1, 2. Ijkon ken kijtoa 1 Pedro 4:7, 8, ¿tlen techpaleuis ma tikixnamikikan ouijkayotl?

XAMO okachi titlajyouiskej itlamian “iksemi tonatijmeh” (2 Tim. 3:1). Ma tikitakan tlen opanok itech se altepetl tlen kajki ompa África ijkuak okipejpenkej se tekiua. Kanaj chikuase metstli tokniuan otlajyouijkej porque omoteuiayaj tlen ik ompa ochantiayaj. ¿Tlen okinpaleui tokniuan ma tlaxikokan? Sekimej omokalotitoj inkalijtik tokniuan kanin amo okachi itlaj opanoaya. Se tokni okijto: “Ijkuak ijkon otechpanok, oniyolpakik porque nikinpia noyolikniuan. San sekan otimoyolchikauayaj”.

² Ijkuak peuas “weyi tlaijyowílistli”, tiyolpakiskej tla timouikaj iuan tokniuan tlen techtlasojtlaj (Apoc. 7:14). Ik non, axkan moneki kuali ma timouikakan iuan tokniuan (xiktlajtolti 1 Pedro 4:7, 8). Jeremías okixnamik ouijkayotl uan tlen okipanok techmachtia miak tlamantli. Okipaleuijkej iyolikniuan ijkuak opejki kixixiniaj Jerusalén. * ¿Ken uelis tikchiuaskej ken Jeremías?

3. (1) ¿Tleka Jeremías iselti uelis yetoskia? (2) ¿Ken omouikaya Jeremías iuan Baruc uan tlen opanok?

³ Jeremías ochantik kanaj cuarenta xiuitl ik kanin  ochantiayaj akinmej amo okitekichiuiliayaj toTajtsin Dios. Xamo ompa ochantiayaj sekimej ifamiliares tlen oualayaj Anatot (Jer. 11:21; 12:6). Pero amo okatka iselti. Ye omouikaya iuan Baruc tlen okatka isecretario uan okiluiaya nochi tlen okipanoaya. Nochi tlen okichijkej omoijkuilo, ik non, tikmatij nochi tlen opanok (Jer. 8:21; 9:1; 20:14-18; 45:1). Xamo opejki motlasojtlaj uan omotlakaitayaj ijkuak Baruc opejki kijkuiloa tlen okipanok Jeremías (Jer. 20:1, 2; 26:7-11).

4. ¿Tlen okinauatijkej ma kichiua Jeremías uan ken okipaleui ma mouika iuan Baruc?

⁴ Jeremías miak xiuitl okinmilui israelitas tlen kipanoskia Jerusalén (Jer. 25:3). Saiktlami oksepa okinmilui israelitas ma moyolkopakan. Noijki Jehová okilui Jeremías ma kijkuilo itech se rollo nochi tlen okinauati (Jer. 36:1-4). Jeremías uan Baruc miak metstli san sekan okichijkej tlen okinnauati toTajtsin Dios. Noijki omotlapouiayaj tlen kinpaleuiskia ma kipiakan chikauak intlaneltokilis.

5. ¿Ken tikmatij Baruc kuali omouikaya iuan Jeremías?

⁵ Ijkuak kitematiltiskiaj tlen okijtoaya rollo, Jeremías okinauati Baruc ye ma kitematilti (Jer. 36:5, 6). Baruc okatka yolchikauak uan okichi tlen okinauati Jeremías maski uelis itlaj kipanoskia. ¿Timokuayejyekoaj ken omomachili Jeremías ijkuak Baruc oyajki kanin okatka teokali uan okintlajtoltili israelitas tlen okijtoaya rollo? (Jer. 36:8-10). Príncipes tlen ochantiayaj Judá okimatkej tlen okichi Baruc, ik non, okiluijkej ma kintlajtoltili rollo (Jer. 36:14, 15). Príncipes okiluijkej tekiua Jehoiaquim tlen okijto Jeremías.  Okiknomatkej Baruc uan okiluijkej: “Xio, ximotlatiti te uan Jeremías uan amikaj ma kimati kanin nankatej” (Jer. 36:16-19).

