Ijkuak okatkaj novios kuali omoixmatkej ikinon okipejpenkej amo monamiktiskej.

4. ¿Tleka miak ipati matikajsikamatikan tlen kijtosneki ijkuak ikaj kipia inovia noso inovio?

⁴ ¿Tleka miak ipati makajsikamatikan telpochmej uan ichpochmej tlen kijtosneki ijkuak ikaj kipia inovia noso inovio? Tla se tokni tlen ok iselti kajsikamati tlen kijtosneki amo nemis iuan ikaj tlen amo kineki monamiktis. Pero tinochtin moneki matikajsikamatikan non tlamantli uan amo san akinmej ayamo monamiktiaj. Ualeua sekimej kijtouaj ijkuak se telpochtli uan se ichpochtli yomochijkej novios moneki monamiktiskej. Pero yejuan motekipachouaj ijkuak ijkon kinmiluiaj. Se tokni itoka Melissa uan chanti Estados Unidos okijto: “Sekimej tokniuan kinmiluiaj miak tlamantli akinmej yomochijkej novios para mamonamiktikan. Ikinon sekimej novios monamiktiaj maski amo kuali mouikaj. Oksekimej telpochmej uan ichpochmej kijtouaj amikaj iuan nemiskej porque ijkon amitlaj kintekipachos”.

KUALI XIMOIXMATIKAN

5, 6. ¿Tlen moneki motlapouiskej akinmej yomochijkej novios? (1 Pedro 3:4).

⁵ ¿Tlen mitspaleuis xikpejpena kox timonamiktis iuan monovio noso monovia? Kuali ximoixmatikan. Xamo itlaj omitspakti ijkuak otikixmatki akin axkan monovia noso monovio. Pero axkan moneki timochijchikauas tikixmatis ‘tlen kualtsin kipia iyolipan’ (xiktlajtolti 1 Pedro 3:4). Non kijtosneki okachi xikita ken mouika iuan Jehová, ken kipia iyelis uan tlen mokuayejyekoua. Ijkuak okachi tikixmatis, uelis tikinnankilijtias ninmej tlajtlanilmej: “¿Nechpaleuis tla yetos nonamik noso nosiua? ¿Kuali timouikaskej?” (Prov. 31:​26, 27, 30; Efes. 5:33; 1 Tim. 5:8). “¿Uelis timotlasojtlaskej uan timoajsikamatiskej? ¿Uelis iuan nichantis maski ualeua motlapololtis?” (Rom. 3:23). b Xikilnamikto akinmej kuali mouikaj amo kijtosneki kinpaktia kichiuaskej san se tlamantli. Kuali mouikaj porque  mochijchikauaj moyekuikaskej maski tlatlamantli mokuayejyekouaj.

⁶ ¿Tlen okse tlamantli moneki xikmati ijkuak yitikpias monovio noso monovia? Moneki achto ximotlapouikan tlen nankinekij nankichiuaskej uan amo xikchiuakan ijkuak okachi yinanmotlasojtlaj. Ximotlapouikan tlen tlamantli nankixnamikij, kox nanmokokouaj uan kox nankipiaj tomin. Noijki ximotlapouikan kox itlaj onamechpanok ijkuak onanmoskaltijkej. Pero amo moneki nanmotlapouiskej nochi non tlamantli ijkuak yikin nanmochiuaskej novios (noijki xikita Juan 16:12). Uelis tikiluis monovio noso monovia tla ayamo tikneki tiknankilis seki tlamantli. Pero xikilnamikto monovio noso monovia moneki kimatis seki tlamantli uan ijkon uelis kipejpenas tlen kichiuas. Ikinon ximotlapouikan tlen yotikijtojkej.

7. ¿Tlen kinpaleuis novios kuali mamoixmatikan? (Xikita recuadro “ Ijkuak novios chantij itech okseki altepemej” uan noijki xikinmita fotos).

