1. ¿Tleka moneki ma techyolchikauakan?

TINOCHTIN sapanoa titlajyouiaj, tisotlauaj uan timoyolkokoaj, ik non, moneki ma techyolchikauakan. Xamo titlajyouiaj porque timokokoaj, yitikpiaj miak xiuitl noso omikik se tokalchanejka. Noijki xamo oksekimej techtlajyouiltiaj uan ayakmo ikaj tetlasojtla. Biblia kijtoa axkan tikatej “iksemi tonatijmeh”, ik non, onka “miak tlaijyowílistli”. Pero nin kiteititia ayakmo miak poliui tiyetoskej itech xochitlali (2 Tim. 3:1). Xamo yimiak xiuitl tikchixtokej ma mochiua nochi tlen Jehová yokijto pero axkan ok titlajyouiaj. Ik non, ¿akin uelis techyolchikauas?

2. ¿Tlen tikmatij itech Habacuc?

² Ma tikitakan tlen kijtoa amochtli tlen okijkuilo Habacuc uan ijkon tikmatiskej akin uelis techyolchikauas. Biblia amo okachi techtlapouia itech Habacuc pero itoka  xamo kijtosneki “Yolik tenapaloa noso technauateki”. Nin kijtosneki Jehová techyolchikaua ken yetoskia technapalojtok noso technauatektok. Noijki xamo kijtosneki ijkuak tejuan sapanoa itech titlaneltokaj. Sapanoa techyolchikaua nin amochtli tlen okijkuilo Habacuc (Hab. 2:2).

3. ¿Tleka timomachtiskej amochtli tlen okijkuilo Habacuc?

³ Biblia san techtlapouia Habacuc okilui Jehová nochi tlen okitekipachoaya. Nochi tlen kijtoa nin amochtli, omoijkuilo “para matimoixtlamachtikah, para matikchiakah ika yolsewílistli tlan Ye yokijto techmakas” (Rom. 15:4). ¿Ken techpaleuia amochtli tlen okijkuilo Habacuc? Techpaleuia ma tikajsikamatikan tlen kijtosneki ma titlaneltokakan itech Jehová. Noijki tlen okijkuilo Habacuc techpaleuia ma tikpiakan yolseuilistli maski tikixnamikiskej ouijkayotl.

4. ¿Tleka Habacuc omoyolkokoaya?

⁴ (Xiktlajtolti Habacuc 1:2, 3). Habacuc sapanoa otlajyoui. Omoyolkokoaya porque israelitas sapanoa omoteuiayaj uan amo okipiayaj kuali inyelis. Habacuc omotlajtlani: “¿Keman tlamis nochi tlen amo kuali? ¿Tleka Jehová amitlaj kichiua?”. Habacuc amo uelis kachiuaskia tlen amo kuali. Ik non, okilui Jehová itlaj ma kichiua. Xamo omokuayejyeko Jehová amo okitekipachoaya tlen okipanotoka uan amitlaj kichiuaskia. ¿Tejuan noijki ijkon timomachiliaj?

5. ¿Tlen techmachtia amochtli tlen okijkuilo Habacuc? (Xikita foto kanin peua tlamachtil).

⁵ ¿Ayakmo otlaneltokaya Habacuc itech Jehová? Amo. Habacuc okilui Jehová ma kipaleui uan nin okiteititi itech otlaneltokaya. Ye sapanoa omotekipachoaya uan amo okimatiaya tlen kichiuas. Amo okajsikamatiaya tleka Jehová amitlaj okichiuaya uan tleka okitekauiliaya ma tlajyoui. Jehová okipaleui Habacuc ma kijkuilo nochi tlen okipanok uan nin techmachtia itlaj miak ipati. Nochipa ma tikiluikan Jehová nochi tlen techtekipachoa (Sal. 50:15; 62:8). Ik non, Proverbios 3:5 techiluia: “Xitlaneltoka itech Jehová ika nochi moyolo uan amo xikchiua san tlen timokuayejyekoa”. Xamo Habacuc okimatiaya nin texto uan sapanoa okipatioitaya.