6. ¿Tlen okichi Jeremías uan Baruc ijkuak okinekiayaj kinkitskiskej?

⁶ Tekiua Jehoiaquim sapanoa okualanki ijkuak okimatki tlen okijkuilo Jeremías. Ik non, okitlati rollo uan otlanauati ma kikitskitij Jeremías uan Baruc. Pero Jeremías amo omomojti. Jeremías okimakak okse rollo Baruc uan okiluijtia tlen Jehová okinekiaya ma kijkuilo. Baruc okijkuilo “nochi tlen okijtoaya rollo tlen okitlati Jehoiaquim akin otlanauatiaya ompa Judá” (Jer. 36:26-28, 32).

7. ¿Tlen okipanok Jeremías uan Baruc ijkuak okitekichiuilijkej Jehová?

⁷ Ijkuak tikixnamikij ouijkayotl iuan se toyolikni, okachi kuali timouikaj. Ik non, xamo Jeremías uan Baruc okachi omouikakej ijkuak oksepa okijkuilojkej rollo tlen tekiua Jehoiaquim okitlati. ¿Tlen techmachtia tlen okichi Jeremías uan Baruc?

8. ¿Tleka ualeua ayakmo tiknekij ikaj iuan timouikaskej uan tleka amo ma timosotlauakan?

⁸ Xamo ikaj otechyolkoko uan ayakmo tiknekij ikaj iuan timouikaskej (Prov. 18:19, 24). Xamo timokuayejyekoaj ayakmo timajxiliaj timouikaskej iuan oksekimej. Pero amo ma timosotlauakan. Tla tiknekij ma techpaleuikan tokniuan ijkuak tikpiaskej ouijkayotl, axkan moneki tikinmiluiskej tlen timokuayejyekoaj uan tlen tikmachiliaj. Non techpaleuis ma timouikakan iuan oksekimej (1 Ped. 1:22).

9. (1) ¿Ken okiteititi Jesús omouikaya iuan oksekimej? (2) Xikijto ken techpaleuis tla timotlapouiaj iuan oksekimej.

⁹ Jesús omotlapouiaya iuan iyolikniuan uan ijkon okiteititi okinneltokiliaya tlen okiluiayaj (Juan 15:15). Tikchiuaskej ken ye tla tikintlapouiaj tokniuan tleka tiyolpakij, tlen techtekipachoa uan tleka timoyolkokoaj. Noijki kuali ma titlakakikan ijkuak ikaj techtlapouia porque ijkon tikitaskej mokuayejyekoa ken tejuan uan noijki kineki kichiuas seki tlamantli tlen tejuan tiknekij tikchiuaskej. Ma tikitakan tlen okipanok Cindy. Nin tokni kipia 29 xiuitl. Opejki mouika iuan se precursora tlen kipia 67 xiuitl uan itoka Marie-Louise. Nochi jueves kualkan  yauij tetlapouitiuij uan motlapouiaj miak tlamantli. Cindy okijto: “Nechpaktia nimotlapouis iuan noyolikniuan porque ijkon nikinmixmati uan noijki nikinmajsikamati”. Okachi kuali timouikaskej iuan oksekimej tla inmiuan timotlapouiaj. Ma tikchiuakan ken Cindy uan ma timotlapouikan iuan oksekimej (Prov. 27:9).

10. Ijkon ken kijtoa Hebreos 10:24, ¿tlen panos tla titetlapouiaj iuan tokniuan?

¹⁰ Jeremías omouikaya iuan Baruc. Tejuan noijki timouikaskej iuan tokniuan tla inmiuan titetlapouiaj. Noijki tikinmixmatiskej uan techititiskej tlen yejuan kimatij uan non techpaleuis inmiuan ma timouikakan (xiktlajtolti Hebreos 10:24). Okachi peua tiktlasojtlaj se tokni ijkuak iuan titetlapouiaj uan tikitaj amo momojtia ijkuak kitematiltia ika nochi iyolo tlen kichiuas Jehová.

