Ayakmo miak poliui uan iTekiuajkayo toTajtsin Dios tlen kajki iluikak techualnauatis, nochtin tiyolpakiskej, nochtin tiyetoskej ika yolseuilistli uan techpaktis toteki. ToTajtsin Dios okitlali Jesucristo ma technauati. Ye amo kichiua ken tekiuajkej tlen axkan katej, ye kineki nochipa kuali ma tiyetokan. Ye kuali technauatis porque techtlasojtla, techiknomati uan kichiua tlen kuali (Isaías 11:4).

Tinochtin kuali timouikaskej maski tlatlamantli toaltepe, tiixchipajkej noso amo (Apocalipsis 7:9, 10). Tinochtin akinmej nikan tichantiskej tiktlasojtlaskej toTajtsin Dios uan tinochtin timotlasojtlaskej. San sekan titekipanoskej uan amo timokualaniskej, tikmaluiskej tlaltikpak ijkon ken yiuejkika okinekiaya toTajtsin Dios (Salmo 115:16).

Ijkuak toTajtsin Dios ualtlanauatis ika iTekiuajkayo, ye kichiuas ayakmo ma tlaxixini (Salmo 24:1, 2). Ijkuak Jesús okatka nikan tlaltikpak, okiteititi ichikaualis toTajtsin Dios ijkuak okichi ayakmo ma ejekakiaui (Marcos 4:39, 41). Ijkuak ye ualtlanauatis ayakmo tlaxixinis uan ijkon amikaj momojtis. Noijki iTekiuajkayo toTajtsin Dios kichiuas ma timouikakan iuan yolkamej uan noijki ayakmo ikaj kisokiotis tlaltikpak (Oseas 2:18).

Tinochtin kuali tiyetoskej. Amikaj mokokos, kokoxkatis nion amikaj ixpoliuis (Isaías 35:5, 6). Kanin tichantiskej kualtsin uan chipauak tlayetos, ijkon ken ijkuak okatkaj Adán uan Eva itech xochitlali Edén. Itech nochi tlaltikpak tlamochiuas uan tikpiaskej miak tlamantli tlen tikkuaskej (Génesis 2:9). Itech xochitlali techpanos tlen Jehová okinmilui israelitas, ‘titlakuaskej hasta tiixuiskej uan nochipa kuali tiyetoskej itech toaltepe’ (Levítico 26:4, 5).

Ijkuak ualtlanauatis iTekiuajkayo toTajtsin Dios nochtin tikpiaskej yolseuilistli, amikaj techchiuilis tlen amo kuali uan tinochtin timotlasojtlaskej. Ayakmo yetos guerras, amikaj techtlajyouiltis uan tinochtin tikpiaskej tlen moneki. Biblia kijtoua: “Yejuan motlaliskej itlampa uvas uan itlampa higos uan amikaj kinmomojtis” (Miqueas 4:3, 4).

Tinochtin tikpiaskej tokalijtik uan amikaj techkuilis uan tiyolpakiskej ika tlen tikchiuaskej. Akinmej tichantiskej itech xochitlali Biblia kijtoua ‘amo san nenka titekitiskej’ (Isaías 65:21-23).

Biblia kijtoua: “Tlaltikpak tentos ika itlamatilis Jehová” (Isaías 11:9). Tinochtin timomachtiskej iixtlamatilis Jehová uan nochi tlen ye okichijchi. Amo tikinchijchiuaskej teposmej para ika titetlajyouiltiskej. Tlen timomachtiskej techpaleuis para tinochtin ma tiyetokan ika yolseuilistli uan ma tikmaluikan tlaltikpak (Isaías 2:4; Salmo 37:11).

ToTajtsin Dios okitak ken kuali kiyektlalis tlaltikpak para nochipa itech ma tichantikan (Salmo 37:29; Isaías 45:18). Ik non, ye “sepa kitlajtlamis mikilistli” (Isaías 25:8). Biblia kijtoua “ayakmó yetos mikílistli, nion chokílistli, nion neyolkókoli” (Apocalipsis 21:4). ToTajtsin Dios kinkauilis akinmej kinyolitis (Juan 5:28, 29; Hechos 24:15) nochipa ma yetokan uan noijki akinmej kinmakixtis ijkuak kinmixpolos nochtin akinmej kichiuaj tlen amo kuali.

 Axkan sapanoua miakej moyektlalijtokej para yetoskej ijkuak ualtlanauatis iTekiuajkayo toTajtsin Dios. Maski tlajtlakolejkej mochijchikauaj para kichiuaskej ijkon ken toTajtsin Dios kineki. ¿Ken kichiuaj? Momachtiaj para kixmatiskej Jehová uan noijki Jesucristo (Juan 17:3).

Ayakmo miak poliui uan yitlamis nochi tlen amo kuali. Tla tejuatsin tikneki tikmatis tlen uelis tikchiuas para timomakixtis uan nochipa tiyoltos nikan tlaltikpak, xikilui se iTlaixpantijka Jehová ma mitsmachti ika amatlajkuilol Tiyoltos uan tiyolpakis.