6. ¿Tleka miak ipati ma tikiluikan Jehová nochi tlen techtekipachoa?

⁶ Habacuc otlaneltokaya itech Jehová uan okitaya ken iTajtsin uan iyolikni, ik non, okitlatlaujti ma kipaleui. Okilui ken omomachiliaya uan tlen okitekipachoaya uan amo okichi tlen ye omokuayejyekoaya. Nin techmachtia tejuan noijki ijkon ma tikchiuakan. Jehová kineki ma tikiluikan tlen techtekipachoa uan ijkon tikteititiaj itech titlaneltokaj (Sal. 65:2). Jehová techpaleuis tla tikiluiskej tlen techtekipachoa uan yetos ken yolik technapaloa noso technauateki. Noijki ye kuali techyekanas (Sal. 73:23, 24). Nin techpaleuis ma timokuayejyekokan ken ye maski titlajyouiskej. Tikteititiaj titlaneltokaj itech Jehová ijkuak tikiluiaj tlen techpanoa.

7. ¿Tlen okichi Jehová ijkuak Habacuc okilui tlen okitekipachoaya?

⁷ (Xiktlajtolti Habacuc 1:5-7). Habacuc okilui Jehová tlen okitekipachoaya. Pero xamo noijki omotlajtlani tlen kichiuaskia Jehová. Ijkon ken se teta tetlasojtla, Jehová okajsikamatki ken omomachiliaya Habacuc. Jehová okajsikamatki Habacuc otlajyouijtoka uan omonekiaya ma kipaleui. Amo okajuak uan okilui tlen kinchiuiliskia judíos tlen okichijtokaj tlen amo kuali. Nesi ye Habacuc okiluijkej kintlajyouiltiskiaj akinmej okichijtokaj tlen amo kuali.

8. ¿Tlen amo okichiaya Habacuc ma kinankili Jehová?

⁸ Jehová okititi Habacuc itlaj kichiuaskia. Kintekitiltiskia akinmej ochantiayaj Babilonia para kintlajyouiltiskia nochtin israelitas tlen okichiuayaj tlen amo kuali. Jehová okijto kintlajyouiltiskia israelitas ijkuak Habacuc ok yetoskia. Habacuc amo okichiaya ijkon ma kinankili Jehová. Akinmej ochantiayaj Babilonia okachi otetlajyouiltiayaj amo ken israelitas tlen okijtoayaj okiueyichiuayaj toTajtsin Dios. Pero ¿tleka Jehová kintekitiltiskia akinmej ochantiayaj Babilonia tla yejuan amo okitekichiuiliayaj? San okachi tlajyouiskiaj israelitas. ¿Ken timomachiliskiaj tla ompa tiyetoskiaj?

9. ¿Tlen okseki tlamantli okitlajtlani Habacuc toTajtsin Dios?

⁹ (Xiktlajtolti Habacuc 1:12-14, 17). Habacuc amo nochi kuali okajsikamatiaya. Maski yokimatiaya Jehová kintekitiltiskia akinmej ochantiayaj Babilonia para kintlajyouiltiskia akinmej okichiuayaj tlen amo kuali. Pero ye okatka yolyamanki uan otlaneltokaya itech Jehová uan itech omopaleuiaya “ken se Tepexitl” (Deut. 32:4; Is. 26:4). Okineltokaya Jehová tetlasojtla uan teajsikamati. Ik non, okachi miak tlamantli okitlajtlani: “¿Tleka okitekauiliaya ma tlajyouikan akinmej okichiuayaj tlen kuali? ¿Tleka amo san niman itlaj okichi? ¿Tleka okitekauiliaya ma tlajyouikan tla ye kipia miak chikaualistli?”. Pero toTajtsin Dios santo uan ‘ixtololouan sapanoa chipauakej, ik non, amo kita tlen amo kuali’.