11. Xikijto tlen panos tla titetlapouiaj iuan tokniuan.

¹¹ Ma tikitakan tlen okinpanok ome tokniuan ijkuak san sekan tetlapouiaj. Adeline kipia 23 xiuitl. Ye okilui iyolikni itoka Candice kox yaskia iuan tetlapouiti kanin amo nochipa tetlapouiaj. Adeline okijto: “Otiknekiayaj okachi titetlapouiskej uan otiknekiayaj okachi tiyolpakiskej ijkuak titetlapouiaj. Otiknekiayaj timoyolchikauaskej uan ijkon okachi tiktekichiuiliskej Jehová”. ¿Okinpaleui san sekan otetlapouitoj? Adeline okijto: “Ijkuak otlamiaya otitetlapouiayaj, nochipa otimotlapouiayaj ken otimomachiliayaj, ken otimoyolchikauayaj ijkuak otimotlapouiayaj iuan oksekimej uan ken techyekana Jehová. Otechpaktiaya timotlapouiskej uan ijkon okachi otimoixmatkej”.

12. Xikijto okseki tlamantli tlen panos tla titetlapouiaj iuan tokniuan.

¹² Laïla uan Marianne ayamo monamiktiaj uan yejuan chantij Francia uan oyajkej  otetlapouitoj kanaj makuili semana ompa Bangui tlen poui República Centroafricana. Laïla kilnamiki: “Marianne uan ne otikpixkej ouijkayotl. Pero otikyektlalijkej porque kuali otimotlapouijkej. Okachi opejki iuan nimouika porque ye onechajsikamatiaya, nochtin kintlasojtla uan yolpaki kitekichiuilis Jehová”. Amo moneki tiaskej okse altepetl tla tiknekij kuali timouikaskej iuan tokniuan. Okachi tikinmixmatij tokniuan uan kuali inmiuan timouikaj ijkuak inmiuan titetlapouiaj.

13. ¿Tlen tikitaj ijkuak titetlapouiaj iuan tokniuan?

¹³ Ijkuak titetlapouiaj iuan tokniuan, tikitaj kualtsin inyelis pero noijki tikitaj tlen amo kuali kichiuaj. ¿Tlen techpaleuis amo ijkon ma tikchiuakan? Ma tikitakan oksepa tlen okichi Jeremías. ¿Tlen okipaleui okitak tlen kuali okichiuayaj iyolikniuan uan okintlapojpolui?

14. ¿Tlen okimatki Jeremías okichi Jehová uan ken okipaleui?

¹⁴ Jeremías okijkuilo amochtli tlen kipia itoka uan xamo noijki okijkuilo 1 uan 2 Reyes. Non okipaleui ma kita Jehová techiknomati maski titlajtlakolejkej. Okimatki ijkuak Acab omoyolkopki uan Jehová okilui amo kitaskia ken mikiskiaj nochtin akinmej inmiuan ochantiaya (1 Rey. 21:27-29). Noijki okimatki ijkuak Manasés okachi okikualani Jehová pero okitlapojpolui ijkuak omoyolkopki (2 Rey. 21:16, 17; 2 Crón. 33:10-13). Nochi non okipaleui Jeremías ma kimati mochias uan ma kinmiknomati iyolikniuan ijkon ken kichiua toTajtsin Dios (Sal. 103:8, 9).

15. ¿Ken okichi Jeremías ijkon ken Jehová ijkuak Baruc opejki kitemoa okseki tlamantli?

¹⁵ Ma tikitakan tlen okichi Jeremías ijkuak Baruc opejki kitemoa okseki tlamantli. Jeremías amo okika ma kichiua tlen kineki uan okilui tlen Jehová okinekiaya ma kimati (Jer. 45:1-5). ¿Tlen techmachtia tlen okichi?