⁷ ¿Tlen mitspaleuis kuali xikixmati monovio noso monovia? Ximotlapouikan nochi tlen moneki uan amo ximokajkayauakan. Ximotlajtlanikan nochi tlen moneki uan ximokakikan (Prov. 20:5; Sant. 1:19). Uelis nanmotlapouiskej tla san sekan nantlakuaskej, tla nanpaxialotiuij kanin miakej panouaj uan tla san sekan nantetlapouiskej. Noijki uelis nanmoixmatiskej tla nanmonechikoskej inuan namoyolikniuan uan namofamilia. Xikinyoleua sekimej tokniuan uan xikchiua seki tlamantli. Ijkon tikmatis tlen kichiua ijkuak itlaj panoua uan ken mouika inuan oksekimej. Ijkon okichi se tokni itoka Albert tlen chanti Países Bajos ijkuak ye uan Alicia okatkaj novios. Ye okijto: “Otikchiuayaj seki tlamantli tlen otechpaleuiaya okachi matimoixmatikan. San sekan otitlakualchiuayaj noso itlaj otikchiuayaj kalijtik. Non otechpaleui matikitakan tlen okachi kuali otikchiuayaj uan tlen amo kuali otikchiuayaj”.

8. ¿Ken kinpaleuis novios tla san sekan momachtiskej?

⁸ Noijki mitspaleuis kuali xikixmati monovia noso monovio tla iuan timomachtis Biblia. Porque tla nanmonamiktiskej monekis nanmomachtiskej Biblia ken familia uan ijkon nankikauiliskej toTajtsin Dios manamechyekana (Ecl. 4:12). Ikinon namechpaleuis tla desde axkan san sekan nanmomachtiskej. Uelis ijkon nankichiuaskej maski ayamo nankatej ken se familia uan maski tlakatl  ayamo kiyekana inovia. Pero tla san sekan nanmomachtiskej uelis nankitaskej ken nanmouikaj iuan Jehová. Max uan Laysa tlen chantij Estados Unidos okijtojkej ijkuak san sekan omomachtiayaj okinpaleui makichiuakan okse tlamantli. Max okijto: “Ijkuak otimochijkej novios san sekan otimomachtiayaj amatlajkuilolmej. Otiktlajtoltiayaj tlen moneki kichiuaskej novios, akinmej yomonamiktijkej uan tlen moneki kichiuaskej familias. Non otechpaleui matimotlapouikan seki tlamantli miak ipati tlen amo otikchiayaj timotlapouiskej”.

OKSEKI TLAMANTLI TLEN MONEKI NANKITASKEJ

9. ¿Tlen moneki kilnamiktoskej novios ijkuak kitaskej akinmej kinmiluiskej yejuan yomochijkej novios?

⁹ ¿Akinmej nankinmiluiskej yonanmochijkej novios? San namejuan nankijtoskej akinmej nankinmiluiskej. Xamo san sekimej nankinmiluiskej tla yikin onanmochijkej novios (Prov. 17:27). Non namechpaleuis amo miak tlamantli manamechtlajtlanikan nion namechiluijtoskej keman nanmonamiktiskej. Pero tla amikaj nankiluiskej xamo nanmotlatijtinemiskej porque nanmomojtiskej makimatikan oksekimej yonanmochijkej novios. Tla ijkon nankichiuaskej xamo nankichiuaskej itlaj amo kuali. Ikinon moneki xikinmiluikan akinmej uelis namechpaleuiskej uan namechiluiskej tlen uelis nankichiuaskej. Uelis nankinmiluiskej namofamiliares, namoyolikniuan noso tlayekankej (Prov. 15:22).

10. ¿Tlen kinpaleuis novios amo matlajtlakolchiuakan? (Proverbios 22:3).

¹⁰ ¿Tlen namechpaleuis amo xitlajtlakolchiuakan? Okachi nankinekiskej san sekan nanyetoskej ijkuak okachi nanmoixmatiskej. Pero amo nankinekij itlaj nankichiuaskej tlen kiyolkokos Jehová (1 Cor. 6:18). Ikinon amo ximotlapouikan tlen pitsotik, amo xiyetokan namoselti nion xitlakonikan miak (Efes. 5:3). Tla nankichiuaskej non tlamantli xamo nankinekiskej san sekan nanmotekaskej uan nantlajtlakolchiuaskej. Ikinon nochipa ximotlapouikan tlen uelis nankichiuaskej para nanmoyekanaskej ika itlanauatiluan Jehová ijkuak yonanmochijkej novios (xiktlajtolti Proverbios 22:3). Matikitakan tlen okichijkej Dawit uan Almaz tlen chantij Etiopía. Yejuan okijtojkej: “Otikatkaj inuan toyolikniuan noso otiayaj kanin miakej panouaj. Amo keman otimokauayaj toselti itech se carro nion itech se kali. Non otechpaleui amo matitlajtlakolchiuakan”.