10. ¿Tleka ualeua timomachiliaj ken Habacuc?

¹⁰ Xamo ualeua timomachiliaj ken Habacuc. Pero Jehová techkaki uan tejuan itech titlaneltokaj. Ik non, tiktlajtoltiaj Biblia uan timomachtiaj uan nin techpaleuia ma tikchiakan tlen ye okijto techmakas. Noijki ialtepe techmachtia tlen toTajtsin Dios okijto kichiuas. Pero xamo timotlajtlaniaj: “¿Kox ok titlajyouiskej?”. Axkan timomachtiskej tlen okichi Habacuc.

11. ¿Tlen okichi Habacuc?

¹¹ (Xiktlajtolti Habacuc 2:1). Habacuc omoyolseui ijkuak omotlapoui iuan Jehová. Ik non, okichixki Jehová itlaj ma kichiua. Habacuc okiteititi otlaneltokaya itech Jehová ijkuak okijto: “Nimochixtok ma peua tlajyouilistli” (Hab. 3:16). Oksekimej tlen noijki okitekichiuilijkej Jehová okichixkej itlaj ma kichiua uan itech otlaneltokakej. Nin techyolchikaua noijki ma  tikchiakan itlaj ma kichiua Jehová (Miq. 7:7; Sant. 5:7, 8).

12. ¿Tlen techmachtia tlen okichi Habacuc?

¹² ¿Tlen techmachtia tlen okichi Habacuc? Techmachtia eyi tlamantli. Se tlamantli, nochipa ma tikiluikan Jehová tlen techtekipachoa. Ome tlamantli, nochipa ma tikchiuakan tlen kijtoa Biblia uan ma tikchiuakan tlen techiluia ialtepe. Eyi tlamantli, ma tikchiakan Jehová itlaj ma kichiua uan techyolseuis ijkuak tikixnamikiskej ouijkayotl. Tla tikchiuaskej ken Habacuc, tikpiaskej yolseuilistli uan nin techpaleuis ma tikixnamikikan ouijkayotl. Noijki tlen Jehová yotechilui kichiuas, techpaleuia itech ma titlaneltokakan uan ma tiyolpakikan (Rom. 12:12).

13. ¿Ken okiyolchika Jehová Habacuc?

¹³ (Xiktlajtolti Habacuc 2:3). Xamo Jehová oyolpakik porque Habacuc okichixki ye itlaj ma kichiua. Jehová okimatiaya tlen ouijkayotl okixnamiktoka Habacuc. Ik non, okiyolseui ika tlasojtlalistli uan okilui kinankiliskia nochi tlen okitlajtlani. Jehová san niman kachiuaskia tlen okitlajyouiltijtoka Habacuc. Jehová okilui: “Amo ximosotlaua uan techneltokili tlen onimitsilui. Maski mota niuejkauas, ne itlaj nikchiuas”. Jehová okilui yokimatiaya tlen kichiuaskia uan okilui ma mochia. Ijkon ayakmo moyolkokoskia.

14. ¿Tlen moneki tikchiuaskej ijkuak tikixnamikiskej ouijkayotl?

¹⁴ Tejuan noijki ma tikchiakan Jehová itlaj ma kichiua uan ma tikkakikan tlen techiluia. Tla ijkon tikchiuaskej tikpiaskej yolseuilistli uan titlaneltokaskej itech Jehová maski tikixnamikiskej ouijkayotl. Jesús okijto amo ‘toteki tlan tonati noso kemania Totajtsi Dios kichiwas iteki’ (Hech. 1:7). Ma tikneltokakan san ye Jehová kimati keman itlaj kichiuas. Ik non, ma tiyetokan tiyolyamankej, ma titlaneltokakan itech Jehová uan amo ma timosotlauakan. Pero moneki ma tiktekichiuilikan Jehová uan amo san ma timochixtokan (Mar. 13:35-37; Gál. 6:9).

15, 16. (1) ¿Tlen okijto kichiuas Jehová itech amochtli tlen okijkuilo Habacuc? (2) ¿Tlen techmachtia tlen okijto kichiuas Jehová?

