Yotikitakej toTajtsin Dios kinpojpolos akinmej kichiuaj tlen amo kuali uan nochi tlen techtlajyouiltia. ¿Tikneltokaj melauak ijkon panos? Kema. Biblia ijkon kijtoua:

“Yin tlaltikpak san panos” (1 JUAN 2:17, [NHY]).

Tikmatij sekimej momakixtiskej porque non texto noijki kijtoua:

‘Akin kichiwa tlan Dios kineki, yolitos’

Tla tiknekij tiyoltoskej moneki tiktlakamatiskej toTajtsin Dios. Uan tla tiknekij ijkon tikchiuaskej, moneki achto tikixmatiskej.

Jesús okijto: “Nin kijtosneki yolilistli tlen amo keman tlamis, tla mitsixmatiskej te, akin melauak toTajtsin Dios” (Juan 17:3). Tla tiknekij timomakixtiskej ijkuak toTajtsin Dios kitlajtlamis tlen amo kuali, moneki tikixmatiskej. Amo san moneki tikneltokaskej kajki uan san tikmatiskej tlen kichiua. Moneki iuan timouikaskej. Tla tiknekij iuan ikaj timouikaskej, moneki timajxiliskej para iuan tiyetoskej. Ijkon panoua iuan toTajtsin Dios. Ma tikitakan seki tlamantli tlen kijtoua Biblia, tlen techpaleuis nochipa ma timouikakan iuan toTajtsin Dios.

Moneki mojmostla titlakuaskej tla tiknekij tiyoltoskej. Pero Jesús okijto: “N tlakatl amo san ika paj yolitok, yej noiwa ika nochi tlájtoli non Dios kijtoa” (Mateo 4:4).

Nochi tlen toTajtsin Dios kijtoua kajki itech Biblia. Ik non, ijkuak tejuan timomachtiaj, tikmatij tlen okichi yiuejkika, tlen kichijtok uan tlen kichiuas.

¿Tlen techpaleuis tla tiknekij tiktlakamatiskej toTajtsin Dios pero oui tikitaj ayakmo tikchiuaskej tlen ye amo kipaktia? Techpaleuis tla okachi tikixmatij toTajtsin Dios.

Ma tikitakan tlen okipanok se siuatl tlen tiktokayotiskej Sakura. Ye oauilnemiaya pero ijkuak opejki momachtia Biblia okitak toTajtsin Dios kijtoua: “Xikcholilikah n awilnemílistli” (1 Corintios 6:18). Sakura okilui toTajtsin Dios ma kipaleui, satepan okipatlak inemilis. Pero ok moneki mochijchikajtos para ayakmo auilnemis. Ye okijto: “Ijkuak nimokuayejyekoua niauilnemis, ika nochi noyolo nikiluia Jehová ma nechpaleui porque nikmati san ye uelis nechpaleuis ayakmo ijkon ma nimokuayejyeko. Ijkuak niktlatlaujtia Jehová okachi iuan nimouika”. Ijkon ken Sakura, miakej tlen kixmatij toTajtsin Dios kinpaleuia ma kipatlakan innemilis uan ma kichiuakan tlen ye kineki (Filipenses. 4:13).

Ijkuak okachi tikixmatiskej toTajtsin Dios, tiktlasojtlaskej uan okachi iuan timouikaskej (Gálatas 4:9; Salmo 25:14). Ijkon uelis timomakixtiskej uan kuali tiyetoskej ijkuak toTajtsin Dios ualtlanauatis. Pero ijkuakon ¿ken tlayetos? Itech okse tlamachtil non timomachtiskej.