11. ¿Tlen moneki kilnamiktoskej novios ijkuak kiteititiskej motlasojtlaj?

¹¹ ¿Ken moneki nankiteititiskej nanmotlasojtlaj? Xamo okachi nankinekiskej nankiteititiskej nanmotlasojtlaj ijkuak okachi nanmoixmatiskej (Cant. 1:2; 2:6). Pero ayakmo nankitaskej ken namoyelis tla okachi nankinekiskej san sekan nanmotekaskej. San nankinekiskej nankichiuaskej tlen nankimachiliaj uan ayakmo nankitaskej tlen okachi ipati nankipiaj. Nantlajtlakolchiuaskej tla amo nanmomaluiskej ijkuak nankiteititiskej nanmotlasojtlaj (Prov. 6:27). Ikinon ijkuak nanmochiuaskej novios san niman ximotlapouikan tlen uelis nankichiuaskej para nanmoyekanaskej ika principios bíblicos (1 Tes. 4:​3-7). c Ximotlajtlanikan: “¿Tlen mokuayejyekouaj ik kanin tichantij ijkuak tikteititiaj timotlasojtlaj? ¿Tiknekij tikchiuaskej itlaj tlen amo kuali ijkuak tikteititiaj timotlasojtlaj?”.

12. ¿Tlen moneki makilnamiktokan novios ijkuak tlatlamantli mokuayejyekouaj?

 ¹² ¿Tlen nankichiuaskej ijkuak tlatlamantli nanmokuayejyekouaj? ¿Kijtosneki amo nanmoyekuikaskej tla tlatlamantli nanmokuayejyekouaj? Amo. Porque nochtin akinmej yomochijkej novios amo mokuayejyekouaj san se tlamantli kichiuaskej. Okachi kuali mouikaj akinmej yomonamiktijkej ijkuak mopaleuiaj maski tlatlamantli mokuayejyekouaj. Uelis nankitaskej ken nankiyektlaliaj seki tlamantli uan non namechpaleuis ken nanmouikaskej ijkuak nanmonamiktiskej. Ximotlajtlanikan: “¿Tikteititiaj timotlakaitaj ijkuak timotlapouiaj uan amo san niman tikualanij? ¿Tikijtouaj ijkuak timotlapololtiaj uan timochijchikauaj ayakmo ijkon tikchiuaskej? ¿Tikseliaj ijkuak oksekimej kijtouaj itlaj kichiuaskej uan titetlapojpoluiaj?” (Efes. 4:​31, 32). Pero tla nochipa amo nanmoajsikamatij uan nanmokualaniaj, amo ximokuayejyekokan nanmoyekuikaskej ijkuak nanmonamiktiskej. Okachi kuali ayakmo xiyetokan novios tla nankitaj amo kuali nanmouikaj. d

13. ¿Tlen kinpaleuis novios makitakan kox uejkauaskej yetoskej novios?

¹³ ¿Moneki nanuejkauaskej nanyetoskej novios? Tla san tikpejpentikisaj itlaj tikchiuaskej amo kuali kisas (Prov. 21:5). Ikinon miak ipati kuali ximoixmatikan. Pero non amo kijtosneki xiuejkauakan. Porque Biblia kijtoua: “Moyolkokoua akin kichixtok itlaj tlen amo mochiua” (Prov. 13:12). Noijki ijkuak se telpochtli uan se ichpochtli uejkauaj katej novios xamo uelis tlajtlakolchiuaskej (1 Cor. 7:9). Amo san xikitakan kox yiuejkika nankatej novios. Ikinon sejse ximotlajtlanikan: “¿Tlen okachi moneki nikmatis para nikpejpenas kox nimonamiktis iuan nonovia noso nonovio?”.