¹⁵ ToTajtsin Dios yokijto akin yolmelajki yoltos uan “nochtin kimatiskej Jehová ueyititok” (Hab. 2:4, 14). Jehová kinmakas yolilistli tlen amo keman tlamis akinmej mochiaj uan akinmej itech tlaneltokaj.

¹⁶ Ximokuayejyeko tlen okijto Jehová itech Habacuc 2:4. Nin kipia miak ipati porque noijki tlatitlanil Pablo okijto eyi uelta (Rom. 1:17; Gál. 3:11; Heb. 10:38). Tikitaskej nochi tlen Jehová kichiuas tla itech titlaneltokaj maski san tlen tlamantli tikixnamikiskej. Jehová kineki ma timokuayejyekokan itech tlen satepan kichiuas.

17. ¿Tlen tlateochiualistli kiseliskej akinmej tlaneltokaj itech Jehová?

¹⁷ Tlen okijkuilo Habacuc axkan techmachtia miak tlamantli porque tikatej itlamian tonalmej. Jehová kijtoa akinmej yolmelauakej nochipa yoltoskej tla  itech tlaneltokaj. Ik non, okachi ma titlaneltokakan itech toTajtsin Dios maski techtekipachoa miak tlamantli. Jehová okilui Habacuc nochipa kipaleuiskia uan tejuan noijki techpaleuis. Ye techiluia ika tlasojtlalistli itech ma titlaneltokakan uan amo ma timosotlauakan porque ye yokijto keman ualtlanauatis iTekiuajkayo. Ijkuak ijkon kichiuas nochtin yolpakiskej, kipiaskej yolseuilistli uan san Jehová kiueyichiuaskej (Mat. 5:5; Heb. 10:36-39).

18. ¿Ken okipaleui Habacuc tlen okilui Jehová?

¹⁸ (Xiktlajtolti Habacuc 3:16-19). Sapanoa okipaleui tlen Jehová okilui Habacuc. Ye omokuayejyekoaya ken okinpaleui israelitas ijkuak otlajyouijtokaj. Ik non, okachi otlaneltokak itech Jehová uan okimatiaya itlaj kichiuaskia. Noijki omoyolseui maski okimatiaya ok tlajyouiskia. Habacuc otlaneltokak itech Jehová uan okimatiaya kipaleuiskia. Sekimej ixtlamatkej mokuayejyekoaj versículo 18 kijtosneki Habacuc mijtotiskia uan yolpakiskia ipatka toTajtsin Dios. Nin tlamantli techmachtia itlaj miak ipati. Jehová amo san techiluia tlen kichiuas. Axkan ye nochi yikiyektlalijtok uan ijkon kichiuas nochi tlen yokijto.

19. ¿Tlen moneki tikchiuaskej tla tiknekij ma techyolseui Jehová?

¹⁹ Tlen okijkuilo Habacuc techititia moneki titlaneltokaskej itech Jehová (Hab. 2:4). Moneki tikpiaskej chikauak totlaneltokilis tla tiknekij iuan timouikaskej. Pero moneki tikchiuaskej eyi tlamantli. Se tlamantli, nochipa ma tikiluikan Jehová tlen techtekipachoa. Ome tlamantli, nochipa ma tikchiuakan tlen kijtoa Biblia uan ma tikchiuakan tlen techiluia ialtepe Jehová. Eyi tlamantli, ma tikchiakan Jehová itlaj ma kichiua. Habacuc ijkon okichi. Maski ijkuak opejki kijkuiloa amochtli omoyolkokoaya, ijkuak otlanki oyolpakiaya uan otlaneltokaya itech toTajtsin Dios. Ma tikchiuakan ken ye uan ijkon tikmachiliskej yolik technapalojtok Jehová noso technauatektok ken se teta tetlasojtla. Jehová sapanoa techtlasojtla uan techyolchikaua maski titlajyouiaj.