Ijkuak nesi se konetl uan panoa kanaj se hora, itlaj miak ipati panoa. ¿Tleka? Tlen kichiuas inantsin kipaleuis kuali ma moskaltijti. *

¿Tleka siuamej sapanoa kinmaluiaj inkoneuan ijkuak nesij? Itech The Journal of Perinatal Education, se tlamachti itoka Jeannette Crenshaw, okijto ijkuak nesi se konetsintli, “momiaktilia se hormona itoka oxitocina uan nin kichiua siuamej ma kitlasojtlakan inkoneuan uan ma kinchichitikan”. Noijki momiaktilia okse hormona uan nin kichiua siuamej kuali ma mouikakan iuan inkoneuan. ¿Tleka nin miak ipati?

ToTajtsin Dios Jehová * okichi siuamej kuali ma mouikakan iuan inkoneuan. Tekiua David okitlasojkamatili toTajtsin Dios porque okichi ma nesi uan kuali okimalui inantsin. Uan okijto Jehová okimalui ijkuak yikin oneski. Okitlatlaujti: “Ijkuak onikatka ijtik nonantsin te yotikatka tinoDios” (Salmo 22:9, 10).

XIMOKUAYEJYEKO: Tla toTajtsin Dios otechchijchi kuali ma techmalui uan ma techtlasojtla tonantsin, ¿amo tikneltoka toTajtsin Dios totech motekipachoa porque tiikoneuan? (Hechos 17:29).

Jesucristo kuali kixmati akin otechchijchi uan okijto: “Omeh tototsitsinteh monamakah ika se tomi, pero nion se de yejwah weleti wetsi ixko tlali tla Totajtsi Dios amo kitekawilia. Noiwa Dios kuali kimatok kech tsónkali nonkipiah itech nomotsonteko. Yika, amo ximomojtikah, porke nomejwah okachi nomopatih ke miakeh tototsitsinteh (Mateo 10:29-31).

Miakej amo kitaj tlen kichiuaj totomej uan tlen mikij. Pero toTajtsin Dios nochtin totomej kinpatioita. Maski katej miakej totomej, tejuan okachi techpatioita toTajtsin Dios. Ik non, tikijtoaj totech motekipachoa. ¡Uan tejuatsin sapanoa mitstlasojtla!

 Biblia kijtoa:

• “Jehová nochi ueli kita, kinmita akinmej amo yolkualmej uan akinmej yolkualmej” (PROVERBIOS 15:3).

• “Jehová kinmita akinmej yolmelauakej uan kinkaki ijkuak kitlatlaujtiaj ma kinpaleui” (SALMO 34:15).

• “Melauak niyolpakis itech motlasojtlalis yolmelajki porque otikitak ken nitlajyouia; otikmatki tlen nechtekipachoa” (SALMO 31:7).

¿Techpaleuis tikmatiskej toTajtsin Dios totech motekipachoa uan techmaluia? Kema. Hannah, * tlen chanti Inglaterra, okijto:

“Miak uelta onimokuayejyeko toTajtsin Dios amo onechtlasojtlaya uan amo onechnankiliaya ijkuak oniktlatlaujtiaya porque amo itech onitlaneltokaya. Ne onikijtoaya san onechtlajyouiltiaya uan amo onechkakiaya porque amo itlaj nopati. Onikmachiliaya amo notech omotekipachoaya”.

Pero axkan Hannah kineltoka Jehová kitlasojtla uan itech motekipachoa. ¿Tlen okipaleui ma tlaneltoka? Ye okijto: “Yolik itech onitlaneltokak. Yiuejkika onikkak se tlapoualistli uan ompa okijtojkej tleka topatka omotemakak Jesús, sapanoa onechtlajtlachialti uan onikitak Jehová nechtlasojtla. Noijki onikitak onechtlasojtlaya ijkuak oniktlatlaujtiaya uan onechnankiliaya. Ik non, ualeua onichokaya. Opejki nimomachtia Biblia uan nochipa opejki nimonechikoa uan non onechpaleui ma nikixmati Jehová uan onikajsikamatki techtlasojtla. Axkan nikmati Jehová techtlasojtla, techpaleuia uan kineki techmaluis”.

¡Melauak kualtsin tlen okijto Hannah! Pero ¿ken tikmatis toTajtsin Dios kitekipachoa tlen tikmachilia uan noijki mitsajsikamati? Itech okse tlamachtil tikitaskej nin tlamantli.