¿KEN UELIS TIKINPALEUISKEJ NOVIOS?

14. ¿Ken uelis tikinpaleuiskej novios? (Noijki xikita foto).

¹⁴ ¿Ken uelis tikinpaleuiskej novios? Uelis tikinyoleuaskej touan matlakuakan, mamomachtikan Biblia iuan tofamilia noso inuan matipaxialotij (Rom. 12:13). Non kinpaleuis kuali mamoixmatikan. Tla kinekij matikinpaleuikan, uelis tikinmiluiskej inuan tiaskej kanin kinekij yaskej noso uelis tikinuikaskej. Noijki uelis tikinmiluiskej mayakan tokalijtik para uelis motlapouiskej uan ijkon amo inselti  yetoskej (Gál. 6:10). Alicia tlen otimotlapouijkej itech párrafo 7 okijto: “Albert uan ne sapanoua otikintlasojkamatiliayaj tokniuan tlen otechpaleuijkej. Yejuan otechiluiayaj matikintlajpalotij ijkuak tiknekiskiaj timotlapouiskej uan ijkon amo toselti tiyetoskiaj”. ¿Tlen uelis tikchiuaskej tla novios techiluiaj inuan matiakan kanin yejuan kinekij yaskej? Uelis tikinpaleuiskej tla inuan tiaskej. Pero miak ipati matikitakan keman moneki tikinkauaskej inselti mamotlapouikan pero amo sepa matikinkauakan inselti (Filip. 2:4).

15. ¿Tlen okseki tlamantli uelis tikchiuaskej para tikinpaleuiskej novios? (Proverbios 12:18).

¹⁵ Noijki tla tiknekij tikinpaleuiskej novios moneki kuali matimokuayejyekokan tlen tikinmiluiskej. Ualeua amo moneki itlaj matikijtokan (xiktlajtolti Proverbios 12:18). Ijkuak sekimej mochiuaj novios xamo san niman tiknekij tikinmiluiskej oksekimej. Pero xamo yejuan kijtoskej kinmiluiskej oksekimej. Amo matikijtojtinemikan tlen kichiuaj nion matikinteneuakan (Prov. 20:19; Rom. 14:10; 1 Tes. 4:11). Noijki amitlaj matikijtokan nion matikintlajtlanikan kox melauak monamiktiskej. Se tokni itoka Elise uan inamik okijtojkej: “Miakej otechtlajtlaniayaj keman timonamiktiskiaj. Amo kuali otimomachiliayaj porque ayamo otimotlapouiayaj keman ijkon tikchiuaskiaj”.

16. ¿Tlen moneki tikchiuaskej tla tokniuan ayakmo katej novios?

¹⁶ ¿Tlen moneki tikchiuaskej tla tokniuan kijtouaj ayakmo yetoskej novios? Amo matitlajtlantinemikan tleka ayakmo katej novios nion matikijtojtinemikan akin itlajtlakol (1 Ped. 4:15). Se tokni itoka Lea okijto: “Onikmatki sekimej otlajtlaniayaj tleka ayakmo onikpiaya novio uan non sapanoua onechyolkoko”. Ijkon ken yotikitakej akinmej ayakmo katej novios amo kijtosneki okichijkej itlaj amo kuali. Xamo ijkuak okatkaj novios okinpaleui makipejpenakan tlen kichiuaskej. Pero yejuan moyolkokouaj uan inselti momachiliaj. Ikinon matikinpaleuikan akinmej ijkon kinpanoua (Prov. 17:17).

17. ¿Tlen moneki okachi kichiuaskej akinmej katej novios?

¹⁷ Axkan yotikitakej novios kixnamikij seki tlamantli pero noijki yolpakij porque okachi moixmatij. Jessica okijto: “Omonekiaya timochijchikauaskej miak ijkuak otikatkaj novios. Non otechpaleui porque axkan tiyolpakij”. Akinmej kipiaj innovio noso innovia moneki mochijchikauaskej kuali moixmatiskej. Non kinpaleuis kuali makipejpenakan kox monamiktiskej.