16. Ijkon ken kijtoa 1 Corintios 13:5, ¿tlen techpaleuis kuali ma timouikakan iuan tokniuan?

¹⁶ Ma tikilnamiktokan ualeua tokniuan motlapololtiaj. Ik non, ma timochijchikauakan kuali ma timouikakan. Tla se toyolikni kichiua itlaj amo kuali, iuan ma timotlapouikan uan ma tikiluikan tlen kijtoa Biblia (Sal. 141:5). Noijki ma tiktlapojpoluikan tla techyolkokoa. Ayakmo ma timotlapouikan tlen amo kuali opanok tla yotimotlapojpoluijkej (xiktlajtolti 1 Corintios 13:5). Moneki axkan kuali ma timouikakan iuan tokniuan uan amo san ma tikitakan tlen amo kuali kichiuaj. Non techpaleuis kuali ma timouikakan. Moneki ijkon ma tikchiuakan porque yejuan techpaleuiskej ijkuak panos ueyi tlajyouilistli.

17. ¿Ken tikmatij Jeremías okinpaleui iyolikniuan ijkuak okixnamikej ouijkayotl?

¹⁷ Jeremías okinpaleui iyolikniuan ijkuak okixnamikej ouijkayotl. Ma tikitakan ken okipaleui Ébed-Mélec. Nin tlakatl okipaleuiaya se tekiua. Ébed-Mélec okipaleui Jeremías ijkuak okikalakijkej ijtik se koyoktli. Ébed-Mélec omomojti ijkuak okikixtijkej Jeremías porque ye omokuayejyeko  itlaj kichiuiliskiaj príncipes. Jeremías okimatki ken omomachiliaya uan okipaleui. Jeremías otsaktoka pero okiyolchika uan okimatilti tlen kichiuaskia Jehová (Jer. 38:7-13; 39:15-18).

18. Ijkon ken kijtoa Proverbios 17:17, ¿ken uelis tikinpaleuiskej tokniuan ijkuak tlajyouiaj?

¹⁸ Axkan miakej tokniuan noijki kixnamikij ouijkayotl. Sekimej tlajyouiaj ijkuak tlaxixini, tlalolini noso onka se guerra. Tla ijkon panoa kanin tichantij, ma tikinkalotikan tokniuan. Oksekimej uelis kitemakaskej tomin. Pero tinochtin uelis tikiluiskej Jehová ma kinpaleui tokniuan. Tla se tokni moyolkokoa xamo amo tikmatij tlen tikiluiskej. Pero tinochtin uelis tikpaleuiskej. Uelis iuan timotlapouiskej, ma tikkakikan ijkuak itlaj techtlapouia uan ma tikiluikan se texto tlen tejuan techyolchikaua (Is. 50:4). Pero miak ipati ma timochijchikauakan ma tikinpaleuikan tokniuan ijkuak tlajyouiaj (xiktlajtolti Proverbios 17:17).

19. ¿Ken techpaleuiskej toyolikniuan tla axkan kuali inmiuan timouikaj?

¹⁹ Axkan moneki ma timochijchikauakan kuali ma timouikakan iuan tokniuan. ¿Tleka? Akinmej techkokoliaj san tlakajkayauaskej uan san tlen amo kijtoskej uan ijkon kichiuaskej ayakmo ma timouikakan iuan tokniuan. Kichiuaskej miak tlamantli uan ijkon ayakmo ma tikinneltokilikan tokniuan tlen techiluiskej nion ma tikinpaleuikan. Pero amo uelis ijkon kichiuaskej. Amo keman uelis kichiuaskej ayakmo ma timouikakan uan ayakmo ma timotlasojtlakan. Amo san axkan timouikaskej iuan tokniuan, noijki inmiuan timouikaskej itech xochitlali.